Saka Lo Máksimo for di Bo Lesamentu di Beibel

1. Kon nos por sa ku e Skritura tabata importante pa Hesus?

BO A yega di pensa kon lo tabata pa skucha Hesus ora e tabata siña hende? Hopi biaha e tabata sita e Santu Skritura for di kabes! De echo, tantu su promé palabranan registrá despues ku el a batisá komo su último palabranan promé ku el a muri tabata for di e Skritura.b (Deu. 8:3; Sal. 31:5; Luk. 4:4; 23:46) Durante e tres aña i mei di su sirbishi aki riba tera, vários biaha el a lesa, sita i splika for di e Skritura.​—Mat. 5:17, 18, 21, 22, 27, 28; Luk. 4:16-20.

2. Kon bini Hesus tabata konosé e Skritura asina bon segun ku e tabata krese? (Wak e plachi riba portada.)

² Promé ku Hesus a kuminsá ku su sirbishi, e tabatin kustumber di lesa e Palabra di Dios i skucha otro hende ora nan tabata les’é i papia tokante dje. Na kas, sigur el a skucha Maria i Hose sita for di e Skritura den kòmbersashon di famia.c (Deu. 6:6, 7) Nos tin sigur ku tur sabat e tabata bai snoa ku su famia. (Luk. 4:16) Na snoa, e tabata skucha ku atenshon ora ku tabata lesa for di e Skritura. Ku tempu, e tabata lesa nan riba su mes. Tur e kosnan ei a pone ku Hesus no tabata djis sa loke e Skritura ta bisa, pero ku el a stim’é i a permitié form’é. Por ehèmpel, bo ta kòrda kiko a pasa kuné na e tèmpel ora e tabatin apénas 12 aña? E maestronan, ku tabata vèrsá den Lei di Moises, a “keda asombrá di e kontestanan ku e tabata duna i di kuantu kos e tabata komprondé.”​—Luk. 2:46, 47, 52.

3. Kiko nos lo trata den e artíkulo akí?

³ Ora nos lesa e Skritura regularmente, nos tambe por siña konosé i stima e Palabra di Dios. Pero, kon nos por saka lo máksimo, esta, tur e sous, for di nos lesamentu? Laga nos siña for di loke Hesus a bisa hende ku tabata konosé e Lei bon, manera e eskriba-, fariseo- i saduseonan. Aunke e lidernan religioso ei tabatin kustumber di lesa e Skritura, nan a lesa djis pa lesa. Hesus a resaltá tres kos ku nan mester a hasi pa saka benefisio for di nan lesamentu. Loke el a bisa nan tambe lo yuda nos (1) komprondé loke nos ta lesa, (2) haña tesoronan spiritual i (3) laga e Palabra di Dios forma nos.

KOMPRONDÉ LOKE BO TA LESA

4. Kiko Lukas 10:25-29 ta siña nos tokante lesamentu di Beibel?

⁴ Nos ke komprondé loke nos ta lesa den Beibel, sino nos lesamentu lo no benefisiá nos. Por ehèmpel, pensa riba e kòmbersashon ku Hesus tabatin ku “un hòmber vèrsá den Lei.” (Lesa Lukas 10:25-29.) E hòmber a puntra kiko e mester a hasi pa haña bida eterno. Pa yud’é haña e kontesta den e Palabra di Dios, Hesus a puntr’é: “Kiko tin pará skirbí den Lei? Kiko bo ta komprondé?” E hòmber a duna e kontesta korekto. El a sita e partinan ku ta papia tokante stima Dios i stima próhimo. (Lev. 19:18; Deu. 6:5) Pero, el a puntra despues: “Ma ken realmente ta mi próhimo?” Ku e pregunta ei e hòmber a laga mira ku e no a komprondé bon loke el a kaba di sita. Anto debí na esei, e no tabata sa kon pa apliká e skrituranan ei bon den su bida.

5. Kon orashon i lesa pokopoko ta yuda nos komprondé e mensahe di Beibel mihó?

⁵ Si nos desaroyá bon kustumber di lesa, nos lo komprondé e Palabra di Dios mihó. Tin vários kos ku kada un di nos tin ku hasi. Promé ku nos kuminsá lesa, hasi orashon. Pa komprondé Beibel, nos mester di Yehova su yudansa, p’esei nos ta pidié spiritu santu pa yuda nos konsentrá. Djei, nos ta kuminsá lesa, pero pokopoko. Kòrda, no tin purá. Asina ei nos lo komprondé loke nos ta lesa. Algu ku tambe por yuda nos ta pa lesa na bos haltu òf sigui e grabashon di lesamentu di Beibel. Esei lo yuda nos drenta den e relato i graba e informashon den nos mente i kurason. (Hos. 1:8) Ora nos kaba di lesa, hasi orashon atrobe pa yama Yehova danki pa su Palabra i pidié yuda nos apliká loke nos a lesa.

6. Dikon ta bon pa hasi nos mes pregunta i nota algu kòrtiku segun ku nos ta lesa Beibel? (Wak e plachi.)

⁶ Kiko mas lo yuda nos komprondé Beibel mihó? Esei ta di hasi nos mes pregunta tokante e relato. Por ehèmpel: ‘Tokante ken e relato ta bai? Ken ta papiando? Ku ken e ta papia, i dikon? Na unda i ki ora e relato akí ta tumando lugá?’ Tipo di preguntanan asina lo yuda nos pensa i konsentrá riba e ideanan prinsipal. Tambe, nos por nota algu kòrtiku. Esei lo yuda nos pone nos pensamentunan riba papel i lo yuda nos komprondé e relato mihó. Ademas, skirbimentu ta yuda nos kòrda loke nos a lesa. Kiko nos por skirbi? E preguntanan ku nos a hasi nos mes, loke nos a investigá, puntonan prinsipal, kon nos por usa loke nos a lesa òf djis kon nos a sinti ora nos a lesa e relato. Si nos hasi e kosnan ei ora nos ta lesa Beibel, nos lo sinti ku Yehova ta papiando ku nos personalmente.

7. Kiko Hesus a bisa ku nos mester tin ora nos ta lesa, i dikon? (Mateo 24:15)

⁷ Hesus a bisa ku nos mester tin disernimentu pa nos komprondé Beibel. (Lesa Mateo 24:15.) Pero kiko esei ta? Disernimentu ta e kapasidat di mira kon un idea ta konektá ku un otro i e diferensia ku tin entre nan. Pero tambe pa mira loke no ta asina bisto. Ademas, manera Hesus a bisa, disernimentu lo yuda nos mira ku sierto suseso ta kumpli ku profesia di Beibel. Nos mester tin disernimentu pa nos saka lo máksimo for di nos lesamentu Beibel.

8. Kon nos por lesa Beibel ku disernimentu?

⁸ Yehova ta duna su sirbidónan disernimentu. P’esei nos mester pidié yuda nos kultiv’é. (Pro. 2:6) Pero, nos tin ku hasi mas ku djis hasi orashon so. Nos tin ku analisá loke nos ta lesa i djei wak kon e ta konektá ku loke ya nos sa. Nos tin hopi hèrmènt ku por yuda nos hasi esei, manera Guia pa Buska Informashon den Publikashonnan di Testigunan di Yehova. Ku yudansa di e hèrmèntnan ei, nos lo por diserní importansia di un relato den Beibel i mira kon nos por aplik’é den nos bida. (Heb. 5:14) Ora nos lesa Beibel ku disernimentu, nos lo komprondé e tekstonan kada biaha mas mihó.

HAÑA TESORONAN SPIRITUAL

9. Ki bèrdat importante e saduseonan no a kapta?

⁹ Aunke e saduseonan tabata bon konosí ku e promé sinku bukinan di Skritura Hebreo, nan no a kapta e bèrdatnan importante den e bukinan ei. Por ehèmpel, wak kon Hesus a kontestá nan ora nan a puntr’é tokante resurekshon. El a puntra nan: “Boso no a lesa den e buki di Moises, den e relato tokante e mata di sumpiña, ku Dios a bis’é: ‘Ami ta Dios di Abraham, Dios di Isak i Dios di Yakòb’?” (Mar. 12:18, 26) Nos tin sigur ku e saduseonan a lesa esei vários biaha, pero e pregunta ku Hesus a hasi nan a saka na kla ku nan no a kapta e siñansa di resurekshon, kual ta un bèrdat importante den e Palabra di Dios.​—Mar. 12:27; Luk. 20:38.d

10. Na kiko nos ke ta atento ora nos ta lesa?

¹⁰ Kiko nos ta siña? Ora nos ta lesa Beibel, nos ke ta atento na tur loke un versíkulo òf un relato por siña nos. Nos no ke djis haña e lèsnan básiko, pero tambe e bèrdat- i prinsipionan ku ta skondí.

11. Kon 2 Timoteo 3:16 i 17 por yuda bo haña tesoronan den bo lesamentu di Beibel?

¹¹ Kon bo por haña tesoronan spiritual ora bo ta lesa Beibel? Wak loke 2 Timoteo 3:16 i 17 ta bisa. (Les’é.) E teksto ei ta bisa ku“henter e Skritura ta . . . probechoso” pa (1) siña, (2) reprendé, (3) korigí i (4) disipliná. Bo por saka e kuater puntonan ei asta for di e bukinan di Beibel ku bo no sa lesa hopi. Analisá e relato pa mira loke e ta siña bo tokante Yehova, su propósito i su prinsipionan. Purba di mira tambe kon e ta yuda reprendé. Por ehèmpel, wak kon e ta yuda bo identifiká i rechasá tendensia- òf aktitutnan robes i pa keda fiel na Yehova. Pensa kon e relato por korigí, òf rektifiká, un punto di bista robes, kisas algu ku un hende a bisa den sirbishi. Ki bo tin ku hasi pa un relato disipliná bo? Purba di mira kosnan manera Yehova ta mira nan. Si bo tene e kuater puntonan ei na mente, lo bo haña tesoronan spiritual ku lo yuda bo saka lo máksimo for di bo lesamentu di Beibel.

LAGA BO LESAMENTU FORMA BO

12. Dikon Hesus a puntra e fariseonan: “Boso no a lesa?”

¹² Na un okashon, e fariseonan a akusá Hesus su disipelnan di no a tene sabat. Pa yuda e fariseonan mira ku nan tabatin un punto di bista robes di e Skritura, Hesus a puntra nan: “Boso no a lesa?” (Mat. 12:1-7)e Hesus a menshoná dos ehèmpel for di e Skritura i a sita un versíkulo di Oséas pa mustra e fariseonan ku nan no a komprondé e propósito di e lei di sabat i no a mustra kompashon. Nan tabata lesa e Palabra di Dios, pero nan no a lag’é forma nan. Dikon nò? Pasobra nan tabata orguyoso i tabata les’é djis pa kritiká otro hende. Nan mal aktitut a stroba nan di komprondé loke nan tabata lesa.—Mat. 23:23; Huan 5:39, 40.

13. Ku ki aktitut nos tin ku lesa Beibel, i dikon?

¹³ E palabranan di Hesus ta siña nos ku nos tin ku lesa Beibel ku e aktitut korekto. Kontrali na e fariseonan, nos mester ta humilde i dispuesto pa siña. Nos mester “aseptá ku suavedat e palabra ku Dios ta planta den [nos].” (Sant. 1:21) Si nos hasi esei, nos lo permití e Palabra di Dios kambia e persona ku nos ta. Ora nos lesa Beibel, nos no mester ta orguyoso ni lesa pa haña teksto pa kritiká otro hende. Ta solamente ora nos evitá e sorto di aktitutnan ei, e lèsnan tokante miserikòrdia, kompashon i amor lo forma i kambia nos.

14. Kon nos por sa si nos ta laga Beibel forma nos? (Wak e plachi.)

¹⁴ E manera ku nos ta trata otro hende ta mustra si nos ta laga e Palabra di Dios forma nos. Komo ku e fariseonan a sera nan kurason pa e Palabra di Dios, nan tabata “kondená esnan ku no ta kulpabel.” (Mat. 12:7) P’esei, nos tin ku paga tinu kon nos ta trata otro hende i pensa tokante nan. Por ehèmpel, nos tin kustumber di papia e bon ku nos ta mira den otro hende, òf nos ta lihé pa papia riba nan fayonan? Nos ta dispuesto pa pordoná, òf nos gusta kritiká i keda tene hende na kurason? Nos kontesta lo proba si nos ta laga Beibel kambia nos pensamentu-, sintimentu- i akshonnan.​—1 Tim. 4:12, 15; Heb. 4:12.

LESAMENTU DI BEIBEL TA HIBA NA FELISIDAT

15. Kon Hesus a sinti tokante e Santu Skritura?

¹⁵ Hesus stima e Santu Skritura, i e palabranan na Salmo 40:8 a profetisá kon lo el a sinti tokante e Palabra di Dios. Nos ta lesa: “O mi Dios, hasimentu di bo boluntat ta duna mi goso, i bo lei ta den mi kurason.” Debí ku Hesus tabata stima e Skritura asina tantu, e tabata felis i a sigui sirbi Yehova. Meskos lo konta pa nos si nos hasi esfuerso pa lesa Beibel i stim’é.​—Sal. 1:1-3.

16. Kiko bo tin pensá di hasi pa saka tur e sous for di bo lesamentu di Beibel? (Wak e kuadro “Loke Hesus A Bisa Ta Yuda Bo Komprondé Loke Bo Ta Lesa.”)

¹⁶ Tur loke Hesus a bisa i hasi mester motivá nos pa mehorá nos lesamentu di Beibel. Pa nos komprondé mihó loke nos ta lesa, nos tin ku hasi orashon, lesa pokopoko, hasi nos mes pregunta i nota algu kòrtiku. Nos ta haña disernimentu ora nos ta analisá e relato i hasi investigashon den nos publikashonnan. Nos ta siña usa Beibel mihó, asta e partinan ku nos no ta lesa masha hopi, ora nos koba pa haña tesoronan spiritual. I pa laga e Palabra di Dios forma e persona ku nos ta, nos tin ku lesa Beibel ku e aktitut korekto. Si nos hasi tur esei, nos lo saka tur e sous for di nos lesamentu di Beibel i nos lo hala mas serka di Yehova.​—Sal. 119:17, 18; Sant. 4:8.