Abo A Siña Keda Kontentu ku Loke Bo Tin?

1. Kiko ke men keda satisfecho ku loke bo tin, i kiko e no ke men?

ABO ta kontentu ku loke bo tin? Un ruman ku ta kontentu, òf satisfecho, ku loke e tin, ta apresiá e bendishonnan ku e ta haña di Yehova. P’esei, e tin goso i pas. E no ta kunsumí pasobra e no tin sierto kos. Pero, djis pasobra e ta kontentu ku loke e tin no ke men ku e no ta wòri su kabes ku nada. Beibel mes ta animá nos pa hasi mas pa Yehova. (Rom. 12:1; 1 Tim. 3:1) Pero, un ruman ku ta satisfecho ku loke e tin lo no pèrdè su goso ora e no haña e asignashon ku e tabatin gana di haña.

2. Kiko ta pasa si nos no ta satisfecho ku loke nos tin?

² Si un ruman no ta satisfecho ku loke e tin, e por kuminsá tuma mal desishon. Por ehèmpel, algun ruman a kuminsá traha hopi overtaim djis pa kumpra kos ku no ta ni nesesario. Lamentablemente, tin ruman a asta hòrta sèn òf otro kos. Podisé nan a pensa: ‘Ya, mi mester di dje,’ ‘Mi no ta bai warda mas; mi ke e kos awor,’ òf, ‘Mi ta pone e sèn bèk.’ Sinembargo, Yehova no ta aprobá niun forma di hòrtamentu, pasobra esei ta daña Su nòmber. (Pro. 30:9) Di otro banda, tin ruman a keda asina desepshoná ku nan no a haña sierto asignashon ku nan a stòp di sirbi Yehova. (Gal. 6:9) Kiko lo pone ku un ruman lo hasi algu asina? Kisas pokopoko el a stòp di keda satisfecho ku loke e tin.

3. Kiko nos por siña for di Filipensenan 4:11 i 12?

³ Sin importá nos situashon den bida, nos tur por siña keda satisfecho ku loke nos tin. Apòstel Pablo mes a siña esei. El a skirbi: “Mi a siña pa, den ki sirkunstansia ku mi ta, keda satisfecho ku loke mi tin.” (Lesa Filipensenan 4:​11, 12.) Ora el a skirbi esei, e mes tabata prezu. Apesar di esei, e no a pèrdè su goso, pasobra el a “siña e sekreto” di keda satisfecho den su situashon. Loke Pablo a bisa i pasa aden ta mustra ku nos tambe por keda satisfecho. Pero, nos no mester ferwagt ku ta fásil pa nos keda satisfecho ku nos situashon den bida. Nos mester siña kon pa hasi esei. Ta esei mes nos ta bai trata den e artíkulo akí.

BIRA UN HENDE MAS GRADISIDU

4. Si nos ta gradisidu, kon esei lo yuda nos keda kontentu ku loke nos tin? (1 Tesalonisensenan 5:18)

⁴ Yehova sa kon importante ta pa nos ta gradisidu. (Lesa 1 Tesalonisensenan 5:18.) Gratitut ta hasi posibel ku nos ta keda kontentu ku loke nos tin. Por ehèmpel, si di kurason nos ta gradisidu ku nos tin e kosnan básiko den bida, nos lo no keda wòri tokante e kosnan ku nos tin gana di tin. Si nos ta gradisidu pa e trabou ku nos ta hasiendo aworakí pa Yehova, nos lo hasi nos bèst den dje i no bira opseshoná pa haña un asignashon nobo. No ta por nada anto Beibel ta animá nos pa yama Yehova danki ora nos ta hasi orashon. Pasobra ora nos ta gradisidu, nos lo sinti “e pas di Dios ku ta surpasá tur komprondementu.”—Flp. 4:​6, 7.

5. E israelitanan tabatin motibu pa keha? Splika. (Wak e plachi.)

⁵ Ban wak loke pasa ku e israelitanan. Nan tabata blo keha ku nan no tabatin e kumindanan ku nan a kustumbrá di tin na Egipto. (Num. 11:​4-6) Aunke bida den desierto no tabata fásil, kiko lo a yuda nan keda satisfecho ku loke nan tin? Algu ku lo por a yuda nan keda kontentu ku loke nan tin ta di pensa riba tur e kosnan ku ya Yehova a hasi pa nan. Por ehèmpel, ora nan tabata ser maltratá komo katibu na Egipto, Yehova a trese dies plaga riba e egipsionan i libra nan. Despues, Yehova a laga e israelitanan “pluma e egipsionan.” Nan a haña hopi kos di plata, di oro i paña for di e egipsionan. (Éks. 12:​35, 36) Anto ora e ehérsito di Egipto a persiguí e israelitanan te na Laman Kòrá, Yehova a habri e laman pa nan por a skapa. Anto segun ku nan tabata krusa desierto, Yehova a sòru pa tur dia nan tabatin mana pa kome. Ta hopi kos Yehova a hasi pa nan. Pero dikon nan tabata keha anto? E kos ta ku, maske Yehova a duna nan sufisiente kuminda, tòg nan no tabata gradisidu pa loke nan tabatin.

6. Kiko por yuda bo bira gradisidu?

⁶ Wak algun kos ku por yuda bo bira gradisidu. Di promé, traha tempu pa tur dia bo pensa riba e kosnan ku ta hasi bo felis, i kisas skirbi algun di nan. (Lam. 3:​22, 23) Di dos, demostrá gratitut. Por ehèmpel, gradisí hende ora nan hasi algu pa bo. Anto e persona mas importante ku bo tin ku gradisí tur dia ta Yehova. (Sal. 75:1) Di tres, sòru pa bo amigunan ta hende gradisidu. Si nan ta gradisidu, bo tambe lo ta gradisidu. Pero si nan ta malagradesí òf gusta keha, bo tambe lo bira meskos. (Deu. 1:​26-28; 2 Tim. 3:​1, 2, 5) Mas bezig bo ta buskando oportunidat pa demostrá gratitut, ménos tempu bo tin pa preokupá tokante bo problemanan i e kosnan ku bo no tin.

7. Kiko ta e kosnan ku Achi a hasi pa bira gradisidu?

⁷ Wak loke a pasa ku Achi, un ruman di Indonesia. El a bisa: “Durante pandemia di COVID-19, mi a kuminsá kompará mi situashon ku esnan di e rumannan den mi kongregashon. Anto esei a pone ku mi no tabata kontentu mas ku mi situashon.” (Gal. 6:4) Kiko a yud’é? Achi a bisa: “Mi a kuminsá pensa riba tur e kosnan ku Yehova tabata duna mi tur dia. Ademas, mi a pensa riba tur e kosnan bon ku mi tin pasobra mi ta parti di Yehova su organisashon. Djei m’a yama Yehova danki pa tur e kosnan ei. Anto esei a yuda mi pa keda kontentu ku mi situashon.” Si bo ta lucha ku sintimentunan manera Achi, purba di hasi e kosnan ku a yud’é.

SIGUI FOCUS I SEA HUMILDE

8. Kiko a pasa ku Baruk?

⁸ Baruk tabata sekretario di Profeta Yeremías. E mester a yuda Yeremías bisa e israelitanan malagradesí kiko lo a bai pasa ku nan pa nan mal komportashon. Esei no tabata fásil. Pero dado momento, Baruk a stòp di focus riba loke Yehova tabata ke p’e hasi. Na lugá di esei, el a kuminsá pensa muchu hopi riba su mes i riba loke é tabata ke hasi. Via Yeremías, Yehova a bisa Baruk: “Bo ta buskando kos grandi pa bo mes. Stòp di buska e kosnan ei.” (Yer. 45:​3-5) Ku otro palabra, Yehova a bis’é: “Keda kontentu ku bo situashon aktual.” Baruk a hasi kaso di e korekshon, i a sigui ku su bon amistat ku Yehova.

9. Kiko 1 Korintionan 4:6 i 7 ta siña nos? (Wak e plachinan.)

⁹ Tin biaha, un ruman ku tin hopi abilidat, ku ta traha duru i tin hopi aña den e bèrdat por pensa ku e meresé di haña un sierto asignashon. Pero podisé un otro ruman ta haña nèt e asignashon ku e tabata ke. Kiko por yud’é pa no bira desapuntá? Lo e por meditá riba loke Apòstel Pablo a bisa na 1 Korintionan 4:6 i 7. (Les’é.) Tur asignashon i tur abilidat ku nos tin ta bini di Yehova. Yehova no a duna nos nan pasobra nos meresé nan, sino mas bien pasobra e stima nos i ta bondadoso.—Rom. 12:​3, 6; Efe. 2:​8, 9.

10. Kon nos por bira humilde?

¹⁰ Hesus a pone un bon ehèmpel di humildat pa nos. Por ehèmpel, pensa riba loke a pasa e anochi ku el a laba pia di su apòstelnan. E por a pensa ku ta su apòstelnan mester a laba su pia. Wak dikon. Apòstel Huan a skirbi ku Hesus tabata sa “ku [1] e Tata a entregá tur kos den su man i ku [2] el a bini di Dios i ku [3] e tabata bai serka Dios.” Sabiendo tur esei, Hesus a “laba pia di su disipelnan.” (Huan 13:​3-5) Durante Hesus su bida riba tera, nunka e no a sinti ku, komo e ta Yu di Dios, e mester biba den un bon kas, tin hopi sèn i un bida fásil. (Lúk. 9:58) Hesus tabata humilde; el a keda kontentu ku loke e tin. Di bèrdat e ta un ehèmpel perfekto pa nos.—Huan 13:15.

11. Kiko a yuda Dennis keda kontentu ku e asignashonnan ku e tin?

¹¹ Dennis, un ruman na Hulanda, ta purba di imitá Hesus su ehèmpel di humildat, pero el a ripará ku esei no ta fásil. El a bisa: “Tin biaha ora mi mira ku otro ruman ta haña un asignashon ku ami tabata ke, mi ta ripará ku algu robes ta sosodiendo den mi kurason. Ora mi kuminsá sinti asina, mi ta bai studia humildat. Den mi JW Library^® app, mi a tag sierto teksto ku ta papia tokante humildat ya asina mi por haña nan mesora pa lesa. Ademas, mi a download algun diskurso tokante humildat riba mi telefòn, i kada bes mi ta skucha nan.a Esei a yuda mi mira ku tur loke mi ta hasi pa Yehova mester trese alabansa p’e i no pa ami. Ademas, e trabou ta di Yehova i é ta duna nos e privilegio di hasi algu.” Pues, si bo kuminsá sinti ku bo no ta kontentu ku bo asignashon, traha riba humildat. Esei lo hasi bo amistat ku Yehova mas fuerte i lo yuda bo keda kontentu ku e privilegionan ku bo tin.—Sant. 4:​6, 8.

MEDITÁ RIBA NOS SPERANSA

12. Kiko mas por yuda nos keda kontentu ku nos situashon den bida? (Isaías 65:​21-25)

¹² Via Profeta Isaías, Yehova mes ta bisa ku bida lo ta hopi duru aworakí. Pero e ta primintí nos ku den futuro lo e kita tur difikultat. P’esei, algu ku por yuda nos keda kontentu ku nos situashon den bida ta di meditá riba loke Yehova a primintí. (Lesa Isaías 65:​21-25.) Por ehèmpel, kada un di nos lo biba den kas bunita. Nos lo tin trabou ku ta duna nos satisfakshon, i nos lo kome kuminda ku ta dushi i saludabel. Ademas, nos i nos yunan lo ta safe. (Isa. 32:​17, 18; Eze. 34:25) Nos por tin sigur ku Yehova lo kumpli ku tur e bunita promesanan ei.

13. Kiko ta algun di e difikultatnan ku nos tin aworakí, i kon nos speransa pa futuro por yuda nos?

¹³ Komo ku nos ta biba den “e último dianan,” i nos tur tin problema ku ta “difísil pa trata kuné,” ta importante pa nos meditá riba nos speransa pa futuro. (2 Tim. 3:1) Tur dia Yehova ta yuda nos ku e konseho, forsa i yudansa ku nos tin mester. (Sal. 145:14) Pero loke tambe ta yuda nos ta nos speransa pa futuro. Por ehèmpel, kisas aworakí bo ta traha hopi duru, pero sèn no ta yega pa pèrkurá pa abo i bo famia. Ma, esei no ta bai keda asina pa semper. Yehova ta primintí ku den Paradeis, lo e duna bo loke bo tin mester, i muchu mas. (Sal. 9:18; 72:​12-14) Òf kisas bo ta biba ku doló, depreshon òf ku un malesa grave. Wèl, lo bo no bai sufri pa semper pasobra den Dios su mundu nobo lo no tin malesa ni morto mas. (Rev. 21:​3, 4) Pues, nos speransa ta yuda nos keda satisfecho ku nos situashon. I e ta yuda nos pa nos no rabia ni bira amargá. Mas bien, nos por keda ku nos goso i trankilidat asta ora nos ta trata ku inhustisia, morto òf ku kualke otro kos malu den bida. Kon esei ta posibel? Pasobra nos sa ku maske kon difísil nos problemanan ta, nan ta “pa un tempu kòrtiku.” I nos sa tambe ku pronto, den e mundu nobo, nos lo no sufri nunka mas.—2 Kor. 4:​17, 18.

14. Kon nos por tene nos speransa bibu?

¹⁴ Manera nos a komprondé, pa nos keda kontentu ku loke nos tin, nos tin ku kòrda riba nos speransa, sí nos mester ten’é bibu. Kon nos por hasi esei? Esei ta ora nos ta imaginá nos mes den Paradeis kaba. Por ehèmpel, suponé ku bo preokupashon ta ku sèn no ta yega. Hasi esaki: Sera bo wowo, i wak rònt den Paradeis; no tin sèn, niun hende tin debe i niun hende ta pober. Òf suponé ku bo ta preokupá pasobra bo no a haña un sierto asignashon den kongregashon. Hasi esaki: Sera bo wowo, i wak kon bo bida den Paradeis lo ta. Ora bo ta perfekto i tin míles di aña ta sirbi Yehova, lo bo no preokupá tokante asignashon. (1 Tim. 6:19) Kisas debí ku nos tin muchu kos na nos kabes, ta difísil pa nos meditá riba nos promesanan pa futuro. Pero, mas nos purba hasié, mas fásil lo e bira.

15. Kiko abo a siña di Christa?

¹⁵ Laga nos wak kon speransa a yuda Christa, esposa di Dennis, kende nos a menshoná na paragraf 11. Christa a bisa: “Mi tin un malesa ku ta hasi mi spirnan slap. Mi no por kana i mi ta usa ròlstul i gran parti di dia mi ta pasa riba kama. Mi ta biba ku doló. Poko dia ei, mi dòkter a bisa mi ku kosnan no ta pinta masha bon. Ora el a bisa mi esei, mi a pensa mesora: ‘E manera ku é ta mira futuro no ta manera ami ta mir’é.’ Komo ku mi speransa ta bibu den mi mente, mi tin pas. Den e mundu akí, mi tin ku lucha ku hopi problema, pero den e mundu nobo lo mi gosa bai gol!”

‘HENDE KU TIN RÈSPÈT PROFUNDO PA YEHOVA NO TIN FALTA DI NADA’

16. Dikon David por a bisa ku hende ku tin rèspèt profundo pa Yehova “no tin falta di nada”?

¹⁶ Asta ora nos ta kontentu ku loke nos tin, nos por haña nos ku problema. Pensa riba David. Por lo ménos tres di su yunan a muri. El a ser akusá di kos ku e no a hasi, nan a traishon’é i pa vários aña un rei tabata busk’é pa mata. Apesar di tur e difikultatnan ei, e por a bisa tokante Yehova: ‘Hende ku tin rèspèt profundo pa Yehova no tin falta di nada.’ (Sal. 34:​9, 10) Dikon e por a bisa esei? Pasobra e tabata konvensí ku apesar ku su bida no tabata sin problema, Yehova semper a dun’é loke e tabatin mester. (Sal. 145:16) Anto meskos ku David, nos por ta sigur ku Yehova lo yuda nos keda fiel durante tur nos pruebanan. Sí, nos por tin pas i goso apesar di nos sirkunstansianan.

17. Dikon bo ke hasi bo bèst pa ta kontentu ku bo situashon?

¹⁷ Yehova ke pa bo tin goso i pas den bo bida, sí, pa bo ta satisfecho. (Sal. 131:​1, 2) Pues, sigui hasi bo bèst pa ta kontentu ku bo situashon. Sigui hasi esfuerso pa ta gradisidu. Keda focus riba loke Yehova ke i sea humilde. Anto trata di tene bo speransa bibu. Si bo sigui hasi e kosnan ei, lo bo por bisa: “Sí, mi ta satisfecho.”—Sal. 16:​5, 6.