Te Ainda e Bèrdatnan Básiko Por Yuda Bo

1. Kiko a pasa ora ku bo a siña e siñansanan básiko di Beibel pa promé biaha?

ORA bo a haña sa ku Dios su nòmber ta Yehova, esei a pone ku bo por a kuminsá bira su amigu. (Isa. 42:8) Anto ora bo a haña sa kiko ta pasa ku hende ora nan muri, bo a keda mas trankil pasobra bo sa bo sernan kerí no ta sufri. (Ekl. 9:10) I ora bo a haña sa ku Dios a primintí di hasi tera un paradeis, esei a kita tur preokupashon i duda tokante futuro. Awor bo sa sigur ku bo bida no ta limitá na 70 òf 80 aña so. Mas bien bo sa ku lo bo por biba pa semper. Ta bisto ku e siñansanan básiko ei di Beibel a kambia bo bida por kompleto.—Sal. 37:29; 90:10.

2. Kon 2 Pedro 1:12 i 13 ta mustra ku asta rumannan ku tin hopi tempu den bèrdat por benefisiá di e siñansanan básiko den Beibel?

² E di dos karta ku Pedro a skirbi tabata pa kristiannan ku ya tabatin hopi tempu den e bèrdat. Sí, nan tabata “bon establesí den e bèrdat.” (Lesa 2 Pedro 1:​12, 13.) Pero awor, nan lo a haña nan ku algun peliger den e kongregashon ku por a afektá nan fe. Entre otro, nan mester a trata ku hende malbado ku kier a desviá nan for di e bèrdat. (2 Ped. 2:​1-3) Pedro a skirbi e kongregashon pasobra e kier a fortalesé nan fe pa nan por a resistí e peligernan ei. P’esei el a kòrda nan riba algun bèrdatnan ku ya nan tabata sa kaba. E bèrdatnan ei lo a yuda nan keda fiel te na final. Esaki ta mustra nos ku nunka nos ke pèrdè e balor di e siñansanan básiko ku tin den Beibel.

3. Dikon nos tur mester sigui siña lèsnan nobo for di e siñansanan básiko den Beibel? Splika.

³ Aunke nos tin hopi tempu den e bèrdat, tòg nos por siña lèsnan nobo for di e siñansanan básiko di Beibel. Por ehèmpel, ban bisa ku nos ta duna un kòki nobo i un kòki ku eksperensia e mesun ingredientenan pa kushiná kuné. Sigur e kòki nobo por kushiná algun plato ku loke e tin. Pero e kòki ku tin eksperensia lo por kushiná un variedat mas amplio di plato ku e mesun ingredientenan. Kisas lo e por asta kushiná platonan ku e kòki nobo no a ni pensa riba dje. Asina tambe, un studiante nobo i un ruman ku tin hopi tempu den bèrdat tin akseso na e mesun siñansanan básiko den Beibel. Pero, e diferensia ta loke nan por hasi ku e siñansanan ei. Muy probablemente, nos situashon no ta meskos ku dia nos a batisá. Kisas awor nos asignashon òf loke nos por hasi pa Yehova ta otro. Pues, si nos tuma e mesun siñansanan ku nos a siña ántes i apliká nan na nos situashon aktual, chèns ta grandi ku nos lo saka lèsnan nobo ku lo yuda nos awor. Maske nos tin hopi tempu den bèrdat, ban wak kiko nos por siña for di tres siñansa básiko.

YEHOVA TA E KREADOR

4. Ora bo a siña ku Yehova ta e Kreador, ki impakto esei tabatin riba bo?

⁴ Nos sa ku nos planeta i tur kos riba dje a wòrdu kreá dor di un persona hopi inteligente i poderoso. Hebreonan 3:4 ta bisa: “Esun ku a traha tur kos ta Dios.” Pero tin mas kos ku nos por siña for di e siñansa básiko ei. Por ehèmpel, komo ku Yehova a traha nos, nos sa ku e konosé nos bon bon. Ademas, e stima nos i sa kiko ta mihó pa nos. E simpel echo ku nos a siña ku Yehova ta e Kreador a kambia nos bida por kompleto. Sí, esei a duna nos berdadero propósito den bida.

5. Kiko por yuda nos pa nos ta humilde? (Isaías 45:​9-12)

⁵ E siñansa básiko di ku Yehova ta e Kreador ta siña nos un lès masha importante. Nos mester ta humilde. Por ehèmpel, na un sierto momento den Yòb su bida, el a kuminsá enfoká demasiado riba su mes i a pèrdè for di bista kiko realmente tabata mas importante. Pero Yehova a kòrda Yòb ku ta E ta e Kreador. (Yòb 38:​1-4) E bèrdat básiko ei a yuda Yòb korigí su manera di pensa i mira ku tur loke Yehova ta hasi ta bon. Profeta Isaías a splika ku nos no por pensa ku nos sa mas ku nos Kreador ora el a skirbi: “Akaso klei por bisa e Persona ku ta form’é: ‘Kiko bo ta trahando?’”—Lesa Isaías 45:​9-12.

6. Ki ora foral nos tin ku kòrda kon sabí i poderoso Yehova ta? (Wak e plachi.)

⁶ Ora nos tin hopi tempu den bèrdat, nos tur ta kore e peliger di stèns mas riba nos opinion na lugá di hasi kaso di Yehova i Su Palabra. (Yòb 37:​23, 24) Algu ku por yuda nos ta di ègt para pensa kon sabí i poderoso Yehova nos Kreador ta. (Isa. 40:22; 55:​8, 9) E bèrdat ei lo yuda nos kòrda ku Yehova semper sa mihó i ku nos mester ta humilde.

7. Ki a yuda Rahela aseptá kambio?

⁷ Rahela, kende ta biba na Slovenia, a konta ku kòrdando ku Yehova ta e Kreador a yud’é aseptá un kambio ku a tuma lugá den e organisashon. El a atmití: “No ta tur biaha ta fásil pa mi aseptá e desishonnan òf kambionan den e organisashon. Por ehèmpel, m’a wak e Informe #8 di Kuerpo Gobernante pa Aña 2023, pero ora m’a mira un ruman subi duna diskurso ku barba m’a her’i kai flo.” Pues e kos tabata duru ainda pa Rahela. Pero wak kiko el a hasi. El a bisa: “M’a pidi Yehova yuda mi.” Manera Rahela a kòrda ku Yehova ta e Kreador, el a realisá ku Yehova semper sa ki ta e mihó manera pa dirigí su organisashon. Pues si kualke un di nos ta haña ku ta duru pa aseptá kualke kambio ku e organisashon bin kuné, lo ta bon pa nos tuma tempu pa pensa kon sabí i poderoso nos Kreador ta.—Rom. 11:​33-36.

DIKON YEHOVA TA PERMITÍ SUFRIMENTU

8. Kon e bèrdat tokante dikon Dios ta permití sufrimentu a yuda bo?

⁸ Hopi hende awe ta pensa ku Dios ta kousa sufrimentu. Debí na esei nan tin rabia riba Dios òf ta pensa ku e no ta eksistí mes. (Pro. 19:3) Pero for di nos estudio di Beibel nos a siña ku Yehova no tin nada di haber ku sufrimentu. Hende ta sufri debí na piká ku nos a heredá i imperfekshon. Nos a siña tambe ku e motibu ku Yehova no a kaba ku sufrimentu ainda ta pasobra e tin pasenshi. Pasenshi pakiko? Pa asina hende por haña sa ken e ta i kon e ta bai kaba ku sufrimentu unabes i pa semper. (2 Ped. 3:​9, 15) Bo ta kòrda kon bo sinti ora bo a siña e bèrdatnan akí? Nan no a yuda bo hala mas serka Yehova?

9. Foral durante ki momentonan nos ke kòrda pakiko Yehova ta permití sufrimentu?

⁹ Nos tur sa ku nos mester tin pasenshi i warda pa Yehova kaba ku sufrimentu. Pero ora ku ta nos òf un di nos sernan kerí ta pasa den un situashon duru kisas nos por puntra: ‘Yehova, dikon bo ta tarda asina tantu? Mi n’ por mas.’ (Hab. 1:​2, 3) Foral na momentonan asina e mihó kos ku nos por hasi ta kòrda riba e motibu pakiko Yehova ta permití hende hustu sufri.a (Sal. 34:19) Algu mas ku nos ke meditá riba dje ta tur e kosnan ku Yehova ya a hasi pa sigurá nos ku lo e bai kaba ku sufrimentu unabes i pa semper.

10. Kon Anne por a dil ku morto di su mama?

¹⁰ Ban wak kon e bèrdat tokante sufrimentu a yuda un ruman. Anne, kende ta biba na Mayotte, a bisa: “Un par di aña pasá m’a pèrdè mi mama, e kos ei a kibrá mi. Pero tur ora mi ta keda kòrda mi mes ku Yehova no tin nada di haber ku nos sufrimentu. E ke i ta bai kita tur sufrimentu i ta bai resusitá nos sernan kerí. Kada biaha ku mi kòrda riba e bèrdatnan ei mi ta haña un pas i trankilidat ku mi mes no por splika.”

11. Dikon te ainda Yehova ta permití sufrimentu, i kon esei ta motivá nos pa sigui prediká?

¹¹ Nos sa pakiko Yehova ta permití sufrimentu. E bèrdat ei mester motivá nos pa hasi algu. Kiko? Na 2 Pedro 3:​11, Pedro a bisa: “Pensa riba ki sorto di hende boso mester ta. Boso mester ta hende di kondukta santu i mester hasi obranan ku ta demostrá deboshon na Dios.” Un di e “obranan ku ta demostrá deboshon na Dios” ta nos trabou di prediká. Yehova stima hende, inkluso esnan den bo teritorio, e ke pa nan haña oportunidat pa ador’é. Komo ku nos ta sinti meskos ku Yehova, nos ke pa hende biba den Dios su mundu nobo. P’esei pa nos ta un privilegio grandi pa traha huntu ku Dios pa yuda hende konos’é promé ku e fin yega!—1 Kor. 3:9.

NOS TA BIBANDO DEN “E ÚLTIMO DIANAN”

12. Ku kiko e profesia na 2 Timoteo 3:​1-5 ta yuda nos?

¹² Beibel ta duna nos un splikashon detayá di kon hende lo bira durante “e último dianan.” (2 Tim. 3:​1-5) Nos no tin ku wak muchu leu pa mira ku komportashon di hende ta bai di malu pa pió. Segun nos ta mira e profesia akí kumpli nos ta bira mas konvensí ku nos por konfia loke tin den Beibel.—2 Tim. 3:​13-15.

13. Kon e ilustrashon na Lúkas 12:​15-21 por yuda nos?

¹³ Ora nos a siña ku nos ta bibando den e último dianan esei a motivá nos pa usa nos tempu na e mihó manera. Ta esei Hesus kier a siña ku e ilustrashon na Lúkas 12:​15-21. (Les’é.) Dikon e hòmber den e ilustrashon tabata “irasonabel”? Su problema no tabata su rikesa, ma ku e no a usa e tempu ku e tabatin bon. E no tabata sa ku e anochi ei “nan [lo a] eksigí [su] alma.” Na lugá di bira “riku den bista di Dios” el a gasta su tempu pa montoná “tesoro pa su mes.” Den nos kaso nos sí sa ku e fin ta serka. P’esei ta na su lugá pa nos puntra nos mes: ‘Mi metanan den bida ta mustra ku mi ta usa mi tempu na e mihó manera? Ki mi ta animá mi yunan hasi ku nan bida? Kon mi ta usa mi tempu, energia i medionan di entrada? Mi ta usa nan pa montoná tesoro pa mi mes òf pa montoná tesoro den shelu?’

14. Kon Miki su eksperensia ta yuda nos mira ku ta importante pa kòrda ku nos ta biba den e último dianan?

¹⁴ Henter nos perspektiva di bida por kambia ora nos rekonosé ku nos ta bibando den e último dianan. Ta esei ta loke a pasa ku un ruman ku yama Miki. El a konta: “Mi gusta bestia, p’esei ora m’a kaba skol sekundario mi tabatin hopi gana di studia dierkunde. Pero mi tabata ke traha pionero tambe i sirbi kaminda tabatin mester di mas yudansa. Un par di ruman den mi kongregashon a animá mi pa pensa si ègt lo mi por dediká mesun tempu i pashon den e trabou ku mi tin gana di hasi i pionero pareu. Nan a kòrda mi ku den mundu nobo mi tin tur tempu pa studia kuantu bestia ku mi ke, i ku e fin ta serka. Ku esei na mente m’a skohe un kurso ku lo no a eksigí mesun tantu tempu fo’i mi. M’a haña un trabou ku a yuda mi bira pionero i despues mi por a yuda na Ecuador kaminda tabatin mas nesesidat.” Awor Miki i su esposo ta den e trabou di sirkuito na Ecuador.

15. Hende su interes pa e bon notisia por kambia? Duna un ehèmpel. (Wak e plachi.)

¹⁵ Nos sa ku e fin ta serka, pues e trabou di prediká ta urgente. Pero sa pasa ku nos ta haña hende ku no ta interesá. Nos no mester laga esei desanimá nos pasobra hende por kambia. Ta esei a pasa ku Santiago, Hesus su ruman parti mama. Santiago tabata den e mesun kas ku esun ku a bira Mesías i ku a bira e mihó Maestro na mundu. Apesar di tur esei, Santiago no a bira disipel di Hesus. Ta te ora Hesus a resusitá, Santiago a bira un disipel i a duna tur di dje pa e Reino!b (Huan 7:5; Gal. 2:9) P’esei no pensa ku no ta bale la pena pa sigui purba ku bo famia ku no a mustra interes ni esnan ku a bisa ku nan no ta interesá. Bo no sa nunka, den futuro òf kisas asta despues ku tribulashon grandi kuminsá, nan por kòrda riba loke b’a bisa nan i hasi kaso.c

KEDA APRESIÁ E SIÑANSANAN BÁSIKO DEN BEIBEL

16. Kon e bèrdatnan básiko a yuda abo? (Wak e kuadro “Usa Bèrdatnan Básiko pa Yuda Hende.”)

¹⁶ Ta bèrdat ku algun kos ku nos organisashon ta saka ta pa hende ku no sa kasi nada di Beibel. Por ehèmpel, nos diskursonan públiko, algun artíkulo i vidio riba jw.org i nos revistanan pa públiko ta pa hende ku no ta Testigu. Pero e siñansanan básiko ku tin den nan ta bon pa nos tambe. Nan ta oumentá nos amor pa Yehova i ta fortalesé nos fe den su Palabra. Ademas, nos ta siña kon pa splika e bèrdatnan básiko akí mihó na otro hende.—Sal. 19:​7, di dos nota.

17. Den ki situashonnan bo tin ku kòrda riba e bèrdatnan básiko?

¹⁷ Si nos tin hopi tempu den e bèrdat nos ta bira masha kontentu ora tin lus nobo. Pero nos tin hopi apresio tambe pa e bèrdatnan básiko ku a hala nos na e bèrdat. Manera nos a siña, te ainda e bèrdatnan básiko ei por yuda nos. Por ehèmpel, si nos ripará ku nos tin problema pa sigui sierto guia ku ta bin di Yehova su organisashon, nos ke ta humilde i kòrda ku Yehova ta e Kreador i ku te ta na kabes di su organisashon. Ora nos òf un ser kerí ta pasa den un situashon difísil, nos ke tene pasenshi i kòrda dikon Yehova ta permití sufrimentu. Anto ora nos ta disidí kon nos ta bai usa nos tempu i medionan di entrada nos ke kòrda ku nos ta bibando den e último dianan. Pues laga e bèrdatnan básiko ku Yehova a siña nos sigui fortalesé nos, motivá nos i hasi nos mas sabí.