Yehova Lo Hasi Nos “Masha Felis”

1-2. (a) Kon hopi hende ta sinti nan awe? (b) Kiko nos lo trata den e artíkulo akí?

HENDE awe ta purba di hasi delaster un kos pa nan sinti nan felis. Pero apesar di tur e kosnan ei, tòg nan no ta felis. Pa ser sinsero, hopi di nan ta sinti nan bashí i tristu. Komo sirbidónan di Yehova, algun di nos tambe ta sinti nos asina. Esei ta bin debí ku nos ta biba den “e último dianan” i nos ta haña nos ku kosnan ku por duna nos ansiedat òf hasi nos tristu.—2 Tim. 3:1.

² Den e artíkulo akí, nos lo mira ken por yuda nos pa ta ègt felis. Anto despues nos lo wak tres kos ku por hòrta nos felisidat i kiko nos por hasi pa hañ’é bèk.

YEHOVA POR HASI NOS REALMENTE FELIS

3. Kiko kreashon ta siña nos tokante Yehova? (Wak e plachi.)

³ Yehova semper ta felis. Anto e ke pa nos tambe ta felis. P’esei el a krea hopi kos pa hasi nos felis. Por ehèmpel, nos bunita planeta, un variedat di koló, bestianan ku ta hasi kos prèt i dushi kuminda. Di bèrdat Yehova stima nos i ke nos disfrutá di bida!

Yu di olefante: Image © Romi Gamit/Shutterstock; yu di pingwin: Vladimir Seliverstov/500px via Getty Images; yu di kabritu: Rita Kochmarjova/stock.adobe.com; dos dòlfein: georgeclerk/E+ via Getty Images

4. (a) Kon bin Yehova por ta felis apesar di tur sufrimentu ku e ta mira? (b) Kon Yehova ta yuda nos? (Salmo 16:11)

⁴ Apesar di tur e sufrimentu ku Yehova ta mira den mundu, e ta “e Dios felis.” (1 Tim. 1:11) Kon bin e por ta felis? Pasobra ya el a skohe e dia ku lo e kaba ku tur sufrimentu i tristesa. P’esei, ku pasenshi e ta warda e dia ei yega. Turesten, e ta komprondé ki nos ta pasando aden i ke yuda nos pa ta kontentu i felis. (Lesa Salmo 16:11.) Laga nos wak kon el a hasi esei ku su Yu, Hesus.

5-6. Dikon Hesus ta felis?

⁵ Despues di Yehova, e persona mas felis ta Hesus. Kon bin? Wak algun motibu. Pa kuminsá, e ‘ta e refleho di e Dios invisibel’ esta, e ta meskos ku su Tata. (Kol. 1:15) Tambe di tur kreashon, Hesus ta esun ku a pasa mas tantu tempu ku Yehova.

⁶ Ademas, Hesus ta sintié felis pasobra semper e ta hasi e boluntat di su Tata. (Pro. 8:​30, 31; Huan 8:29) Ta p’esei Yehova ta masha orguyoso di dje. Esei ta un otro motibu dikon Hesus ta sintié felis.—Mat. 3:17.

7. Kon nos tambe por ta realmente felis?

⁷ Nos tambe por ta realmente felis si nos sigui hala serka Yehova. Mas tempu nos pasa pa siña konosé Yehova, mas mihó nos por imit’é. Anto esei lo hasi nos mas felis. Algu otro ku lo hasi nos felis i kontentu ta di hasi Yehova su boluntat i di sa ku e ta orguyoso di nos.a (Sal. 33:12) Pero nos no por kita ku tin biaha nos por sinti nos tristu. Tin biaha e sintimentu ei ta dura pa un par di dia òf e ta keda pa hopi tempu. Si nos ta sinti nos tristu nos no mester pensa ku Yehova no ta kontentu ku nos. E ta komprondé ku den e mundu akí lo tin biaha ku nos lo ta hopi tristu i tin hopi doló. (Sal. 103:14) Laga nos mira awor tres kos ku por hòrta nos felisidat i ki nos por hasi pa hañ’é bèk.

PAGA TINU DI LOKE POR HÒRTA BO GOSO

8. Kon nos ta sinti ora nos haña nos ku problema?

⁸ Ladron #1: Problemanan. Kosnan manera persekushon, desaster natural, problema finansiero, malesa i edat avansá por fásilmente hòrta nos goso. Sierto situashon por laga nos sinti manera nos mannan ta mará i nos por bira hopi tristu. Beibel mes ta bisa ku “tristesa ta deprimí hende.” (Pro. 15:13) Babis, un ansiano, a sinti asina. El a pèrdè su mayornan i su ruman hòmber den un lapso di kuater aña. El a bisa: “M’a sinti malu pasobra mi tabata dil ku hopi kos pareu i mi no por a pasa e tempu ku mi tabata ke ku nan promé ku nan a muri.” Meskos ku Babis, problemanan di bida por chupa tur nos energia i laga nos desanimá.

9. Kon nos por haña nos goso bèk? (Yeremías 29:​4-7, 10)

⁹ Kon nos por haña nos goso bèk? Loke nos por hasi ta di aseptá nos sirkunstansia i sea gradisidu. Mundu ta krea e idea ku pa nos por ta felis nos mester tin un bon bida i tur kos mester ta kana nèchi. Pero esei no ta bèrdat. Por ehèmpel, Yehova a bisa e hudiunan ku a bai Babilonia ku nan mester a hasi nan esfuerso pa aseptá nan sirkunstansia i disfrutá di nan bida einan. (Lesa Yeremías 29:​4-7, 10.) Ki nos tin ku komprondé di esei? Nos tambe tin ku hasi esfuerso pa aseptá nos sirkunstansia i sea gradisidu pa e kosnan bon ku nos tin den bida. Keda kòrda ku Yehova ta ku bo i lo yuda bo. (Sal. 63:7; 146:5) Effie, a keda hopi gradisidu pa e manera ku Yehova a yud’é. Despues di un aksidente, el a keda paralisá. El a bisa: “M’a haña hopi yudansa di Yehova, mi famia i di e kongregashon. Mi ke mustra nan ku mi ta gradisidu pa loke nan ta i a hasi pa mi. P’esei mi ta hasi mi esfuerso pa keda felis i kontentu.”

10. Kon nos por tin goso i alegria apesar di problema?

¹⁰ Asta ora nos bida no ta manera nos ke òf ora algu teribel pasa ku nos òf nos famia, tòg nos por tin goso i alegria.b (Sal. 126:5) Dikon? Pasobra nos goso i felisidat no ta dependé di nos sirkunstansia. Maria, un pionero, a bisa: “Ora nos haña nos ku problema nos ta laga esei hòrta nos felisidat pasobra nos no ta lubidá riba loke Yehova a primintí nos. Esei no ke men ku nos no por yora òf ekspresá kon nos ta sinti nos. Pero Yehova ta yuda nos pa nos sigui ta kontentu i felis.” Kòrda ku asta si loke bo ta pasando aden ta super difísil, e no ta bai keda asina pa semper. Un djis akí Yehova ta bai kita tur kos ku ta kousa sufrimentu i tristesa.

11. Konta kon Pablo su ehèmpel a animá bo.

¹¹ Tin biaha nos tin asina tantu problema den nos bida ku nos por kuminsá pensa ku Yehova no ta kontentu ku nos mas. Si bo tambe ta sinti asina, kisas bo por para ketu i pensa riba otro sirbidónan di Yehova ku a pasa den hopi problema, manera Apòstel Pablo. Ta Hesus mes a skohe Pablo pa hiba e bèrdat pa “e nashonnan, na e reinan i na e pueblo di Israel.” (Echo. 9:15) Esei tabata algu hopi spesial! Pero esei no ke men ku Pablo no tabatin un bida sin problema. (2 Kor. 11:​23-27) Pablo tabata hañ’é ku un problema tras di otro. Akaso esei tabata ke men ku Yehova no tabata kontentu kuné? Klaru ku nò! Pablo su perseveransia a mustra ku Yehova tabata kontentu kuné. (Rom. 5:​3-5) Awor kiko di abo? Bo ta perseverando apesar di tur bo problemanan? Awèl, bo tambe por tin sigur ku Yehova ta kontentu ku bo.

12. Kon nos ta sinti ora nos no por logra hasi loke nos tin gana di hasi pa Yehova?

¹² Ladron #2: Ora bo no por kumpli ku bo deseonan. (Pro. 13:12) Nos stima Yehova i nos ta hopi gradisidu pa loke el a hasi pa nos. I p’esei nos ke buska manera pa yam’é danki. Pero si nos purba di hasi algu ku nos sirkunstansia no ta permití, nos por bira desanimá. (Pro. 17:22) Un pionero ku yama Holly a bisa: “Mi kier a bai e Skol pa Predikadó di Reino, prediká den otro pais òf yuda na e proyekto di konstrukshon na Ramapo. Pero mi situashon a kambia i mi no por a logra niun di nan. E ko’i a kibrá mi.” Hopi di nos ta komprondé loke Holly ta sinti.

13. Si nos sirkunstansia no ta permití, kiko ta algun kos ku sí nos por hasi?

¹³ Kon nos por haña nos goso bèk? Kòrda ku Yehova no ta pidi nos hasi mas ku loke nos por. Nos balor no ta dependé di kuantu kos nos ta logra hasi pa Yehova. E úniko kos ku e ke ta pa nos ta modesto i fiel. (Mik. 6:8; 1 Kor. 4:2) Pues, e ta mas interesá den e persona ku nos ta di paden. P’esei lo no ta rasonabel pa nos purba di hasi mas ku loke Yehova ta ferwagt di nos.c P’esei si bo sirkunstansia no ta permití bo hasi loke bo tin gana di hasi pa Yehova, focus riba e kosnan ku sí bo por hasi. Por ehèmpel, bo por train un ruman hóben òf yuda un ruman di edat. Kisas bo por pone e meta tambe pa animá un ruman sea dor di mand’é un mensahe, bishit’é òf yam’é. Yehova ta keda masha kontentu ora bo hasi loke abo por. Bo por tin sigur ku lo e bendishoná bo esfuerso i lo e yuda bo pa ta felis. Anto kòrda ku den futuro nos lo hasi kosnan pa Yehova ku nos ni por imaginá. Esei ta loke a animá Holly. El a bisa: “Loke ta yuda mi bin bei ora mi ta desanimá ta di kòrda ku mi lo por logra algun di metanan den mundu nobo.”

14. Kiko mas por hòrta nos goso?

¹⁴ Ladron #3: Biba pa satisfasé bo mes. Algun hende ta usa ret sosial pa promové e idea ku pa un hende ta realmente felis e mester por ehèmpel, bai shòp, biaha i hasi su hòbinan e kosnan di mas importante den su bida. Sin ku nos ripará nos por kuminsá kere ku esei ta bèrdat. Klaru ku no ta malu pa nos disfrutá di e kosnan ei, pasobra Yehova a krea nos pa disfrutá di e kosnan bunita ku el a traha. Sinembargo, hopi hende a realisá ku e kosnan ku nan a kere ku lo a hasi nan felis en realidat a hòrta nan goso. Eva, un pionero, a bisa: “Si e úniko kos ku bo ta hasi ta kore tras di bo plasernan, nunka lo bo ta satisfecho.” Si nos tin un aktitut asina nos lo keda desepshoná i bashí.

15. Ki lès nos ta siña for di Rei Sálomon?

¹⁵ Nos por siña un lès for di Rei Sálomon. El a purba di hasi diferente kos pa mira si nan lo hasié felis. Por ehèmpel, el a disfrutá di tur sorto di kuminda, muzik i kosnan luhoso. Pero tòg e kosnan ei no a hasié felis. Tur desepshoná el a bisa: “Wowo no ta keda satisfecho ku loke e ta mira; orea no ta keda satisfecho ku loke e ta tende.” (Ekl. 1:8; 2:​1-11) Tin hende ta pensa ku nan lo ta felis si nan tin sèn i por hasi kiko ku nan ke. Pero esei no ta bèrdat. E kosnan ei hamas lo por hasi nos realmente felis.

16. Dikon nos lo ta felis si nos hasi kos pa otro hende? (Wak e plachi.)

¹⁶ Kon nos por haña nos goso bèk? Hesus a siña nos ku “tin mas felisidat den duna ku den risibí.” (Echo. 20:35) Un ansiano ku yama Alekos a bisa: “Mi ta purba di hasi kosnan chikitu pa mi rumannan. Mas mi yuda otro hende, ménos mi ta focus pa satisfasé mi mes. Anto esei ta hasi mi felis.” Kiko abo por hasi pa bo rumannan? Wèl, si por ehèmpel bo mira ku un ruman no ta su mes, purba di anim’é. Ta bèrdat ku bo no por kita su problemanan, pero kisas bo por skuch’é ku atenshon i purba di komprondé kon e ta sintié. Tambe bo por anim’é pa tira su karga riba Yehova i kòrd’é ku Yehova stim’é. (Sal. 55:22; 68:19) Yud’é mira ku Yehova no a bandon’é. (Sal. 37:28; Isa. 59:1) Bo por asta ofres’é pa kushiná p’e òf bai kana kuné. Tambe bo por pidié bai sirbishi ku bo, ku ta algu ku semper ta hasi nos felis. Ora bo hasi tipo di kosnan asina bo ta permití Yehova usa bo pa yuda bo rumannan i lo bo sinti bo felis.—Pro. 11:25.

17. Si nos ke ta realmente felis kiko nos tin ku hasi? (Salmo 43:4)

¹⁷ Nos lo ta realmente felis si nos sigui konosé Yehova mihó i hasié kontentu. Beibel ta sigurá nos ku si nos hasi esei, Yehova lo hasi nos “masha felis.” (Lesa Salmo 43:4.) Si nos haña nos ku problema den bida, nos lo no sinti ansiedat ni miedu. Pues, laga nos keda ku nos bista fihá riba Yehova, kende lo yuda nos pa ta felis pa semper.—Sal. 144:15.