Yehova Su Amor Ta pa Semper

1-2. Kon situashonnan difísil ta laga mayoria di nos sinti?

IMAGINÁ un boto den mal tempu. Debí na e olanan brutu, e boto ta bai laira bin abou i a ménos ku un hende tira e anker na awa, e boto lo bai kaminda e olanan mand’é. E anker lo stabilisá e boto i asina evitá ku e ta drif bai.

² Ora bo ta pasa den situashonnan difísil, bo por sinti bo manera e boto ei. Bo emoshonnan tambe ta bai laira bin abou. Un dia bo ta ful konvensí ku Yehova stima bo i ta yuda bo, anto e siguiente dia bo ta duda si di bèrdat Yehova stima bo. (Sal. 10:1; 13:1) Kisas un ruman ta animá bo i bo ta sinti bo bon pa un ratu. (Pro. 17:17; 25:11) Pero despues, bo duda ta bini bèk. Bo por asta pensa ku bo no ta importante pa Yehova i ku e no ta wòri ku bo. Kiko por ta “un anker” pa bo ora bo tin e sintimentunan akí? Ke men di, kiko por konvensé bo i yuda bo keda konvensí ku Yehova stima bo i lo yuda bo?

3. (a) Segun Salmo 31:7 i 136:​1, kiko “amor leal” ta nifiká? (b) Dikon no tin un persona ku por mustra mas amor leal ku Yehova? (Wak e plachi.)

³ Algu ku por sirbi komo “un anker” ta di keda kòrda riba Yehova su amor leal. (Lesa Salmo 31:7; 136:1.) E ekspreshon “amor leal” ta duna e idea di un hende ku ta stima un otro masha hopi mes i ku hamas i nunka lo e bandon’é. No tin un persona ku por mustra mas amor leal ku Yehova. De echo, Beibel ta bisa ku e ta “yen di amor leal.” (Éks. 34:​6, 7) Beibel ta bisa tambe ku Yehova “ta yen di amor leal pa tur hende ku ta hasi orashon na [dje].” (Sal. 86:5) Kiko e tekstonan ei ke yuda nos komprondé? Nan ke yuda nos komprondé ku Yehova nunka ta bandoná su sirbidónan fiel. Ora bo kòrda ku Yehova ta un Dios leal, esei por ta un anker pa bo den situashonnan difísil.—Sal. 23:4

MIRA YEHOVA SU AMOR KOMO UN SIÑANSA BÁSIKO DI BEIBEL

4. Menshoná algun siñansa básiko di Beibel, i splika dikon bo ta kere den nan.

⁴ Ora ku bo realisá ku Yehova su amor ta forma parti di e siñansanan básiko di Beibel, esei lo yuda bo ta konvensí ku Yehova stima bo. Ora bo tende “siñansanan básiko di Beibel,” ki ta bin na bo mente? Kisas bo ta pensa riba loke bo a siña for di Beibel. Por ehèmpel, ku Dios su nòmber ta Yehova, ku Hesus ta Yu unigénito di Dios, ku e mortonan no sa nada i ku hende lo biba pa semper den Paradeis aki riba tera. (Sal. 83:18; Ekl. 9:5; Huan 3:16; Rev. 21:​3, 4) Unabes ku bo a komprondé i aseptá ku e siñansanan akí ta bèrdat, niun hende no por a pone bo kere algu otro. Dikon? Pasobra bo a mira ku nan no ta fantasia sino bèrdat. Asina tambe, ora bo mira Yehova su amor komo un siñansa básiko di Beibel, esei lo yuda bo pa stòp di duda ku e stima bo i stòp di duda ku lo e yuda bo. Ban wak kon.

5. Splika kon un hende por tumba siñansa falsu.

⁵ Ora b’a kuminsá studia Beibel, bo ta kòrda kiko a yuda bo rechasá siñansanan falsu? Probablemente lo bo a kompará loke bo religion a siña bo ku loke Beibel ta bisa. Por ehèmpel, suponé ku bo tabata kere ku Hesus ta Dios Todopoderoso. Segun ku bo tabata studia, b’a puntra bo mes: ‘E kos ku mi ta kere akí ta bèrdat?’ Despues ku b’a wak pa bo mes loke Beibel ta bisa, b’a mira ku esei no tabata bèrdat. Anto b’a kuminsá kere loke Beibel ta bisa, esta, ku Hesus ta e “promé di tur kreashon” i “e Yu unigénito di Dios.” (Kol. 1:15; Huan 3:18) Klaru ku algun siñansa falsu por ta “fuertemente ankrá” i difísil pa tumba. (2 Kor. 10:​4, 5) Pero unabes b’a logra tumba nan, bo no a bai bèk na e siñansanan falsu ei nunka mas.—Flp. 3:13.

6. Dikon bo ta konvensí ku Yehova “su amor leal ta pa semper”?

⁶ Bo por hasi meskos si bo ta den un situashon difísil i bo kuminsá duda ku Yehova stima bo. Puntra bo mes: ‘Mi ta pensando kos na tinu?’ Djei kuminsá kompará bo duda ku loke Beibel ta bisa tokante Yehova su amor leal den Salmo 136:​1, e teksto prinsipal di e artíkulo akí. Dikon Yehova ta bisa ku su amor ta “leal”? Dikon ta ripití 26 biaha den e salmo akí ku “su amor leal ta pa semper”? For di esaki, nos por siña ku Yehova su amor leal pa su pueblo ta un di e siñansanan básiko di Beibel, meskos ku e hopi otro siñansa básiko di Beibel ku tabata fásil pa bo aseptá. E idea ku Yehova no stima bo òf no ta balorá bo ta un mentira. Pues, rechasá e mentira ei meskos ku lo bo rechasá kualke otro siñansa falsu!

7. Menshoná algun teksto ku ta proba ku Yehova stima bo.

⁷ Den Beibel nos ta haña hopi teksto mas ku ta konvensé nos ku Yehova stima nos. Por ehèmpel, Hesus a bisa su siguidónan: “Boso ta bal mas ku hopi mòfi.” (Mat. 10:31) Tambe Yehova mes a bisa su pueblo: “Lo mi fortalesé bo; sí, lo mi yuda bo. Lo mi tene bo duru ku mi man drechi, sí, ku mi man ku ta hasi loke ta hustu.” (Isa. 41:10) Ripará bon ku Hesus no a bisa ‘kisas boso ta bal mas.’ Mas bien, el a bisa: “Boso ta bal mas.” Ni tampoko Yehova no a bisa ‘kisas lo mi yuda bo.’ Ma el a bisa: “lo mi yuda bo.” Pues, si bo ta den un situashon difísil i bo kuminsá duda ku Dios stima bo, e tekstonan ei lo no djis yuda bo sinti mihó ma nan lo konvensé bo ku Yehova stima bo. E tekstonan ei ta basá riba bèrdat, no riba fantasia. Si bo papia ku Yehova tokante bo dudanan i meditá riba e tekstonan ei, bo tambe lo por bisa manera 1 Huan 4:16 ta bisa: “Nos a siña konosé e amor ku Dios tin pa nos i ta kere den esaki.”a

8. Ki bo por hasi si tin biaha bo ta duda si Yehova stima bo?

⁸ Pero kiko bo por hasi si tin biaha ainda bo ta duda ku Yehova stima bo? Kompará loke bo ta sinti ku loke bo sa. Bo no por bai tras di bo sintimentunan, pasobra nan ta gaña bo. Pero loke Beibel ta bisa tokante Yehova su amor ta bèrdat. Si nos no ta kere ku Yehova stima nos, ta manera nos ta bisa indirektamente ku e deklarashon “Dios ta amor” no ta bèrdat.—1 Huan 4:8.

PENSA RIBA E KARIÑO KU YEHOVA TIN PA BO

9-10. Kiko Hesus tabata ke men ora el a bisa na Huan 16:26 i 27 ku “e Tata mes tin kariño pa boso”? (Wak e plachi.)

⁹ Nos por siña mas tokante Yehova su amor for di e siguiente palabranan ku Hesus a bisa su siguidónan: “E Tata mes tin kariño pa boso.” (Lesa Huan 16:​26, 27.) Hesus no a bisa nan esei djis pa animá nan. Ora nos lesa e versíkulonan promé nos ta mira ku Hesus tabata papiando tokante orashon.

¹⁰ Hesus a kaba di bisa su disipelnan ku nan no mester a hasi orashon na dje, sino den su nòmber. (Huan 16:​23, 24) Tabata importante pa nan komprondé esei. Dikon? Pasobra komo nan a bira bon amigu di Hesus, despues di su resurekshon nan por a haña gana di hasi orashon na dje. Nan lo por a pensa ku, ya ku Hesus stima nan asina tantu, lo e ke skucha nan orashon i pidi su Tata pa yuda nan. Pero, Hesus a yuda nan komprondé bon kla ku e idea ei no ta korekto, p’esei el a bisa: “E Tata mes tin kariño pa boso.” E palabranan ei ta un siñansa básiko di Beibel tokante orashon. Awor pensa un ratu kiko esei ta nifiká pa abo. Ora bo a studia Beibel, bo tambe a siña konosé Hesus i stim’é. (Huan 14:21) Pero meskos ku e disipelnan ei, abo por hasi orashon na Yehova ku konfiansa ku e ta bai skucha bo pasobra bo sa ku ‘e Tata mes tin kariño pa bo.’ Kada biaha ku bo hasi orashon na Yehova, bo ta demostrá ku bo ta konvensí di e palabranan ei.—1 Huan 5:14.

KOMPRONDÉ KI POR PONE NOS DUDA

11. Dikon Satanas lo bira kontentu si nos duda di Yehova su amor?

¹¹ Kiko por pone nos duda ku Yehova stima nos? Kisas bo ta pensa ku ta Satanas ta kousa esei, i di un banda bo tin rason. Diabel ke “habraká” nos i lo e keda masha kontentu si nos pensa ku Yehova no stima nos. (1 Ped. 5:8) De echo, ta pasobra Yehova stima nos asina tantu el a pèrkurá e reskate. Anto Satanas ke pa nos sinti ku nos no meresé e bunita regalo ei. (Heb. 2:9) Pero para ketu i pensa riba esaki: Ken ta sali ganá si nos duda ku Yehova stima nos? Ta Satanas! Anto ta ken ta kontentu si nos bira desanimá i stòp di sirbi Yehova? Ta Satanas! T’e ta esun ku ke pa nos kere e mentira di ku Yehova no stima nos. Eigenlijk, ta Satanas ta esun ku a pèrdè Yehova su amor. Interesante ta ku un di su “trampanan” mas astuto ta pa laga nos sinti ku ta nos a pèrdè Yehova su amor i ku el a rechasá nos. (Efe. 6:11) Ora nos sa kiko nos enemigu Satanas ta purbando di hasi, nos lo ta mas determiná pa resistié, òf opon’é.—Sant. 4:7.

12-13. Dikon e piká ku nos a heredá ta pone nos duda di Yehova su amor?

¹² Aparte di Satanas, e piká ku nos a heredá tambe ta pone nos duda ku Yehova stima nos. (Sal. 51:5; Rom. 5:12) Piká a alehá nos for di Yehova i a daña nos mente, kurason i kurpa.

¹³ Piká tin un efekto hopi negativo riba nos emoshonnan. E ta laga nos sinti nos kulpabel, anshá, insigur i asta sinti bèrgwensa. Tin biaha nos ta sinti e kosnan ei ora nos peka. Ma tin biaha nos ta sinti nos asina tambe pasobra semper nos ta keda kòrda ku nos ta imperfekto. Pero Yehova no a krea nos pa ta imperfekto. (Rom. 8:​20, 21) Pa komprondé esei, pensa riba un outo. Si un outo tin un flèt tayer, bo no por kor’é manera e ta supose di kore. Meskos tambe, nos imperfekshon ta manera un flèt tayer ku ta pone ku nos no por logra funshoná na e nivel ku Yehova a krea nos. P’esei, no ta nada straño ku tin biaha nos ta duda ku Yehova stima nos. Pero ora ku nos kuminsá duda, nos tin ku kòrda ku Yehova “ta stima tur persona ku ta stima [e] i ku ta kumpli ku [su] mandamentunan.”—Neh. 1:5.

14. Kon e reskate por yuda nos stòp di duda ku Yehova stima nos? (Romanonan 5:8) (Wak e kuadro “Tene Kuidou pa Piká No ‘Engañá’ Nos.”)

¹⁴ Ta bèrdat ku tin biaha nos por sinti ku nos no meresé Yehova su amor. I pa ta sinsero, nos no meresé su amor. Pero e ta stima nos tòg, i esei ta hasi su amor asina spesial. Maske nos no por hasi nada pa gana Yehova su amor, tòg e stima nos i a perkurá e reskate pa e por pordoná nos pikánan. (1 Huan 4:10) Kòrda tambe ku Hesus a bini na tera pa salba pekadó, no hende perfekto. (Lesa Romanonan 5:8.) Niun di nos no por hasi nada perfektamente, i Yehova no ta ferwagt esei tampoko. Unabes nos komprondé ku tin biaha ta e imperfekshon ku nos a heredá ta pone nos duda ku Yehova stima nos, nos lo ta mas determiná pa lucha kontra e pensamentu ei ku tur nos forsa.—Rom. 7:​24, 25.

SKOHE PA KEDA LEAL

15-16. Di kiko nos por ta konvensí si nos keda leal na Yehova? (2 Sámuèl 22:26)

¹⁵ Yehova ke pa nos mes skohe pa “keda leal na dje.” (Deu. 30:​19, 20) Si nos ta leal na dje, nos por ta konvensí ku e tambe lo ta leal na nos i lo no laga nos na kaya bou di niun sirkunstansia.—Lesa 2 Sámuèl 22:26.

¹⁶ Manera nos a mira den e artíkulo akí, sea loke sea nos haña nos kuné den bida e mihó kos ku nos por hasi ta di tira nos anker, esta, kòrda ku Yehova stima nos i lo yuda nos. Ta esei ta loke Beibel ta siña nos. Ora nos kuminsá duda ku Yehova stima nos, no focus riba kon nos ta sinti e momento ei, ma kòrda riba loke nos sa ku ta bèrdat. P’esei, laga nos semper keda konvensí ku manera Beibel ta bisa, Yehova su amor leal ta pa semper.