Kon pa Sigui Stima Otro

1-2. (a) Dikon Apòstel Pablo a bisa ku e kualidat “di mas grandi” ta amor? (b) Ki pregunta nos lo kontestá?

DESPUES ku Apòstel Pablo a menshoná fe, speransa i amor, el a bisa ku “esun di mas grandi ta amor.” (1 Kor. 13:13) Dikon el a bisa esei? Pasó den futuro e promesanan di Dios tokante mundu nobo lo a kumpli kaba. Pues, nos lo no tin mester di fe ni speransa. Pero, loke semper nos tin ku sigui hasi ta stima Yehova i hende. E amor ei lo sigui krese pa semper.

² Mirando ku amor ta un kualidat ku semper nos tin ku demostrá, e siguiente preguntanan ta lanta: (1) Dikon nos tin ku stima otro? (2) Kon nos por mustra ku nos ta stima otro? (3) Kon nos por sigui stima otro?

DIKON NOS TIN KU STIMA OTRO?

3. Ki motibunan nos tin pa stima otro?

³ Dikon ta importante pa nos stima otro? Ora nos ta stima nos rumannan, nos ta proba ku nos ta berdadero kristian. Hesus a bisa su apòstelnan: “Na esaki tur hende lo sa ku boso ta mi disipelnan, esta, si boso ta stima otro.” (Huan 13:35) Ademas, ora nos ta stima otro, esei ta yuda nos keda uní. Pablo a bisa ku amor “ta e laso perfekto di union.” (Kol. 3:14) Pero, tin un otro motibu importante dikon nos tin ku stima otro. Apòstel Huan a bisa su rumannan: “Esun ku ta stima Dios mester stima su ruman tambe.” (1 Huan 4:21) Pues, ora nos ta stima nos rumannan, nos ta proba ku nos ta stima Dios.

4-5. Kiko amor pa nos rumannan tin di haber ku amor pa Dios?

⁴ Kiko amor pa nos rumannan tin di haber ku amor pa Dios? Pa nos por komprondé mihó, pensa riba e konekshon ku e kurason tin ku otro partinan di e kurpa. Un dòkter ta usa pòls di su pashènt pa haña un idea kon fuerte òf suak e kurason ta. Kiko nos ta komprondé for di e prinsipio ei?

⁵ Meskos ku un dòkter por saka afó den ki kondishon e kurason ta for di e pashènt su pòls, asina tambe na e manera ku nos ta stima nos rumannan nos por saka afó kon fuerte nos amor pa Yehova ta. Pues, si nos ripará ku nos no ta stima nos rumannan manera ántes, kisas esei ta mustra ku nos amor pa Dios no ta mesun fuerte mas. Pero si nos tin kustumber di mustra nos rumannan ku nos ta stima nan, esei ta señalá ku nos amor pa Dios ta fuerte.

6. Dikon nos mester preokupá si nos no ta stima nos rumannan manera ántes? (1 Huan 4:​7-9, 11)

⁶ Si nos ripará ku nos no ta stima nos rumannan manera ántes, esei ke men ku nos amistat ku Yehova ta na peliger. Apòstel Huan a laga komprondé esei bon kla ora el a bisa: “Esun ku no ta stima su ruman, ku e ta mira, no por stima Dios, ku e no ta mira.” (1 Huan 4:20) Kiko nos ta siña for di esei? E úniko manera ku Yehova lo stima nos ta si nos “sigui stima otro.”—Lesa 1 Huan 4:​7-9, 11.

KON NOS POR MUSTRA KU NOS TA STIMA OTRO?

7-8. Kon nos por mustra nos rumannan ku nos ta stima nan?

⁷ Den Beibel bes tras bes nos ta haña e mandamentu pa “stima otro.” (Huan 15:​12, 17; Rom. 13:8; 1 Tes. 4:9; 1 Ped. 1:22; 1 Huan 4:11) Pero amor ta un sintimentu ku ta bini di nos kurason, i niun hende no por lesa nos kurason. Pues, kon nos por mustra nos rumannan ku nos ta stima nan? Ku nos palabra i akshon.

⁸ Beibel ta menshoná vários manera ku nos por mustra nos rumannan ku nos ta stima nan. Por ehèmpel: ‘Papia bèrdat ku otro.’ (Zak. 8:16) “Keda na pas ku otro.” (Mar. 9:50) Tuma e inisiativa pa “mustra onor na otro.” (Rom. 12:10) “Risibí otro gustosamente.” (Rom. 15:7) “Sigui . . . pordoná otro.” (Kol. 3:13) “Sigui yuda otro ku su karga.” (Gal. 6:2) “Sigui konsolá otro.” (1 Tes. 4:18) “Sigui . . . fortalesé otro.” (1 Tes. 5:11) “Hasi orashon pa otro.”—Sant. 5:16.

9. Dikon konsolá nos rumannan ta un manera importante pa mustra nan ku nos ta stima nan? (Wak e plachi.)

⁹ Laga nos trata un di e maneranan ku nos por mustra nos rumannan ku nos ta stima nan. Pablo a bisa: “Sigui konsolá otro.” Dikon nos ta bisa ku konsolá otro ta un manera importante pa mustra nos rumannan ku nos ta stima nan? Wèl, un buki di referensia di Beibel a menshoná ku e palabra griego ku Pablo a usa pa “konsolá” ta nifiká “para banda di un hende pa anim’é ora ku e ta pasa den pruebanan difísil.” Pues, ora nos ta konsolá un ruman ku ta sufriendo, nos ta yudando e pa sigui sirbi Yehova fielmente. I kada bes ku nos konsolá un ruman, nos ta mustr’é ku nos ta stim’é.—2 Kor. 7:​6, 7, 13.

10. Ki konekshon tin entre kompashon i konsuelo?

¹⁰ Tin un konekshon entre kompashon i konsuelo. Kon asina? Ora un persona ta sinti kompashon pa un hende ku ta sufriendo, e ta haña gana di konsolá i yuda e hende ei. Pues promé, nos ta sinti kompashon i despues e sintimentu ei ta motivá nos pa duna konsuelo. Meskos ta konta pa Yehova. Pablo a konektá e kompashon ku Yehova ta sinti ku e konsuelo ku E ta duna nos. El a yama Yehova “e Tata di tierno miserikòrdia i Dios di tur konsuelo.” (2 Kor. 1:3) Pablo a usa e ekspreshon “tierno miserikòrdia” pa deskribí sintimentu di kompashon. Pues, e motibu ku a yama Yehova “e Tata,” òf e Fuente, di “tierno miserikòrdia,” ta pasobra e tin un kompashon enorme pa hende. Anto ta e kompashon ei ta motiv’é pa “konsolá nos den tur nos tribulashonnan.” (2 Kor. 1:4) Meskos ku awa ta refreská hende ku tin set, asina tambe Yehova ta refreská i konsolá esnan ku ta pasando den difikultat. Kon nos por sinti kompashon pa otronan i duna nan konsuelo, meskos ku Yehova? Un manera ta di desaroyá kualidatnan ku lo yuda nos ku esei. Ban wak algun di nan.

11. Segun Kolosensenan 3:12 i 1 Pedro 3:​8, kiko mas lo yuda nos sigui stima i konsolá otro?

¹¹ Kiko lo yuda nos sigui stima i “sigui konsolá otro” dia tras dia? Nos tin ku hasi esfuerso pa nos tin mas bondat, kariño pa e rumannan i sintimentu pa otro. (Lesa Kolosensenan 3:12; 1 Pedro 3:8.) Ora nos ta sinti kompashon pa nos rumannan i ta ègt preokupá pa nan, nos lo sinti un deseo fuerte pa konsolá nan ora nan ta pasa den momentonan duru. Kòrda, Hesus a bisa “di loke kurason ta yen di dje, boka ta papia. Un bon hende ta saka loke ta bon for di e kosnan bon ku e tin wardá.” (Mat. 12:​34, 35) Sin duda, un manera importante ku nos ta mustra nos rumannan ku nos ta stima nan, ta ora nos konsolá nan.

KON NOS POR SIGUI STIMA OTRO?

12. (a) Nos mester tene kuidou di kiko? (b) Ki pregunta nos ta bai trata awor?

¹² Ta klaru ku nos tur ke obedesé e mandamentu di “sigui stima otro.” (1 Huan 4:7) Pero, ta importante pa nos kòrda ku Hesus a atvertí ku “amor di mayoria di hende lo fria.” (Mat. 24:12) Hesus no tabata ke men ku mayoria di su disipelnan lo stòp di stima otro. Pero ku esei lo ta e aktitut den mundu i nos mester tene kuidou pa esei no influensiá nos. Ku esei na mente, laga nos trata e siguiente pregunta: Kon nos por haña sa si e amor ku nos ta sinti pa nos rumannan ta fuerte?

13. Kiko lo yuda nos haña sa si nos amor pa nos rumannan ta fuerte?

¹³ Un manera ku nos por haña sa si e amor ku nos tin pa nos rumannan ta fuerte ta di wak kon nos ta reakshoná den sierto situashon. (2 Kor. 8:8) Apòstel Pedro a menshoná un di e situashonnan ei. El a bisa: “Riba tur kos, stima otro intensamente, pasobra amor ta tapa un multitut di piká.” (1 Ped. 4:8) Pues, loke nos ta bisa òf ta hasi ora nos rumannan faya òf hùrt nos, lo yuda nos haña sa si nos amor pa nan ta fuerte.

14. Segun 1 Pedro 4:​8, kon nos tin ku stima nos rumannan? Ilustrá esei.

¹⁴ Laga nos analisá loke Pedro a bisa. E promé parti di versíkulo 8 ta bisa ku nos tin ku “stima otro intensamente.” E palabra griego ku Pedro a usa pa “intensamente,” literalmente ta nifiká “rèk.” E di dos parti di e versíkulo ta mustra kiko nos lo logra ora nos stima otro intensamente: esei ta tapa un multitut di piká. Imaginá ku nos amor ta manera un tela ku bo por rèk i rèk te tapa, no un ni dos, sino “un multitut di piká.” Den e kaso akí, tapa ta nifiká pordoná. Meskos ku un pida tela por tapa mancha, amor por yuda nos tapa debilidat- i imperfekshonnan di otro.

15. Kiko nos ta logra hasi si nos amor pa nos rumannan ta fuerte? (Kolosensenan 3:13)

¹⁵ Nos mester stima nos rumannan asina tantu ku nos ta dispuesto pa pordoná nan nan fayonan, asta ora esei no ta fásil. (Lesa Kolosensenan 3:13.) Ora nos pordoná nos rumannan, nos ta mustra ku nos amor pa nan ta fuerte i ku nos ke agradá Yehova. Kiko mas por yuda nos pasa por alto di e erornan i kosnan ku nos rumannan ta hasi ku ta iritá nos?

16-17. Kiko mas por yuda nos pasa por alto di erornan chikitu di nos rumannan? Ilustrá esei. (Wak e plachi.)

¹⁶ Focus riba e kosnan bon ku nos rumannan ta hasi i no riba e malunan. Pensa riba e siguiente ilustrashon. Imaginá ku bo ta pasando hopi dushi na un get-together ku bo rumannan. Pero promé ku bo bai kas, bo ta saka un potrèt ku e grupo. Pa hasi sigur, bo ta saka dos potrèt mas. Awor bo tin tres potrèt. Pero segun ku bo ta pasa den nan, bo ta ripará ku riba un di nan un ruman no ta smail. Kiko lo bo hasi ku e potrèt ei? Bo ta delete e pasobra bo tin e dos otronan kaminda tur hende ta smail.

¹⁷ Potrètnan ku nos ta keda kuné ta manera rekuerdonan. Generalmente nos tin dushi rekuerdo di e biahanan ku nos a pasa ku nos rumannan. Pero imaginá ku un di e biahanan ei un ruman a hasi òf bisa algu ku no tabata masha amabel. Kiko lo bo hasi? Lo bo delete e mané lo bo a hasi ku un di e potrètnan ayá? (Pro. 19:11; Efe. 4:32) Muy probablemente nos tin otro bunita rekuerdo ku nos a pasa ku e ruman ei, pues nos por delete e fayo ku el a hasi for di nos memoria, sin niun problema. Ta bunita rekuerdonan so nos ke keda kuné.

DIKON AWE AMOR TA ASINA IMPORTANTE?

18. Kiko ta e puntonan prinsipal ku nos a trata den e artíkulo akí?

¹⁸ Bo ta kòrda dikon nos ke sigui stima otro? Wèl, manera nos a mira, ora nos demostrá nos rumannan ku nos stima nan, nos ta mustra ku nos ta stima Yehova tambe. Pero kon nos por mustra nos rumannan ku nos ta stima nan? Un manera ta di konsolá nan. Pa nos por sigui hasi esei, nos mester sinti kompashon. Kon nos por sigui stima otro? Esei ta dor di hasi tur nos esfuerso pa pordoná e erornan di otro.

19. Dikon foral aworakí ta importante pa nos stima otro?

¹⁹ Dikon foral aworakí ta importante pa nos stima otro? Wak loke Pedro a bisa: “Fin di tur kos a yega serka. P’esei, . . . stima otro intensamente.” (1 Ped. 4:​7, 8) Sí, fin di e mundu malbado akí ta hopi serka. Pues, kiko nos por ferwagt segun ku esaki ta yega mas i mas serka? Hesus a profetisá tokante su siguidónan: “Tur nashon lo odia boso pa motibu di mi nòmber.” (Mat. 24:9) Pa nos por keda fiel na Yehova apesar ku e mundu ta odia nos, nos tin ku keda uní. Si nos stima nos rumannan, hamas Satanas lo por habri nos for di otro pasobra amor “ta e laso perfekto di union.”—Kol. 3:14; Flp. 2:​1, 2.