Referensia pa Material i Tarea pa Reunion Nos Bida i Sirbishi Kristian

4-10 DI MEI

TESORO DI E PALABRA DI DIOS | GÉNESIS 36-37

Buska Hoya Spiritual

it-1-S 735

Edòm

(Kòrá), Edomitanan.

Edòm ta e di dos nòmber òf nòmber di kariño di Esou, e ruman hòmber oochi di Yakòb. (Gén 36:1) Esou a haña e nòmber ei debí ku el a bende su derecho di primogénito pa un tayó di stobá kòrá. (Gén 25:30-34) Pa kasualidat, ora Esou a nase, e tabatin aparensia kòrá. (Gén 25:25) Ademas, gran parti di e tera ku e i su desendientenan a habitá despues di tempu tabatin un koló similar.

it-1-S 618 §1-2

Kustodia

Ora un wardadó di karné òf un kuidadó di bestia a primintí ku lo el a kuida òf wak un tou di bestia, e tabata aseptá kustodia legal di e bestianan akí, esta, tabata haña e responsabilidat di kuida nan. E tabata primintí e doño ku e bestianan lo a haña kuminda i ku lo e no a laga niun hende hòrta nan. Si akaso esei a sosodé, lo e tabatin ku paga e doño di e bestianan pa e pèrdida ku e doño a sufri. Sinembargo, tabatin sierto eksepshon pa loke tabata trata e wardadó su responsabilidat. Pa lei, e no tabata responsabel si algu fuera di su kontrol a sosodé, por ehèmpel, si bestia feros a ataká e tou di bestia. Pero, pa e wardadó por a ser librá di su responsabilidat di kustodia, e mester a bini ku prueba pa mustra e doño, por ehèmpel, kadaver di e bestia ku a ser habraká. Despues di a wak e pruebanan, e doño mester a deklará e wardadó di bestia inosente.

E mes prinsipio akí tabata aplikabel den kaso di kualke propiedat ku a ser konfiá na un hende, asta ora tabata trata di miembro di famia. Por ehèmpel, segun lei, e yu hòmber mas grandi tabata responsabel pa su rumannan mas chikitu. P’esei, for di loke ta registrá na Génesis 37:18-30, nos por komprondé dikon Ruben, siendo yu mayó, tabata asina preokupá pa bida di Yosef ora su rumannan kier a mata Yosef. “Ruben . . . a bisa: ‘Laga nos no kita su bida.’ . . . ‘No drama sanger. . . . no pone man riba dje’—pa e por reskat’é for di nan man, pa hib’é bèk pa su tata.” I ora Ruben a ripará ku Yosef no tabat’ei, el a bira asina anshá ku “el a sker su pañanan” i a sklama: “E mucha no t’ei; i ami, unda lo mi bai?” Ruben tabata sa ku por a ten’é responsabel pa morto di Yosef. Pa skapa di tal responsabilidat, e rumannan di Yosef a trama un kòmplòt pa laga parse ku ta un bestia salbahe a mat’é. Nan a dòp Yosef su túnika den sanger di kabritu. Despues nan a bai serka Yakòb, nan tata i hues, ku a libra Ruben di tur responsabilidat pasobra ora e rumannan di Yosef a trese e túnika na sanger, Yakòb por a konkluí ku un bestia salbahe a mata Yosef.—Gén 37:31-33.

11-17 DI MEI

TESORO DI E PALABRA DI DIOS | GÉNESIS 38-39

Buska Hoya Spiritual

it-2-S 550

Onan

(derivá di un palabra ku ta nifiká “kapasidat pa reprodusí; energia dinámiko”).

Onan tabata e di dos yu hòmber ku Huda tabatin ku un muhé kananeo, yu muhé di Súa. (Gén 38:2-4; 1Kr 2:3) Yehova a kita bida di Er, Onan su ruman hòmber mas grandi, pasobra Er tabata un hòmber malbado den bista di Yehova. Despues ku Er, kende no tabatin yu, a muri, Huda a bisa Onan pa e kasa ku su kuñá, Tamar, esposa di Er. Si nan a haña un yu hòmber, lo e no a bira e fundadó di e famia di Onan, i e herensia di primogénito lo a bai pa e yu akí komo heredero di Er. Si no tabatin heredero, Onan lo a haña e herensia. Ora Onan tabata tene relashon seksual ku Tamar, e tabata “laga su [sémen] basha abou na suela;” e kier a hasi sigur ku Tamar lo no sali na estado. Esaki no tabata un kaso di masturbashon, pasobra e relato ta bisa ku ora e tabata “drumi ku su ruman su esposa,” e tabata laga su sémen basha abou. Esaki ta parse di ta un kaso di coitus interruptus, esta, deliberadamente Onan a evitá ku su sémen a bai den e órgano seksual di Tamar. Pa motibu ku Onan a desobedesé su tata, Yehova a kita Onan su bida i a lag’é muri sin desendensia. Pues, Yehova a kita su bida pa motibu di su golosidat i piká ku el a kometé ora el a keda sin kumpli ku Dios su areglo di matrimonio di sua i no pa motibu di masturbashon.—Gén 38:6-10; 46:12; Num 26:19.

25-31 DI MEI

TESORO DI E PALABRA DI DIOS | GÉNESIS 42-43

“Yosef A Demostrá Dominio Propio”

it-2-S 125 §1

Yosef

Despues ku e mitar rumannan di Yosef a mira kon e situashon a desaroyá, nan a kuminsá ripará ku Dios tabata kastigá nan debí ku nan a bende Yosef komo esklabo. Den presensia di Yosef, sin sa ku tabata Yosef, nan a atmití ku nan tabata kulpabel. Despues ku Yosef a tende su rumannan konfesá i a mira ku nan a arepentí, el a kita bai for di nan i a yora. Ora Yosef a regresá, el a mara Simeon i a laga Simeon keda te ora ku nan a trese su ruman hòmber chikitu p’e.—Gén 42:21-24.

Buska Hoya Spiritual

it-2-S 873 §5

Ruben

Algun di Ruben su bon kualidatnan tabata bisto ora el a konvensé su nuebe rumannan pa tira Yosef den un pos seku en bes di mat’é. Su intenshon tabata pa bai e pos bèk i reskatá su ruman den sekreto. (Gén 37:18-30) Mas ku 20 aña despues, ora su rumannan a ser akusá di ta spion na Egipto i a pensa ku tabata debí ku nan a trata Yosef malu, Ruben a rekordá nan ku e no tabata kómplise den nan kòmplòt pa mata Yosef. (Gén 42:9-14, 21, 22) Despues, ora Yakòb a nenga di laga Benyamin bai ku su rumannan durante nan di dos biahe pa Egipto, Ruben a ofresé su dos yunan komo garantia i a bisa: “Bo por mata mi dos yu hòmbernan si mi no trese Benyamin bèk pa bo.”—Gén 42:37.