Haña Delisia den e Palabra di Dios

FELIS ta e hende kende su “delisia ta den e lei di SEÑOR.” E persona ei ta lesa i meditá riba e Palabra di Dios “di dia i anochi.” (Sal. 1:1, 2) Abo ta sinti e delisia ei? Kon bo por haña mas goso for di e Palabra di Dios?

Skucha Ora Yehova Ta Papia

En bes di djis lesa palabra, purba visualisá e situashonnan. Imaginá stèm di e personahenan. Ora bo lesa e promé kapítulonan di Beibel, tende kon Yehova mes ta revelá, stap pa stap, kiko el a hasi pa e tera por a bira un lugá adekuá pa hende. Skucha ora e ta bisa su Yu, e Trahadó Eksperto, ku ta tempu pa krea e promé hendenan. Wak e esena bo dilanti: Adam ku Eva ta rebeldiá, Dios ta husga nan, anto kaba e ta saka nan for di Paradeis. (Génesis, kap. 1-3) Sinti un rèspèt profundo ora bo lesa tokante un stèm for di shelu ku ta identifiká Hesukristu komo e Yu stimá di Dios, esun ku Dios a manda pa entregá su bida pa humanidat. (Mat. 3:16, 17) Purba imaginá e reakshon di apòstel Huan ora e tende Yehova deklará: “Mira, mi ta hasi tur kos nobo.” (Rev. 21:5) Un kos ta sigur, ta un eksperensia masha agradabel pa lesa e Palabra di Dios den e manera aki!

Si bo sigui lesa e Skritura inspirá, lo bo siña konosé Yehova komo un persona mahestuoso i impreshonante. Lo bo sinti bo sumamente atraí na e Persona aki ku stima nos, ku ta trata nos ku miserikòrdia, ku ta yuda nos si nos ta purba hasi su boluntat humildemente, i ku ta mustra nos kon nos por tin éksito den tur loke nos hasi.—Hos. 1:8; Sal. 8:1; Isa. 41:10.

Mas tempu bo dediká na lesamentu di Beibel, mas satisfakshon lo bo haña, pasobra lo bo komprondé mihó kiko Dios ta spera di bo. Pero lo bo haña hopi mas delisia ku esei. Ora bo lesa algu ku ta yuda bo trata ku problema den un manera sabí, lo bo sinti meskos ku e salmista ku a bisa: “Bo testimonionan ta maravioso; p’esei mi alma ta warda nan.” (Sal. 119:129) Bo tambe lo alegrá ora bo haña sa for di e Skritura kua ta e prinsipionan ku ta yuda bo moldia bo forma di pensa i bo deseonan pa asina esakinan kuadra ku e normanan di Dios.—Isa. 55:8, 9.

Beibel ta perkurá guia moral ku ta sirbi komo protekshon pa nos i ku ta mustra nos e kaminda korekto. Segun nos ta les’é, nos ta komprondé ku Yehova ta un Tata ku sa ki problemanan nos lo haña nos kuné si nos entregá na deseonan karnal imperfekto. E no kier pa nos sufri e konsekuensianan teribel ku ta bini inevitablemente riba esnan ku ta faya ku su normanan moral haltu. E ta interesá den nos i kier pa nos disfrutá mas tantu posibel di bida. Dor di lesa su Palabra nos ta siña apresiá asta mas ainda e bendishon grandi di por tiné komo nos Dios i Tata selestial.

Lesa Beibel Tur Dia

E salmista a bisa di e hende ku ta lesa e Palabra di Dios tur dia: “Tur loke ku e hasi ta prosperá.” (Sal. 1:3) Sí, apesar di nos imperfekshonnan, apesar ku nos ta biba den Satanas su mundu malbado i apesar di Diabel su intentonan pa kaba ku nos, si nos ta lesa e Palabra di Dios regularmente i ta pon’é na práktika, nos por prosperá den tur loke tin di haber ku nos relashon ku Yehova.

Ora nos repasá e pensamentunan di e Kreadó maske ta pa un ratu presioso tur dia, esei por fortalesé nos pa resistí e preshonnan di e sistema bieu aki. Algun persona enkarselá pa motibu di nan fe tabatin apénas un par di versíkulo aki-aya ku nan a haña sitá den artíkulonan di korant. Nan tabata kòrta esakinan, siña nan for di kabes, i meditá riba nan. Yehova a bendishoná nan esfuerso, pasobra segun nan sirkunstansia, nan a hasi loke nan tabata por pa atkerí konosementu for di e Palabra di Dios. (Huan 17:3) Sin embargo, mayoria di nos tin hopi mas libertat ku esei, pues nos no mester kere ku djis lesa rápidamente un solo versíkulo di Beibel pa dia lo tin algun efekto milagroso. Mas bien, nos lo risibí bendishon ora nos ahustá nos prioridatnan pa asina nos por lesa un porshon di Beibel tur dia, pensa riba dje i pon’é na práktika den nos bida.

Realístikamente, e mihó plannan ku nos tin por ser interumpí. Ora esei sosodé, nos ta duna prioridat na loke ta realmente importante. Por ehèmpel, nos lo no keda èksprès sin bebe awa pa un par di dia. Pues anto, sin importá kiko presentá den nos bida diario, nos mester traha tempu pa refreská nos mes ku e awanan di e bèrdat.—Echo. 17:11.

Lesa Henter e Palabra di Dios

Abo personalmente a lesa e Beibel kompleto? Tin hende ta haña e idea di kuminsá lesa for di Génesis bai kaba te na Revelashon algu muchu pisá. Pa e motibu ei, hopi hende ku kier a lesa e Beibel kompleto a kuminsá promé ku e Skritura Griego Kristian. Dikon? Kisas pasobra nan por a mira mas fásilmente kon e bukinan bíbliko aki den un forma práktiko por yuda nan kana den e pasonan di Kristu. Òf kisas tabata pasobra e Skritura Griego Kristian no a parse asina largu, siendo ku e ta un poko mas ku un kuart di Beibel. Pero despues ku nan a kaba di lesa e 27 bukinan ei, nan a bai konsentrá riba e 39 bukinan di e Skritura Hebreo i a kuminsá lesa nan i disfrutá di nan kontenido. Pa ora ku nan a kaba ku e Skritura Hebreo, ya nan a haña e kustumber kaba di lesa Beibel ku regularidat, pues nan a sigui ku esei i a bolbe lesa e Skritura Griego Kristian pa di dos bes, i nunka mas a stòp ku e kustumber ei. Mare bo tambe por hasi lesamentu di e Palabra di Dios tur dia un kustumber permanente.

Tin un persona den bo famia òf den kongregashon ku no por lesa? Pakiko bo no ta ofresé pa lesa Beibel regularmente p’e? Abo lo benefisiá, i e persona tambe lo benefisiá segun ku e ta meditá riba loke e ta tende, anto ta pon’é na práktika den su bida.—Rev. 1:3.

Ku tempu kisas lo bo kier studia sierto pasashinan di Beibel mas a fondo. Den algun kaso, e análisis aki por yuda bo komprondé mas mihó e relashon ku tin entre e vários partinan di Beibel. Si bo Beibel tin referensia den márgen, esakinan por dirigí bo na detayenan históriko i na relatonan paralelo. Tambe nan lo por yuda bo komprondé e sirkunstansianan ku a hiba na e komposishon di vários salmo i tambe di e kartanan ku e apòstelnan di Hesukristu a skirbi. E buki Perspikasia pa Komprondé e Skritura ta duna masha hopi informashon adishonal tokante hende, lugá i kualidatnan menshoná den Beibel. E tin tabèl ku ta hala atenshon na kumplimentu di profesianan bíbliko, ku ta mustra kua rei i profeta a biba den mesun époka, i ku ta duna e posibel fechanan di hopi suseso bíbliko.

Segun bo ta meditá riba loke bo ta siña, lo bo komprondé e motibu dikon sierto situashonnan a surgi den e pueblo di Dios. Tambe lo bo deskubrí dikon Yehova a trata su pueblo di sierto manera. Lo bo mira kon Yehova ta evaluá aktuashon di gobièrnu-, pueblo- i hendenan individual. Esaki lo duna bo un mihó komprondementu di su forma di pensa.

Historia di Beibel lo bira mas interesante pa bo ora bo imaginá e esenario kaminda e susesonan a tuma lugá. Mapa di paisnan bíbliko ta revelá e karakterístikanan di e tereno i tambe e distansia entre lugánan. Por ehèmpel, na unda mas o ménos e israelitanan a krusa Laman Kòrá? Kon grandi e Tera Primintí tabata? Kon leu Hesus a kana ora el a efektuá su ministerio riba tera? Ki paisahe Pablo a mira durante su biahenan komo misionero? Mapa- i deskripshonnan geográfiko ta agregá detayenan ku lo duna bida na bo lesamentu. Unda bo por haña mapa di paisnan bíbliko? Tin vários den e Tradukshon di Mundu Nobo di e Santu Skritura. E volúmennan di e buki Perspikasia tin mas o ménos 70 mapa, i na final di e promé volúmen tin un lista di nan tur. Usa e Indèks di Publikashonnan Watch Tower pa lokalisá otro mapanan. Si bo no tin e publikashonnan aki, usa mapanan publiká den E Toren di Vigilansia pa yuda bo den bo lesamentu di Beibel.

Den e Skritura Hebreo, Rei David a alabá Yehova bisando: “Ki presioso bo pensamentunan ta pa mi, o Dios! Ki grandi nan kantidat ta!” (Sal. 139:17) Den e Skritura Griego Kristian, apòstel Pablo a alabá Yehova pasobra Yehova “a resplandesé den nos kurason pa duna e lus di e konosementu di e gloria di Dios den kara di Kristu.” (2 Kor. 4:6) Pablo a biba vários siglo despues di David, pero nan tur dos tabatin delisia den e Palabra di Dios. I abo tambe por tin e delisia ei si bo tuma tempu pa lesa tur loke Yehova ta brinda bo mediante e páginanan di su Palabra inspirá.