Studio di Famia Cu Ta Trece Goso

“Cu conocimentu e kambernan interior lo ser yená cu tur cos precioso i agradabel di balor,” Bijbel ta bisa. (Proverbionan 24:4) E cosnan precioso aki di balor no ta djis tesoronan material sino ta incluí berdadero amor, temor piadoso i fe firme. Cualidadnan asina en berdad ta crea un bida di famia ricu. (Proverbionan 15:16, 17; 1 Pedro 1:7) Pero, pa adkerí nan nos tin cu trece e conocimentu di Dios den nos hogar.

ECABES di famia tin e responsabilidad di inculcá e conocimentu aki den e miembronan di famia. (Deuteronomio 6:6, 7; Efesionan 5:25, 26; 6:4) Un dje mihó maneranan di haci esaki ta mediante un studio regular di famia. Ki un deleite esaki por ta p’e participantenan ora e studio ta ser conducí den un manera cu ta tantu instructivo como placentero! Laga nos, anto, considerá algun punto esencial den conducí un studio di famia eficas.a

Un studio di famia ta mas eficas ora e ta regular. Si lagu’é pa casualidad of pa solamente ora tin chens, probablemente e ta iregular si e ta bai dor mes. P’esei bo tin cu ‘cumpra tempu’ p’e studio. (Efesionan 5:15-17) Por ta hopi difícil pa scoge un ora regular cu ta cumbiniente pa tur. “Nos tabatin problema pa tene nos studio di famia regular,” un cabes di famia ta confesá. “Nos a purba diferente ora te cu finalmente nos a haña un tempu un poco mas lat parti anochi cu a cumbiní nos. Awor nos studio di famia ta regular.”

Una bes bo tin un tempu cumbiniente, cuidou pa no laga distraicionnan stroba e studio. “Ora nos tabata haña bishita miéntras cu nos tabata studia,” Mariab cu awor tin 33 aña di edad ta corda, “Papi tabata bisa nan pa warda te ora nos caba di studia. I pa loke ta yamada di telefon, e simplemente tabata bisa e persona cu lo e yama bek despues.”

Sin embargo, esaki no ta nificá cu no por tin espacio pa flexibilidad. Situacionnan di emergencia of sucesonan imprevisto por presentá, i kisas ta necesario pa cancelá of posponé e studio de bes en cuando. (Eclesiástes 9:11) Pero tene cuidou pa no laga ningun di e cosnan aki kibra bo rutina.—Filipensenan 3:16.

Con largu un studio mester dura? Robert, kende a lanta un yu muher i un yu homber exitosamente, ta bisa: “Generalmente nos studionan tabata dura un ora. Ora e muchanan tabata yong, nos tabata purba tene nan interes bibu durante e ora dor di considerá un variedad di cosnan, manera un par di paragraf den e artículo di studio den E Toren di Vigilancia, cierto pasashinan for di Bijbel, i partinan di otro publicacionnan.” Maria ta corda: “Tempu ami cu mi dos ruman muhernan tabata hopi yong, nos studio tabata dura como 20 minuut dos of tres biaha pa siman. Segun cu nos a crece, nos studio semanal di famia tabata dura mas o ménos un ora.”

Kico Nos Mester Studia?

Si plantia e pregunta aki ora tur hende t’ei pa studia, esei lo resultá den frustracion i perdementu di tempu balioso di studio. Si esei ta e caso, yunan lo no tin nada specífico pa anticipá i pronto lo perde interes. P’esei, selectá di antemano un dje publicacionnan di Sociedad pa considerá.

“E esclabo fiel i discreto” a percurá un abundancia di publicacionnan pa scoge for di dje. (Mateo 24:45-47) Tal bes bo por usa un buki cu e famia no a studia ainda. I ta ki un deleite pa considerá partinan selectá for di Perspicacia para comprender las Escrituras si e volúmennan aki ta disponibel den bo idioma! Por ehempel, lo bo por repasá e artículo tocante e Cena di Señor durante e simannan promé cu Memorial. Hopi famia ta gusta prepará e Studio di Toren di Vigilancia p’e siman. Pero e artículonan secundario den E Toren di Vigilancia tambe ta percurá material excelente pa studio. E cabes di famia, cu conocé e necesidadnan spiritual dje famia, ta den e mihó posicion pa dicidí ki publicacionnan mester studia.

“Semper nos a studia un publicacion selectá di antemano,” Maria ta corda. “Pero ora un pregunta a bin padilanti of a surgi un situacion na scol, e ora ei nos tabata pasa p’e informacion cu a aplicá n’e situacion.” Cosnan cu ta exigí atencion special, manera e problemanan cu hóbennan ta enfrentá na scol, trahamentu di cita cu sexo opuesto, actividadnan despues di scol i cosnan por estilo, ta presentá. Ora esaki bin padilanti, selectá e artículonan of publicacionnan cu ta trata cu e problema pendiente. Si bo mira informacion den e último edicion di E Toren di Vigilancia of Spierta! cu lo bo kier cubri cu e famia mesora, no vacilá pa haci areglo pa esei. Naturalmente, ta bon pa informá e miembronan di famia dje cambio delantá. Pero haci sigur di bolbe bek na e material programá una bes cu bo atendé n’e necesidad.

Tene e Ambiente Trankil

Hende ta siña mihó den un atmósfera trankil. (Santiago 3:18) P’esei cultivá un ambiente relahá pero respetuoso. Un cabes di famia na Merca ta bisa: “Sea nos ta studia den sala of den balcon, nos ta purba sinta basta cerca di otro en bes di plama den un espacio grandi. Pa nos, esaki ta crea un sintimentu caluroso.” I Maria tin e grato recuerdo aki: “Ami cu mi ruman muhernan tabatin mag di scoge unda den e cas nos tabata kier a tene e studio e siman ei. Esei a pone nos sinti nos confortabel.” No lubidá cu bon lus, bon lugá pa sinta i un ambiente alegre sin muchu potoshi, tur ta contribuí na trankilidad. Teniendo cos di bebe i di come p’e famia despues dje studio tambe ta yuda haci e anochi placentero.

Algun famia asta ta scoge pa incluí otro famianan den nan studio na algun ocasion, haciendo e studio mas interesante i aumentando e variedad di comentarionan. Ora esnan nobo den e berdad ta ser invitá pa participá den e areglo aki, nan por saca beneficio for di observá un cabes di famia experenciá conducí un studio di famia.

Duna Bida na Bijbel

Haci periodonan di studio bibu p’e yunan, i nan lo anhelá ansiosamente na nan. Bo por haci esaki dor di animá yunan chikitu pa pinta cuadro di esenanan di Bijbel. Ora ta apropiado, laga yunan protagonisá papelnan den suceso i dramanan bíblico. Cu yu chikitu no ta necesario pa pega na un método formal di pregunta i contesta. Lesa i conta relatonan tocante personahenan bíblico ta un manera placentero pa inculcá principionan piadoso. Robert, mencioná anteriormente, ta corda: “Algun biaha nos tabata haña asignacion pa lesa pasashinan di Bijbel, tumando turno, lesando e vários ‘bosnan.’ Yunan por ser invitá pa scoge e personahe cu nan kier representá den e lesamentu.

Uso di mapa i tabèlnan lo yuda yunan mas grandi visualisá e áreanan i rasgonan dje tera unda e sucesonan cu ta ser considerá a tuma lugá. Claramente, cu un tiki imaginacion, un studio di famia por ser hací bibu i variá. I e yunan lo forma un anhelo p’e Palabra di Dios.—1 Pedro 2:2, 3.

Yuda Tur Participá

Pa yunan disfrutá dje studio, nan tin cu sinti nan enbolbí tambe. Sin embargo, kisas no ta fácil pa haña yu di diferente edad participá. Pero un principio di Bijbel ta declará: “Esun cu ta presidí, lagu’e hacié cu berdadero empeño.” (Romanonan 12:8) Ser entusiasmá ta yuda, pasobra entusiasmo ta contagioso.

Ronald ta enbolbé su yu muher di cincu aña, Dina, dor di lagu’e lesa e subtemanan den e material di studio i pidié comentá riba e plachinan. Segun cu e Memorial dje morto di Cristo tabata acercá aña pasá, el a enfocá riba e plachinan relevante den e buki E homber mas importante cu hamás a biba.* E ta remarcá: “Esaki a yud’é comprendé e importancia dje suceso.”

Cu su yu muher di dies aña, Misha, Ronald ta bai un stap mas aleu. “Misha a progresá te n’e punto unda e por comprendé no solamente loke e plachinan ta, sino tambe e nificacion cu nan ta representá,” Ronald ta bisa. “Pues ora nos tabata considerá e buki Revelacion—su gran culminacion ta cerca!,c nos tabata concentrá riba e nificacion dje plachinan, i esaki a yud’é.”

Segun cu yunan ta crece bira tiener, invitá nan pa haci aplicacion práctico dje material cu ta ser considerá. Ora preguntanan ta presentá durante e studio, asigná partinan di investigacion. Robert a haci esei ora su yu homber, Paul, di 12 aña di edad, a haci pregunta tocante un club di scol recien formá den cua tabatin e wega di ‘Dungeons and Dragons.’ Paul i otronan den e famia a busca informacion usando e Watchtower Publications Index, i nan a repas’é na nan studio di famia. “Como resultado,” Robert ta bisa, “mesora Paul a comprendé cu e wega tabata malu pa cristiannan.”

Tambe Robert tabata duna asignacion pa haci investigacion na otro ocasionnan. Su esposa, Nancy, ta corda: “Ora nos a investigá e apostelnan di Jesus, nos cada un a ser asigná un apostel tur siman. Ki emocionante tabata pa mira e muchanan presentá nan informe cu entusiasmo n’e studio di famia!” Dor di haci nan mes investigacion i compartí e informacion cu e famia, yunan ta ser yudá pa ‘crece cu Jehova.’—1 Samuel 2:20, 21.

Hacimentu di pregunta—preguntanan di punto di bista i tambe preguntanan guiador—tambe ta un manera excelente pa enbolbé yunan. E Gran Maestro, Jesus, a haci preguntanan di punto di bista, manera, “Kico bo ta pensa?” (Mateo 17:25) “Ora cualkier un di nos tabatin un pregunta, nos mayornan nunca tabata contestá nos directamente,” Maria ta corda. “Semper nan tabata haci preguntanan guiador, yudando nos razoná riba e asuntu.”

Comunicá—No Iritá!

E goso di un studio di famia ta aumentá ora tur presente por comunicá nan punto di bista i sintimentunan sin miedu di ser ridiculisá. Pero “bon comunicacion durante un studio di famia ta posibel solamente si e liñanan di comunicacion ta habrí otro ora,” un tata ta bisa. “Bo no por pretendé di tin bon comunicacion solamente durante e periodo di studio.” Haci tur bo esfuerso pa evitá comentarionan sin pensa cu ta heridá, manera, ‘Esei ta tur? M’a kere bo tabatin algu importante di bisa’; ‘Esei ta co’i kens’; ‘Wel, ta kico bo ta verwagt? Ta mucha bo ta.’ (Proverbionan 12:18) Sea compasivo i misericordioso cu bo yunan. (Salmo 103:13; Malakías 3:17) Haña placer den nan, i apoyá nan segun cu nan ta haci esfuerso pa aplicá loke nan ta siña.

E ambiente dje studio di famia mester ta di tal forma cu e mente dje yu ta receptivo pa instruccion. “Ora bo cuminsá corigí yunan,” un mayor exitoso di cuater yu ta splica, “bo tin un auditorio un poco hostil.” Den un ambiente asina, e informacion probablemente lo no penetrá. Pues evitá di haci e periodonan di studio sesionnan pa disiplina i castigu. Si esakinan ta necesario, duna nan despues i individualmente.

E Esfuerso Ta Bale la Pena

Ta tuma tempu i esfuerso pa edificá un famia spiritualmente ricu. Pero e salmista ta declará: “Mira! Yunan ta un herencia for di Jehova; e fruta di barica ta un recompensa.” (Salmo 127:3) I e mayornan ta ser encargá cu e responsabilidad di “cria [yunan] den e disiplina i reglamentu mental di Jehova.” (Efesionan 6:4) P’esei, desaroyá e abilidadnan pa conducí un studio di famia eficas i placentero. Haci bo best pa proveé “e lechi no adulterá cu ta pertenecé n’e palabra,” di manera cu bo yunan por “crece na salbacion.”—1 Pedro 2:2; Juan 17:3.

[Nota]