Hóbennan Sa Puntra . . .

Pakico Mi Mihó Amigu A Muda Bai?

‘BO TA parce manera ta bo mihó amigu bo a perde.’ Esaki ta loke nan ta bisa ora un hende ta parce un tiki tristu of deprimí. Pero ora en berdad bo a perde bo mihó amigu, e dicho ta haña un nificacion completamente nobo.

Al fin i al cabo, berdadero amistad ta algu special i precioso. Bijbel ta bisa: “Un berdadero compañero ta stima na tur tempu, i ta un ruman cu ta nací pa ora tin angustia.” (Proverbionan 17:17) Bon amigunan ta duna nos compañerismo i apoyo. Nan ta yuda nos crece den sentido emocional i spiritual. Maske nos por tin hopi amigu casual i conocínan, generalmente e individuonan cu nos por confia algu i den ken nos por pone berdadero confiansa ta scars.

Por lo tantu, si bo mihó amigu a muda bai, ta di comprendé cu bo por sintí bo destrosá. Un hóben cu yama Bryan a corda con el a sinti ora su mihó amigu a muda bai. “Mi tabatin miedu, i a sintí mi solitario i di hùrt,” el a bisa. Kisas bo ta sinti mescos.

Enfrentando Realidad

Reflehando riba e motibunan pakico bo amigu a muda por yuda. Sigur-sigur, esei no tabata pa falta di aprecio pa bo amistad. Mudamentu a bira un parti establecí di bida moderno. Tur aña na Merca so, mas cu 36 miyon hende ta muda! Segun e Oficina di Censo di Merca, e mericano promedio lo muda 12 biaha den su bida.

Pakico tur e mudamentu aki? E motibunan ta varia. Hopi famia ta muda afin di obtené mihó trabou i bibienda. Den paisnan den desaroyo, guera i pobresa a forsa miyones di famia pa muda. I segun cu hóbennan ta bira adultonan hóben, hopi ta scoge pa muda bai for di cas pa biba riba nan mes. Algun ta muda pa bai casa. (Génesis 2:24) I otronan por muda pa sigui tras di interesnan spiritual. (Mateo 19:29) Entre Testigonan di Jehova, hopi a bandoná e comodidad di nan ambiente acustumbrá pa sirbi den áreanan—kisas asta den paisnan den estranheria—caminda tin mas necesidad di ministernan cristian. Algun ta muda den nan mes pais pa bai sirbi na Betel, manera e facilidadnan pa supervisá e obra di Testigonan di Jehova ta ser yamá. Sí, maske cuantu nos stima nos amigunan, nos mester mira esaki como un echo di bida cu segun tempu ta pasa, nan probablemente lo muda.

Sea cual sea e motibu pa bo amigu su mudamentu, bo por puntra bo mes con un dia lo bo recuperá dje pérdida. Pero aunke ta natural pa sintí bo un tiki solitario i deprimí pa poco tempu, probablemente bo ta realisá cu cana henter dia den cas cu un cara tristu lo no yuda ni’un tiki. (Proverbionan 18:1) P’esei, laga nos considerá algun cos cu por yuda.

Keda den Contacto cu Otro

“Realisá cu boso amistad no a caba,” e hóben Bryan ta consehá. Sí, e echo cu bo mihó amigu a muda definitivamente lo cambia boso relacion, pero esei no kier men cu boso amistad tin cu muri. Consehero di tiener, Dr. Rosemarie White a bisa: “Na cualkier etapa di bida ta difícil pa perde un ser kerí, pero e manera pa trata cuné ta simplemente di consider’é como un cambio, i no como un porta cu a cera.”

Kico bo por haci pa mantené e porta di amistad habrí? Considerá e relato bíblico di David cu Jonatan. Apesar dje diferencia grandi den edad, nan tabata amigunan masha cerá mes. Ora circunstancianan a forsa David pa hui bai den exilio, nan no a separá for di otro sin bisa un palabra. Al contrario, nan a confirmá nan amistad cu lo no muri, asta cerando un pacto, of palabracion, pa keda amigu.—1 Samuel 20:42.

Di igual manera, lo bo por papia cu bo amigu promé cu e bai. Laga bo amigu sa cuantu bo ta apreciá e amistad i cuantu bo kier mantené e liñanan di comunicacion habrí. Patty i Melina, amiganan cerá cu awor ta separá pa 8.000 kilometer di tera i océano, a haci exactamente esei. “Nos ta planeá pa keda den contacto cu otro,” Patty a splica. Sin embargo, plannan asina por faya, a ménos cu boso haci areglonan fiho.—Compará cu Amos 3:3.

Bijbel ta bisa nos cu ora apostel Juan no tabata por a mira su amigu Gayo, el a keda den contacto cuné dor di ‘skirbié cu ink i pen.’ (3 Juan 13) Boso tambe por palabrá pa manda otro un carta of un tarheta regularmente, kisas un bes pa siman of un bes pa luna. I si boso mayornan no tin nada contra pa paga yamadanan di largu distancia, kisas boso por yama otro tempu-tempu pa conta otro tocante loke a sosodé últimamente den boso bida. Of kisas boso lo por palabrá pa manda otro mensahenan grabá riba caset of video. Den futuro kisas lo ta asta posibel pa haci areglo pa un bishita di fin di siman of un vacansi huntu. Asina ei e amistad por sigui crece.

Yenando e Bashí

Asta asina, e echo cu bo mihó amigu a bai lo laga un bashí den bo bida. Como resultado, kisas bo ta haña cu awor bo tin mas tempu disponibel. Wel, no laga e tempu ei bai perdí. (Efesionan 5:16) Us’é pa haci algu productivo—kisas bo por siña toca un instrumento musical, dominá un idioma nobo of practicá un hobi. Haci diligencia pa esnan den necesidad ta un otro uso productivo di tempu. Si bo ta un Testigo di Jehova, bo por aumentá bo participacion den e actividad di predicacion público. (Mateo 24:14) Of bo por cuminsá un proyecto interesante di studio di Bijbel.

Ademas, apostel Pablo a consehá cristiannan na Corinto pa “hancha”—esta, pa incluí otronan den nan círculo di amigu. (2 Corintionan 6:13) Kisas bo a pasa asina tantu tempu cu solamente un amigu cu bo a pasa por haltu di otro potencial amigunan. Hóbennan entre Testigonan di Jehova ta haña cu hopi bes tin oportunidadnan na abundancia ei mes den nan congregacion local. Por lo tantu, trata na yega n’e reunionnan di congregacion trempan i keda un tiki despues dje reunionnan. Esaki lo duná bo mas tempu pa siña conocé hende. Congresonan cristian i reunionnan social chikitu ta duna otro oportunidadnan pa haña amigunan nobo.

Sin embargo, un palabra di cautela ta na su lugá: No sea asina lihé pa haña amigunan nobo cu bo ta bai cuminsá asociá íntimamente cu hóbennan cu no ta compartí bo meta i balornan spiritual. Hóbennan asina por tin un mal influencia riba bo i por hací bo mas daño cu bon. (Proverbionan 13:20; 1 Corintionan 15:33) Asociá solamente cu hóbennan cu inclinacion spiritual cu un reputacion di tin bon conducta.

Ora bo haña un hende asina, cultivá e amistad dor di planea pa haci algu huntu. Come un cuminda huntu. Bishitá un museo. Bai cana. Haci areglo pa pasa un dia huntu den e ministerio cristian, bishitando hende cu e bon nobo di Dios su Reino. Cu tempu i esfuerso, e amistad nobo por crece. Pa motibu cu amor cristian ta unu cu ta expandé su mes—e ta “hancha” pa incluí otronan—ora bo haña amigunan nobo, bo no tin nodi sinti cu bo ta birando desleal na bo amigu cu a muda bai.

Tambe bo por probechá dje oportunidad pa hala mas cerca di esnan cu ta stimá bo mas—bo mayornan. Nan por ta un gran yudansa, maske na cuminsamentu bo por sinti incómodo pa busca nan compania. Un hóben cu yama Josh a bisa: “Casi mi mester a forsa mi mes pa pasa tempu cu nan, ya cu mi no tabata masha cerá cu mi mama ni mi tata n’e tempu ei. Pero awor nan ta mi mihó amigunan!”

Corda, tambe, cu ainda bo tin un amigu den shelu. Manera Dan di 13 aña a bisa, “si bo wak bon, bo no ta bo so pasobra ainda bo tin Jehova.” Nos Tata celestial ta semper disponibel pa nos mediante oracion. Lo e yudá bo trata cu e situacion difícil aki si bo confia den dje.—Salmo 55:22.

Mantené un Punto di Bista Positivo

E sabí Rey Sálomon a duna e conseho aki: “No bisa: ‘Pakico a sosodé cu e dianan di ántes a resultá di ta mihó cu esakinan?’” (Eclesiástes 7:10) Cu otro palabra, no keda biba den pasado; probechá dje tempu presente cu tur su oportunidadnan. Bill, cu awor tin bint’i picu aña, a haci net esei ora el a perde su mihó amigu. El a corda: “Despues di poco tempu mi a cuminsá haña amigunan nobo i no a keda pensa mes tantu riba ántes. Mi a purba prepará pa futuro i biba den presente.”

E sugerencianan aki por yuda, pero tog ta tristu ora bo mihó amigu muda bai. Kisas lo dura basta tempu promé cu e dolor dje recuerdonan dje dushi tempu cu boso a pasa huntu kita. Djis corda, cambio ta un parti di bida i e ta duná bo un chens pa madurá i crece. Maske por parce cu no ta posibel pa reemplasá un amigu special completamente, bo por desaroyá cualidadnan cu lo hací bo “agradabel, tantu for dje punto di bista di Jehova como di esun di hende.” (1 Samuel 2:26) Si bo haci esei, semper lo bo tin un persona cu bo por yama bo amigu!

[Plachi na página 15]

Yama bo mihó amigu ayó ta un experencia doloroso