Ora Morto Ta Nificá Morto

“Un cachó bibu ta den un mihó situacion cu un leon morto. Pasobra e bibunan ta conciente cu nan lo muri; pero en cuanto e mortonan, nan no ta conciente di nada en absoluto, tampoco nan no tin salario mas, pasobra e recuerdo di nan a ser lubidá.” —Eclesiástes 9:4, 5.

HOPI hende ta kere algu tocante un alma cu ta sigui biba despues di morto of cu ta pasa dor di un cantidad di ciclo di reencarnacion. Algun hende ta asta kere cu hende por bin bek for di morto. Poco tempu pasá a puntra Thomas Lynch, agente funerario, su opinion riba e cuestion di bida despues di morto. El a bisa: “E hendenan cu ta mira tunel di lus etcétera, no a bin bek for di morto. Loke sí a pasa ta cu nan ta bai mas ayá di nos abilidad di midi e señalnan di bida. Pasobra ‘morto’ bo ta ora bo no bini bek.”—The New York Times Magazine.

Pa miles di aña Bijbel tabatin rason. “Un cachó bibu ta den un mihó situacion cu un leon morto. Pasobra e bibunan ta conciente cu nan lo muri; pero en cuanto e mortonan, nan no ta conciente di nada en absoluto, tampoco nan no tin salario mas, pasobra e recuerdo di nan a ser lubidá.” (Eclesiástes 9:4, 5) Un bishita corticu na cualkier santana bieu lo confirmá e berdad aki unbes.

Acaso esei kier men cu no tin absolutamente ningun speransa pa e mortonan? Un cos ta sigur: Bijbel no ta ofrecé ningun base pa kere den un alma inmortal cu ta sigui biba despues di morto. (Génesis 2:7; Ezekiel 18:4, 20) Pero sí Jesucristo a predicá tocante un resureccion na bida den un paradijs restorá riba tera. Su siguidó hudiu Marta, kende su ruman, Lázaro, a caba di fayecé, a kere den resureccion, pasobra el a bisa tocante Lázaro: “Mi sa cu lo e lanta den e resureccion riba e último dia.” (Juan 11:24) Riba esaki, Jesus a contestá: “Ami ta e resureccion i e bida. Esun cu ehercé fe den mi, asta si e muri, lo bolbe na bida; i tur cu ta bibu i ta ehercé fe den mi lo no muri hamas. Abo ta kere esaki?” (Juan 11:25, 26) Mas promé cu esei, el a bisa: “No straña boso riba esaki, pasobra e ora ta bini den cua tur esnan cu ta den grafnan conmemorativo lo tende su bos, i lo sali, esnan cu a haci bon cosnan pa un resureccion di bida, esnan cu a practicá cosnan baho pa un resureccion di huicio.” Pero, ripará cu Jesus no a mencioná nada tocante un alma inmortal!—Juan 5:28, 29; Lucas 23:43.

[Komentario na página 31]

“ ‘Morto’ bo ta ora bo no bini bek.”

Thomas Lynch, agente funerario