Nan A Haci e Boluntad di Jehova

Daniel A Sirbi Dios cu Constancia

TA ALGU straño pa e curso di historia cambia den un drumi lanta. Tog, esei a sosodé na 539 P.E.C., ora e Imperio Babilónico a ser tumbá dor dje medonan i e personan den cuestion di un par di ora. P’e aña ei, Jehova su profeta Daniel tabata bibando como un exiliado hudiu na Babilonia pa casi 80 aña. Probablemente den su 90 i picu aña, Daniel tabata cla pa enfrentá un dje pruebanan di mas grandi di su integridad na Dios.

Despues dje caida di Babilonia, inicialmente cosnan a parce di bai fácil pa Daniel. E rey nobo tabata Dario e medo, un homber di 62 aña di edad cu a mira Daniel cu aprobacion. Un dje promé actonan di Dario como rey tabata pa nombra 120 sátrapa i pa promové tres homber n’e rango di alto funcionario.a Daniel tabata un dje tres hombernan privilegiá aki. Reconociendo Daniel su potencial excepcional, Dario tabatin asta intencion di dun’é e posicion di promé minister! Sin embargo, net e ora ei, algu a sosodé cu a cambia abruptamente e plannan dje rey.

Un Plan Mañoso

Daniel su compañeronan alto funcionario, compañá pa un grupo grandi di sátrapa, a acercá e rey cu un idea fasinante. Nan a roga Dario pa establecé un ley cu ta stipulá: “Ken cu haci un peticion na cualkier dios of hende durante trinta dia excepto na abo, O rey, mester ser tirá den e cueba di leon.” (Daniel 6:7) Por a parce na Dario cu e hombernan aki tabata declarando nan lealtad na dje. Tambe Dario por a razoná cu e ley aki lo por a yud’é, un stranhero, pa reforsá su posicion como cabes dje reino.

Sin embargo, e alto funcionarionan i e sátrapanan no a proponé e decreto aki pa e causa dje rey. Nan tabata “busca pa haña algun pretexto contra Daniel relacioná cu e reino; pero no tabatin ningun pretexto ni nada corupto cu nan por a haña, ya cu e tabata digno di confiansa i ningun negligencia ni nada corupto a ser hañá den dje.” Pues e hombernan mañoso aki a razoná: “Nos lo no haña den e Daniel aki ningun pretexto en absoluto, excepto si nos tin cu hañ’é contra dje den e ley di su Dios.” (Daniel 6:4, 5) Conciente cu Daniel tabata haci oracion diariamente na Jehova, nan a busca pa haci esaki un crímen castigabel cu morto.

Tal bes e alto funcionarionan i e sátrapanan a carga rencor pa cu Daniel pasobra e “tabata distinguiendo su mes constantemente riba [nan], ya cu un spiritu extraordinario tabata den dje; i e rey tabatin intencion di hals’é riba tur e reino.” (Daniel 6:3) Daniel su onrades kisas a crea un freno indeseabel contra corupcion i soborno. Sea cual sea e caso, e hombernan aki a convencé e rey pa firma e decreto, haciend’e parti di “e ley dje medonan i e personan, cu no ta ser anulá.”—Daniel 6:8, 9.

Daniel Ta Keda Firme

Despues di haña sa tocante e statuto nobo, Daniel a stop di haci oracion na Jehova? Di ningun manera! Hincando rudia den e kamber dje dak di su cas, el a haci oracion na Dios tres bes pa dia, “manera e tabata haci regularmente promé cu esaki.” (Daniel 6:10) Segun cu e tabata haci oracion, su enemigunan “a drenta na boshi i a haña Daniel ta haci peticion i roga fabor dilanti di su Dios.” (Daniel 6:11) Ora nan a trece e asuntu na atencion dje rey, Dario a keda afligí cu e ley cu el a firma lo a incriminá Daniel. “Te ora solo a baha el a keda busca moda di libr’é,” e relato ta bisa nos. Pero ni e rey no por a revocá e ley cu el a establecé. P’esei Daniel a ser hibá n’e cueba di leon, evidentemente un lugá hundu of subteráneo. “Bo Dios kende bo ta sirbi cu constancia, e mes lo rescatá bo,” e rey a sigurá Daniel.—Daniel 6:12-16.

Despues di un anochi sin drumi i na yuna, Dario a bai lihé n’e cueba. Daniel tabata bibu i ileso! E reaccion dje rey tabata inmediato. El a laga Daniel su enemigunan i nan famianan ser tirá den e cueba di leon como nan castigu merecí. Tambe Dario a laga anunciá atrabes dje reino cu “den tur dominio di mi reino, hende tin cu tembla i teme dilanti e Dios di Daniel.”—Daniel 6:17-27.

Les pa Nos

Daniel tabata un ehempel excelente di fieldad. Asta e rey, kende no a adorá Jehova, a ripará cu Daniel a sirbi Dios “cu constancia.” (Daniel 6:16, 20) E palabra arameo fundamental traducí como “constancia” básicamente ta nificá “move den un círculo.” E ta duna idea di continuidad. Ki bon esaki ta describí Daniel su integridad continuo na Jehova!

Daniel a desaroyá un patronchi di constancia hopi tempu promé cu el a ser tirá den e cueba di leon. Como un exiliado yong na Babilonia, el a nenga di tuma cuminda of bebida prohibí p’e Ley di Moises of contaminá dor di ritual pagano. (Daniel 1:8) Mas despues, cu curashi el a declará e mensahe di Dios n’e rey babilónico, Nabucodonosor. (Daniel 4:19-25) Solamente algun ora promé cu e caida di Babilonia, Daniel a proclamá sin miedu e huicio di Dios na Rey Belsasar. (Daniel 5:22-28) Pues ora Daniel a enfrentá e cueba di leon, el a sigui den e curso fiel cu el a establecé.

Abo tambe por sirbi Jehova cu constancia. Bo ta un hóben? Anto actua awor pa desaroyá un patronchi di constancia dor di rechasá e mal asociacion i conducta corupto dje mundu aki. Si bo ta sirbiendo Dios pa algun tempu, mantené un patronchi di awante fiel. No entregá, pasobra cada prueba cu nos ta enfrentá ta duna nos un oportunidad pa mustra Jehova cu nos ta dicididu na sirbié cu constancia.—Filipensenan 4:11-13.

[Nota]