Jehova Ta Duna Pas i Berdad na Abundancia
“Lo mi sana nan i lo mi revelá na nan un abundancia di pas i berdad.”—JEREMIAS 33:6.
1, 2. (a) Pa loke ta pas, kico echonan dje nacionnan ta mustra? (b) Na 607 P.E.C., ki les Jehova a siña Israel tocante pas?
PAS! Ki deseabel esei ta, tog ki scars e tabata den historia humano! Siglo 20, specialmente, no tabata un siglo di pas. Mas bien, el a mira e dos gueranan di mas destructivo den historia humano. Despues dje promé guera mundial, e Liga di Nacionnan a ser lantá pa mantené pas mundial. E organisacion ei a fracasá. Despues di e segundo guera mundial, e organisacion di Nacionnan Uní a ser establecí cu e mésun meta. Nos tin cu solamente lesa e corantnan di tur dia pa mira con e tambe ta fracasando totalmente.
2 Nos mester keda sorprendí cu organisacionnan humano no por trece pas? Di ningun manera. Mas cu 2.500 aña pasá, e pueblo scogí di Dios, Israel, a siña un les relacioná cu esaki. Den e di siete siglo P.E.C., Israel su pas a ser menasá dor di Babilonia, cu tabata subiendo na poder. Israel a acudí na Egipto en busca di pas. Egipto a fracasá. (Jeremías 37:5-8; Ezekiel 17:11-15) Na 607 P.E.C., ehércitonan babilónico a tumba e murayanan di Jerusalem i a kima e tempel di Jehova. Asina Israel a siña na mal manera e banidad di confia den organisacionnan humano. En bes di disfrutá di pas, e nacion a ser mandá den exilio na Babilonia.—2 Crónicanan 36:17-21.
3. Na cumplimentu di Jehova su palabranan mediante Jeremías, ki sucesonan histórico a siña Israel un di dos les vital tocante pas?
3 Sin embargo, promé cu e caida di Jerusalem, Jehova a revelá cu é, no Egipto, lo trece berdadero pas pa Israel. Mediante Jeremías el a primintí: “Lo mi sana nan i lo mi revelá na nan un abundancia di pas i berdad. I lo mi trece bek e cautivonan di Huda i e cautivonan di Israel, i lo mi edificá nan mescos cu na cuminsamentu.” (Jeremías 33:6, 7) Jehova su promesa a cuminsá haña cumplimentu na 539 P.E.C. ora Babilonia a ser derotá i e exiliadonan israelita a ricibí nan libertad. (2 Crónicanan 36:22, 23) Yegando na final di 537 P.E.C., un grupo di israelita a celebrá e Festival di Cabaña riba e suela di Israel pa promé biaha den 70 aña! Despues dje festival, nan a cuminsá reconstruí e tempel di Jehova. Con nan a sinti tocante esaki? E registro ta bisa: “Nan a grita cu un gritu duru alabando Jehova p’e ponementu dje fundeshi dje cas di Jehova.”—Esdras 3:11.
4. Con Jehova a animá e israelitanan pa haci e trabou di construccion di tempel, i ki promesa el a duna tocante pas?
4 No obstante, despues dje cuminsamentu felis ei, e israelitanan a ser desanimá dor di opositornan i a stop e trabou di construccion dje tempel. Algun aña despues, Jehova a lanta e profetanan Ageo i Zacarías pa animá e israelitanan pa completá e trabou di reconstruccion. Ki emocionante lo mester tabata pa nan tende Ageo bisa relacioná cu e tempel cu lo a ser construí: “‘Mas grandi e gloria dje último cas aki lo bira cu esun di e [cas] anterior,’ Jehova di ehércitonan a bisa. ‘I den e lugá aki lo mi duna pas.’”!—Ageo 2:9.
Jehova Ta Cumpli cu Su Promesanan
5. Kico ta notabel tocante e di ocho capítulo di Zacarías?
5 Den e buki bíblico di Zacarías, nos ta lesa di numeroso visionnan i profecianan inspirá cu a fortalecé Dios su pueblo aya den e di seis siglo P.E.C. E mésun profecianan aki ta sigui garantisá nos Jehova su sosten. Nan ta duna nos tur motibu pa kere cu Jehova lo duna su pueblo pas den nos dia tambe. Por ehempel, den e capítulo ocho dje buki cu ta carga su nomber, dies biaha profeta Zacarías ta expresá e palabranan: ‘Esaki ta loke Jehova a bisa.’ Cada biaha, e expresion ta introducí un pronunciacion divino cu tin di haber cu e pas dje pueblo di Dios. Algun dje promesanan aki a ser cumplí den dia di Zacarías. Tur a ser cumplí of ta den e proceso di cumplimentu awe.
“Lo Mi Ta Yalurs pa Síon”
6, 7. Den ki maneranan Jehova tabata ‘yalurs pa Síon cu gran furia’?
6 E expresion ta aparecé pa promé bes na Zacarías 8:2, unda nos ta lesa: “Esaki ta loke Jehova di ehércitonan a bisa, ‘Lo mi ta yalurs pa Síon cu gran yaluzí, i cu gran furia lo mi ta yalurs p’e.’” Jehova su promesa di ta yalurs, di tin gran celo pa su pueblo a nificá cu lo e ta alerto pa restorá nan pas. E restoracion di Israel na su tera i e reconstruccion dje tempel tabata evidencia dje celo ei.
7 Pero, kico di esnan cu a oponé e pueblo di Jehova? Su celo pa su pueblo lo ta mes grandi cu su “gran furia” riba e enemigunan aki. Ora e fiel hudiunan a adorá n’e tempel reedificá, nan lo por a refleccioná riba e desenlace fatal dje imperio poderoso di Babilonia, awor derotá. Nan lo por a pensa tambe dje fracaso total dje enemigunan cu a purba prevení e reconstruccion dje tempel. (Esdras 4:1-6; 6:3) I nan por a gradicí Jehova cu el a cumpli cu su promesa. Su celo a trece un triunfo pa nan!
“E Stad di Pegamentu n’e Berdad”
8. Den e dianan di Zacarías, con Jerusalem lo a bira un stad di pegamentu n’e berdad na contraste cu tempunan anterior?
8 Un di dos biaha Zacarías ta skirbi: “Esaki ta loke Jehova a bisa.” Kico ta Jehova su palabranan n’e ocasion aki? “Lo mi bolbe na Síon i biba meimei di Jerusalem; i Jerusalem siguramente lo ser yamá e stad di pegamentu n’e berdad, i e ceru di Jehova di ehércitonan, e ceru santu.” (Zacarías 8:3) Promé cu 607 P.E.C., Jerusalem siguramente no tabata un stad di pegamentu n’e berdad. Su sacerdotenan i profetanan tabata corupto, i su pueblo tabata infiel. (Jeremías 6:13; 7: 29-34; 13:23-27) Awor e pueblo di Dios tabata reconstruyendo e tempel, mustrando nan compromiso cu adoracion puru. Den spiritu Jehova a biba un biaha mas den Jerusalem. E berdadnan di adoracion puru a ser papiá den dje atrobe, di manera cu Jerusalem por a ser yamá “e stad di pegamentu n’e berdad.” Su ubicacion na haltu por a ser yamá “e ceru di Jehova.”
9. Ki cambio remarcabel den condicion “e Israel di Dios” a experenciá na 1919?
9 Aunke e dos pronunciacionnan aki tabata yen di nificacion pa Israel di antigwedad, nan tin tambe hopi nificacion pa nos segun cu siglo 20 ta yega na su fin. Casi 80 aña pasá, durante e promé guera mundial, e poco mil ungínan cu e tempu ei a representá “e Israel di Dios,” a bai den cautiverio spiritual, mescos cu Israel di antigwedad a bai den cautiverio na Babilonia. (Galationan 6:16) Proféticamente, nan a ser describí como cadavernan drumí den caya. No obstante, nan tabatin un deseo sincero pa adorá Jehova “cu spiritu i cu berdad.” (Juan 4:24) P’esei, na 1919, Jehova a libra nan for di cautiverio, elevando nan for di nan condicion spiritualmente morto. (Revelacion 11:7-13) Asina Jehova a contestá cu un Sí resonante Isaías su pregunta profético: “Un tera lo ser producí cu dolor di parto riba un solo dia? Of un nacion lo nace den un solo biaha?” (Isaías 66:8) Na 1919, Jehova su pueblo un biaha mas a existí como un nacion spiritual den nan propio “tera,” of estado spiritual riba tera.
10. Cuminsando na 1919, ki bendicionnan cristiannan ungí ta disfrutando di dje den nan “tera”?
10 Sano i salbo den e tera ei, cristiannan ungí a sirbi den Jehova su gran tempel spiritual. Nan a ser apuntá como “e esclabo fiel i discreto,” aceptando e responsabilidad di percurá pa Jesus su pertenencianan terenal, un privilegio cu nan ta disfrutá di dje ainda segun cu siglo 20 ta yega na su conclusion. (Mateo 24:45-47) Nan a siña bon e les cu Jehova ta “e Dios mes di pas.”—1 Tesalonicensenan 5:23.
11. Con lidernan religioso di cristiandad a demostrá di ta enemigunan dje pueblo di Dios?
11 Sin embargo, kico dje enemigunan dje Israel di Dios? Jehova su celo pa su pueblo ta mes grandi cu su furia contra e opositornan. Durante e promé guera mundial, e lidernan religioso di cristiandad a monta un presion enorme segun cu nan a purba—i a fracasá—pa caba cu e grupo chikitu aki di cristiannan cu ta papia e berdad. Durante e segundo guera mundial, e cleronan di cristiandad tabata uní den solamente un cos: Na ámbos banda dje conflicto, nan a urgi gobiernunan pa eliminá Testigonan di Jehova. Asta awe, den hopi pais, lidernan religioso ta incitando gobiernunan pa restringí of prohibí e trabou di predicacion cristian di Testigonan di Jehova.
12, 13. Con Jehova su furia ta ser expresá contra cristiandad?
12 Jehova no a keda sin tuma nota di esaki. Despues dje promé guera mundial, cristiandad, huntu cu e resto di Babilonia e Grandi, a experenciá un caida. (Revelacion 14:8) E realidad di cristiandad su caida a bira conocí pa un i tur ora, cuminsando na 1922, un seri di plaga simbólico a ser dramá, desenmascarando públicamente su condicion spiritualmente morto i spiertando di su binidero destruccion. (Revelacion 8:7–9:21) Como evidencia cu e dramamentu dje plaganan aki ta continuá, e discurso “E Fin di Religion Falsu Ta Cerca” a ser duná rond mundu dia 23 di april, 1995, siguí p’e distribucion di cientos di miyones di copia di un edicion special di Noticia di Reino.
13 Awe, cristiandad ta den un estado lastimoso. Atrabes di siglo 20, su miembronan a mata otro den gueranan feros bendicioná dor di su pastornan i cleronan. Den algun pais su influencia ta prácticamente nihil. E ta destiná pa destruccion huntu cu e resto di Babilonia e Grandi.—Revelacion 18:21.
Pas pa Jehova Su Pueblo
14. Ki cuadro textual profético ta ser duná di un pueblo na pas?
14 N’e otro banda, den e aña 1996 aki, Jehova su pueblo ta disfrutá di pas abundante den nan tera restorá, manera ta ser describí den Jehova su di tres pronunciacion: “Esaki ta loke Jehova di ehércitonan a bisa, ‘Ainda lo sinta hombernan bieu i muhernan bieu den e plasanan público di Jerusalem, cada un tambe cu su bara den su man debí n’e abundancia di su dianan. I e plasanan público dje stad mes lo ser yená cu hobencito i hobencitanan hungando den su plasanan público.’”—Zacarías 8:4, 5.
15. Apesar dje gueranan dje nacionnan, ki pas Jehova su sirbidornan a disfrutá di dje?
15 E cuadro textual deleitabel aki ta duna un representacion di algu remarcabel den e mundu asotá dor di guera aki—un pueblo na pas. Desde 1919, Isaías su palabranan profético a ser cumplí: “‘Pas continuo lo tin pa esun cu ta leu i pa esun cu ta cerca,’ Jehova a bisa, ‘i ami lo san’é. Pero . . . no tin pas,’ mi Dios a bisa, ‘pa e malbadonan.’” (Isaías 57:19-21) Naturalmente, Jehova su pueblo, aunke nan no ta parti dje mundu, no por evitá di ser afectá dor dje tumulto dje nacionnan. (Juan 17:15, 16) Den algun pais, nan ta wanta dificultadnan severo, i algun asta a ser matá. Tog, cristiannan berdadero tin pas den dos manera principal. Di promé, nan tin “pas cu Dios mediante [nan] Señor Jesucristo.” (Romanonan 5:1) Di dos, nan tin pas entre nan mes. Nan ta cultivá “e sabiduria di ariba,” cu ta “promé cu tur cos decente, anto pacífico.” (Santiago 3:17; Galationan 5: 22-24) Ademas, nan ta anhelá pa disfrutá di pas den e sentido mas completo ora “e mansunan mes lo poseé e tera, i nan berdaderamente lo haña nan deleite exkisito den e abundancia di pas.”—Salmo 37:11.
16, 17. (a) Con “hombernan bieu i muhernan bieu” i tambe “hobencito i hobencitanan” a fortalecé Jehova su organisacion? (b) Kico ta demostrá e pas di Jehova su pueblo?
16 Ainda tin “hombernan bieu i muhernan bieu” entre Jehova su pueblo, e ungínan cu ta corda e promé triunfonan di Jehova su organisacion. Nan fieldad i awante ta ser apreciá mashá tantu. E ungínan mas yong a hiba delantera durante e dianan ardiente di añanan ’30 i Guera Mundial II, como tambe den e añanan excitante di crecementu cu a sigui. Ademas, specialmente desde 1935, e “multitud grandi” di “otro carnénan” a manifestá su mes. (Revelacion 7:9; Juan 10:16) Segun cu e cristiannan ungí a bira mas bieu i ménos na cantidad, e otro carnénan a tuma e trabou di predicacion na nan encargo i a extend’é na tur parti dje tera. Den añanan recien e otro carnénan ta basha bin den e tera dje pueblo di Dios. Sí, aña pasá so, 338.491 di nan a ser bautisá como símbolo di nan dedicacion na Jehova! E personanan nobo ei ta masha yong en berdad, den sentido spiritual. Nan frescura i entusiasmo ta ser atesorá segun cu nan ta aumentá e filanan di esnan cu ta canta alabansanan agradecidu “na nos Dios, kende ta sintá riba e trono, i n’e Lamchi.”—Revelacion 7:10.
17 Awe, ‘e plasanan público ta yená cu hobencito i hobencitanan,’ Testigonan cu vigor hubenil. Den e aña di sirbishi di 1995, a ricibí informenan di 232 pais i isla di laman. Pero no tin ningun rivalidad internacional, ningun odio entre tribu, ningun yaluzí inapropiado, entre e ungínan i e otro carnénan. Tur ta crece huntu spiritualmente, uní den amor. E hermandad mundial di Testigonan di Jehova ta berdaderamente único riba e esena mundial.—Colosensenan 3:14; 1 Pedro 2:17.
Demasiado Difícil pa Jehova?
18, 19. Den e añanan desde 1919, con Jehova a cumpli cu loke a parce demasiado difícil for di un punto di bista humano?
18 Aya na 1918 ora e resto ungí tabata consistí di djis algun mil alma desanimá den cautiverio spiritual, ningun hende por a premirá e curso cu sucesonan lo a tuma. No obstante, Jehova tabata sa—manera su di cuater pronunciacion profético ta confirmá: “Esaki ta loke Jehova di ehércitonan a bisa, ‘Aunke e mester parce demasiado difícil den bista dje restantenan dje pueblo aki den e dianan ei, e mester parce demasiado difícil tambe den mi bista?’ ta e expresion di Jehova di ehércitonan.”—Zacarías 8:6.
19 Na 1919, Jehova su spiritu a rebibá su pueblo p’e trabou nan dilanti. Tog, fe tabata necesario pa tene firme n’e organisacion chikitu di Jehova su adoradornan. Nan tabata asina poco, i hopi cos no tabata masha cla. Sin embargo, poco poco Jehova a fortalecé nan organisacionalmente i a ekipá nan pa haci e trabou cristian di predicá e bon nobo i haci disipel. (Isaías 60:17, 19; Mateo 24:14; 28:19, 20) Gradualmente, el a yuda nan dicerní cuestionnan vital manera neutralidad i soberania universal. Tabata demasiado difícil pa Jehova cumpli cu su boluntad pa medio dje grupo chikitu ei di Testigonan? E contesta ta siguramente un no! Esaki ta ser confirmá riba página 12 pa 15 dje revista aki, cua ta presentá e registro di actividad di Testigonan di Jehova pa e aña di sirbishi di 1995.
“Ami Mes Lo Bira Nan Dios”
20. Con extenso e recogimentu dje pueblo di Dios mester tabata segun profecia?
20 E di cincu pronunciacion ta mustra mas aleu e condicion felis di Testigonan di Jehova awe: “Esaki ta loke Jehova di ehércitonan a bisa, ‘Aki mi ta bai salba mi pueblo dje tera di salimentu di solo i for dje tera di bahamentu di solo. I ami siguramente lo trece nan aden, i nan mester biba meimei di Jerusalem; i nan mester bira mi pueblo, i ami mes lo bira nan Dios den pegamentu n’e berdad i den husticia.’”—Zacarías 8:7, 8.
21. Den ki manera e pas abundante di Jehova su pueblo a ser mantené i extendé?
21 Den 1996 nos por bisa sin ningun duda cu e bon nobo a ser predicá rond mundu, for “dje tera di salimentu di solo” te na e “tera di bahamentu di solo.” A haci disipelnan di hende di tur nacion, i nan a mira e cumplimentu di Jehova su promesa: “Tur bo yunan lo ta personanan siñá pa Jehova, i e pas di bo yunan lo ta abundante.” (Isaías 54:13) Nos tin pas pasobra nos ta ser educá pa Jehova. Cu e obhetivo aki na mente, literatura a ser publicá den mas cu 300 idioma. Aña pasá so, 21 idioma adicional a ser agregá. E revista Toren di Vigilancia ta ser publicá awor simultáneamente den 111 idioma i Spierta! den 54. Congresonan nacional i internacional ta duna un demostracion público dje pas dje pueblo di Dios. Reunionnan semanal ta uni nos i ta duna nos e animacion cu nos mester pa keda firme. (Hebreonan 10:23-25) Sí, Jehova ta educando su pueblo “den pegamentu n’e berdad i den husticia.” E ta dunando pas na su pueblo. Ki un bendicion di por participá den e pas abundante ei!
Bo Por Splica?
◻ Den tempu moderno, con Jehova tabata ‘yalurs cu un gran furia’ pa su pueblo?
◻ Con Jehova su pueblo ta disfrutá di pas, asta den paisnan asotá dor di guera?
◻ Den ki manera ‘e plasanan público ta yená cu hobencito i hobencitanan’?
◻ Ki percuracionnan a ser hací pa asina e pueblo di Jehova por ser siñá dor di dje?
[Tabèl na página 12-15]
RAPORT DI AÑA DI SIRBISHI PA 1995 DI TESTIGONAN DI JEHOVA MUNDIALMENTE
(Wak e edishon imprimí di e revista akí.)
[Plachi na página 8]
Den e di seis siglo P.E.C., e hudiunan fiel cu a reconstruí e tempel a realisá cu Jehova tabata e único fuente confiabel di pas