Desaster Natural Ta un Siñal dje Tempo Aki?

“NACION lo lanta contra nacion i reino contra reino, i lo tin scarcidad di cuminda i temblor den un lugar tras di otro. Tur e cosnan ei ta principio di dolor di afliccion.” Cu e palabra ei, Jesucristo a splica na su disípelnan mil nuebe cien aña pasá cu tal suceso desastroso, hunto cu un aumento di maldad, i e predicacion mundial dje bon nobo di e Reino di Dios, lo introduci un siñal combiná marcando “e conclusion dje sistema di cosnan.”—Mateo 24:3-14.

Den bista di su splicacion, nos mester puntra, Nos ta mira mas temblor catastrófico, mas horcán, diluvio, secura, i hamber cu generacion di pasado? I apesar di progreso di ciencia i tecnología, e cantidad di hende cu ta sufri ta corresponde cu e aumento di desaster?

Pa hopi hende e contesta ta cu sí. Por ehempel, e revista na inglés Científico Nobo ta adverti cu “mundo por spera mas desaster despues di 1990 cu den década di pasado.” També, den UN Chronicle di Juni di 1991, e director dje Organizacion Mundial Meteorológico a bisa: “E tendencia ta basta claro. Desde 1960 te 1990 . . . , e aumento ta cinco bez mas grandi den e frecuencia di desaster natural grandi, i e aumento total di pérdida económico ta tres bez mas grandi. Dunando un poco perspectiva dje asunto, World Health, e revista dje Organizacion Mundial di Salud di NU, a bisa: “Ehempel di desaster natural i nan efecto desastroso por ta encontrá durante tur e pasado. Pero, mientras cu siglo 21 ta yega cerca, un cambio den e mezcla di situacion di pueblo, di ambiente i di tecnología ta enfrentános, locual ta haci hopi poblacion mas vulnerable tanto na impacto di catástrofe natural como na loke hende ta causa.”

E declaracion ei no ta un sorpresa pa hende cu ta presta atencion na suceso actual. Publicador di noticia nunca ta falta noticia sensacional, sea cu ta erupcion di volcán na Isla Filipina, temblor na California, diluvio na Bangladesh, secura i hamber den Somalia, horcán na Hawaí, of ola grandi di lamá subiendo tera na Nicaragua. Apenas un luna ta pasa sin informe di un desaster den un parti of otro di mundo.

Algun hende ta ignora esei como insignificante. Nan ta pleita cu e aparente aumento di desaster den nos tempo ta simplemente e resultado di mihor reportero i mihor tenimento di cuenta. Nan ta sigi pleita cu mas hende ta sufri di desaster simplemente pa motibo cu tin mas hende awe. Tal argumento ta correcto of mas detaye ta necesario?

Ripara loke e artículo di Científico Nobo citá caba a bisa. “Tabatin informe di 523 desaster entre 1960 i 1970 i 767 entre 1970 i 1980. Entre 1980 i 1990, e cantidad a aumenta te na 1387.” E ta sigi pa splica cu “un parti dje aparente aumento durante e último diez aña por ta debí na mas franqueza di informe di desaster den China i e Union Soviética.” Anto el a agrega: “Sin embargo, e cantidad di desaster ta aumenta.” E aumento di ripiente den e cantidad di desaster no por ta minimizá door di bisa cu esei ta solamente e resultado di mihor informe of mihor tenimento di cuenta.

Además, UN Chronicle di Mart di 1992 ta informa: “Durante e último 20 aña, mas cu 3 miyón hende a perde nan bida i 800 miyón mas a ser afectá pe ‘destruccion, dificultad i sufrimento’ cu desaster natural a causa.” Esei kier men cu rond di 1 persona di cada 7 cu ta biba den mundo a ser afectá pa algun clase di desaster of tragedia. Esei ta berdaderamente tolondrador i ta laga poco base pa duda cu nos ta biba den un época di cataclismo i inketud.

Siendo cu e Bijbel ta profetiza di tal tempo di angustia grandi, esei kier men cu Dios ta responsabel pa desaster i sufrimento cu ta e resultado di nan? Hopi hende ta kere cu sí. Pero, kico echo ta mustra? I mas importante, kico e Bijbel ta mustra?

[Picture Credit Line on page 2]

Cover: W. Faidley/Weatherstock

[Picture Credit Lines on page 3]

Prenchi meimei: Mark Peters/Sipa Press

WHO/League of Red Cross