Fin na Pobresa Ta Cerca
KICO Jesus tabata kier men ora el a bisa: “Semper boso tin hende pober cerca boso”? (Mateo 26:11) Acaso e tabata kier men cu pobresa lo existí pa semper, i cu no tin solucion p’e?
Jesus tabata sa cu miéntras e sistema actual di gobernacion humano permanecé, lo tin pobresa. E tabata sa cu ningun gobernacion humano ni sistema económico of social por a eliminá pobresa permanentemente. I historia ta confirmá esaki.
Atrabes di miles di aña di historia humano, hende a purba tur clase di gobernacion i tur tipo di sistema económico i social, pero tog ainda tin pobresa. Sí, apesar di progreso den áreanan manera ciencia, industria i medicina, e echo indiscutibel ta cu mundialmente e cantidad di hende cu ta atrapá den pobresa ta sigui aumentá.
Jesus tabata masha conciente dje hopi factornan cu ta hiba na pobresa, manera hamber, secura, invasion di ehércitonan enemigu, mal gobernacion, mal maneho di economia, opresion di hende pober i débil di parti di hende ricu i hende poderoso, accidente i malesa, i e morto di hombernan cu ta laga casá cu yu sin nada atras. Ademas, e tabata sa cu hende por hinca nan mes i nan famia den pobresa dor di mal custumbernan manera flohera, buracheria, wega di placa i adiccion na droga.
Pues, ora Jesus a bisa “semper boso tin hende pober cerca boso,” e tabata kier men cu eliminacion di pobresa tabata fuera di alcanse dje agencianan dje mundu aki. E tabata kier men cu tanten e sistema actual di gobernacion humano t’ei, lo tin hende pober.
Maske e problema di pobresa ta unu hopi bieu, nos no mester pensa cu ni Jesus ni su Tata celestial no ta interesá den hende pober. Ni tampoco nos mester pensa cu e palabranan di Jesus a nificá cu nunca mas lo tin un fin na pobresa. Nos por comprendé esaki dor di loke Bijbel ta bisa tocante e asuntu.
Pobresa i e Ley di Moises
Tuma, por ehempel, e Ley cu Dios a duna n’e antiguo nacion di Israel mediante Moises. Un stipulacion dje Ley tabata cu tur famia israelita a haña posesion di un pida tereno na Canan. (Deuteronomio 11:8-15; 19:14) E único excepcion tabata e levitanan, kendenan no a ricibí ningun tereno. Na lugá di esei nan a ricibí nan sosten, debí na nan asignacion special di trabou n’e tempel, dor di haña un décimo parti dje producto dje tera.—Númeronan 18:20, 21, 24.
Ademas, e leynan di herencia bou dje Ley di Moises a sigurá cu e tereno lo permanecé dje famia of tribu na ken el a ser duná. (Númeronan 27:8-11) Asta si un homber bende su tereno, ta temporalmente so e doño nobo lo por a keda cuné. Cu tempu e mester a debolb’é bek n’e famia di esun cu a bend’é.
Pa esnan cu a bira pober pa motibunan manera mal maneho di nan tereno of pa motibu cu nan a malgastá nan fondonan, e Ley a garantisá nan e derecho di recogé resto di cosecha den e cunucu, hofi di palu di fruta i hofi di wijndruif di otro hende. (Levítico 23:22) Ademas, un israelita den necesidad por a fia cen sin tin cu paga interes. Sí, mester a mustra un spiritu di generosidad na hende pober.—Exodo 22:25.
Jesus A Mustra Interes den Hende Pober
Siglonan despues, ora Jesus a bini na tera, el a sigui desplegá e spiritu di generosidad cu el a siña for di su Tata, Jehova. Jesus a mustra interes personal den esnan cu tabata materialmente pober. E i su disipelnan tabatin un fondo comun for di cua nan tabata duna israelitanan den necesidad.—Juan 12:5-8.
Despues di Jesus su morto, e cristiannan a mustra e mésun interes den hende pober, ora nan a percurá yudansa material specialmente pa nan rumannan spiritual mas pober. (Romanonan 15:26) Cristiannan berdadero awe ta mustra e mésun interes amoroso pa otro.
Claro, maske Bijbel ta expresá compasion pa víctimanan di condicionnan opresivo, e ta papia contra esnan cu, na moda di papia, ‘ta come nan mes carni’ pa motibu di flohera. (Eclesiástes 4:1, 5) Apostel Pablo a skirbi: “Si un hende no kier traha, no lagu’é come tampoco.” (2 Tesalonicensenan 3:10) Mescos tambe, esnan cu ta malgastá cen na custumbernan manera adiccion na droga, sigaria of alcohol por haña nan den pobresa. Esaki ta un consecuencia di nan mes mal echonan; eigenlijk nan ta ‘cosechando loke nan a sembra.’—Galationan 6:7.
Siguridad Awor
Bijbel ta mustra cu Dios tin un interes special den e condicion di esnan cu ta haci esfuerso pa cumpli cu su boluntad. Por ehempel, na Salmo 37:25, David ta declará: “Un homber hóben mi tabata, tambe mi a bira bieu, i tog nunca mi a mira un hende hustu bandoná henteramente, ni su yunan buscando pan.” Esnan cu un disposicion recto no tin e promesa di cu nan lo haña rikesa, pero aki nos ta haña un indicacion cu Dios lo soru pa nan haña suficiente provision material pa sobrebibí. I na versículo 28 e mésun salmo ei ta declará: “Jehova ta un stimador di husticia, i lo e no bandoná su lealnan.”
Jesus a haci mas cu djis mustra interes den hende pober yudando nan materialmente durante su bida riba tera. El a sigurá nan cu tanten nan sigui trata na haci Dios su boluntad, Dios lo soru pa nan satisfacé por lo ménos nan necesidadnan básico, tantu awor como den futuro. Jesus a bisa lo siguiente:
“Observá atentamente e paranan di shelu, pasobra nan no ta sembra ni ta cosechá ni ta recogé den mangasina; tog boso Tata celestial ta alimentá nan. Boso no ta bal mas cu nan? . . . Tambe, en cuanto e asuntu di bistí, pakico boso ta ansha? Siña un les for dje lelinan di campo, con nan ta crece; nan no ta afaná, ni nan no ta hila; pero mi ta bisa boso cu ni sikiera Sálomon den tur su gloria tabata bistí manera un di esakinan. Awor, si Dios ta bisti e vegetacion di campo asina, cu awe ta aki i mañan ta ser tirá den fornu, lo e no cu muchu mas rason bisti boso, hende di poco fe? P’esei nunca sea anshá i bisa: ‘Kico nos lo come?’ of: ‘Kico nos lo bebe?’ of: ‘Kico nos lo bisti?’ . . . Pasobra boso Tata celestial sa cu boso tin mester di tur e cosnan aki.”—Mateo 6:26-32.
Jesus a concluí dor di urgi su siguidónan: “Sigui busca, anto, promé e reino [di Dios] i Su husticia, i tur e otro cosnan aki lo ser agregá na boso.” (Mateo 6:33) Esta un bon animacion esaki ta pa esnan cu ta pober, pero cu ta buscando pa haci Dios su boluntad! Ripará tambe cu Jesus a mustra cu e Reino di Dios mester tabata e cos mas importante den bida di su siguidónan. Jesus tabata sa cu ora Dios su Reino celestial tuma pleno control di henter e tera, e ora ei—i solamente e ora ei—pobresa lo ser eliminá.
Pobresa Lo No T’ei pa Semper
Pues, Jesus a duna un speransa maraviyoso pa futuro. Di manera cu ora el a bisa “semper boso tin hende pober cerca boso,” e tabata papiando di bida bou dje sistema actual di gobernacion humano. E no tabata papiando di bida den futuro bou dje gobernacion di Dios su Reino celestial. Bijbel ta predicí: “No semper e hende pober lo ser lubidá, ni e speransa dje mansunan lo no perecé nunca.” (Salmo 9:18) I como Rey dje Reino di Dios, Jesucristo lo no tolerá ningun hende cu ta purba explotá i oprimí otronan.
Jesus a haci e reinado di Dios su Reino celestial e tema central di su siñansa. (Mateo 4:17) Bou dje gobernacion di Reino, condicionnan riba tera lo reflehá e condicionnan den shelu. Ta p’esei el a siña su siguidónan pidi Dios: “Laga bo reino bini. Laga bo boluntad sosodé, mescos cu den shelu, tambe riba tera.”—Mateo 6:10.
Con esaki lo sosodé? Ta Dios su propósito pa eliminá henter e sistema actual di gobernacion humano for dje tera i reemplas’é cu e gobernacion di su Reino celestial. E profecia di Daniel 2:44 ta declará: “Den e dianan dje reynan ei [cu ta existí awor] e Dios di shelu lo establecé un reino cu nunca lo ser reducí na ruina. I e reino mes lo no ser pasá na ningun otro pueblo [lo no tin gobernacion humano mas]. Lo e aplastá i pone un fin na tur e reinonan [actual] aki, i e mes lo permanecé pa tempu indefiní.”
E ora ei, den un mundu nobo bou dje gobernacion dje Reino di Dios, henter e tera lo ser transformá den un paradijs di abundancia, sin ningun rastro di pobresa. Tuma nota di algun profecia bíblico cu ta papia dje condicionnan cu lo existí n’e tempu ei:
“Jehova di ehércitonan siguramente lo prepará pa tur pueblo . . . un bankete di biña mantené riba kachi-kachi, di plato cu hopi zeta yená cu tuti di wesu.” (Isaías 25:6) “Lo yega di tin abundancia di grano riba tera; riba top dje cerunan lo tin sobreabundancia.” (Salmo 72:16) “Lo resultá di tin yobidanan fuerte di bendicion. I e palu dje campo mester duna su fruta, i e tera mes lo duna su producto, i realmente nan lo resultá di ta riba nan suela den siguridad.” (Ezekiel 34:26, 27) “E tera mes siguramente lo duna su producto; Dios, nos Dios, lo bendicioná nos.” (Salmo 67:6) “E desierto i e region sin awa lo hubilá, i e yanura di desierto lo ta gososo i lo florecé manera asafran.”—Isaías 35:1.
Ademas, Mikéas 4:4 ta primintí: “Nan realmente lo sinta, cada un bou di su mata di wijndruif i bou di su palu di figu, i lo no tin ningun hende cu ta haci nan tembla.” Tur hende lo tin nan mes cas: “Nan siguramente lo construí casnan i ocupá nan . . . Nan lo no traha cas i otro hende biba aden.” (Isaías 65:21, 22) Nada straño cu Jesus por a primintí esnan cu a kere den su siñansanan: “Lo [boso] ta cu mi den Paradijs”!—Lucas 23:43.
Sí, Dios su Palabra inspirá mes ta siña claramente cu lo bai tin un fin total na pobresa. I e tempu ei ta cerca, pasobra profecianan bíblico ta mustra cu e mundu aki ta awor den su “último dianan,” i ta pasando den “tempu crítico, duru pa trata cuné.” (2 Timoteo 3:1-5, 13) Pronto e sistema actual di cosnan lo ser destruí pa semper i lo eliminá pobresa pa semper, no mediante esfuersonan humano, sino cu intervencion divino. E Rey Jesucristo lo “libra esun pober cu ta sclama pa yudansa, tambe esun afligí i ken cu no tin yudante. Lo e sinti duele di esun di condicion humilde i esun pober, i e alma di esnan pober lo e salba.”—Salmo 72:12, 13.
[Plachi na página 8, 9]
Den Dios su mundu nobo, lo tin bon bibienda i cuminda na abundancia pa tur hende
[Plachi na página 10]
Den e mundu nobo, nunca mas lo tin mucha cu hamber