Glorificá Jehova Mediante Obranan Excelente
1 Ora mal tempu coge bo na caminda, esta un alivio si bo por haña lugá di sconde! Si e lugá ta secu i safe i e habitantenan ta hospitalario, gustosamente bo ta keda einan. E trabou di predicá e Reino ta dirigí hende na un lugá di sconde asina for dje sistema di Satanas. Nos conducta diario por yuda otro hende mira con atractivo e lugá di refugio safe aki ta? Sí, pasobra Jesus a bisa cu hende lo ‘mira nos obranan excelente i duna gloria na nos Tata cu ta den shelu.’—Mat. 5:16.
2 Con nos por comportá nos mes di manera cu nos obranan lo atraé otro hende na Jehova i na su organisacion? Dor di laga e palabranan di Jesus cu ta pará skirbí na Lucas 6:31 i 10:27 moldea nos bida tur dia. Esaki lo motivá nos pa demostrá interes amoroso na nos próhimo, i asina distinguí nos for dje mundu friu i indiferente aki.
3 Un ruman muher cu tabata riba un ferry riba laman a observá un señora yong cu tabata asina mareá cu e no por a soru pa su yu chikitu. E ruman muher a ofrecé pa soru p’e yu. Ora e señora a puntr’é con e por gradicié, e ruman muher a bisa: ‘Por fabor scucha Testigonan di Jehova e siguiente biaha cu nan pasa na bo cas.’ E señora a haci esei, i awor e cu su casá ta Testigo. Obranan excelente a haci un diferencia den e manera cu nan a reaccioná riba e mensahe di Reino.
4 Henter Nos Bida Ta Enbolbí: Nos conducta den bario, na trabou of scol, i durante periodonan di recreo ta laga otro hende forma un opinion di nos i di nos religion. Pues, nos tur ta haci bon di puntra nos mes: ‘Con observadónan ta mira ami i mi famia? Bisiñanan ta haña nos cas i curá limpi i bon tené? Nos coleganan di trabou i di scol ta considerá nos como hendenan puntual i diligente? Otro hende lo haña nos aparencia modesto i respetuoso?’ Nos obranan excelente por haci e adoracion di Jehova mas atractivo pa otro hende.
5 Pedro a spierta cristiannan cu hende lo haci bofon di nan. (1 Ped. 4:4) Nos mester haci sigur cu nos conducta no ta motibu pa abla negativo. (1 Ped. 2:12) Si nos obranan diario ta glorificá e Dios cu nos ta adorá, anto nos lo ta manera lampi den laira cu ta invitá otro hende pa bini na e lugá di sconde safe cu Jehova ta percurá.—Mat. 5:14-16.