El A Bai Dilanti e Mesías

UN FAHA hanchu di cueru a accentuá su cueru bronseá dor di solo. Bistí den un paña di lana di camel, en berdad el a parce un profeta. Hopi hende a ser atraí na dje n’e riu Jordan. Ei e homber fasinante aki a declará cu curashi cu e tabata cla pa bautisá pecadornan repentí.

Hende a keda asombrá! Ken e homber aki tabata? Kico tabata su propósito?

Jesucristo a bisa dje persona aki: “Pakico boso a sali? Pa mira un profeta? Sí, mi ta bisa boso, i hopi mas cu un profeta. . . . Entre esnan cu a nace di muher, no a lanta unu mayor cu Juan Bautista.” (Mateo 11:9-11) Pakico Juan tabata un homber asina excepcional? Pasobra e tabata esun cu a bai dilanti e Mesías.

Su Mision A Ser Profetisá

Mas cu 700 aña promé cu Juan su nacementu, Jehova a anunciá cu esaki lo sclama den desierto: “Boso prepará e caminda di Jehova! Haci e caminda grandi pa nos Dios atrabes dje desierto stret.” (Isaías 40:3; Mateo 3:3) Mas cu 400 aña promé cu e nacementu di Juan, Dios Todopoderoso a declará: “Mira! Mi ta manda pa boso Elías e profeta promé cu e binida di Jehova su dia grandi i inspirador di temor.” (Malakías 4:5) E echo cu Juan Bautista a nace rond di seis luna promé cu Jesus no tabata un simpel casualidad, tampoco esaki a sosodé simplemente dor di procesonan natural. Mescos cu e nacementu dje yu primintí, Isaac, Juan su nacementu tabata un milager, pasobra tur su dos mayornan, Zacarías i Elísabet, a pasa e edad normal pa producí yu.—Lucas 1:18.

Asta promé cu Juan a ser concibí, su comision, trabou i estilo di bida a ser revelá dor di angel Gabriel. Cu e vigor i spiritu di Elías, Juan lo bira bek esnan desobediente for dje caminda di morto i lo prepará nan pa aceptá Jesus como e Mesías. For di nacementu, Juan mester tabata un nazareo, completamente dedicá na Dios, i no mag bebe biña ni bibida sterki. En berdad, su cuminda den e desierto a consistí di “dalakochi i miel di mondi.” (Marco 1:6; Númeronan 6:2, 3; Lucas 1:13-17) Mescos cu Samuel, for di infancia, Juan a ser designá specialmente p’e glorioso sirbishi dje Haltísimo Dios.—1 Samuel 1:11, 24-28.

Asta e nomber Juan a ser scogí dor di Dios. E nomber hebreo traducí “Juan” ta nificá “Jehova A Mustra Fabor; Jehova Tabata Bondadoso.”

Ora e mucha a ser circuncidá riba e di ocho dia, su tata, Zacarías, a ser inspirá divinamente pa declará: “En cuanto abo, mucha, lo bo ser yamá profeta dje Haltísimo, pasobra lo bo bai delantá dilanti Jehova pa prepará su camindanan, pa duna conocimentu di salbacion na su pueblo mediante pordon di nan picá, debí n’e tierno compasion di nos Dios. Cu e compasion aki un manisé lo bishitá nos for di haltura.” (Lucas 1:76-78) Juan su ministerio público mester tabata di importancia primario den su bida. Compará cu esei, tur otro cos tabata di poco importancia. Pues, e Scritura ta cubri e promé 30 añanan di Juan su bida den un solo versículo: “E mucha a sigui crece i bira fuerte den spiritu, i el a sigui den desierto te n’e dia di mustra su mes abiertamente na Israel.”—Lucas 1:80.

Bos den e Desierto

Den e di 15 aña dje reinado di Tiberio César, ora Poncio Pilato tabata e gobernador di Hudea, Juan Bautista a aparecé den e desierto cu e mensahe alarmante aki: “Repentí, pasobra e reino di cielu a yega cerca.” (Mateo 3:2; Marco 1:4; Lucas 3:1, 2) E poblacion di henter e region a ser spiertá. E declaracion yen di curashi ei a toca curason dje pueblo cu tabata anhelando un speransa sigur. Juan su anuncio tambe a pone e humildad di hende na prueba pasobra esei a exigí repentimentu di curason. Su sinceridad i conviccion a impulsá multitud di hende onesto i sincero pa mir’é como un homber mandá dor di Dios.

Juan su fama a plama manera e manisé di un dia nobo. Como Jehova su profeta, el a ser reconocé fácilmente dor di su bistí i debocion. (Marco 1:6) Asta sacerdotenan i levitanan a biaha for di Jerusalem pa haña sa kico tabata lantando tur e interes aki. Repentí? Pakico, i di kico? Ken e homber aki tabata? Nan tabata kier a sa. Juan a splica: “ ‘Ami no ta e Cristo.’ I nan a puntr’é: ‘Kico, anto? Bo ta Elías?’ I el a bisa: ‘Mi no ta.’ ‘Bo ta E Profeta?’ I el a contestá: ‘No!’ P’esei nan a bis’é: ‘Ken bo ta? pa nos por duna un contesta na esnan cu a manda nos. Kico bo ta bisa tocante bo mes?’ El a bisa: ‘Mi ta un bos di un hende cu ta sclama den e desierto, “Haci e caminda di Jehova stret,” mescos cu Isaías e profeta a bisa.’ Awor esnan cu a ser mandá a bini dje fariseonan. Pues nan a haci’é pregunta i nan a bis’é: ‘Pakico, anto, bo ta bautisá hende si bo mes no ta e Cristo ni Elías ni E Profeta?’ ”—Juan 1:20-25.

Repentimentu i bautismo tabata pasonan necesario pa esnan cu lo drenta e Reino. P’esei, Juan a contestá: ‘Mi ta bautisá pecadornan repentí cu awa, pero despues di mi un persona mas fuerte cu mi lo bautisá boso cu spiritu santu i cu candela. Wel, mi no ta digno ni pa los e veternan di su sandalia. I tene cuidou! E tin un bientador den su man i lo recogé e trigu den su mangasina pero lo kima i destruí e bagas completamente.’ (Lucas 3:15-17; Echonan 1:5) En berdad, e spiritu santu lo ser dramá riba siguidornan dje Mesías, pero su enemigunan lo experenciá e candela di destruccion.

“Hende di Tur Clase” A Ser Spiertá

Hopi hudiu di curason onrado a keda profundamente conmoví dor di Juan su palabranan i a confesá abiertamente nan picánan di infieldad n’e pacto di Ley. Nan a demostrá públicamente nan repentimentu dor di permití Juan bautisá nan den e Riu Jordan. (Mateo 3:5, 6) Como resultado, nan curason tabata den e condicion corecto pa ricibí e Mesías. Saciando nan sed pa conocimentu di Dios su rekisitonan hustu, Juan gustosamente a instruí nan como su disipelnan, asta siñando nan con pa haci oracion.—Lucas 11:1.

En cuanto esun aki cu a bai dilanti e Mesías, apostel Juan a skirbi: “E homber aki a bini pa un testimonio, p’e duna testimonio tocante e lus, pa hende di tur clase por kere pa medio di dje.” (Juan 1:7) Asina anto hende di tur sorto a bini pa tende Juan Bautista segun cu el a “predicá públicamente na tur hende di Israel bautismo como símbolo di repentimentu.” (Echonan 13:24) El a spierta cobradornan di belasting contra e práctica di extorsion. El a spierta soldadnan pa no ferfelá hende of lanta acusacion falsu. I el a bisa e fariseonan i saduceonan falsu i hipócrita: “Boso, yunan di víbora, ken a bisa boso pa hui dje rabia binidero? P’esei anto producí fruta cu ta pas cu repentimentu; i no cuminsá bisa den boso mes, ‘Nos tin Abraham como tata.’ Pasobra mi ta bisa boso cu Dios por lanta yunan pa Abraham for dje piedranan aki.”—Mateo 3:7-9; Lucas 3:7-14.

Como clase colectivo, e lidernan religioso di Juan su dia a nenga di ker’é i a acus’é falsamente di tabata poseí pa demoño. Nan a rechasá e caminda di husticia cu ta hiba na bida eterno. N’e otro banda, pecadornan manera e cobradornan di belasting i e muhernan di mala bida cu a kere Juan su testimonio a repentí i a ser bautisá. N’e debido tempu, nan a aceptá Jesucristo como e Mesías.—Mateo 21:25-32; Lucas 7:31-33.

E Mesías Ta Ser Introducí

Pa seis luna—for di primavera te n’e otoño di 29 E.C.—Juan, e testigo fiel di Dios a dirigí e atencion dje hudiunan n’e binidero Mesías. Tabata tempu p’e Rey Mesiánico aparecé. Pero ora el a aparecé, el a baha bin n’e mésun awanan ei di Jordan i a pidi pa ser bautisá. Na promé instante Juan a protestá, pero despues el a bai di acuerdo. Imaginá su goso ora spiritu santu a baha riba Jesus i e bos di Jehova a ser tendé expresando aprobacion di Su Yu.—Mateo 3:13-17; Marco 1:9-11.

Juan tabata e promé cu a reconocé Jesus como e Mesías, i el a introducí su mes disipelnan na Esun Ungí aki. “Mira,” Juan a bisa, “e Lamchi di Dios cu ta kita picá dje mundu!” Tambe el a declará: “Esaki ta esun tocante ken mi a bisa, Mi tras ta bini un homber kende a bai mi dilanti, pasobra el a existí promé cu mi. Ami mes no tabata conocé, pero e motibu pakico mi a bin ta bautisá den awa tabata p’e por ser manifestá na Israel.”—Juan 1:29-37.

Juan su trabou a sigui paralelo cu Jesus su ministerio pa mas o ménos seis luna. Nan cada un a comprendé e trabou cu e otro tabata haciendo. Juan a mira su mes como amigu dje Bruidegom i a alegrá pa mira Cristo aumentá miéntras cu e i su trabou a mengua.—Juan 3:22-30.

Jesus a identificá Juan como esun cu a bai dilanti dje, representá dor di Elías. (Mateo 11:12-15; 17:12) Na un ocasion, Jesus a bisa: “E Ley i e Profetanan a sigui te na Juan. Dje tempu ei padilanti e reino di Dios ta ser declará como bon nobo, i tur clase di persona ta forsa padilanti p’e.”—Lucas 16:16.

Fiel te na Fin

Juan a ser arestá i encarcelá pa motibu cu el declará e berdad cu curashi. E no a core pa su responsabilidad di desenmascará asta e picá di Rey Herodes. Violando e ley di Dios, e rey ei tabata bibando den adulterio cu Herodías, e esposa di su mes ruman. Juan a papia cu curashi p’e homber ei por a repentí i obtené Dios su misericordia.

Ki un ehempel Juan tabata di fe i amor! Sacrificando su mes libertad personal, el a proba su fieldad na Jehova Dios i su amor pa su próhimo. Despues di un aña di encarcelacion, Juan su cabes a ser kitá afó como resultado di un plan inspirá pa Diabel, dirigí dor di e malbado Herodías, kende tabata “carga un rencor” contra dje. (Marco 6:16-19; Mateo 14:3-12) Pero esun cu a bai dilanti e Mesías a mantené su integridad na Jehova i pronto lo ser lantá for dje mortonan pa disfrutá di bida den Dios su mundu nobo di husticia.—Juan 5:28, 29; 2 Pedro 3:13.