El A Siña Nikodemo Anochi

Hesus tabata na Herúsalèm pa selebrá e Pasku Hudiu di aña 30 di promé siglo. Einan, el a hasi vários milager. Debí na esei, hopi hende a pone fe den dje. Nikodemo, un fariseo i miembro di Sanedrin (e korte supremo hudiu), a keda asina impreshoná ku e tabata ke sa mas. P’esei, el a bai serka Hesus ora a bira skur kaba. Probablemente e tabatin miedu pa hende no mir’é pasobra esei por a pon’é pèrdè kara den bista di e otro lidernan hudiu.

Nikodemo a bisa Hesus: “Rabi, nos sa ku abo komo maestro a bini di Dios, pasobra ningun hende no por hasi e milagernan akí ku bo ta hasi si Dios no ta kuné.” Anto Hesus a bis’é ku, pa un hende drenta e Reino di Dios, e tin ku “nase di nobo.”—Huan 3:2, 3.

Pero, kon un hende por nase di nobo? Nikodemo a puntra: “E no por drenta den barika di su mama i nase di nobo, tòg?”—Huan 3:4.

Nò, no ta esei nase di nobo ke men. Hesus a splika: “Si un hende no nase di awa i di spiritu, e no por drenta e Reino di Dios.” (Huan 3:5) Tuma Hesus mes komo ehèmpel. Ora el a batisá i spiritu santu a baha riba dje, el a “nase di awa i di spiritu.” Na e momento ei, un bos for di shelu a bisa: “Esaki ta mi Yu stimá, esun ku tin mi aprobashon.” (Mateo 3:16, 17) Di e manera ei, Dios a anunsiá ku Hesus a bira un yu ungí ku spiritu santu ku e speransa di drenta e Reino selestial. Despues, na Pentekòste di aña 33 di promé siglo, spiritu santu lo a ser dramá riba otro hende ku tabata batisá kaba; di e manera ei, nan tambe lo a nase di nobo i bira Dios su yu den sentido spiritual.—Echonan 2:1-4.

Nikodemo tabatin difikultat pa komprondé loke Hesus tabata siñ’é tokante e Reino. P’esei, Hesus a dun’é mas informashon tokante Su papel spesial komo e Yu humano di Dios. El a bis’é: “Meskos ku Moises a hisa e kolebra na haltu den desierto, asina tambe mester hisa e Yu di hende na haltu, pa tur hende ku kere den dje por haña bida eterno.”—Huan 3:14, 15.

Hopi tempu pasá, e israelitanan ku kolebra venenoso a morde mester a wak e kolebra di koper pa nan por a skapa. (Numbernan 21:9, NW) Di mes manera, tur hende mester pone fe den e Yu di Dios pa nan ser librá di kondena di morto i haña bida eterno. Enfatisando e papel amoroso ku Yehova ta hunga den e asuntu akí, Hesus a bisa Nikodemo: “Dios a stima mundu asina tantu ku el a duna su Yu unigénito, pa tur ku pone fe den dje no bai pèrdí, ma haña bida eterno.” (Huan 3:16) Ta p’esei, awor ku Hesus tabata na Herúsalèm un seis luna despues di a kuminsá su sirbishi, el a mustra bon kla ku é ta e kaminda di salbashon pa humanidat.

Hesus a bisa Nikodemo: “Dios a manda su Yu na mundu, no pa e Yu husga mundu.” Pues, Dios no a mand’é na mundu pa kondená humanidat na destrukshon. Al kontrario, Hesus a bisa ku Dios a mand’é na mundu pa mundu ser salbá pa medio di dje.—Huan 3:17.

Kòrda ku ta pa motibu di miedu Nikodemo a bai bishitá Hesus ora tabata skur kaba. Pues, ta interesante ku Hesus a terminá su kòmbersashon kuné, bisando: “Esaki ta e base pa huisio: E lus [esta, Hesus, kende a demostrá di ta e lus pa medio di su bida i su siñansanan] a bini na mundu, ma hende a stima skuridat en bes di lus, pasobra nan obranan tabata malu. Pues, esun ku ta praktiká kosnan baho ta odia lus i no ta bini na e lus, pa su obranan no keda eksponé. Ma esun ku ta hasi loke ta korekto ta bini na e lus, pa su obranan por keda manifestá komo obranan ku ta na armonia ku e boluntat di Dios.”—Huan 3:19-21.

Despues di e kòmbersashon ei, a keda na Nikodemo—kende tabata un fariseo i maestro di Israel—pa reflekshoná riba loke el a tende tokante e papel ku Hesus ta hunga den e propósito di Dios.