Kapítulo Dieshete
Praktiká Deboshon na Dios na Kas
1. Ki efekto e guia dje Palabra di Dios tabatin riba hopi matrimonio ora hende a aplik’é?
YEHOVA ta Esun ku a originá matrimonio, i su Palabra ta duna e mihó guia pa famia. Hopi hende ku a apliká e guia ei tin un bon matrimonio awor. Ta di elogiá tambe ku algun hende ku tabata djis biba huntu, a sinti nan motivá pa registrá nan matrimonio legalmente. Otronan a stòp di tene relashon seksual pafó di matrimonio. Hòmbernan violento ku tabata abusá di nan kasá i yunan, a siña demostrá bondat i ternura.
2. Kiko bida di famia kristian ta enserá?
2 Bida di famia kristian ta enserá hopi kos. Por ehèmpel, kon nos ta mira e durashon dje union matrimonial, kiko nos ta hasi pa kumpli ku nos responsabilidatnan den famia i kon nos ta trata miembronan di famia. (Efesionan 5:33–6:4) Tal bes nos sa bon-bon kiko Beibel ta konsehá tokante bida di famia, pero ta apliká ta e kos. Ningun di nos no kier ta manera e hendenan ku Hesus a kondená pasobra nan tabata hala Dios su mandamentunan un banda. Nan a rasoná ekibokadamente ku deboshon religioso so tabata sufisiente. (Mateo 15:4-9) Nos no kier duna e impreshon di ta religioso, pero no ta demostrá esei den nos mes famia. Al kontrario, nos kier desplegá berdadero deboshon na Dios, lokual ‘ta duna hopi benefisio.’—1 Timoteo 5:4; 6:6, SAB; 2 Timoteo 3:5.
Pa Kuantu Tempu e Matrimonio Lo Dura?
3. (a) Kiko ta pasando ku hopi matrimonio, pero kiko nos mester ta desididu pa hasi? (b) Usando bo Beibel, kontestá e preguntanan na final dje paragraf aki.
3 Matrimonio a bira ta kibra masha lihé. Tin pareha ku tabata huntu pa años, ta disidí di divorsiá i kasa ku otro hende. Ademas no ta straño tampoko pa tende ku parehanan yòn a separá despues di tin poko tempu kasá. Sin importá kiko otro hende ta hasi, nos sí mester tin e deseo di agradá Yehova. P’esei laga nos konsiderá e siguiente preguntanan i tekstonan bíbliko pa wak kiko e Palabra di Dios ta bisa tokante e durashon dje union matrimonial.
Ora un hòmber i un muhé kasa, pa kuantu tempu nan mester pensa di keda huntu? (Marko 10:6-9; Romanonan 7:2, 3)
Den bista di Dios, kua ta e úniko base válido pa divorsiá ku e posibilidat di bolbe kasa? (Mateo 5:31, 32; 19:3-9)
Kiko Yehova ta opiná di divorsio ku su Palabra no ta outorisá? (Malakías 2:13-16)
Beibel ta boga pa usa separashon komo un medio pa solushoná problema matrimonial? (1 Korintionan 7:10-13)
Bou di ki sirkunstansia un separashon lo por ta hustifiká? (Salmo 11:5; Lukas 4:8; 1 Timoteo 5:8)
4. Kiko ta pone ku algun matrimonio sí ta dura?
4 Tin matrimonio ta bai bon, i e parehanan ta keda huntu. Kon bini? Un faktor importante ta ku e pareha ta warda pa kasa te ora nan tur dos ta maduro. Pero un otro faktor importante tambe ta pa haña un kasá ku ta kompartí bo interesnan i ku ken bo por papia abiertamente. Sin embargo, lo mas importante ta pa haña un kasá ku ta stima Yehova i ku ta respetá su Palabra komo e base pa atendé problema. (Salmo 119:97, 104; 2 Timoteo 3:16, 17) Un persona asina lo no tin e aktitut ku si kos no bai bon, e por separá òf buska un divorsio. Lo e no usa e debilidatnan di su kasá komo un èksküs pa keda sin kumpli ku su propio responsabilidatnan. Mas bien, lo e atendé e problemanan ku surgi i purba haña solushonnan práktiko.
5. (a) Ki papel fieldat na Yehova ta hunga den un matrimonio? (b) Asta ora un kristian ta haña oposishon di su kasá, ki benefisionan e por haña dor di kumpli ku e normanan di Yehova?
5 Segun Satanas, ora nos ta sufri nos lo bandoná e normanan di Yehova. (Job 2:4, 5; Proverbionan 27:11) Pero e gran mayoria di Testigu di Yehova ku a sufri pasobra nan tin un kasá ku ta oponé nan, no a renunsiá nan voto matrimonial. Nan ta sigui fiel na Yehova i na su mandamentunan. (Mateo 5:37) Algun di nan ku a perseverá tabatin e goso di mira nan kasá djòin nan den sirbi Yehova, asta despues di hopi aña di oposishon! (1 Pedro 3:1, 2) Tin kristiannan kende nan kasá no ta duna ningun indikashon di kambio òf kende nan kasá a bandoná nan pasobra nan ta sirbi Yehova. Pero e kristiannan aki tambe sa ku nan lo ser bendishoná ya ku nan a duna prueba di nan deboshon na Dios den nan kas.—Salmo 55:22; 145:16.
Kada Ken Hasi Su Parti
6. Ki areglo nos mester respetá pa nos por tin un bon matrimonio?
6 Ta klaro ku pa nos tin un bon matrimonio esei ta eksigí mas ku djis keda huntu. Un nesesidat básiko di parti di kada kasá ta pa nan respetá Yehova su areglo di un kabes di famia. Esaki ta kontribuí na bon òrdu i un sintimentu di siguridat den e hogar. Na 1 Korintionan 11:3, nos ta lesa: “Kristu ta e kabes di tur hòmber, i e hòmber ta e kabes di e muhé, i Dios ta e kabes di Kristu.”
7. Kon e esposo mester aktua komo kabes di famia?
7 Bo a ripará kiko ta e promé kos ku e versíkulo ta menshoná? Sí, tur hòmber tin un Kabes, Kristu, na ken nan mester someté nan mes. Esaki ta nifiká ku e hòmber tin ku aktua komo kabes di famia di tal manera ku e ta reflehá e kualidatnan di Hesus. Kristu ta someté su mes na Yehova, e stima e kongregashon masha hopi i ta perkurá p’e. (1 Timoteo 3:15) El a asta “entregá su mes p’e.” Hesus no ta orguyoso ni sin konsiderashon, pero mas bien “mansu i humilde di kurason.” Esnan ku ta asept’é komo nan kabes ta “haña sosiegu pa [nan] alma.” Ora un esposo ta trata su famia den e manera aki, e ta mustra ku e ta someté su mes na Kristu. E ora ei un esposa kristian lo ripará ku ta probechoso i refreskante pa koperá ku nan kasá i respet’é komo kabes di famia.—Efesionan 5:25-33; Mateo 11:28, 29; Proverbionan 31:10, 28.
8. (a) Dikon por parse ku métodonan kristian no ta duna e resultado deseá den algun kas? (b) Kiko nos mester hasi si nos ta konfrontá un situashon asina?
8 Sin embargo, lo surgi problema. Kisas promé ku un miembro dje famia a kuminsá apliká prinsipionan bíbliko, ya kaba e otro miembronan tabatin e tendensia fuerte di nenga instrukshon di otro hende. Por ta, ora bo hasi petishon den un forma bondadoso i amoroso, ningun hende no ta hasi kaso. Nos sa ku Beibel ta bisa pa nos kita “furia, rabia, griteria i kalumnia.” (Efesionan 4:31) Pero kiko bo mester hasi si aparentemente algun miembro di famia no ta reakshoná si no ta ora bo grita òf rabia? Wèl, Hesus no a imitá esnan ku a menas’é i zundr’é, sino mas bien a konfia den su Tata. (1 Pedro 2:22, 23) P’esei ora situashonnan ku ta kousa tenshon surgi den kas, duna prueba di bo deboshon na Dios dor di pidi Yehova su yudansa den orashon, en bes di adoptá e sistema di mundu.—Proverbionan 3:5-7.
9. En bes di piki pieu, kiko hopi esposo kristian a siña hasi?
9 Kosnan no sa kambia mesora, pero e konseho di Beibel realmente ta resultá efikas si nos aplik’é diligentemente i ku pasenshi. Hopi esposo a ripará ku nan matrimonio a kuminsá drecha ora nan a komprendé kon Kristu ta trata e kongregashon. E kongregashon ei no ta konsistí di hende perfekto. Pero tòg Hesus ta stim’é, e ta pone un bon ehèmpel p’e i ta usa e Skritura pa yud’é mehorá. El a entregá su bida p’e kongregashon. (1 Pedro 2:21) Hesus su ehèmpel a animá hopi esposo kristian pa aktua komo bon kabes di famia i ofresé yudansa amoroso pa yuda drecha nan matrimonio. Esaki ta produsí mas mihó resultado ku ora e esposo ta piki pieu òf ta nenga di papia.
10. (a) Den ki maneranan un esposo òf esposa—asta unu ku ta bisa di ta un kristian—por hasi bida difísil pa otro hende den kas? (b) Kiko un hende lo por hasi pa mehorá e situashon?
10 Pero kiko si un esposo no ta konsiente dje nesesidatnan emoshonal di su famia, òf no ta tuma e inisiativa pa hasi areglo pa lesa i studia Beibel ni pa hasi otro aktividatnan? Òf kiko si un esposa no ta koperá ni demostrá sumishon na su kasá? Tin famia ta haña bon resultado dor di sinta huntu i papia den un forma respetuoso tokante e problemanan. (Génesis 21:10-12; Proverbionan 15:22) Pero asta si nos no haña tur e resultadonan ku nos a spera, kada un di nos por yuda drecha e ambiente na kas dor di desplegá Dios su fruta di spiritu den tur aspekto di nos bida, demostrando konsiderashon amoroso pa otro miembronan di famia. (Galationan 5:22, 23) E situashon lo drecha, no dor di warda pa e otro persona hasi algu, sino dor ku kada un di nos ta hasi nos parti, demostrando asina ku nos ta praktiká deboshon na Dios.—Kolosensenan 3:18-21.
Unda pa Haña Kontesta
11, 12. Kiko Yehova a perkurá pa yuda nos hasi bida di famia un éksito?
11 Hende ta akudí na hopi fuente pa haña konseho tokante asuntu di famia. Pero nos sa ku e Palabra di Dios ta kontené e mihó konseho, i nos ta gradisidu ku mediante su organisashon visibel, Dios ta yuda nos aplik’é. Bo ta probechá plenamente dje yudansa ei?—Salmo 119:129, 130; Mikéas 4:2.
12 Fuera di asistí na reunionnan di kongregashon, bo a apartá un ora fiho pa studia Beibel komo famia? Famianan ku hasi esei por traha pa nan ta uní den nan adorashon. Nan bida di famia ta bira mas riku segun ku nan ta apliká e Palabra di Dios na nan propio sirkunstansia.—Deuteronomio 11:18-21.
13. (a) Si nos tin pregunta riba asuntunan di famia, unda hopi bes nos por haña e yudansa nesesario? (b) Kiko mester keda reflehá den tur desishon ku nos tuma?
13 Kisas bo tin pregunta tokante asuntunan di famia. Por ehèmpel, kiko di planea famia? Tin okashon ku aborto ta hustifiká? Si un yu tin masha tiki interes den asuntunan spiritual, te na ki grado por eksigí p’e partisipá ku e famia den adorashon? Literatura publiká dor di Testigunan di Yehova a trata hopi di e preguntanan ei. Siña usa publikashonnan ku ta yuda bo studia Beibel, entre otro e indèksnan, pa haña e kontesta. Si bo no tin e publikashonnan ku e indèks ta referí na dje, chèk e biblioteka den e Salon di Reino. Òf podisé bo tin akseso na e publikashonnan aki riba bo kòmpiuter. Tambe bo por konsiderá bo preguntanan ku kristiannan maduro. Pero no ferwagt ku semper bo ta haña un sí òf nò riba tur pregunta. Hopi bes ta abo tin ku disidí, sea personalmente òf komo pareha. Anto tuma desishonnan ku ta demostrá ku bo ta praktiká deboshon na Dios no solamente den públiko, sino tambe na kas.—Romanonan 14:19; Efesionan 5:10.
Komo Repaso
• Kiko fieldat na Yehova tin di haber ku fieldat na bo kasá?
• Kiko lo yuda nos hasi loke ta agradá Dios ora nos ta bou di preshon debí na problemanan di famia?
• Asta si otro miembro di famia no ta kumpli ku nan parti, kiko nos por hasi pa drecha e situashon?
[Plachi na página 155]
E manera ku un esposo ta aktua komo kabes mester reflehá e kualidatnan di Hesus
[Plachi na página 157]
Un studio di Beibel regular ku e famia ta yuda trese union