Jehova E Dios Di Proposito

“Siguramente net manera mi a calculá, asina mester sosodé; i net manera mi a consehá, esei ta loke lo ser realisá.”​—⁠ISAIAS 14:24.

TUR caminda hende ta puntra: “Kico ta e propósito di bida?” Un lider político occidental a declará: “Mas hende cu nunca promé ta puntrando, ‘Ken nos ta? Kico ta nos propósito?’ ” Ora un corant den un encuesta a puntra hóbennan kico e propósito di bida ta, e contestanan típico tabata: “Haci tur loke bo curason ta deseá.” “Saca mayor probecho for di bida.” “Gosa mas tantu posibel.” “Haña yu, ser felis i despues muri.” Mayoria a kere cu e bida aki tabata tur loke tin. Ningun a papia di cualkier propósito di largu alcanse pa bida riba tera.

² Un escolástico confuciano a bisa: “E nificacion fundamental di bida ta ser hañá den nos existencia humano ordinario.” Di acuerdo cu esaki, hende lo sigui nace, lucha pa 70 of 80 aña, anto muri i keda inexistente pa semper. Un científico evolucionario a bisa: “Nos por anhelá pa un contesta ‘mas haltu’​—⁠pero no ta existí ningun.” P’e evolucionistanan aki, bida ta un lucha pa sobrebibencia, cu morto terminando tur cos. Tal filosofia ta presentá un punto di bista di bida sin speransa.

³ Hopi hende ta duda cu bida tin un propósito ora nan mira cu existencia humano ta yená cu asina tantu miseria. Den nos tempu, ora hende supuestamente a alcansá un culminacion di logro industrial i científico, rond di un biyon hende rond mundu ta seriamente malu of malnutrí. Miyones di mucha ta muri cada aña dje causanan ei. Ademas, e siglo 20 aki tabatin cuater biaha mas tantu morto di guera cu e cuatercien añanan anterior poní huntu tabatin. Crímen, violencia, abusu di droga, kiebro di famia, AIDS i otro malesanan transmití sexualmente​—⁠e lista di factornan negativo ta crece. Lidernan di mundu no tin solucion p’e problemanan aki.

⁴ Den bista di tal condicionnan, un persona a expresá loke hopi hende ta kere: “Bida no tin propósito. Si tur e mal cosnan aki ta sosodiendo, anto bida no ta nificá mashá.” I un homber bieu a bisa: “Casi henter mi bida mi ta puntrando pakico mi ta aki. Si tin un propósito, no ta importá mi mas.” Pues dor cu hopi hende no sa pakico Dios ta permití sufrimentu, condicionnan angustioso di mundu ta pone cu nan no tin berdadero speransa pa futuro.

⁵ Asta lidernan religioso ta dividí, i insigur, tocante e propósito di bida. Un ex- decano di Catedral di San Pablo na Lónden a bisa: “Henter mi bida mi a lucha pa haña e propósito di biba. . . . Mi a fracasá.” Sí, hopi clero ta siña cu na morto bon hende ta bai cielu i mal hende ta bai un fiernu di candela pa semper. Pero e punto di bista aki tog ta laga humanidad riba tera sigui su curso tormentá. I si tabata e propósito di Dios pa hende biba den cielu, pakico e no a simplemente traha nan como criatura celestial fo’i principio, manera el a traha e angelnan, i pues spar hende di asina tantu sufrimentu? Pues confusion en cuanto e propósito di bida riba tera of rechaso pa kere cu e tin cualkier propósito ta comun.

E Dios di Propósito

⁶ Tog, e buki mas ampliamente plamá den historia, e Bijbel Santu, ta bisa nos cu Jehova, e Soberano di universo, ta e Dios di propósito. E ta mustra nos cu e tin un propósito di largu alcanse pa humanidad riba tera, en realidad, un propósito eterno. I ora Jehova proponé algu, lo e tuma lugá sin faya. Mescos cu awaceru ta pone simia spruit, Dios ta bisa, “asina mi palabra cu ta sali for di mi boca lo resultá di ta. Lo e no bolbe na mi sin resultado, sino cu siguramente lo e haci loke mi tin deleite den, i lo e tin éxito sigur pa locual mi a mand’é.” (Isaías 55:​10, 11) Kico cu Jehova bisa cu lo e cumpli cuné, “ta loke lo ser realisá.”​—⁠Isaías 14:24.

⁷ Como hende nos por tin pleno confiansa cu e Todopoderoso lo cumpli cu su promesanan, pasobra Dios “no por gaña.” (Tito 1:2; Hebreo 6:18) Ora e bisa nos cu lo e haci algu, su palabra ta un garantia cu lo e ser realisá. Bo por consider’e como cumplí caba. E ta declará: “Ami ta Esun Divino i no tin otro Dios, ni ningun manera mi; Esun cu ta declará desde e principio e final, i for di hopi tempu atras e cosnan cu no a ser hací; Esun bisando, ‘Mi mes conseho lo sigui existí, i tur loke ta mi deleite lo mi haci’ . . . Mi asta a papi’é; lo mi trec’é aden tambe. Mi a form’é, lo mi haci’é tambe.”​—⁠Isaías 46:​9-11.

⁸ Ademas, Jehova “no ta deseá pa ningun ser destruí sino ta deseá pa tur alcansá repentimentu.” (2 Pedro 3:⁠9) P’e motibu aki, e no kier pa ningun persona ta den ignorancia di dje. Un profeta yamá Azarías a bisa: “Si boso busca [Dios], lo e laga su mes ser hañá dor di boso, pero si boso bandon’é lo e bandoná boso.” (2 Crónica 15:​1, 2) Pues, esnan cu sinceramente kier conocé Dios i su propósitonan siguramente por haci esei si nan haci e esfuerso pa busk’é.

⁹ Busca na unda? Pa esnan cu berdaderamente ta buscando Dios, el a percurá su Palabra, e Bijbel. Pa medio di su spiritu santu, e mésun forsa activo cu el a usa pa crea e universo, Dios a dirigí hombernan fiel pa skirbi loke nos mester sa tocante su propósitonan. Por ehempel, en cuanto profecia bíblico, apostel Pedro a bisa: “Profecia no a yega na ningun tempu p’e boluntad di hende, sino hombernan a papia di parti di Dios ora spiritu santu a hiba nan.” (2 Pedro 1:21) Di igual manera, apostel Pablo a declará: “Tur Scritura ta inspirá di Dios i ta probechoso pa siña, pa reprendé, pa rectificá cosnan, pa disipliná den husticia, pa e hende di Dios por ta henteramente competente, completamente ekipá pa tur bon obra.”​—⁠2 Timoteo 3:​16, 17; 1 Tesalonicense 2:13.

¹⁰ Nota cu e Palabra di Dios ta capacitá nos pa ta, no parcialmente of incompletamente, sino “henteramente competente, completamente ekipá.” E ta capacitá bo pa ta sigur tocante ken Dios ta, kico su propósitonan ta i loke e ta rekerí di su sirbidornan. Esaki ta loke bo por spera di un buki di cua Dios ta su autor. I e ta e único fuente cu nos por investigá pa haña un conocimentu exacto di Dios. (Proverbio 2:​1-5; Juan 17:⁠3) Dor di haci asina, nos lo “no ta mucha chikitu mas, tirá p’aki i p’aya manera dor di olanan i hibá di aki p’aya dor di tur bientu di siñansa pa medio di triki di hende, pa medio di astucia di inventá eror.” (Efesio 4:​13, 14) E salmista a expresá e punto di bista corecto: “Bo [Dios su] palabra ta un lampi pa mi pia, i un lus pa mi caminda.”​—⁠Salmo 119:105.

Revelá Progresivamente

¹¹ N’e principio mes dje famia humano, Jehova a revelá su propósitonan pa cu e tera aki i hende riba dje. (Génesis 1:​26-30) Pero ora nos promé mayornan a rechasá e soberania di Dios, humanidad a cai den scuridad spiritual i morto. (Romano 5:12) Sin embargo, Jehova tabata sa cu lo tin hende cu lo kier a sirbi’é. P’esei, atrabes dje siglonan, el a revelá su propósitonan progresivamente na su fiel sirbidornan. Algun di esnan cu ken el a comunicá tabata Enoc (Génesis 5:24; Hudas 14, 15), Noe (Génesis 6:​9, 13), Abraham (Génesis 12:​1-3) i Moises (Éxodo 31:18; 34:​27, 28). E profeta di Dios, Amos, a skirbi: “E Señor Soberano Jehova lo no haci ni un solo cos aménos cu el a revelá su asuntu confidencial na su sirbidornan e profetanan.”​—⁠Amos 3:7; Daniel 2:​27, 28.

¹² Ora Jesucristo, e Yu di Dios, tabata riba tera rond di 4.000 aña despues dje rebelion den Eden, hopi mas detaye di Jehova su propósitonan a ser revelá. Esaki tabata particularmente cierto en cuanto Dios su propósito pa establecé un Reino celestial pa goberná e tera. (Daniel 2:44) Jesus a haci e Reino ei e tema di su siñansa. (Mateo 4:17; 6:10) E i su disipelnan a siña cu bou dje Reino, Dios su propósito original p’e tera i pa humanidad lo ser cumplí. E tera lo ser transformá den un paradijs habitá pa hende perfecto, kendenan lo biba pa semper. (Salmo 37:29; Mateo 5:5; Lucas 23:43; 2 Pedro 3:13; Revelacion 21:⁠4) Ademas, Jesus i su disipelnan a demostrá loke lo tuma lugá den e mundu nobo ei dor dje milagernan cu Dios a duna nan poder pa haci.​—⁠Mateo 10:​1, 8; 15:​30, 31; Juan 11:​25-44.

¹³ Na Pentecoste 33 E.C., 50 dia despues dje morto di Jesus, e spiritu di Dios a ser dramá rib’e congregacion di siguidornan di Cristo. El a reemplasá Israel infiel como Jehova su pueblo di pacto. (Mateo 21:43; 27:51; Echo 2:​1-4) E dramamentu di spiritu santu na tal ocasion tabata un evidencia cu, dje tempu ei en adelante, Dios lo a revelá e berdadnan tocante su propósitonan mediante e agencia nobo aki. (Efesio 3:10) Durante e promé siglo E.C., e structura organisacional dje congregacion cristian a ser establecí.​—⁠1 Corintio 12:​27-31; Efesio 4:​11, 12.

¹⁴ Awe, buscadornan dje berdad por identificá e berdadero congregacion cristian dor di su manifestacion consistente dje cualidad principal di Dios, amor. (1 Juan 4:​8, 16) En berdad, amor fraternal ta un marca di identificacion di berdadero cristianismo. Jesus a bisa: “Mediante esaki tur hende lo sa cu boso ta mi disipelnan, si boso tin amor entre boso.” “Esaki ta mi mandamentu, pa boso stima un e otro mescos cu ami a stima boso.” (Juan 13:35; 15:12) I Jesus a recordá su oyentenan: “Boso ta mi amigunan si boso ta haci loke mi ta manda boso.” (Juan 15:14) Pues, e berdadero sirbidornan di Dios ta esnan cu ta biba e ley di amor. Nan no ta djis papia tocante dje, pasobra “fe sin obra ta morto.”​—⁠Santiago 2:26.

Iluminacion

¹⁵ Jesus a profetisá cu, cu pasamentu di tempu, e berdadero congregacion cristian lo ser iluminá mas i mas en cuanto e propósitonan di Dios. El a primintí su siguidornan: “E yudante, e spiritu santu, cu e Tata lo manda den mi nomber, esei lo siña boso tur cos.” (Juan 14:26) Jesus a bisa tambe: “Mira! Mi ta cu boso tur e dianan te na conclusion dje sistema di cosnan.” (Mateo 28:20) Pues, iluminacion relacioná cu e berdad tocante Dios i su propósitonan ta aumentá entre e sirbidornan di Dios. Sí, “e caminda dje hustunan ta manera e lus briyante cu ta birando mas i mas cla te ora e dia ta firmemente establecí.”​—⁠Proverbio 4:18.

¹⁶ Awe, e lus spiritual ei ta mas briyante cu nunca, pasobra nos ta n’e tempu ora hopi profecia bíblico ta cumpliendo of cerca di cumpli. Esakinan ta mustra nos cu nos ta bibando den “e último dianan” dje mal sistema aki di cosnan. Esaki ta e periodo di tempu yamá “e conclusion dje sistema di cosnan”; e mundu nobo di Dios lo sigui su tras. (2 Timoteo 3:​1-5, 13; Mateo 24:​3-13) Manera Daniel a profetisá, e Reino celestial di Dios pronto lo “machicá i pone fin na tur e reinonan [existiendo awor], i e mes lo keda existí pa tempu indefiní.”​—⁠Daniel 2:44.

¹⁷ Entre e profecianan cu ta cumpliendo awor ta esun mencioná den versículo 14 di Mateo capítulo 24. Ei Jesus a bisa: “E bon nobo aki di reino lo ser predicá den tur e tera habitá como testimonio pa tur nacion; anto e fin lo yega.” Rond e tera, e obra ei di predicacion di Reino ta ser hací dor di miyones di Testigo di Jehova. I cientos di miles di hende ta uni cu nan tur aña. Esaki ta na armonia cu e profecia na Isaías 2:​2, 3, cua ta bisa cu “den e parti final dje dianan” dje mundu malbado aki, hende di hopi nacion lo bini na Jehova su adoracion berdadero, i ‘lo e instruí nan tocante su camindanan, i nan lo cana den su bereanan.’

¹⁸ E personanan nobo aki ta congregando na Jehova su adoracion “net manera un nubia,” manera Isaías capítulo 60, versículo 8 a profetisá. Versículo 22 ta agregá: “E chikitu mes lo bira mil, i e menor un nacion poderoso. Ami mes, Jehova, lo aceler’é na su debido tempu.” Evidencia ta mustra cu e tempu ei ta awor aki mes. I hende nobo por tin confiansa cu asociando cu Testigonan di Jehova, nan a drenta den contacto cu e berdadero congregacion cristian.

¹⁹ Pakico nos por bisa esaki cu siguridad? Pasobra e personanan nobo aki, huntu cu e miyones caba den e organisacion di Jehova, a dedicá nan bida na Dios i ta haciendo su boluntad. Esaki ta incluí biba na armonia cu e ley di amor piadoso. Como un evidencia di esaki, e cristiannan aki a ‘bati nan spada na ploeg i nan lansa na chapi i no ta siña mas di guera.’ (Isaías 2:⁠4) Tur Testigo di Jehova rond mundu a haci esaki pasobra nan ta practicá amor. Esaki ta nificá cu nan nunca mas por hisa arma di guera contra otro ni contra ningun otro hende. Den esaki nan ta único​—⁠distinto di religionnan di mundu. (Juan 13:​34, 35; 1 Juan 3:​10-12, 15) Nan no ta bira enbolbí den nacionalismo cu ta causa division, pasobra nan ta forma un hermandad mundial enlasá cu amor, “un banchi perfecto di union.”​—⁠Colosense 3:14; Mateo 23:8; 1 Juan 4:​20, 21.

Mayoria Ta Scoge pa No Sa

²⁰ Miéntras e lus spiritual entre e sirbidornan di Dios ta bira mas cla, e resto dje poblacion di tera ta hundiendo den scuridad spiritual cada bes mas grandi. Nan no conocé Jehova of su propósitonan. E profeta di Dios a describí e tempu aki ora el a bisa: “Mira! scuridad mes lo cubri e tera, i tiniebla diki e gruponan nacional.” (Isaías 60:⁠2) Esaki ta asina debí cu hende no ta manifestá un interes sincero den siña tocante Dios, tampoco nan ta demostrá un deseo pa purba agrad’é. Jesus a bisa: “Awor esaki ta e base pa huicio, cu e lus a bini na mundu pero hende a stima e scuridad mas bien cu e lus, pasobra nan obranan tabata malu. Pasobra esun cu ta practicá cosnan baho ta odia e lus i no ta bini n’e lus, pa su obranan no ser reprendé.”​—⁠Juan 3:​19, 20.

²¹ Hende asina no ta berdaderamente interesá pa conocé e boluntad di Dios. En bes di esei, nan ta concentrá nan bida riba hacimentu di nan mes boluntad. Dor di ignorá e boluntad di Dios, nan ta pone nan mes den un posicion peligroso, pasobra su Palabra ta declará: “Esun cu ta apartá su orea for di tende e ley​—⁠asta su oracion ta un cos detestabel.” (Proverbio 28:⁠9) Nan lo carga e consecuencianan dje curso cu nan a scoge. Apostel Pablo a skirbi: “No sea gañá: hende no por haci mofa di Dios. Pasobra kico cu un hende sembra, esaki lo e cosechá tambe.”​—⁠Galatio 6:⁠7.

²² Sin embargo, tin hopi hende cu sí kier conocé e boluntad di Dios, kendenan sinceramente ta busk’é, i kendenan ta ser atraí na dje. “Hala cerca Dios, i lo e hala cerca boso,” segun Santiago 4:⁠8. Di hende asina Jesus a bisa: “Esun cu ta haci loke ta berdad ta bini n’e lus, pa su obranan por ser manifestá en cuanto si el a obra na armonia cu Dios.” (Juan 3:21) I ki un futuro maraviyoso Dios a proponé pa esnan cu ta bini n’e lus! Nos siguiente artículo lo considerá e prospectonan promesanan emocionante.

[Study Questions]

1, 2. Kico hopi hende ta bisa tocante e propósito di bida?

3, 4. Con condicionnan di mundu ta afectá e manera cu hopi hende ta mira bida?

5. Pakico e religionnan dje mundu aki ta aumentá e confusion tocante e propósito di bida?

6, 7. Kico Bijbel ta bisa nos tocante e Soberano Universal?

8. Esnan cu sinceramente kier conocé Dios por hañ’é?

9, 10. (a) Kico a ser percurá pa esnan cu kier conocé Dios? (b) Kico un investigacion dje Palabra di Dios ta capacitá nos pa haci?

11. Con Jehova a revelá su propósitonan na humanidad?

12. Con Jesus a tira mas lus riba e propósitonan di Dios?

13. Relacioná cu Dios su tratamentu cu humanidad, ki cambio a tuma lugá na Pentecoste 33 E.C.?

14. Con buscadornan dje berdad por identificá e berdadero congregacion cristian?

15. Di kico e sirbidornan di Dios por ta sigur?

16. Segun nos iluminacion spiritual, unda nos ta relacioná cu e propósitonan di Dios?

17, 18. Cua gran profecianan ta cumpliendo awor aki?

19. Pakico nos ta bisa cu personanan nobo cu ta asociá cu Testigonan di Jehova ta biniendo n’e berdadero congregacion cristian?

20, 21. Pakico e gran mayoria di humanidad ta den scuridad spiritual? (2 Corintio 4:4; 1 Juan 5:19)

22. Hopi hende cu kier conocé Dios ta haciendo kico awor?

[Caption on page 14]

Con Lo Bo Contestá?

◻ Kico hopi hende ta bisa en cuanto e propósito di bida?

◻ Con Jehova ta revelá su mes como un Dios di propósito?

◻ Cua gran iluminacion a tuma lugá den e promé siglo E.C.?

◻ Con e berdadero congregacion cristian por ser identificá awe?