No Entregá den e Careda pa Bida!
“Laga nos core cu awante e careda cu ta poní dilantí nos.”—Hebreonan 12:1.
1, 2. Ki sucesonan excitante a emocioná sirbidónan di Jehova durante e último dianan aki?
NOS ta biba den un tempu excitante i difícil. Mas cu 80 aña pasá, na 1914, Jesus a ser entronisá como Rey dje Reino celestial di Dios. “E dia di Señor” i huntu cuné “e tempu di fin” dje sistema di cosnan aki a cuminsá. (Revelacion 1:10; Daniel 12:9) Desde e tempu ei e necesidad pa core e careda cristian pa bida a bira mas i mas urgente. Dios su sirbidónan a haci esfuerso vigoroso pa keda pareu cu Jehova su garoshi celestial, su organisacion celestial, cu ta moviendo padilanti sin cu ningun hende por stop e, pa cumpli cu e propósitonan di Jehova.—Ezekiel 1:4-28; 1 Corintionan 9:24.
2 E pueblo di Dios a haña goso den nan “careda” pa alcansá bida eterno? Claro cu sí! Yen di emocion nan a mira e recogementu dje resto di Jesus su rumannan, i nan ta alegrá ora nan realisá cu e seyamentu final dje resto dje 144.000 ta cerca di ser completá. (Revelacion 7:3, 4) Ademas, cu entusiasmo nan ta dicerní cu Jehova su Rey nombrá a manda su machete pa recogé “e cosecha dje tera.” (Revelacion 14:15, 16) I ki un cosecha esei ta! (Mateo 9:37) Te asina leu, mas cu cincu miyon alma a ser recogé—“un multitud grandi, cu ningun hende por a conta, for di tur nacion i tribu i pueblo i lenga.” (Revelacion 7:9) Ningun hende por bisa con grandi e multitud ei lo ta finalmente, ya cu ningun hende por cont’é.
3. Apesar di ki obstáculo nos semper tin cu purba cultivá un spiritu gososo?
3 Ta cierto cu Satanas ta purba pone nos trompecá of reducí nos velocidad segun cu nos ta avansá rápidamente den e careda. (Revelacion 12:17) I no tabata fácil pa sigui wanta den e careda meimei di guera, hamber, pest i tur e otro contratempunan cu ta marca e tempu di fin. (Mateo 24:3-9; Lucas 21:11; 2 Timoteo 3:1-5) Tog, nos curason ta salta di goso segun cu e fin dje careda ta yega mas cerca. Nos ta haci esfuerso pa reflehá e spiritu cu Pablo a urgi compañeronan cristian den su dia pa nan tin: “Semper alegrá den Señor. Un bes mas lo mi bisa: Alegrá!”—Filipensenan 4:4.
4. Ki spiritu e cristiannan filipense a manifestá?
4 No tin duda cu e cristiannan na ken Pablo a dirigí e palabranan ei tabata haña goso den nan fe, pasobra Pablo a bisa nan: “Sigui alegrá den Señor.” (Filipensenan 3:1) E filipensenan tabata un congregacion generoso i amoroso cu a sirbi cu celo i entusiasmo. (Filipensenan 1:3-5; 4:10, 14-20) Pero no ta tur e cristiannan dje promé siglo tabatin e spiritu ei. Por ehempel, algun dje cristiannan hudiu na ken Pablo a skirbi e buki di Hebreonan tabata un causa di preocupacion.
“Presta Mas cu e Atencion Acustumbrá”
5. (a) Ki spiritu cristiannan hebreo tabatin ora e promé congregacion cristian a ser formá? (b) Describí e spiritu di algun cristian hebreo rond di 60 E.C.
5 E promé congregacion cristian den historia di mundu tabata consistí di hudiu natural i prosélitonan i a ser establecí den Jerusalem na 33 E.C. Ki spiritu e tabatin? Bo tin cu solamente lesa e promé capítulonan dje buki di Echonan pa descubrí su entusiasmo i goso, asta meimei di persecucion. (Echonan 2:44-47; 4:32-34; 5:41; 6:7) Sin embargo, segun cu e décadanan a pasa, cosnan a cambia, i ta parce cu hopi cristian hudiu a baha nan velocidad den e careda pa bida. Un obra di referencia ta bisa esaki tocante nan situacion manera el a existí rond di 60 E.C.: “Un condicion di flohera i cansancio, di expectativanan cu a keda sin cumpli, speransanan posponé, eror deliberá i falta di fe den cosnan di tur dia. Nan tabata cristian pero nan tabatin poco aprecio p’e gloria di nan yamamentu.” Con cristiannan ungí por a haña nan den un condicion asina? Un consideracion di partinan di Pablo su carta n’e hebreonan (skirbí rond di 61 E.C.) ta yuda nos contestá e pregunta ei. Un consideracion asina lo yuda nos tur awe evitá di hundi den un condicion spiritual débil asina.
6. Kico ta algun diferencia entre adoracion bou dje Ley di Moises i adoracion basá riba fe den Jesucristo?
6 Cristiannan hebreo a sali for di hudaismo, un sistema cu a pretendé di obedecé e Ley cu Jehova a duna mediante Moises. Aparentemente e Ley ei a sigui atraé hopi cristian hudiu, tal bes debí cu pa hopi siglo e tabata e único manera pa acercá Jehova, i e tabata un sistema impresionante di adoracion, cu un sacerdocio, sacrificionan regular i un tempel mundialmente famoso den Jerusalem. Cristianismo ta diferente. E ta exigí un punto di bista spiritual, manera esun di Moises, kende “a mira atentamente n’e pago dje [futuro] recompensa” i “a sigui firme como si el a mira Esun cu ta invisibel.” (Hebreonan 11:26, 27) Hopi cristian hudiu evidentemente tabata falta un punto di bista spiritual asina. Nan tabata cocochá en bes di core cu un propósito.
7. Con e sistema cu nos a sali for di dje lo por afectá e manera cu nos ta core den e careda pa bida?
7 Tin un situacion similar awe? Wel, cosnan no ta exactamente mescos. Tog, cristiannan ta sali for di un sistema di cosnan cu ta gaba su mes mashá. Mundu ta ofrecé oportunidadnan excitante, pero na mésun tempu, e ta pone responsabilidadnan pisá riba hende. Ademas, hopi di nos ta biba den paisnan caminda un actitud sképtico ta comun i caminda hende tin un actitud egoista di ‘ami promé.’ Si nos permití un sistema asina influenciá nos, fácilmente e ‘wowonan di nos curason’ por bira dòf. (Efesionan 1:18) Con nos lo core bon den e careda pa bida si nos no por dicerní claramente mas unda nos ta bayendo?
8. Cua ta algun manera den cua cristianismo ta superior na adoracion bou dje Ley?
8 Pa por stimulá cristiannan hudiu, Pablo a recordá nan dje superioridad dje sistema cristian riba e Ley di Moises. Ta cierto cu ora e nacion di Israel carnal tabata consistí di Jehova su pueblo bou dje Ley, Jehova a papia cu nan mediante profetanan inspirá. Pero, Pablo ta bisa, awe e ta papia “pa medio di un Yu, kende el a nombra heredero di tur cos, i pa medio di ken el a traha e sistemanan di cosnan.” (Hebreonan 1:2) Ademas, Jesus ta mayor cu tur e reynan dje desendencia di David, su “socionan.” E ta asta mas haltu cu e angelnan—Hebreonan 1:5, 6, 9.
9. Pakico nos, mescos cu cristiannan hudiu dje tempu di Pablo, tin cu presta “mas cu e atencion acustumbrá” na loke Jehova ta bisa?
9 P’esei, Pablo a consehá cristiannan hudiu: “Ta necesario pa nos presta mas cu e atencion acustumbrá n’e cosnan cu nos a tende, pa nos nunca drif bai.” (Hebreonan 2:1) Aunke tabata un bendicion maraviyoso pa siña tocante e Cristo, mas tabata necesario. Nan mester a presta sumo atencion n’e Palabra di Dios pa contrarestá e influencia dje mundu hudiu rond di nan. Nos tambe tin cu presta “mas cu e atencion acustumbrá” na loke Jehova ta bisa en bista dje ideanan na cua e mundu aki ta exponé nos constantemente. Esaki ta nificá desaroyá un bon hábito di studio i mantené un bon programa di lesamentu di Bijbel. Manera Pablo ta bisa despues den su carta n’e hebreonan, e ta nificá tambe ser regular na reunionnan i den proclamá nos fe na otronan. (Hebreonan 10:23-25) Actividadnan asina lo yuda nos keda spiritualmente alerto pa nos no perde bista di nos speransa glorioso. Si nos yena nos mente cu Jehova su pensamentunan, nada cu e mundu aki por haci cu nos, lo aplastá nos of saca nos for di balansa.—Salmo 1:1-3; Proverbionan 3:1-6.
“Sigui Exhortá Otro”
10. (a) Kico por sosodé cu un persona cu no ta presta mas cu e atencion acustumbrá n’e Palabra di Jehova? (b) Con nos por “sigui exhortá otro”?
10 Si nos no presta sumo atencion na cosnan spiritual, tin hopi chens cu e promesanan di Dios por cuminsá parce ireal. Esaki a sosodé asta den e promé siglo ora e congregacionnan tabata consistí henteramente di cristiannan ungí i algun dje apostelnan tabata na bida ainda. Pablo a spierta e hebreonan: “Tene cuidou, rumannan, pa miedu cu un dia lo desaroyá den algun di boso un curason malbado cu falta fe dor di alehá for di e Dios bibu; pero sigui exhortá otro cada dia, tanten cu e por ser yamá ‘Awe,’ pa miedu cu cualkier di boso por bira duru mediante e poder engañoso di picá.” (Hebreonan 3:12, 13) Pablo su expresion “tene cuidou” ta enfatisá e necesidad pa ta alerto. Tin menasa di peliger! Un falta di fe—“picá”—lo por desaroyá den nos curason, i nos lo por alehá for di Dios en bes di hala mas cerca dje. (Santiago 4:8) Pablo ta recordá nos pa “sigui exhortá otro.” Nos tin mester dje calor di asociacion fraternal. “Un persona cu ta isolá su mes lo busca su mes anhelo egoista; contra tur sabiduria práctico lo e lanta.” (Proverbionan 18:1) E necesidad pa un asociacion asina ta impulsá cristiannan awe pa ta regular den asistí na reunion di congregacion, asamblea i congresonan.
11, 12. Pakico nos no mester keda satisfecho cu un simpel conocimentu di doctrinanan cristian básico?
11 Mas despues den su carta, Pablo ta duna e siguiente conseho baliosísimo aki: “Aunke boso mester tabata maestro caba den bista dje tempu, atrobe boso mester di un hende pa siña boso for di principio e cosnan elemental dje declaracionnan sagrado di Dios; i boso a bira manera hende cu mester di lechi, no cuminda sólido. . . . Cuminda sólido ta pertenecé na hende maduro, na esnan kende mediante uso tin nan facultadnan perceptivo entrená pa distinguí tantu loke ta bon como loke ta malu.” (Hebreonan 5:12-14) Evidentemente, algun cristian hudiu no a mehorá nan facultadnan perceptivo. Nan tabata lento pa aceptá mas iluminacion relacioná cu e Ley i circuncision. (Echonan 15:27-29; Galationan 2:11-14; 6:12, 13) Kisas algun ainda a duna hopi balor na custumbernan tradicional manera e sabat semanal i e Dia solem di Expiacion di tur aña.—Colosensenan 2:16, 17; Hebreonan 9:1-14.
12 P’esei, Pablo ta bisa: “Awor cu nos a bandoná e doctrina primario tocante e Cristo, laga nos sigui padilanti na madures.” (Hebreonan 6:1) Un coredó di máraton cu ta presta sumo atencion na su dieta ta den un mihó posicion pa wanta e careda largu i pisá. Di manera similar, un cristian cu ta presta sumo atencion na nutricion spiritual—no limitando su mes na ‘doctrinanan primario’ básico—lo ta den un mihó posicion pa permanecé riba e curso i finalis’é. (Compará cu 2 Timoteo 4:7.) Esaki ta nificá desaroyá un interes den “e hanchura i largura i haltura i profundidad” dje berdad, progresando asina na madures.—Efesionan 3:18.
“Boso Tin Mester di Awante”
13. Con e cristiannan hebreo a demostrá nan fe den pasado?
13 Den e periodo inmediatamente despues di Pentecoste 33 E.C., cristiannan hudiu a para firme apesar di oposicion feros. (Echonan 8:1) Tal bes Pablo tabatin esaki na mente ora el a skirbi: “Sigui corda e dianan cu a pasa den cua, despues cu boso a ser iluminá, boso a wanta un lucha grandi bou di sufrimentu.” (Hebreonan 10:32) Un awante fiel asina a demostrá nan amor pa Dios i a duna nan frankesa di expresion dilanti dje. (1 Juan 4:17) Pablo ta exhortá nan pa no tira esei afó debí na un falta di fe. E ta urgi nan: “Boso tin mester di awante, afin cu, despues di a haci e boluntad di Dios, boso por ricibí e cumplimentu dje promesa. Pasobra ainda ‘pa masha poco tempu,’ i ‘esun cu ta bini lo yega i lo no tarda.’”—Hebreonan 10:35-37.
14. Ki echonan mester yuda nos wanta asta despues di a sirbi Jehova pa hopi aña?
14 Kico di nos awe? Mayoria di nos tabata celoso ora nos a siña e berdad cristian na promé instante. Nos tin e celo ei ainda? Of nos a ‘bandoná e amor cu nos tabatin na principio’? (Revelacion 2:4) Nos a fria, tal bes bira un tiki desilusioná of cansá di warda riba Armagedon? Pero, para un ratu i considerá esaki. E berdad no ta ménos maraviyoso cu e tabata promé. Ainda Jesus ta nos Rey celestial. Ainda nos ta spera bida eterno riba un tera paradísico, i ainda nos tin nos relacion cu Jehova. I no lubidá nunca: “Esun cu ta bini lo yega i lo no tarda.”
15. Mescos cu Jesus, con algun cristian a wanta persecucion amargo?
15 P’esei, e palabranan di Pablo registrá na Hebreonan 12:1, 2 ta masha apropiado: “Laga nos tambe kita tur carga i e picá [falta di fe] cu fácilmente ta coge nos den trampa, i laga nos core cu awante e careda cu ta poní dilanti nos, segun cu nos ta mira atentamente n’e Agente Principal i Perfeccionador di nos fe, Jesus. P’e goso cu tabata poní su dilanti el a wanta un staca di tormento, despreciando bergwensa, i a sinta na man drechi dje trono di Dios.” Tin hopi cos cu Dios su sirbidónan a wanta den e último dianan aki. Mescos cu Jesus, kende tabata fiel te n’e punto di un morto agonisante, algun di nos rumannan a wanta fielmente e persecucion di mas severo—camponan di prizon, tortura, violacion sexual, asta morto. (1 Pedro 2:21) Nos curason no ta yena cu amor pa nan ora nos considerá nan integridad?
16, 17. (a) Ki desafionan pa nan fe mayoria cristian tin cu lucha cuné? (b) Kico nos mester corda pa yuda nos sigui core den e careda pa bida?
16 Sin embargo, pa mayoria cristian, e siguiente palabranan di Pablo ta aplicabel: “Den boso lucha contra e picá ei, te ainda nunca boso a resistí mes leu cu sanger.” (Hebreonan 12:4) No obstante, den e sistema aki e caminda dje berdad no ta fácil pa ningun di nos. Algun ta ser desanimá dor di “papiamentu contrario di pecadónan” na trabou seglar of na scol, i ta haña nan ta wanta bofon of resistí presion pa peca. (Hebreonan 12:3) Tentacion fuerte a caba cu e determinacion di algun pa mantené e normanan haltu di Dios. (Hebreonan 13:4, 5) Apóstatanan a afectá e balansa spiritual di algun cu ta scucha nan ideanan venenoso. (Hebreonan 13:9) Problemanan di personalidad a horta otronan di goso. Demasiado énfasis riba entretenimentu i actividadnan di tempu liber a debilitá algun cristian. I mayoria hende ta sinti e presion dje problemanan di biba den e sistema di cosnan aki.
17 Ta cierto cu ningun dje situacionnan aki ta forma un ‘resistencia mes leu cu sanger.’ I algun situacion por ta debí na nos mes mal decisionnan. Pero nan tur ta presentá un desafio pa nos fe. P’esei nos mester sigui mantené nos bista riba Jesus su ehempel magnífico di awante. Laga nos nunca lubidá ki maraviyoso nos speransa ta. Laga nos nunca perde nos conviccion cu Jehova “ta bira recompensador di esnan cu ta busk’é cu empeño.” (Hebreonan 11:6) E ora ei, nos lo tin e fortalesa spiritual pa sigui core den e careda pa bida.
Nos Por Wanta
18, 19. Ki sucesonan histórico ta indicá cu cristiannan hebreo den Jerusalem a haci caso dje conseho inspirá di Pablo?
18 Con e cristiannan hudiu a respondé riba e carta di Pablo? Rond di seis aña despues cu e carta n’e hebreonan a ser skirbí, Hudea tabata den guera. Na 66 E.C., e ehército romano a sitia Jerusalem, cumpliendo cu Jesus su palabranan: “Ora boso mira Jerusalem rondoná pa ehércitonan den campamentu, sabi e ora ei cu e desolacion di dje a yega cerca.” (Lucas 21:20) Sin embargo, p’e beneficio di cristiannan cu tabata na Jerusalem e tempu ei, Jesus a bisa: “Laga esnan den Hudea cuminsá hui p’e cerunan, i laga esnan cu ta meimei di dje retirá, i laga esnan den cunucu no drent’é.” (Lucas 21:21) P’esei, e guera cu Roma a presentá un prueba: E cristiannan hudiu lo a bandoná Jerusalem, e centro di adoracion hudiu i e sitio dje tempel glorioso?
19 Di ripiente, i sin ningun motibu conocí, e romanonan a retirá. Probablemente, hudiunan religioso a mira esaki como prueba cu Dios tabata protehando nan stad santu. Kico di cristiannan? Historia ta bisa nos cu nan a hui. Anto, na 70 E.C., e romanonan a bini bek i a destruí Jerusalem totalmente cu pérdida spantoso di bida. E “dia di Jehova” cu Joël a predicí a yega riba Jerusalem. Pero cristiannan fiel no tabat’ei mas. Nan a ‘scapa nan bida.’—Joël 2:30-32; Echonan 2:16-21.
20. E echo cu nos sa cu e ‘dia grandi di Jehova’ ta cerca mester move nos pa haci kico?
20 Awe, nos sa cu un otro ‘dia grandi di Jehova’ pronto lo afectá henter e sistema di cosnan aki. (Joël 3:12-14) Nos no sa ki dia e tempu ei lo bini. Pero e Palabra di Dios ta sigurá nos cu lo e bini sigur! Jehova ta bisa cu lo e no ta lat. (Habacuc 2:3; 2 Pedro 3:9, 10) P’esei, laga nos “presta mas cu e atencion acustumbrá n’e cosnan cu nos a tende.” Evitá un falta di fe, “e picá cu fácilmente ta coge nos den trampa.” Sea determiná pa wanta mes tantu cu ta necesario. Corda, Jehova su organisacion celestial semehante na garoshi ta move bai padilanti. Lo e cumpli cu su propósito. Pues, laga nos tur sigui core i no entregá den e careda pa bida!
Bo ta Corda?
◻ Haciendo caso di ki spiertamentu di Pablo n’e filipensenan lo yuda nos wanta e careda pa bida?
◻ Kico lo yuda nos contrarestá e tendencia dje mundu aki pa distraé nos?
◻ Con nos por yuda otro wanta den e careda?
◻ Kico ta algun cos cu por baha un cristian su velocidad?
◻ Con e ehempel di Jesus por yuda nos wanta?
[Plachi na página 8, 9]
Cristiannan, mescos cu coredónan, no mester laga nada distraé nan
[Plachi na página 10]
Nada por prevení Jehova su gran garoshi celestial di cumpli cu Dios su propósito