“E Palabra di Dios . . . Ta Ehercé Poder”
1 “E palabra di Dios ta bibu i ta ehercé poder,” apostel Pablo a skirbi. (Heb. 4:12) Kico e tabata kier men cu esei? E palabra of mensahe di Dios, hañá den Bijbel por tin un influencia fuerte riba hende. E sabiduria cu Bijbel ta contené tin e poder pa cambia un hende su bida pa mas mihó. E consuelo i speransa cu e ta ofrecé ta hala hende na e Dunador di Bida, Jehova Dios. Bijbel su mensahe por yuda esnan di curason onrado cuminsá cana riba e caminda cu ta hiba na bida eterno. Sin embargo, pa mira e efectonan aki, nos tin cu usa Bijbel ora nos ta duna testimonio na otro hende.
2 Lesa un Texto Bíblico na Tur Oportunidad: Ta parce cu hopi publicadó a perde e custumber di usa Bijbel na porta. Esei ta e caso cu bo? Dor cu hopi hende aparentemente no tin tempu pa combersacionnan largu, kisas bo a cai den e rutina di solamente ofrecé literatura of djis bisa un texto cu bo mes palabranan. Nos ta animá tur publicadó pa haci un esfuerso sincero pa lesa por lo ménos un versículo di Bijbel ora di presentá e bon nobo, permitiendo e persona pa mira dje manera ei cu nos mensahe realmente ta ser hañá den e Palabra di Dios.
3 Aunke masha poco hende tin e custumber di lesa Bijbel, por lo general ainda nan ta respetá ora bo les’é. Hopi bes asta hende ocupá lo tuma un par di minuut pa tende un mensahe lesá directamente for dje Palabra di Dios. Ora lesa un texto apropiado den un forma caluroso i duna un splicacion breve, e poder dje palabra di Jehova por tin un bon efecto riba e oyente. Pero con bo por pasa di bo comentarionan di introduccion pa lesa un versículo for di Bijbel?
4 Purba Haci Esaki den e Trabou cu Revista: Un superintendente biahero ta haci uso eficas dje Scritura ora e ta predicá cu revista. E ta hiba un Bijbel chikitu den su sacu. Despues di presentá e revistanan i resaltá un artículo brevemente, e ta habri su Bijbel sin vacilá i ta lesa un versículo cu ta cuadra cu e artículo. Bo por haci esaki dor di djis puntra: “Kico bo ta pensa dje promesa animador aki?” anto lesa un texto specífico.
5 Hacié bo meta pa compartí un of dos versículo di Bijbel cu tur oyente. Su poder motivador por habri caminda pa mas hende hala cerca Dios.—Juan 6:44.