Ancrá den Speransa, Impulsá pa Amor

“Ta permanecé fe, speransa, amor, e tresnan aki; pero esun mas grandi di esakinan ta amor.”—1 CORINTIONAN 13:13.

1. Ki spiertamentu apostel Pablo ta duna nos?

APOSTEL Pablo ta spierta nos cu, mescos cu un barcu, nos fe por naufragá. E ta papia di ‘mantené e fe i un bon concenshi, cu algun a hala un banda i a experenciá naufragio relacioná cu nan fe.’ (1 Timoteo 1:19) Den promé siglo E.C., hende tabata traha boto di palu. E calidad dje palu i e abilidad di constructor dje barcu, tabata determiná con bon e barcu ta nabegá riba laman ganchu.

2. Pakico e barcu di nos fe mester ta bon construí, i kico esaki ta rekerí di nos?

² Loke nos por yama e barcu di nos fe, tin cu keda riba awa meimei dje laman turbulento di humanidad. (Isaías 57:20; Revelacion 17:15) Pues e mester ta bon construí, i esaki ta dependé di nos. Ora e “laman” dje mundu hudiu i romano tabata birando particularmente brutu p’e promé cristiannan, Hudas a skirbi: “Stimánan, dor di edificá boso mes riba boso santísimo fe, i haci oracion cu spiritu santu, mantené boso den e amor di Dios, miéntras cu boso ta spera e misericordia di nos Señor Jesucristo cu bida eterno na bista.” (Hudas 20, 21) Como cu Hudas a papia tambe di lucha pa ‘e fe cu a ser entregá n’e santunan,’ e expresion “santísimo fe” por referí n’e totalidad di siñansa cristian, incluso e bon nobo di salbacion. (Hudas 3) Cristo ta e fundeshi dje fe ei. Fe fuerte ta necesario si nos kier pega n’e berdadero fe cristian.

E Tormenta di “Pánico di Secta”

3. Con algun hende ta usando e “pánico di secta”?

³ Den añanan recien, tabatin vários caso horibel di suicidio masal, asesinato i atake terorista den cua sectanan di un círculo chikitu tabata enbolbí. Ta di comprendé cu hopi individuo, incluso lidernan político sincero, a mustra nan preocupacion pa protehá hende inocente, foral menornan di edad, contra dje sectanan peligroso ei. Sin duda “e dios dje sistema di cosnan aki” ta tras dje crímennan repugnante aki. Asina el a crea loke algun hende ta yama un pánico di secta, i e ta usa esaki contra e pueblo di Jehova. (2 Corintionan 4:4; Revelacion 12:12) Algun hende a probechá dje situacion aki pa lanta oposicion contra nos obra. Den algun pais, nan a organisá campaña cu e aparente intencion pa protehá hende contra di “sectanan peligroso,” pero eróneamente nan ta mencioná Testigonan di Jehova, i asina ta acusá nos indirectamente. Esaki a dificultá e dunamentu di testimonio di cas-pa-cas den algun pais europeo i a pone cu algun hende cu tabata studia Bijbel cu nos a stop nan studio. Esaki na su turno tabatin un efecto negativo riba algun di nos rumannan.

4. Pakico oposicion no mester desanimá nos?

⁴ Pero, en bes di desanimá nos, oposicion mester fortalecé nos conviccion cu nos ta practicando cristianismo berdadero. (Mateo 5:11, 12) A acusá e cristiannan di promé siglo di ta un secta cu ta instigá rebelion, i cu hende a “papia contra” nan tur caminda. (Echonan 24:5; 28:22) Pero apostel Pedro a trankilisá su compañeronan creyente dor di skirbi: “Stimánan, no keda confundí p’e candela cu tin meimei di boso, cu ta cu boso pa un prueba, como si fuera ta algu straño ta sosodé boso. Al contrario, sigui alegrá ya cu boso ta participante den e sufrimentunan di Cristo, pa boso por alegrá i abundá cu goso tambe durante e revelacion di su gloria.” (1 Pedro 4:12, 13) Di igual manera, un miembro dje cuerpo gobernante dje promé siglo a skirbi: “Consider’é tur goso, mi rumannan, ora boso ta topa cu vários prueba, ya cu boso sa cu e calidad probá aki di boso fe ta obra awante. Pero laga awante completá su obra, pa boso por ta completo i sano den tur sentido, sin tin deficiencia den nada.” (Santiago 1:2-4) Mescos cu bientu fuerte ta test con bon un boto ta nabegá riba laman ganchu, asina tormenta di oposicion lo revelá cualkier debilidad den nos barcu di fe.

Tribulacion Ta Producí Awante

5. Con nos por ta sigur cu nos fe ta stabil durante tribulacion?

⁵ Cristiannan por ta sigur di nan awante i dje stabilidad di nan fe solamente despues cu nan a pasa den tormenta di tribulacion. Nos awante lo “completá su obra” den laman brutu solamente si nos ta “completo i sano den tur sentido, sin tin deficiencia den nada,” incluso tin un fe fuerte. Pablo a skirbi: “Di tur manera nos ta recomendá nos mes como ministernan di Dios, dor di wanta hopi, dor di tribulacion, dor di casonan di necesidad, dor di dificultad.”—2 Corintionan 6:4.

6. Pakico nos mester “hubilá miéntras cu nos ta den tribulacion,” i con esaki ta fortalecé nos speransa?

⁶ Nos mester considerá e bientunan fuerte di tribulacion cu nos por experenciá tin biaha, como oportunidadnan pa proba cu nos barcu di fe ta stabil i den bon condicion. Pablo a skirbi e cristiannan na Roma: “Laga nos hubilá miéntras cu nos ta den tribulacion, siendo cu nos sa cu tribulacion ta producí awante; awante, na su turno, un condicion aprobá; e condicion aprobá, na su turno, speransa, i e speransa no ta hiba na desilusion.” (Romanonan 5:3-5) Firmesa bou di prueba ta duna nos Jehova su aprobacion. Esaki, na su turno, ta fortalecé nos speransa.

Pakico Algun Ta Sufri Naufragio

7. (a) Manera Pablo su palabranan ta mustra, con algun persona a experenciá naufragio spiritual? (b) Con algun persona a desviá awe for dje berdad?

⁷ Ora Pablo a spierta contra sufri “naufragio,” e tabatin algun persona na mente cu a “hala” nan bon concenshi “un banda” i a perde nan fe. (1 Timoteo 1:19) Entre nan tabatin Himeneo i Alehandro cu a cai den apostasia, desviando for dje berdad i papiando cosnan ofensivo. (1 Timoteo 1:20, nota na pia di página; 2 Timoteo 2:17, 18) Awe, apóstatanan, cu ta desviá for dje berdad, ta golpia “e esclabo fiel i discreto” verbalmente. Bon mirá, nan ta morde e man cu tabata alimentá nan den sentido spiritual. Algun ta parce e “esclabo malbado,” bisando eigenlijk: “Mi doño ta tarda.” (Mateo 24:44-49; 2 Timoteo 4:14, 15) Nan ta nenga cu e fin dje sistema di cosnan malbado aki ta cerca i ta criticá e clase di esclabo spiritualmente alerto debí cu e ta mantené un sentido di urgencia den Jehova su pueblo. (Isaías 1:3) E apóstatanan ei ta logra “saboteá e fe di algun,” hibando nan na naufragio spiritual.—2 Timoteo 2:18.

8. Kico a pone algun hende naufragá of sink e barcu di nan fe?

⁸ Otro cristiannan dedicá a naufragá e barcu di nan fe dor di hala nan concenshi un banda i entregá n’e mundu aki su buscamentu desenfrená di placer i su inmoralidad sexual. (2 Pedro 2:20-22) Otronan ta sink nan barcu di fe pasobra den nan bista e haf dje sistema nobo di cosnan ainda no ta parce di ta na horizonte. Ya cu nan no por calculá e tempu relacioná cu e cumplimentu di cierto profecianan i dor cu nan ta posponé “e dia di Jehova” den nan mente, nan ta bandoná adoracion berdadero. (2 Pedro 3:10-13; 1 Pedro 1:9) No ta tarda mashá cu nan ta haña nan bek den e awanan sushi i trubel dje sistema actual di cosnan. (Isaías 17:12, 13; 57:20) Algun cu a stop di asociá cu e congregacion cristian ta kere cu ainda e ta e religion berdadero. Sin embargo, evidentemente nan no tin e pacenshi ni awante necesario pa warda riba e mundu nobo cu Jehova Dios a primintí. Bida den Paradijs no a yega suficiente lihé pa nan.

9. Kico un par di cristian dedicá ta haciendo, i kico e echonan aki mester pone nos considerá?

⁹ Den algun parti di mundu ta parce cu un par di cristian dedicá a baha e belanan di nan barcu di fe. E barcu ta riba awa ainda, pero en bes di move tur cu tin padilanti den pleno fe, nan a cuminsá keiru riba laman. Algun a sinti nan atraí p’e speransa di cu “djis aki lo tin Paradijs,” i tabata dispuesto pa haci nan máximo esfuerso pa alcansá esei: nan tabata celoso den e trabou di predicá i den asistí regularmente na tur reunion, asamblea i congreso. Pensando awor cu e realisacion di loke nan a spera ariba ta mas leu cu nan a anticipá, nan a baha e prijs cu nan ta dispuesto pa paga. Esaki ta evidente den un reduccion dje actividad di predicá, iregularidad na reunionnan i e dispuesto cu nan ta pa perde partinan di programa di asamblea of congreso. Otronan ta dedicá mas tempu na recreo i na obtené comodidadnan material. E echonan aki ta hiba nos na considerá kico mester ta e forsa motivador den nos bida, na armonia cu nos dedicacion na Jehova. Nos celo den su sirbishi mag dependé dje speransa di cu “djis aki lo tin Paradijs”?

Speransa Compará cu un Anker

10, 11. Cu kico Pablo a compará nos speransa, i pakico e comparacion aki ta apropiado?

¹⁰ Pablo a mustra cu Jehova a haci un promesa di manda bendicionnan pa medio di Abraham. Anto e apostel a splica: “Dios . . . a drenta cu un huramentu, pa asina, mediante dos cos incambiabel [su palabra i su huramentu], den cua ta imposibel pa Dios gaña, nos cu a hui n’e refugio, por tin un estímulo fuerte pa haña gara dje speransa poné dilanti nos. E speransa aki nos tin como anker p’e alma, tantu sigur como firme.” (Hebreonan 6:17-19; Génesis 22:16-18) E speransa poné dilanti cristiannan ungí ta bida inmortal den shelu. Awe, e gran mayoria di Jehova su sirbidónan tin e speransa maraviyoso di bida eterno riba un tera paradísico. (Lucas 23:43) Sin un speransa asina, bo no por tin fe.

¹¹ Un anker ta un obheto fuerte di siguridad, indispensabel pa wanta un barcu na su lugá i ta previnié di drif bai. Ningun nabegante lo risca sali haf sin un anker. Ya cu Pablo a naufragá vários bes, e tabata sa di experencia cu hopi bes bida dje marineronan a dependé dje anker di nan barcu. (Echonan 27:29, 39, 40; 2 Corintionan 11:25) Den promé siglo, barcunan no tabatin motor cu a permití e capitan maniobrá manera el a deseá. Cu excepcion di barcunan di guera manehá cu rema, botonan tabata dependé principalmente riba bientu pa move. Si un capitan su barcu tabata den peliger di bai dal den baranca, su único recurso tabata di tira anker i para wanta e tormenta, confiando cu e anker lo no perde su gara den fondo di laman. P’esei Pablo a compará un cristian su speransa cu un “anker p’e alma, tantu sigur como firme.” (Hebreonan 6:19) Ora tormenta di oposicion atacá nos of ora nos pasa den otro pruebanan, nos speransa maraviyoso ta manera un anker cu ta wanta nos stabil como alma bibiente, di manera cu nos barcu di fe no ta drif bai den e awa plat peligroso di duda of e barancanan desastroso di apostasia.—Hebreonan 2:1; Hudas 8-13.

12. Con nos por evitá di alehá for di Jehova?

¹² Pablo a spierta cristiannan hebreo: “Cuidou, rumannan, pa nunca desaroyá den un di boso un curason malbado cu ta falta fe, dor di hala for dje Dios bibu.” (Hebreonan 3:12) Den e texto griego, “hala for” ta nificá literalmente “alehá,” esta, bira apóstata. Pero nos por evitá e naufragio total ei. Fe i speransa lo permití nos pega na Jehova asta durante e tormentanan di prueba di mas severo. (Deuteronomio 4:4; 30:19, 20) Nos fe lo no ta manera un barcu sagudí pa bientu di siñansa apóstata. (Efesionan 4:13, 14) I cu speransa como nos anker, nos lo por pasa dor dje tormentanan di bida como Jehova su sirbidó.

Impulsá pa Amor i Spiritu Santu

13, 14. (a) Pakico e anker di nos speransa riba su mes no ta suficiente? (b) Kico mester ta e forsa motivador den rindi sirbishi sagrado na Jehova, i pakico?

¹³ Un cristian lo no progresá den direccion dje sistema nobo si su único motivacion pa sirbi Jehova ta e speransa di biba pa semper riba un tera paradísico. Aunke cu e ta mantené su anker di speransa como un factor stabilisador den su bida, e tin cu agregá e forsa impulsador di amor na su speransa i na su fe. Pablo a subrayá e echo aki ora el a skirbi: “Ta permanecé fe, speransa, amor, e tresnan aki; pero esun mas grandi di esakinan ta amor.”—1 Corintionan 13:13.

¹⁴ Nos forsa motivador den rindi sirbishi sagrado mester ta amor sincero pa Jehova, debí na su inmenso amor pa nos. Apostel Juan a skirbi: “Esun cu no ta stima no a yega na conocé Dios, pasobra Dios ta amor. Den esaki e amor di Dios a ser manifestá den nos caso, pasobra Dios a manda su Yu unigénito den e mundu pa nos por gana bida mediante dje. En cuanto nos, nos ta stima, pasobra el a stima nos promé.” (1 Juan 4:8, 9, 19) Pa motibu di gratitud na Jehova, nos interes principal no mester ta pa gana salbacion personal, sino pa duna testimonio dje santificacion di su nomber santu i e vindicacion di su soberania hustu.

15. Den ki manera nos amor pa Jehova ta relacioná cu e cuestion di su soberania?

¹⁵ Jehova kier pa nos sirbié pa motibu cu nos stim’é, no djis pa Paradijs. E enciclopedia bíblico Perspicacia para comprender las Escriturasa ta declará: “Jehova ta gloria su mes den e echo cu tantu su soberania como e apoyo cu su criaturanan ta dun’é ta basá principalmente riba amor. E ta deseá como súbdito solamente esnan cu ta stima Su soberania i cu ta prefer’é riba cualkier otro cos pa motibu di su cualidadnan excelente i pasobra e ta hustu. (1 Cor. 2:9) E personanan ei ta scoge pa sirbi bou di su soberania en bes di purba di ta independiente, ya cu ora nan siña conocé Jehova, nan ta reconocé cu e ta hopi mas superior cu nan den amor, husticia i sabiduria. (Sal. 84:10, 11)”—Volúmen 1, pág. 121 [na ingles, Volúmen 2, página 275].

16. Den ki manera amor pa Jesus ta un forsa impulsador den nos bida?

¹⁶ Como cristian, nos ta mustra amor pa Jesus tambe pa motibu cu el a mustra su amor pa nos. Pablo a razoná: “E amor cu e Cristo tin ta obligá nos, pasobra esaki ta loke nos a husga, cu un solo homber a muri pa tur; pues anto, tur a muri; i el a muri pa tur afin cu esnan cu ta biba no biba mas pa nan mes, sino pa esun cu a muri pa nan i a ser lantá.” (2 Corintionan 5:14, 15) Cristo ta e fundeshi mes riba cua nos bida spiritual, nos fe i nos speransa ta edificá. Nos amor pa Cristo Jesus ta reforsá nos speransa i ta stabilisá nos fe, foral den tempu di prueba turbulento.—1 Corintionan 3:11; Colosensenan 1:23; 2:6, 7.

17. Ki forsa dinámico Jehova ta duna nos, i con Echonan 1:8 i Efesionan 3:16 ta mustra su importancia?

¹⁷ Aunke nos amor pa Dios i pa su Yu ta e forsa impulsador principal den nos bida como cristian, Jehova ta percurá algu mas cu ta impulsá nos, cu ta duna nos energia i forsa pa dal bai den su sirbishi. Esei ta su forsa activo, of spiritu santu. E palabranan hebreo i griego traducí como “spiritu” ta referí básicamente n’e movecion dinámico di aire, por ehempel bientu. Barcunan di bela manera esnan cu Pablo a biaha aden, a dependé dje forsa invisibel di bientu pa yega nan destino. Mescos tambe, nos tin mester di amor i e obramentu di Dios su forsa activo invisibel si nos kier pa nos barcu di fe hiba nos padilanti den Jehova su sirbishi.—Echonan 1:8; Efesionan 3:16.

Rumbo pa Nos Destinacion!

18. Kico lo yuda nos wanta cualkier futuro prueba riba nos fe?

¹⁸ Promé cu nos alcansá e sistema nobo di cosnan, kisas nos fe i amor por haña prueba severo. Pero Jehova a duna nos un anker “tantu sigur como firme,” esta, nos speransa maraviyoso. (Hebreonan 6:19; Romanonan 15:4, 13) Ora oposicion of otro prueba ta bati nos, nos por wanta si nos ta bon ancrá pa medio di nos speransa. Despues cu un tormenta calma, pero promé cu un otro cuminsá, laga nos keda determiná pa fortificá nos speransa i fortalecé nos fe.

19. Con nos por tene e barcu di nos fe riba curso i alcansá e haf di Dios su mundu nobo?

¹⁹ Promé cu Pablo a mencioná e “anker p’e alma,” el a bisa: “Nos ta deseá pa cada un di boso mustra e mésun diligencia [pa ‘acelerá,’ nota na pia di página] afin di tene pleno siguransa dje speransa te na fin, pa boso no bira floho, sino bira imitadó di esnan cu mediante fe i pacenshi ta heredá e promesanan.” (Hebreonan 6:11, 12) Impulsá pa amor pa Jehova i pa su Yu, i cu e poder di spiritu santu, laga nos tene e barcu di nos fe riba curso te ora nos alcansá e haf di Dios su mundu nobo primintí.

[Nota]

Como Repaso

◻ Ki spiertamentu Pablo a duna nos relacioná cu nos fe?

◻ Con algun persona a sufri naufragio spiritual, i con otronan ta bahando nan velocidad?

◻ Ki cualidad di Dios mester compañá nos fe?

◻ Kico lo yuda nos alcansá e haf di Dios su mundu nobo primintí?

[Plachi na página 16]

E barcu di nos fe mester ta bon construí pa por wanta e tormentanan di bida

[Plachi na página 17]

Nos fe por naufragá

[Plachi na página 18]

Speransa ta un anker pa nos bida como cristian