Keda Serka di e Organisashon di Yehova

DISIPEL Santiago a skirbi: “Hala serka Dios, i lo e hala serka boso.” (Sant. 4:8) Sí, maske nos ta hende imperfekto i Yehova ta e Dios haltísimo, tòg e no ta asina leu for di nos ku e no por skucha nos orashonnan. (Echo. 17:27) Hala serka Dios ta nifiká sera un amistat íntimo kuné. Kon nos por logra esei? Un manera ta di komuniká regularmente kuné mediante orashon. (Sal. 39:12) Ademas, nos ta hala serka Dios ora nos ta studia su Palabra, Beibel, regularmente. Di e manera ei, nos ta siña konosé Yehova Dios i ta haña sa kiko ta su propósito i su boluntat pa nos. (2 Tim. 3:16, 17) Hasiendo e kosnan akí, nos ta siña stima Yehova i desaroyá un temor saludabel pa no desagrad’é.—Sal. 25:14.

² Sinembargo, ta pa medio di Hesus so nos por tin un amistat íntimo ku Yehova. (Huan 17:3; Rom. 5:10) Hesus ta e úniko persona ku por a yuda hende komprondé Yehova su manera di pensa i sinti. Niun otro hende no por a hasi esei mihó ku Hesus. Hesus konosé su Tata asina bon ku e por a bisa: “Ningun hende no sa ken e Yu ta, sino e Tata, i ningun hende no sa ken e Tata ta, sino e Yu i esun na ken e Yu ke revelá e Tata.” (Luk. 10:22) Pues, ora nos ta studia e Evangelionan ku ta mustra kon Hesus tabata pensa i sinti, nos ta haña sa kon Yehova ta pensa i sinti. E konosementu ei ta yuda nos hala mas serka Dios.

³ Pa nos por tin un amistat será ku Yehova, nos mester keda serka su organisashon, ku bou di guia di Hesus ta siña nos hasi Dios su boluntat. Manera Mateo 24:45-47 a profetisá, e Doño, Hesukristu a nombra “e esklabo fiel i prudente” pa perkurá “kuminda na e debido tempu” pa e sirbidónan di kas. Awe, e esklabo fiel ta perkurá un abundansia di kuminda spiritual pa nos. Mediante e esklabo fiel i prudente, Yehova ta konsehá nos pa lesa su Palabra tur dia, asistí na nos reunionnan regularmente i partisipá aktivamente den e trabou di prediká e “bon notisia di Reino.” (Mat. 24:14; 28:19, 20; Hos. 1:8; Sal. 1:1-3) Semper nos mester mira e esklabo fiel for di un punto di bista spiritual. Nos mester hasi esfuerso pa keda serka di e parti terenal di Yehova su organisashon i sigui su guia. Esaki lo yuda nos hala mas serka nos Dios, Yehova. I Yehova, na su turno, lo protehá nos i duna nos fortalesa pa soportá prueba.

DIKON NOS TA HAÑA NOS KU MAS I MAS PRUEBA?

⁴ Kisas bo ta den e bèrdat pa hopi aña kaba. Si esei ta e kaso, siguramente bo sa kiko ta nifiká pasa den prueba. Pero asta si ta resientemente bo a siña konosé Yehova i a kuminsá asosiá ku su pueblo, bo sa ku Satanas e Diabel ta oponé tur hende ku ta someté nan mes na e soberania di Yehova. (2 Tim. 3:12) Sea kual sea bo kaso, bo no tin motibu pa desanimá ni sinti miedu. Yehova a primintí ku lo e sostené bo, salba bo i duna bo bida eterno den futuro.—Heb. 13:5, 6; Rev. 2:10.

⁵ Nos tur por haña nos ku prueba durante e último dianan akí di e mundu di Satanas. For di e tempu ku e Reino di Dios a kuminsá goberná na 1914, Satanas no por a drenta shelu mas. El a ser tirá abou na tera, kaminda e i su angelnan ta awor. E echo ku tin mas i mas sufrimentu aki riba tera i ku Yehova su sirbidónan ta ser persiguí mas i mas ta prueba ku Satanas ta rabiá i ku nos ta bibando den e último dianan di su gobernashon malbado.—Rev. 12:1-12.

⁶ Satanas a ser humiá i ta masha rabiá; e sa ku a ked’é masha poko tempu. E ku su demoñonan ta hasi tur esfuerso pa stroba e predikashon di e Reino i pa kaba ku e union ku tin entre e sirbidónan di Yehova. Pues, nos ta den un guera spiritual; nos “lucha no ta kontra karni i sanger, sino kontra gobièrnu, kontra outoridat, kontra gobernante di mundu di e skuridat akí, kontra forsanan spiritual di maldat den lugánan selestial.” Si nos ke pa Yehova yuda nos sali viktorioso, nos tin ku sigui lucha i mantené nos armadura spiritual intakto. Nos mester “para firme kontra e trampanan” di e Diabel. (Efe. 6:10-17) Pa nos por logra esei, nos mester di perseveransia.

KULTIVÁ PERSEVERANSIA

⁷ Perseveransia ta e fortalesa pa soportá difikultat òf pa para firme ora di kontratempu. Den sentido spiritual, perseveransia ta enserá sigui hasi loke ta korekto apesar di problema, oposishon, persekushon òf kualke otro prueba ku por pone nos integridat na Dios na peliger. Nos no ta kultivá perseveransia di un dia pa otro. Esaki ta tuma tempu. Segun ku nos ta progresá den sentido spiritual, nos ta haña fortalesa pa perseverá. Si nos ta soportá prueba chikitu ku presentá na prinsipio di nos karera kristian, nos lo haña e fortalesa nesesario pa wanta prueba mas difísil ku lo bini despues. (Luk. 16:10) Nos mester ta determiná pa para firme promé ku nos haña nos ku prueba grandi. Apòstel Pedro a mustra ku nos mester kultivá perseveransia huntu ku e otro kualidatnan ku ta agradá Dios. El a skirbí: “Hasi tur boso esfuerso pa agregá na boso fe, birtut, na boso birtut, konosementu, na boso konosementu, dominio propio, na boso dominio propio, perseveransia, na boso perseveransia, deboshon na Dios, na boso deboshon na Dios, kariño pa e rumannan, na boso kariño pa e rumannan, amor.”—2 Ped. 1:5-7; 1 Tim. 6:11.

⁸ Santiago a hala nos atenshon na e importansia di kultivá perseveransia. Den su karta, el a skirbi: “Mi rumannan, alegrá ora boso ta konfrontá vários prueba, pasobra boso sa ku ora boso fe ser di tèst di e manera akí, e ta produsí perseveransia. Ma laga perseveransia kompletá su obra, pa boso por ta perfekto i sin defekto den tur sentido, sin ku boso tin falta di nada.” (Sant. 1:2-4) Santiago a bisa ku un kristian mester alegrá ora e hañ’é ku prueba, pasobra prueba ta yuda nos kultivá perseveransia. Ta asina bo tambe ta mira prueba? Santiago a mustra tambe ku perseveransia, na su turno, ta kumpli ku un propósito: yuda nos mehorá nos personalidat kristian pa nos por ta kompletamente aseptabel den bista di Dios. Sí, mas prueba nos enfrentá i soportá, mas nos ta siña perseverá. Ademas, perseveransia ta yuda nos kultivá otro kualidat deseabel ku nos mester tin.

⁹ Yehova ta keda kontentu ora nos ta perseverá bou di prueba; nos perseveransia lo motiv’é pa rekompensá nos ku bida eterno. Santiago a sigui bisa: “Felis ta e hende ku ta sigui wanta prueba, pasobra ora e haña aprobashon divino, lo e risibí e korona di bida ku Yehova a primintí esnan ku ta sigui stim’é.” (Sant. 1:12) Sí, nos ta perseverá ku e speransa di risibí bida eterno. Si nos no perseverá, nos no por keda den e bèrdat. Si nos sukumbí na preshon di e mundu akí, nos lo kai bèk den gara di e mundu. Si nos no perseverá, nos lo no tin Yehova su spiritu ni nos lo no por produsí e fruta di spiritu den nos bida.

¹⁰ Pa nos por perseverá bou di prueba den e tempu difísil akí, nos mester tin e punto di bista korekto enkuanto prueba. Kòrda ku Santiago a skirbi ku nos mester “alegrá.” Kisas, esei no ta fásil. Dikon nò? Pasobra nos por ta sufriendo físikamente òf mentalmente. Pero kòrda ku bida eterno ta den wega. Un eksperensia di e apòstelnan ta yuda nos mira ku nos por alegrá ora nos ta sufri. E buki di Echonan ta konta: “Nan . . . a manda yama e apòstelnan, duna nan un halá di sota i taha nan di papia den nòmber di Hesus. Despues nan a laga nan bai. Anto e apòstelnan a sali masha kontentu for di dilanti di e Sanedrin, pasobra Dios a konsiderá nan digno di ser desonrá pa kousa di Hesus su nòmber.” (Echo. 5:40, 41) E apòstelnan a komprondé ku nan sufrimentu a duna prueba ku nan a obedesé e mandamentu di Hesus i ku nan tabatin e aprobashon di Yehova. Hopi aña despues, den su promé karta, apòstel Pedro a mustra e importansia di sufri pa kousa di hustisia.—1 Ped. 4:12-16.

¹¹ Un otro eksperensia a enbolbé Pablo i Sílas. Ora nan tabata kumpli ku nan trabou komo misionero na Filipo, nan a ser arestá i akusá di ta kousa disturbio den e stat i di promové kustumber ku ta kontra lei. Pa e motibu ei, nan a haña un halá di sota i a ser tirá den prizòn. Pablo i Sílas tabata den prizòn ku nan kurpa tur na herida. Beibel ta bisa ku ‘rònt di meianochi nan tabata hasi orashon i alabá Dios ku kantika; i e prezunan tabata skucha nan.’ (Echo. 16:16-25) Korektamente, Pablo i su kompañero a mira nan sufrimentu komo un oportunidat pa demostrá tantu na Yehova komo hende ku nan ta leal. Ademas, nan sufrimentu a duna nan oportunidat pa duna testimonio na hende ku kisas tabata interesá pa skucha e bon notisia, ya ku bida di e personanan akí tabata den wega. E mesun anochi ei, e wardadó di prezu i su famia a skucha i a bira disipel. (Echo. 16:26-34) Pablo i Sílas a konfia ku Yehova tabatin e poder i deseo pa yuda nan den nan sufrimentu. I esei ta loke a sosodé.

¹² Awe tambe, Yehova ta perkurá tur loke nos tin mester pa sostené nos durante tempu di prueba. E ke pa nos perseverá. El a duna nos su Palabra inspirá pa nos por haña konosementu eksakto tokante su propósito. Esaki ta edifiká nos fe. Nos tin e oportunidat di asosiá ku nos rumannan den fe i rindi sirbishi sagrado na Dios. Ademas, nos tin e privilegio di keda den kontakto estrecho ku Yehova pa medio di orashon. E ta skucha nos ekspreshonnan di alabansa i nos petishonnan sinsero pa yuda nos keda limpi den su bista. (Flp. 4:13) I nos no mester pasa por haltu kuantu forsa nos ta haña ora nos reflekshoná riba e speransa poné nos dilanti.—Mat. 24:13; Heb. 6:18; Rev. 21:1-4.

PERSEVERÁ BOU DI VÁRIOS PRUEBA

¹³ E pruebanan ku nos ta enfrentá awe ta paresido na esnan ku e promé disipelnan di Hesus a enfrentá. Den nos tempu, Testigunan di Yehova sa sufri abusu verbal i físiko na man di opositor mal informá. Manera tabata e kaso den dia di e apòstelnan, gran parti di e oposishon ta ser instigá pa fanátiko religioso kendenan ta mira kon e Palabra di Dios ta desenmaskará nan siñansa- i práktikanan falsu. (Echo. 17:5-9, 13) Tabatin biaha ku Yehova su pueblo a haña alivio ora nan a hasi apelashon riba nan derechonan legal ku gobièrnu mes ta respaldá. (Echo. 22:25; 25:11) Sinembargo, e gobernantenan mes tambe a yega di prohibí nos trabou, ku e meta di pone fin na nos sirbishi kristian. (Sal. 2:1-3) Bou di sirkunstansianan asina, ku kurashi nos ta sigui e ehèmpel di e fiel apòstelnan ku a bisa: “Nos tin ku obedesé Dios na promé lugá, i no hende.”—Echo. 5:29.

¹⁴ Segun ku e spiritu di nashonalismo ta sigui reina rònt mundu, predikadó di e bon notisia ta haña mas preshon pa stòp ku nan sirbishi ku Dios a duna nan. P’esei, awor e sirbidónan di Yehova ta komprondé mihó dikon nan tin ku presta atenshon na e spièrtamentu relashoná ku adorashon di “e bestia salbahe i su imágen” ku nos ta haña na Revelashon 14:9-12. Nos ta realisá kon importante e palabranan di Huan ta. El a bisa: “Esaki ta rekerí perseveransia di parti di e santunan, sí, di esnan ku ta kumpli ku e mandamentunan di Dios i ta tene duru na e fe den Hesus.”

¹⁵ Guera, revolushon, prohibishon ofisial òf persekushon por stroba nos di sirbi Dios abiertamente. Podisé nos no por reuní mas komo kongregashon, i kisas asta nos por pèrdè kontakto ku sukursal. Podisé nos no por haña bishita di e superintendente di sirkuito ni haña nos publikashonnan mas. Si nos haña nos den un situashon asina, kiko nos mester hasi?

¹⁶ Wèl, bou di e sirkunstansianan ei, nos mester hasi tur loke ta na nos alkanse. Nos por hasi estudio personal. Generalmente, grupo chikitu por reuní den kas privá. Nos por usa e publikashonnan ku nos a studia den pasado i Beibel komo base pa e reunionnan ei. Nos no tin nodi di preokupá ni ansha. Por lo general, den korto tempu Kuerpo Gobernante por haña kualke manera pa establesé kontakto ku e rumannan responsabel.

¹⁷ Asta si bo no tin komunikashon ku bo rumannan kristian, kòrda ku bo no ta bo so; Yehova i su Yu, Hesukristu, ta ku bo. No pèrdè speransa. Yehova ta tende bo orashonnan i ta fortalesé bo mediante su spiritu. Buska su guia. Kòrda ku bo ta un sirbidó di Yehova i disipel di Hesukristu. P’esei, hasi bon uso di e oportunidatnan ku bo ta haña pa duna testimonio. Yehova lo bendishoná bo esfuersonan i kisas pronto mas hende lo djòin bo pa adorá Yehova.—Echo. 4:13-31; 5:27-42; Flp. 1:27-30; 4:6, 7; 2 Tim. 4:16-18.

¹⁸ Pero si bo haña bo ku menasa di morto, meskos ku tabata e kaso ku e apòstelnan òf otro sirbidó di Dios, pone bo konfiansa den “e Dios ku ta lanta hende for di morto.” (2 Kor. 1:8-10) Bo fe den e speransa di resurekshon lo yuda bo perseverá durante oposishon di mas severo. (Luk. 21:19) Kristu Hesus a pone un bon ehèmpel; e tabata sa ku si e keda fiel bou di prueba, su ehèmpel lo fortalesé otro hende pa nan tambe perseverá. Abo tambe por ta un fuente di fortalesa pa bo rumannan.—Huan 16:33; Heb. 12:2, 3; 1 Ped. 2:21.

¹⁹ Fuera di persekushon òf oposishon, kisas bo ta konfrontá otro situashon difísil ku ta rekerí perseveransia. Por ehèmpel, algun kristian a bira desanimá pa motibu di e manera indiferente ku e hendenan den nan teritorio ta reakshoná. Otronan tabatin ku lucha ku malesa òf problema emoshonal òf ku limitashon debí na imperfekshon. Apòstel Pablo tambe a hañ’é ku sierto difikultat ku a strob’é den su sirbishi na Dios. (2 Kor. 12:7) I Epafrodito, un kristian di e promé siglo, a bira “deprimí pasobra [su amigunan] a tende ku el a bira malu.” (Flp. 2:25-27) Debí na nos mes imperfekshonnan i esnan di otro hende por surgi problema ku ta difísil pa nos soportá. Por surgi konflikto entre nos i nos rumannan den fe i asta ku nos mes famia. Nos por soportá i asta vense opstákulo asina si nos pega na e konseho di e Palabra di Yehova.—Eze. 2:3-5; 1 Kor. 9:27; 13:8; Kol. 3:12-14; 1 Ped. 4:8.

SEA DETERMINÁ PA KEDA FIEL

²⁰ Nos mester ta fiel na Hesukristu, esun ku Yehova a nombra komo Kabes di e kongregashon kristian. (Kol. 2:18, 19) Nos mester kooperá estrechamente ku “e esklabo fiel i prudente” i ku e superintendentenan nombrá. (Heb. 13:7, 17) Ora nos pega estrechamente na areglo teokrátiko i kooperá ku e rumannan ku ta dirigí e kongregashon, nos lo ta organisá pa hasi boluntat di Yehova. Nos mester probechá plenamente di e privilegio di hasi orashon. Kòrda, ni muraya ni prizòn no por kòrta e komunikashon ku nos tin ku nos Tata amoroso Yehova òf kibra e union ku nos tin ku nos rumannan den fe.

²¹ Laga nos ta determiná pa hasi tur loke nos por pa perseverá den e trabou di prediká ku Hesukristu a duna su siguidónan despues ku el a resusitá. El a bisa nan: “Bai, i hasi hende di tur nashon mi disipel, i batisá nan den nòmber di e Tata i di e Yu i di spiritu santu, i siña nan kumpli ku tur loke mi a manda boso.” (Mat. 28:19, 20) Laga nos perseverá meskos ku Hesus. Laga nos semper keda enfoká riba nos speransa di biba pa semper riba tera bou di e Reino di Dios. (Heb. 12:2) Komo disipel batisá di Kristu, nos tin e privilegio di partisipá den kumplimentu di e profesia relashoná ku “konklushon di e era akí.” E profesia akí ta bisa: “E bon notisia akí di e Reino lo ser prediká den henter e tera habitá, komo testimonio pa tur nashon, anto e fin lo yega.” (Mat. 24:3, 14) Si nos ta dediká nos mes di henter nos kurason na e trabou akí, nos lo tin e goso di haña bida eterno den Yehova su hustu mundu nobo!