Hombernan “cu Sintimentu Mescos cu di Nos”

E TABATA rey i profeta pero tambe un tata amoroso. Un di su yu hombernan a crece bira un homber inútil i arogante. Den un intento determiná pa usurpá e trono, e yu aki a iniciá un guera civil, cu e intencion di causa morto di su tata. Pero den e bataya cu a surgi, tabata e yu cu a ser matá. Ora e tata a haña sa cu su yu a muri, el a subi su so den un kamber den dak i a yora: “Mi yu Absalom, mi yu, mi yu Absalom! O mihó ami a muri, mi mes, na bo lugá, Absalom mi yu, mi yu!” (2 Samuel 18:33) E tata tabata Rey David. Mescos cu otro profetanan di Jehova, e tabata “un homber cu sintimentu mescos cu di nos.”—Santiago 5:17.

Den tempu bíblico e homber i muhernan cu a papia den nomber di Jehova tabata hendenan di tur antecedente social, hende comun i coriente. Mescos cu nos, nan tabatin problema i tabatin nan imperfeccionnan. Ken tabata algun dje profetanan aki, i con nan sintimentunan tabata mescos cu di nos?

Moises A Pasa for di Demasiado Confiansa pa Suavedad

Un profeta prominente di tempu pre-cristian tabata Moises. Sin embargo, asta cu 40 aña di edad e no tabata cla pa sirbi como bocero di Jehova. Pakico? Miéntras fárao di Egipto tabata oprimí su rumannan, Moises a ser lantá den e cas di fárao i tabata “poderoso den su palabranan i echonan.” E registro ta bisa nos: “El a suponé cu su rumannan lo a comprendé cu Dios tabata dunando nan salbacion pa medio di su man.” Cu demasiado confiansa, el a actua agresivamente na defensa di un catibu hebreo i a mata un egipcio.—Echonan 7:22-25; Exodo 2:11-14.

Awor Moises a hañ’é forsá ta hui, i el a pasa e siguiente cuater décadanan como wardadó di carné na Madian, un tera hopi leu. (Exodo 2:15) Na fin dje tempu ei, awor cu 80 aña di edad, Jehova a comisioná Moises como profeta. Pero Moises no tabatin demasiado confiansa mas. El a sinti su mes asina incapas cu el a cuestioná e echo cu Jehova a comision’é como profeta, usando expresionnan manera: “Ken ami ta cu mi mester bai cerca fárao” i, “Kico lo mi bisa?” (Exodo 3:11, 13) Cu Jehova su siguransa i yudansa amoroso, Moises a pasa na cumpli cu su asignacion cu hopi éxito.

Abo, mescos cu Moises, a yega di laga demasiado confiansa hibá bo na haci of bisa cosnan cu a resultá imprudente? Si ta asina, aceptá mas entrenamentu cu humildad. Of bo a sintí cu bo ta incapas pa cumpli cu cierto responsabilidadnan cristian? En bes di nenga, aceptá e yudansa cu Jehova i su organisacion ta ofrecé. Esun cu a yuda Moises por yuda abo tambe.

Elías Tabatin Sintimentu Mescos cu di Nos na un Tempu di Disiplina

“Elías tabata un homber cu sintimentu mescos cu di nos, i tog den oracion el a pidi pa awa no yobe; i awa no a yobe riba tera pa tres aña i seis luna.” (Santiago 5:17) Elías su oracion tabata na armonia cu Jehova su boluntad pa disipliná un nacion cu a bira lomba p’e. Tog, Elías tabata sa cu e secura cu e tabata pidiendo p’e den oracion lo a causa sufrimentu humano. Israel a dependé principalmente di agricultura; serena i awaceru tabata bida dje pueblo. Secura continuo lo a trece hopi sufrimentu. Vegetacion lo a marchitá; cosechanan lo a fracasá. Animalnan doméstico bon pa trabou i alimento lo a muri, i algun famia lo tabata den peliger di muri di hamber. Ken lo a sufri mas? E pueblo comun. Mas despues un biuda a bisa Elías cu a rest’é solamente un man yen di hariña i un tiki zeta. E tabata sigur cu e i su yu homber lo a muri pronto di hamber. (1 Reynan 17:12) Pa Elías a haci oracion manera el a haci, e mester tabatin un fe firme cu Jehova lo a percurá pa Su sirbidónan—ricu of pober—cu no a bandoná adoracion berdadero. Manera e registro ta mustra, Elías no a keda desapuntá.—1 Reynan 17:13-16; 18:3-5.

Tres aña despues, ora Jehova a indicá cu pronto lo el a trece awaceru, nos por ripará Elías su deseo sincero pa mira e secura caba den su oracionnan frecuente i intenso miéntras el a “bùk na tera i tene su cara poné meimei di su rudianan.” (1 Reynan 18:42) Bes tras bes, el a urgi su asistente: “Subi, por fabor. Wak den direccion di laman” pa mira si tin un ke otro indicacion cu Jehova a tende su oracionnan. (1 Reynan 18:43) Ki un goso e mester a sinti ora finalmente, como contesta riba su oracionnan, “shelu a duna yobida i tera a producí su fruta”!—Santiago 5:18.

Si bo ta un mayor of un anciano den e congregacion cristian, tal bes bo tin cu lucha cu sintimentunan profundo ora di duna coreccion. Sin embargo, nos tin cu balansá e emocionnan humano ei cu e conviccion cu tin biaha disiplina ta necesario i cu si dun’é cu amor, e ta “duna fruta di pas, esta, husticia.” (Hebreonan 12:11) E resultadonan di obedecé Jehova su leynan ta semper deseabel. Mescos cu Elías, nos ta pidi di curason pa nos cumpli cu nan.

Jeremías A Demostrá Curashi Apesar di Desanimacion

Di tur escritor di Bijbel, kisas Jeremías tabata esun cu mas a skirbi tocante su sintimentunan personal. Como un yoncuman, el a vacilá pa aceptá su comision. (Jeremías 1:6) No obstante, cu hopi curashi el a pasa na declará e palabra di Dios, pero el a dal den oposicion feros di parti di co-israelitanan—for di rey te n’e hende comun. E oposicion ei a pon’é rabia i yora algun biaha. (Jeremías 9:3; 18:20-23; 20:7-18) Na diferente ocasion nan a heringá cuné, batié, hink’é den cepa, encarcel’é, menas’é cu morto i lagu’é p’e muri den lodo den fondo di un renbak bashí. Algun biaha asta Jehova su mensahenan a caus’é angustia, manera su palabranan ta ilustrá: “O mi mondongonan, mi mondongonan! Mi tin dolor fuerte den e murayanan di mi curason.”—Jeremías 4:19.

Tog, el a stima Jehova su palabra, bisando: “Bo palabra ta bira pa mi e hubilacion i alegria di mi curason.” (Jeremías 15:16) N’e mésun tempu, frustracion a pon’é sclama na Jehova: “Abo positivamente a bira pa mi manera algu engañoso, manera awanan cu a resultá di ta indigno di confiansa,” manera esnan di un rooi cu ta seca masha lihé. (Jeremías 15:18) Ma, Jehova a comprendé su sintimentunan conflictivo i a sigui sosten’é di manera cu e por a cumpli cu su comision.—Jeremías 15:20; mira tambe 20:7-9.

Abo, mescos cu Jeremías, ta enfrentá frustracion of oposicion den efectuá bo ministerio? Acudí na Jehova. Sigui su instruccion, i Jehova lo recompensá bo esfuersonan tambe.

Jesus Tabatin Sintimentu Mescos cu di Nos

E profeta di mas grandi di tur tempu tabata e propio Yu di Dios, Jesucristo. Aunke e tabata un homber perfecto, e no a sconde su emocionnan. Hopi bes nos ta lesa di su sintimentunan interno, cuanan lo mester tabata bisto den su cara i den su reaccion na otronan. Hopi biaha Jesus a “compadecé” di hende, i el a usa e mésun expresion ora el a describí personahenan den su ilustracionnan.—Marco 1:41; 6:34; Lucas 10:33.

Lo e mester a hisa su bos ora el a core cu comerciante i animalnan for dje tempel cu e palabranan: “Saca e cosnan aki for djaki den!” (Juan 2:14-16) Pedro su sugerencia: “Sea bondadoso cu bo mes, Señor,” a ocasioná e reaccion fuerte: “Bai tras di mi, Satanas!”—Mateo 16:22, 23.

Jesus tabatin cariño special pa algun hende cu tabata specialmente yegá na dje. Bijbel ta describí apostel Juan como e “disipel cu Jesus tabata stima.” (Juan 21:7, 20) I nos ta lesa: “Sí, Jesus a stima Marta i su ruman muher i Lázaro.”—Juan 11:5.

Jesus por a sinti dolor tambe. Sufriendo p’e tragedia dje morto di Lázaro, “Jesus a entregá na lágrima.” (Juan 11:32-36) Revelando e dolor di curason cu e traicion di Hudas Iscariote a caus’é, Jesus a cita un expresion conmovedor for dje Salmonan: “Esun cu tabata come mi pan a hisa su hilchi contra mi.”—Juan 13:18; Salmo 41:9.

Asta ora Jesus tabata pasando un dolor insoportabel riba e staca, el a mustra e profundidad di su sintimentu. Tiernamente el a encargá e cuido di su mama na “e disipel cu el a stima.” (Juan 19:26, 27) Ora el a mira evidencia di repentimentu den un dje malechornan clabá na un staca banda di dje, Jesus a bisa compasivamente: “Lo bo ta cu mi den Paradijs.” (Lucas 23:43) Nos por sinti e explosion di emocion den su sclamacion: “Mi Dios, mi Dios, pakico bo a bandoná mi?” (Mateo 27:46) I su último palabranan promé cu e muri ta respirá amor i confiansa di curason: “Tata, den bo man mi ta confia mi spiritu.”—Lucas 23:46.

Ki un confiansa tur esaki ta duna nos! “Pasobra nos tin como sumo sacerdote no unu cu no por compadecé cu nos debilidadnan, sino unu [Jesus] cu a ser probá den tur sentido mescos cu nos mes, pero sin picá.”—Hebreonan 4:15.

Jehova Su Confiansa

Nunca a duel Jehova ken el a scoge pa bocero. E tabata sa di nan lealtad na dje, i compasivamente el a pasa por haltu dje debilidadnan di esnan cu tabata imperfecto. Tog el a spera pa nan cumpli cu nan comision. Cu su yudansa nan por a haci esei.

Cu pacenshi laga nos mustra confiansa den nos rumannan leal. Mescos cu nos, semper nan lo ta imperfecto den e sistema di cosnan aki. Tog, hamas nos mester husga nos rumannan como indigno di nos amor i atencion. Pablo a skirbi: “Pero, nos cu ta fuerte mester soportá debilidad di esnan cu no ta fuerte, i no ta agradando nos mes.”—Romanonan 15:1; Colosensenan 3:13, 14.

E profetanan di Jehova a experenciá tur e emocionnan cu nos ta experenciá. Ma nan a confia den Jehova, i Jehova a sostené nan. Mas cu esei, Jehova a duna nan motibu pa goso—un bon concenshi, realisacion di su fabor, compañeronan leal cu a sostené nan, i e siguransa di un futuro felis. (Hebreonan 12:1-3) Laga nos tambe pega na Jehova cu pleno confiansa segun cu nos ta imitá e fe dje profetanan di antigwedad, hombernan “cu sintimentu mescos cu di nos.”