Con pa Reconocé i Vence Cualkier Debilidad Spiritual

SEGUN MITOLOGIA GRIEGO, ACHILLES TABATA E GUERERO GRIEGO CU mas curashi den e Guera di Troya, un campaña contra e stad di Troya. Segun leyenda, ora Achilles tabata mucha, su mama a hink’é bou di awa den e riu Styx. Esei a hacié invencibel cu excepcion dje parti unda su mama a ten’é: e tan conocí ‘achilleshiel.’ Ta precis einan e flecha fatal a alcansá Achilles i mat’é, esta, e flecha cu Paris, yu homber di rey Priam di Troya a tira.

Cristiannan ta soldá di Cristo, enbolbí den un guera spiritual. (2 Timoteo 2:3) “Nos tin un lucha,” apostel Pablo ta splica, “no contra sanger i carni, sino contra e gobiernunan, contra e autoridadnan, contra e gobernantenan dje mundu dje scuridad aki, contra e mal forsanan spiritual den e lugánan celestial.” Sí, nos enemigunan no ta ningun otro sino, Satanas e Diabel i e demoñonan.—Efesionan 6:12.

Si no tabata p’e yudansa cu nos ta ricibí for di Jehova Dios, cu a ser describí como “un persona baronil di guera,” obviamente e lucha aki lo a bira un lucha di un banda so. (Exodo 15:3) Como proteccion contra nos enemigunan perverso, Dios a duna nos un armadura spiritual. P’esei, e apostel a urgi: “Bisti e armadura completo cu ta bini di Dios pa boso por para firme contra e mal inventonan dje Diabel.”—Efesionan 6:11.

Sin duda, e armadura cu Jehova Dios a percurá, ta dje calidad di mas excelente, capas pa resistí cualkier clase di atake spiritual. Djis wak e lista cu Pablo a duna: faha di berdad, corasa di husticia, sandalia di bon nobo, escudo grandi di fe, helm di salbacion, i spada di spiritu. Nos por verwagt un mihó ekipo? Cu un armadura asina bistí, un soldá cristian tin tur chens pa sali victorioso apesar di obstáculonan abrumador.—Efesionan 6:13-17.

Aunke e armadura spiritual cu ta bini for di Jehova ta dje calidad di mas excelente i e ta un fuente di proteccion pa nos, nos no mester asumí cu tur cos ta bini di mes. Pensando riba Achilles cu supuestamente tabata invencibel, no ta posibel cu nos tambe por tin un punto débil, un achilleshiel spiritual? Si nos ser sorprendí, lo e por resultá fatal.

Examiná Bo Armadura Spiritual

Un persona cu a gana medaya olímpico di oro dos bes den ‘schaatsen,’ cu aparentemente tabatin bon salú, a cai den otro di ripiente i muri durante un sesion di práctica. Djis despues di esei, a sali un noticia cu ta pone bo pensa, den The New York Times cu a bisa: “Mitar dje 600.000 mericanonan cu ta haña atake di curason tur aña, no ta haña síntoma adelantá.” Ta claro anto cu, nos estado di salú no ta ser determiná solamente dor dje manera cu nos ta sinti nos mes.

Ora ta trata di nos bienestar spiritual, e situacion ta mescos. E conseho for di Bijbel ta: “Laga esun cu ta kere cu e ta pará tene cuidou p’e no cai.” (1 Corintionan 10:12) Aunke nos armadura spiritual ta esun mihó cu tin, debilidad por desaroyá. Esaki ta asina pasobra nos a nace den picá, i nos naturalesa pecaminoso i imperfecto fácilmente por dominá nos determinacion pa haci e boluntad di Dios. (Salmo 51:5) Apesar di nos bon intencionnan, nos curason traicionero por gaña nos dor di inventá razonamentu of excuusnan falsu pa nos pasa por alto di nos debilidad fácilmente i gaña nos mes cu tur cos ta bon.—Jeremías 17:9; Romanonan 7:21-23.

Ademas, nos ta biba den un mundu cu tin un comprendimentu di bon i malu cu hopi bes ta confuso i trocí. E manera cu e persona ta sinti por determiná si algu ta bon of malu. Aviso, entrenamentu popular i medionan di comunicacion ta promové e manera di pensa aki. Ta obvio cu si nos no tene cuidou, nos por ser pushá suavemente den nan manera di pensa, i nos armadura spiritual por cuminsá debilitá.

En bes di cai den un situacion peligroso asina, nos tin cu haci caso dje conseho bíblico: “Sigui pone boso na prueba pa mira si boso ta den e fe, sigui duna prueba di loke boso mes ta.” (2 Corintionan 13:5) Ora nos haci esei, nos lo ta capas pa detectá cualkier debilidad cu lo por a desaroyá, i tuma e pasonan necesario pa drecha nan promé cu nos enemigunan detectá nan i lansa nan atake. Sin embargo, con nos tin cu haci e prueba ei? Cua ta algun dje síntomanan cu nos mester wak den e examinacion propio aki?

Reconocé e Síntomanan

Un síntoma comun cu kisas ta indicá debilidad spiritual ta un flohamentu den nos hábitonan di studio personal. Algun persona ta haña cu nan mester studia mas, pero ta parce cu tog nan no por logra hacié. Debí n’e bida ocupá djawendia, ta fácil pa cai den un situacion grave asina. Sin embargo, loke ta haci e cos mas pió ta, e echo cu hopi bes hende ta razoná cu cos no ta bai dje malu ei ya cu, ki ora nan haña chens nan ta lesa publicacionnan bíblico i nan ta logra bai algun reunion cristian.

Razonamentu asina ta un manera pa gaña bo mes. E ta mescos cu e caso di un homber cu ta pensa cu e ta demasiado druk pa sinta come un cuminda adecuá, i p’esei e ta dal un hap segun cu e ta core for di un cos pa otro. Aunke kisas e no ta pasa hamber, tardi of trempan lo e por hañ’é cu problema di salú. Mescos tambe, si nos no ta alimentá nos mes continuamente cu cuminda spiritual nutritivo, pronto nos lo por desaroyá puntonan swak den nos armadura spiritual. Dor cu constantemente nos ta ser bombardiá cu propaganda i actitudnan mundano, fácilmente nos por sucumbí n’e atakenan mortífero di Satanas.

Un otro síntoma di debilidad spiritual ta perdementu dje sentido di urgencia den nos lucha spiritual. Ora un soldá ta den un periodo di pas e no ta sinti e tension i peliger cu ta existí durante guera. P’esei, kisas e no ta sinti e urgencia pa ta cla prepará. Si nan yam’é di ripiente pa tuma accion, por ta masha bon cu e no ta prepará. Den sentido spiritual ta mescos. Si nos permití nos sentido di urgencia mengua, nos lo por ta mal prepará pa resistí atakenan cu ta bini den nos direccion.

Pero, con nos por sa cu nos ta den tal situacion? Nos por haci nos mes algun pregunta cu lo por revelá e estado real di asuntunan: Mi ta mes ansioso pa sali den sirbishi cu pa sali keiru? Mi ta dispuesto pa dedicá tempu na preparacion pa reunion mescos cu mi ta dedicá tempu na haci compra i wakmentu di television? Mi ta reconsiderá meta of oportunidadnan cu mi a bandoná tempu mi a bira cristian? Mi ta envidiá otronan p’e supuesto bon bida cu nan tin? Esakinan ta preguntanan cu ta laga bo pensa, pero nan ta di gran yudansa pa detectá cualkier debilidad den nos armadura spiritual.

Siendo cu e armadura cu ta protehá nos ta spiritual, ta esencial pa den nos bida tin un fluho liber dje spiritu di Dios. E grado cu e frutanan di spiritu di Dios ta ser manifestá den tur nos actividadnan ta reflehá esaki. Bo ta iritá lihé of asta rabia ora otro hende bisa of haci algu cu bo no ta gusta? Bo ta haña cu ta difícil pa aceptá conseho, of bo ta pensa cu otronan semper ta piki pieu riba bo? Bo tin un envidia profundo pa motibu di bendicion i logro di otro hende? Bo tin problema pa sali bon cu otronan, specialmente cu bo pareunan? Anto un auto-examinacion onesto lo yuda nos mira si nos bida ta yená cu frutanan di spiritu di Dios of si e obranan di carni ta drentando nos bida di un manera astuto.—Galationan 5:22-26; Efesionan 4:22-27.

Pasonan Positivo pa Vence Debilidad Spiritual

Reconocé e síntomanan di debilidad spiritual ta un cos; enfrentá nan i tuma paso pa corigí asuntunan ta henteramente un otro cos. Lamentablemente, hopi hende tin tendencia di disculpá nan mes, defendé nan mes, minimisá e problema of nenga cu tin problema. E ta mescos cu bai bataya bistí cu un armadura cu no ta completo, i esta peligroso esei ta! Un proceder asina lo haci nos vulnerabel p’e atakenan di Satanas. Mas bien, nos tin cu tuma pasonan positivo lihé pa corigí cualkier defecto cu nos por ripará. Kico nos por haci?—Romanonan 8:13; Santiago 1:22-25.

Siendo cu nos tin un lucha spiritual, un lucha cu ta encerá controlá e mente i curason di un cristian, nos tin cu haci tur loke nos por pa protehá nos facultadnan. Corda cu entre e partinan di nos armadura spiritual tin “e corasa di husticia” cu ta protehá nos curason, i “e helm di salbacion” cu ta protehá nos mente. Siña usa e provisionnan aki eficasmente por nificá e diferencia entre victoria i derota.—Efesionan 6:14-17; Proverbionan 4:23; Romanonan 12:2.

Bisti “e corasa di husticia” adecuadamente ta rekerí pa nos chek nos amor pa husticia i nos odio pa maldad constantemente. (Salmo 45:7; 97:10; Amos 5:15) Nos normanan a baha huntu cu esnan dje mundu? Nos ta entretené nos cu cosnan—sea den bida real of na television, cine, den buki i revista—cu na un tempu a shok of a ofendé nos? Amor pa husticia lo yuda nos mira cu loke ta ser glorificá den e mundu como libertad i cosnan sofisticá, kisas eigenlijk ta promiscuidad i banidad disfrasá.—Romanonan 13:13, 14; Tito 2:12.

Bisti “e helm di salbacion” ta encerá mantené bibu den nos mente e bendicionnan maraviyoso cu tin nos dilanti, sin cu nos ta permití e encanto i briyo dje mundu distraí nos. (Hebreonan 12: 2, 3; 1 Juan 2:16) Un punto di bista asina lo yuda nos pone interesnan spiritual promé cu ganashi material i bentaha personal. (Mateo 6:33) Pues, pa nos ta sigur cu nos tin e parti aki di nos armadura na su lugá, nos tin cu puntra nos mes onestamente: Kico mi kier logra den bida? Mi tin metanan spiritual specífico? Kico mi ta haciendo pa alcansá nan? Sea cu nos ta forma parti dje resto di cristiannan ungí of di e inmenso “multitud grandi,” nos tin cu imitá Pablo, kende a bisa: “Mi no ta considerá cu mi a haña gara di dje ainda; pero tin un solo cos tocante dje: Lubidando loke ta patras i forsando padilanti pa loke ta mas ayá, mi ta sigui den direccion dje meta.—Revelacion 7:9; Filipensenan 3:13, 14.

Pablo ta concluí e descripcion di nos armadura spiritual cu e amonestacion aki: “Cu tur forma di oracion i súplica boso ta sigui haci oracion na tur ocasion den spiritu. I p’e fin ei, keda lantá cu tur constancia i cu súplica na fabor di tur e santunan.” (Efesionan 6:18) Esaki ta indicá dos paso positivo cu nos por dal pa vence of prevení cualkier debilidad spiritual: Desaroyá un bon relacion cu Dios, i forma un relacion estrecho cu compañeronan cristian.

Ora nos tin e custumber di acudí na Jehova den oracion den “tur forma” (confesion di nos picánan, peticion pa pordon, peticion pa guia, gradicimentu pa bendicion, alabansa di curason) i “na tur ocasion” (públicamente, na privá, personalmente, spontáneamente), nos ta logra un relacion íntimo cu Jehova. Esei ta e mihó proteccion cu nos por tin.—Romanonan 8:31; Santiago 4:7, 8.

Di otro banda, nos ta ser amonestá pa haci oracion “na fabor di tur e santunan,” esta, nos compañeronan cristian. Kisas den oracion nos ta corda nos rumannan spiritual na teranan leu, kendenan ta padecé persecucion of otro dificultadnan. Pero kico di cristiannan cu ken nos ta asociá i traha regularmente? Ta apropiado haci oracion pa nan tambe, mescos cu Jesus a haci pa su disipelnan. (Juan 17:9; Santiago 5:16) Oracionnan asina ta hala nos mas cerca otro i nan ta fortalecé nos pa resistí e atakenan di ‘e malbado.’—2 Tesalonicensenan 3:1-3.

Finalmente, tene firmemente na mente e amonestacion amoroso di apostel Pedro: “E fin di tur cos a yega cerca. P’esei sea di sano huicio, i vigilante afin di haci oracion. Riba tur cos, tene amor intenso pa otro, pasobra amor ta tapa un multitud di picá.” (1 Pedro 4:7, 8) Ta masha fácil pa laga imperfeccion humano, di otro hende i esun di nos mes, filtra drenta nos curason i mente i bira obstáculo, piedra di trompecá. Satanas conocé e debilidad humano aki hopi bon. Dividí hende pa despues e vence nan, ta un di su trikinan astuto. P’esei, nos mester ta lihé pa tapa picánan asina cu amor intenso pa otro i no “permití lugá p’e Diabel.”—Efesionan 4:25-27.

Keda Spiritualmente Fuerte Awor

Kico bo ta haci ora bo ripará cu bo cabei ta bruhá of cu bo dashi ta schuin? Casi sigur bo ta drecha nan mas pronto posibel. Masha poco hende lo djis laga nan para, pensando cu iregularidadnan físico asina no ta nada. Laga nos reaccioná mésun lihé ora ta trata di debilidadnan spiritual. Mancha físico kisas ta pone hende wak bo cu mal cara, pero defectonan spiritual cu no ta ser corigí por resultá den desaprobacion di Jehova.—1 Samuel 16:7.

Motivá pa amor, Jehova a duna nos tur loke nos mester pa caba completamente cu cualkier debilidad spiritual i keda spiritualmente fuerte. Mediante reunionnan cristian, publicacionnan bíblico, i compañeronan cristian maduro i interesá, e ta percurá recordatorio i indicacionnan constante relacioná cu loke nos tin cu haci. Ta keda na nos pa aceptá i aplicá nan. Esaki ta exigí esfuerso i disiplina propio. Pero corda loke apostel Pablo a bisa onestamente: “E manera cu mi ta core no ta insigur; e manera cu mi ta dirigí mi golpinan no ta pa dal den laira; pero mi ta dominá mi curpa i ta hib’é manera un esclabo, pa, despues cu mi a predicá na otronan, mi mes no bira desaprobá di algun manera.”—1 Corintionan 9:26, 27.

Sea alerto, i nunca permití un achilleshiel spiritual desaroyá. Mas bien, laga nos humildemente i yen di curashi haci loke ta necesario awor pa reconocé i vence cualkier debilidad spiritual cu nos tin.

[Komentario na página 19]

“SIGUI PONE BOSO NA PRUEBA PA MIRA SI BOSO TA DEN E FE, SIGUI DUNA PRUEBA DI LOKE BOSO MES TA.”—2 Corintionan 13:5.

[Komentario na página 21]

“SEA VIGILANTE AFIN DI HACI ORACION.

RIBA TUR COS, TENE AMOR INTENSO PA OTRO, PASOBRA AMOR TA TAPA UN MULTITUD DI PICÁ.”—1 Pedro 4:7, 8.

[Kuadro/​Plachi na página 20]

PUNTRA BO MES . . .

◆ Mi ta mes ansioso pa dedicá tempu na preparacion di reunion cu pa haci compra of wak television?

◆ Mi ta envidiá e supuesto bon bida cu otro hende tin?

◆ Mi ta iritá lihé ora otro hende ta haci of bisa algu cu mi no ta gusta?

◆ Mi tin dificultad pa aceptá conseho, of mi ta haña cu otronan semper ta piki pieu riba mi?

◆ Mi tin dificultad pa sali bon cu otro hende?

◆ Mi normanan a bai atras huntu cu esnan dje mundu?

◆ Mi tin metanan specífico?

◆ Kico mi ta haciendo pa alcansá mi metanan spiritual?

[Rekonosementu pa Potrèt na página 18]

Achilles: For dje buki Great Men and Famous Women; Soldánan romano i na página 21: Historic Costume in Pictures/Dover Publications, Inc., New York