Famía Cristian Ta Haci Cos Hunto

“Awor mi ta conseha boso, rumanan, . . . pa boso keda aptamente uní den e mesun mente i den e mesun forma di pensa.”—1 CORINTIO 1:10.

1. Cua situacion ta existi en cuanto unidad den hopi famía?

BO FAMÍA ta un famía uní? Of tur hende ta parce di sigi nan mes camina? Boso ta haci cos hunto? Of rara bez boso tur ta den e mesun lugar ne mesun tempo? E palabra “famía” mes ta indica hendenan uní.a Pero, hopi bez esei no ta e caso. Un discursante británico asta a bisa: “En bez di ser e fundeshi di un bon arreglo social, e famía . . . ta e fuente di tur nos infelicidad.” Esei ta cierto di bo famía? Si ta asina, e mester ta asina?

2. Cua persona bíblico a duna evidencia di a bini di un bon famía?

² E unidad of desunion di un famía generalmente ta depende di hefatura, sea dje dos mayornan of di un solo mayor. Den tempo bíblico, famía uní cu a adora hunto a disfruta di bendicion di Jehova Dios. Esei tabata cierto den Israel di antigua, unda e yiu muher di Jefté, Samsón, i Samuel, cada un di manera distinto, a duna evidencia di a bini di un famía deboto. (Huez 11:30-40; 13:2-25; 1 Samuel 1:21-23; 2:18-21) Den tempo cristian di promé, Timoteo, e fiel compañé di Pablo durante algun biahamento misional di Pablo, tabata criá cu un conocimento dje Scritura Hebreo bao di su abuela Loida i su mama, Eunice. Ki un disípel i misionero sobresaliente el a bira!—Echo 16:1, 2; 2 Timoteo 1:5; 3:14, 15; mira també Echo 21:8, 9.

Pakico haci cos hunto?

3, 4. (a) Cua calidad mester ta presente den un famía uní? (b) Con un hogar por ta mas cu simplemente un cas?

³ Pakico ta beneficioso pa famía haci cos hunto? Pasobra esei ta edifica un comprendimento i respet mutuo. En bez di distanciá nos mes un for di otro, nos ta keda íntimo i ta duna apoyo. Un artículo reciente den e revista Family Relations a bisa: “Un cuadro relativamente claro a sali dunando detaye di atributo específico di ‘famía fuerte.’ Calidad asina ta inclui compromiso un cu otro i aprecio un di otro, unidad íntimo, bon comunicacion, aptitud pa resolve problema, i un enlace fuerte di spiritualidad.”

⁴ Ora calidad asina ta existi den un famía, bo cas no ta manera un stacion di gasolín, un lugar pa yena bo tanki. E ta mas cu simplemente un cas. E ta un lugar atractivo cu ta atrae miembro di famía. E ta un refugio di calor i cariño, compasion, i comprendimento. (Proverbio 4:3, 4) Cas ta un neishi unda tin unidad di famía, e no ta un boter di scorpión di picamento i desunion. Pero, con bo ta logra esei?

Unidad íntimo den estudio di famía

5. Kico nos ta usa afin di siña e adoracion berdadero?

⁵ E adoracion berdadero di Jehova Dios ta wordu siñá mediante e uso di nos facultad di razona. (Romano 12:1) Emocion temporal no mag goberna nos conducta, instigá pa predicacion suave di organizacion religioso cu ta plama nan kerimento via television. Mas bien, loke ta motivános ta nos regularidad den estudio i meditacion riba e Bijbel i riba literatura bíblico cu e “sclabo fiel i prudente” ta percura. (Mateo 24:45) Nos accion cristian ta e resultado di nos obteniendo e mente di Cristo riba cualkier situacion of tentacion cu por presenta. En relacion cu esei, Jehova Dios ta nos Gran Educador.—Salmo 25:9; Isaías 54:13; 1 Corintio 2:16.

6. Cua ehempel mundial tin di estudio di famía?

⁶ Estudio bíblico di famía ta hunga un papel necesario den e spiritualidad di tur famía cristian. Ki dia boso tin boso estudio di famía? Si boso ta studia pa casualidad of ta decidi espontáneamente pa studia, anto probablemente e ta irregular of boso no ta studia mes. Unidad den estudio di famía ta exigi un tempo permanente i regular. Anto boso tur sa ki dia i na ki ora boso tin cu presenta pa disfruta di un reunimento spiritual dje famía. E mas cu 12.000 miembro dje famía mundial di Betel sa cu estudio di nan famía ta dialuna anochi. Ta ki impresivo pa miembro boluntario di Betel corda cu nan tur ta participa den e mesun estudio na conclusion dje dia, promé riba isla di Lamá Pacífico i Nueva Zelandia, anto progresando te na Australia, Hapón, Taiwan, Hong Kong, anto sigiendo pa cruza Asia, Africa, i Europa, i finalmente na Nort i Zuid América. Aunque miles di kilometer i hopi idioma ta separánan, estudio di famía ta inspira den miembro dje famía di Betel un sintimento di unidad. Na un escala mas chikito, boso por cultiva e mesun sintimento mediante boso estudio di famía.—1 Pedro 2:17; 5:9.

7. Segun Pedro, con nos mester considera e palabra dje berdad?

⁷ Apóstol Pedro ta consehános: “Manera criatura recién nací, desaroya un anhelo pe lechi puro cu ta pertenece ne palabra, pa mediante di dje boso por crece te na salbacion, con tal cu boso a experimenta cu Señor ta bondadoso.” (1 Pedro 2:2, 3) Ki un cuadro bonita Pedro a pinta cu su palabra! El a usa e verbo griego e·pi·po·theʹsa·te cu, segun e Linguistic Key to the Greek New Testament, ta deriba dje palabra cu ta nifica “anhelá, deseá, antohá.” E ta indica deseo intenso. Bo a ripara con un bestia chikito ta busca ansiosamente e tete di su mama i ki contentu yiu di hende ta keda ora e ta wordu criá na pecho di su mama? Nos mester tene e mesun deseo pe palabra dje berdad. Escolástico griego William Barclay a bisa: “Pa hende cristian sincero, estudio dje palabra di Dios no ta un carga pisá sino ta un gozo, pasobra nan sa cu den dje nan curazón lo haya e alimentacion pa locual nan ta anhela.”

8. Cua desafío ta enfrenta cabez di famía conduciendo estudio di famía?

⁸ Estudio di famía ta pone un responsabilidad grandi riba cabez di famía. Nan tin cu percura pe estudio ser interesante pa tur miembro i pa tur participa. Yiu no mester kere cu estudio ta realmente pa hende grandi so. E calidad dje estudio ta mas importante cu cuanto bladji boso ta studia. Haci e Bijbel bira bibo. Unda cu ta apropiado, yuda boso yiunan visualizá e terreno i aparencia di Palestina unda suceso cu boso ta considera a tuma lugar. Tur mester ta animá pa haci nan investigacion personal i comparti cu e famía. Dje manera ei yiu també por ‘crece cu Jehova Dios.’—1 Samuel 2:20, 21.

Unidad evangelizando

9. Con nos por haci e trabao di predica un experencia feliz dje famía?

⁹ Jesús a bisa: “Den tur nacion e bon nobo tin cu ser predicá promé.” (Marco 13:10) Su palabra ta duna tur hende cristian conciencial un asignacion—pa evangeliza, comparti e bon nobo dje gobernacion dje Reino di Dios cu otro hende. E hacimento di esei hunto como un famía por ta un experencia animador i gozoso. Mama i tata ta keda feliz i contentu cu e presentacion dje bon nobo di nan yiunan. Un pareha cu tres yiu homber entre edad di 15 i 21 a bisa cu nan semper tabatin e costumber di compaña nan yiunan den e trabao di predicacion público tur diarazón despues di scol i tur diasabra maínta. E tata a bisa: “Nos ta síñanan algo cada bez. I nos ta percura pa esei ser un experencia gozoso i animador.”

10. Con mayornan por beneficiá nan yiunan den e ministerio?

¹⁰ Trahamento hunto como un famía den e trabao di predica i siña por ta mashá fructífero. Tin bez cu hende ta acepta mas positivamente e presentacion senciyo pero legítimo di mucha. Anto, Mama of Papa tei pa duna yudanza si ta necesario. Mayornan por percura pa nan yiunan recibi entrenamento progresivo i asina bira sirbidor di Dios “sin nada pa tene bergüenza di dje, manehando e palabra dje berdad correctamente.” Predicacion hunto dje manera ei ta haci posibel pa mayornan observa e actitud, efecto, i bon conducta di nan yiunan den e ministerio. Door di tene un orario regular, nan ta mira e progreso di nan yiunan i por duna entrenamento i animacion consistente pa fortalece nan fe. Ne mesun tempo, e yiunan ta mira cu nan mayornan ta bon ehempel den e ministerio. Den e tempo crítico i violento aki, trahando como un famía uní i amoroso por asta percura un midí di siguridad den becindario cu tin hopi crimen.—2 Timoteo 2:15; Filipense 3:16.

11. Kico por fácilmente reduci e celo di yiu pe berdad?

¹¹ Yiu ta mira fácilmente ora hende grandi tin dos cara. Si e mayornan no ta demonstra un berdadro amor pe berdad i pe ministerio di cas pa cas, apenas nan por spera pe yiunan ser celoso. Pues, mayornan cu no tin problema cu nan salud, pero tin solamente como sirbishi di feld nan estudio bíblico simanal cu nan yiunan, por corda malai ora e yiunan ta bira mas grandi.—Proverbio 22:6; Efesio 6:4.

12. Con algun famía por obtene un bendicion special for di Jehova?

¹² Un bentaha di ser “aptamente uní den e mesun mente” ta cu kizás e famía por coopera afin cu por lo menos un miembro por sirbi como un predicador pionero di tempo completo den e congregacion. Hopi famía rond di mundo ta haci esei, i tur ta recibi un bendicion for di experencia i eficacia di nan ruman cu ta pionero.—2 Corintio 13:11; Filipense 2:1-4.

Unidad resolviendo problema

13, 14. (a) Cua situacion por afecta e armonía di un famía? (b) Con nan por resolve problema di famía?

¹³ Den e tempo dificultoso “trabahoso” i “dificultoso” aki, tur hende ta bao di presion. (2 Timoteo 3:1, Testament Nobo) Tin problema na trabao, na scol, riba caya, i asta na cas mes. Algun hende ta sufri di enfermedad di salud of di problema emocional bieu, cu aveces ta resulta den tension i mal comprendimento den e famía. Con nos por trata cu situacion asina? Door di cada un sconde den su cueba? Door di isola bo mes aunque boso ta biba den e mesun cas? No. Mas bien, nos tin cu comunica nos ansiedad i pidi yudanza. I cua mihor lugar tin pa esei sino den e círculo di un famía amoroso?—1 Corintio 16:14; 1 Pedro 4:8.

¹⁴ Manera cualkier docter sa, prevencion ta mihor cu curacion. Mescos ta cierto cu problema di famía. Consideracion abierto i franco hopi bez por preveni problema di bira serio. Aunque problema serio ta presenta, e famía por trata cu nan i asta resolvénan si nan ta considera hunto principio bíblico cu ta wordu enbolbí. Hopi bez friccion por bira un relacion suave cu e aplicacion dje palabra di Pablo den Colosense 3:12-14: “Bisti boso cu e tierno cariño di compasion, bondad, humildad di mente, suavidad, i gran pacenshi. Sigi soporta otro i pordona otro libremente si algun tin motibo pa keha contra otro. . . . Bisti boso cu amor, pasobra esei ta un enlace perfecto di union.”

Unidad den recreo

15, 16. (a) Cua calidad mester destaca famía cristian? (b) Algun religion ta produci cua clase di hende, i pakico?

¹⁵ Jehova Dios ta un Dios feliz, i e berdad ta un mensahe feliz—un mensahe di speranza pa humanidad. Además, un fruta di spiritu ta gozo. Tal gozo ta hopi diferente cu e hubileo temporario di atleta cu ta triunfa den competencia di deporte. Gozo spiritual ta un sintimento profundo continuo di satisfaccion cu ta pasa over den e curazón como resultado di e cultivacion di un relacion íntimo cu Jehova Dios. Esei ta un gozo fundá ariba balornan spiritual i relacion edificante.—Galatio 5:22; 1 Timoteo 1:11.

¹⁶ P’sei, como Testigo cristian di Jehova, nos no tin motibo pa ser tristu of sin humor. Algun religion ta produci hende asina pasobra nan clase di fe ta enfatiza factor negativo. Nan siñanza ta resulta den un clase di adoracion tristu i sin gozo, locual no ta bíblico ni balanzá. Nan no ta produci famía feliz den e sirbishi di Dios. Jesús a mira e necesidad di recreo i diverticion. Por ehempel, na un ocasion el a invita su disípelnan pa bai “privadamente na un lugar solitario i sosega un poco.”—Marco 6:30-32; Salmo 126:1-3; Jeremías 30:18, 19.

17, 18. Di ki manera apropiado famía cristian por diverti?

¹⁷ Di igual manera, famía tin mester di tempo pa diverti. Un tata a bisa tocante su yiunan: “Nos ta haci hopi cos gozoso hunto—nos ta bai lamá, ta hunga bala riba feld, ta organiza barbecue den campo. De bez en cuando, nos tin un ‘dia di pionero’ hunto den e ministerio; anto nos ta celebra cu un cuminda special, i nos por asta duna otro regalo.”

¹⁸ Otro sugerencia cu mayornan por considera ta biahe na dierentuin, na parque di recreo, na museo, i na otro lugar fasinante. Wandelmars den ceru, wakmento di páhara, i plantamento di hofi ta actividad cu boso por goza hunto. Además, mayornan por anima nan yiunan pa siña toca instrumento musical of ocupánan den un hobby práctico. Siguramente, mayornan balanzá por aparta tempo pa hunga cu nan yiunan. Si famía ta hunga hunto, muy probablemente nan lo keda hunto!

19. Cua tendencia moderno por daña un famía?

¹⁹ Un inclinacion moderno ta pa hovenan deseá di separá for dje famía i haci loke nan kier den e asunto di diverti. Aunque no ta malu pa un hoven sigi un hobby of un pasatempo personal favorito, no ta sabí pa laga tal interés crea un separacion permanente for dje resto dje famía. Mas bien, nos kier aplica e principio cu Pablo a mencioná: “No vigilando cu interés personal den boso mes asuntonan so, sino també cu interés personal den asunto dje otronan.”—Filipense 2:4.

20. Con asamblea grandi i chikito por ta un tempo gozoso?

²⁰ Ta ki un gozo pa nos tur mira famía sintá hunto na asamblea grandi i chikito! Asina e yiunan mayor por yuda hopi bez cu e chikitonan. Tal arreglo també ta evita e tendencia di algun hoven di bai so den grupo i sinta mas patrás i presta poco atencion ne programa dje asamblea. Asta biahamento pa bai i bini di asamblea por ta gozoso ora tur e famía ta consulta hunto en cuanto cua ruta nan lo sigi, cua lugar pa mira riba camina, i unda pa hospeda. Imaginábo ki un tempo excitante nan tabatin den e dia di Jesús ora famía a bai hunto te na Jerusalem!—Lucas 2:41, 42.

E bendicion di unidad

21. (a) Con nos por traha pa bon éxito den nos matrimonio? (b) Menciona cuater bon sugerencia pa bon éxito den matrimonio.

²¹ Nunca ta fácil pa logra bon éxito den matrimonio i unidad di famía, i esei no sa sosode pa casualidad. Algun ta haya cu ta mas fácil pa entrega, kibra e matrimonio den divorcio, i purba di cuminza completamente di nobo. Pero, hopi bez e mesun problema ta presenta den e segundo of tercer casamento. Un solucion hopi mas mihor ta esun cristian: Traha pa bon éxito aplicando principio bíblico di amor i respet. Famía uní ta depende di un spiritu di duna i tuma, di inegoísmo. Un consehero di matrimonio a introduci un fórmula senciyo pa e bon éxito di matrimonio. El a skirbi: “E cuater elemento crítico hayá den casi tur matrimonio exitoso ta di keda dispuesto pa scucha, e facultad di pidi disculpa, e capacidad di duna apoyo emocional consistente, i e deseo di cariciá cu cariño.” Tal factor en berdad por yuda matrimonio ser permanente pasobra nan ta fundá també ariba principio bíblico sano.—1 Corintio 13:1-8; Efesio 5:33; Santiago 1:19.

22. Menciona algun beneficio di un famía uní.

²² Si nos ta sigi conseho bíblico, nos lo tin un fundeshi firme pa un famía uní, i famía uní ta e fundeshi di un congregacion spiritualmente fuerte i uní. P’sei, nos lo recibi un abundancia di bendicion di Jehova mientras cu nos unidamente ta presenta mas alabanza na dje.

[Nota]

Bo Ta Corda?

◻ Pakico ta beneficioso pa famía haci cos hunto?

◻ Pakico estudio bíblico di famía cu regularidad ta necesario?

◻ Pakico ta bon pa mayornan participa den e sirbishi di feld hunto cu nan yiunan?

◻ Pakico ta un yudanza pa considera problema den e círculo di famía?

◻ Pakico famía cristian no mag ser tristu i sin gozo?

[Plachi na página 17]

Bo famía ta disfruta di por lo menos un cuminda hunto pa dia?

[Plachi na página 18]

Excursion di famía mester ta un diverticion i gozoso