Realmente Bo To Apreciá e Bendicionnan di Jehova?

KENICHI, un cabayero di edad medio, a bai botica pa haña remedi pa un verkoud leve. Ora el a bebe e remedi, el a haña un reaccion alérgico cu a causa grawatashi i blar cu awa na henter su curpa. No ta un sorpresa anto cu Kenichi a cuminsá duda si e boticario a presta suficiente atencion na su necesidadnan.

Algun hende lo por pensa di Jehova Dios den mésun manera cu Kenichi a mira e boticario. Nan ta duda cu e Dios todopoderoso, Jehova, ta realmente interesá den nos como hende individual. Aunke nan ta reconocé cu Dios ta bon, nan no ta convencí di cu e ta percurá pa nos personalmente. Esaki ta specialmente cierto ora cos no ta bai bon pa nan of ora problemanan difícil ta bini dor cu nan ta pega na principionan di Bijbel. Debí na falta di dicernimentu, nan ta considerá nan problemanan manera Kenichi su grawatashi i blarnan cu a sali inesperadamente, como si fuera ta Dios su falta.—Proverbionan 19:3.

No por compará Jehova cu hende imperfecto. Hende ta limitá den conocimentu i abilidad. Nan no por dicerní plenamente e berdadero necesidadnan di otronan, manera a pasa cu e boticario di Kenichi. Contrario cu esei, nada no ta scapa Jehova su bista. Hopi bes Jehova ta yuda nos sin cu nos ta ripará i apreciá esei, debí cu nos tin tendencia di enfocá riba loke nos no tin i pasa por haltu dje hopi bendicionnan cu sí nos tin. En bes di ta lihé pa culpa Jehova pa cualkier problema cu nos ta confrontá, nos mester purba dicerní e bendicionnan cu nos ta disfrutá di dje for di Jehova.

Segun Webster’s Ninth New Collegiate Dictionary, por definí un “bendicion” como “un cos cu ta contribuí na felicidad of bienestar.” Bo ta comprendé cu esaki ta specialmente asina cu bendicionnan for di Jehova?

Un Percurador Sin Igual

Ora un esposa bisa cu su casá ta un bon percuradó, generalmente e kier men cu e esposo ta soru adecuadamente p’e necesidadnan dje famia, percurando suficiente cuminda, dak i paña p’e famia su felicidad i bienestar. Con bon Jehova ta como nos Percurador? Tira un bista mas djacerca di nos planeta Tera, hende su cas. E ta situá 150.000.000 kilometer for di solo, net e distancia corecto pa e temperaturanan moderá cu ta haci bida riba tera posibel. Nos globo ta diseñá perfectamente. E ta lèn precis 23,5 grado, loke ta resultá den e diferente temporadanan di aña cu ta contribuí na cosecha abundante. Como resultado, tera ta percurá cuminda pa mas cu cincu mil miyon hende. Jehova en berdad ta un Percurador maraviyoso!

Ademas, Bijbel ta sigurá nos cu Jehova ta profundamente interesá den nos como persona individual i den nos bienestar. Pensa un ratu, Jehova conocé cada un dje biyones di streanan pa nomber, i ni sikiera un mofi ta cai na tera sin cu e sa. (Isaías 40:26; Mateo 10:29-31) Cuantu mas e ta interesá den hende cu ta stim’é i cu a ser cumprá cu e sanger precioso di su Yu stimá, Jesucristo! (Echonan 20:28) Cu rason e salmista sabí a proclamá: “E bendicion di Jehova—esei ta loke ta haci ricu, i e no ta agregá ningun dolor na dje.”—Proverbionan 10:22.

Bendicionnan Cu Ta Haci Nos Ricu

Nos tin den nos posesion algu di gran balor pa cua nos mester ta profundamente gradicidu. Kico e ta? Bijbel ta identifik’é ora e ta bisa: “E ley di bo boca ta bon pa mi, mas ainda cu miles di pida di oro i plata.” (Salmo 119:72; Proverbionan 8:10) Pa balioso cu oro selecto por ta, mester deseá e ley di Jehova muchu mas. Un conocimentu exacto di su ley huntu cu e perspicacia i dicernimentu cu Jehova ta duna na buscadónan sincero dje berdad ta cosnan pa ser atesorá. Nan ta ekipá nos pa protehá nos mes, pa enfrentá situacionnan difícil, pa trata cu problemanan exitosamente i asina ser contentu i felis.

Esaki ta cierto asta di muchanan chikitu. Considerá con un hobencita a solucioná su problemanan dor di sigui e ley di Jehova. E hobencita, Akemi, ta biba cerca di Tokio. Su tata i mama a aplicá principionan bíblico ora di entren’é, i mediante palabra i ehempel a yuda nan yu desaroyá un amor pa Jehova i pa próhimo. Premirando e problemanan cu lo e bai topa na scol, nan a purba prepar’é lo mihó posibel. Sin embargo, ora Akemi a bai scol básico, algun di su compañeronan di klas a consider’é como “otro” pasobra e tabata haci oracion promé cu come i conciencialmente tabata abstené di participá den cierto actividadnan no-bíblico. Pronto el a bira e blanco di un grupo di mucha abusador. Despues di scol nan tabata changu’é i dal e wanta, troce su brasa i haci bofon di dje.

E hóben Akemi no a tuma vengansa ni e no a cobardiá dilanti su tormentadónan. Mas bien, el a purba aplicá loke el a siña. Debí na su conducta excelente i curashi, el a gana respet di hopi di su compañeronan di klas. Nan a trece e asuntu na atencion dje maestro, i desde e dia ei, Akemi no a experenciá mas abusu na scol.

Kico a yuda Akemi trata exitosamente cu un situacion difícil? E conocimentu exacto, perspicacia i sabiduria for di Jehova cu su mayornan a inculcá den dje. Akemi tabata bon conocí cu Jesus su awante, i esei a impuls’é pa imitá Jesus su ehempel. Bijbel a yud’é dicerní cu algun hende ta haci cos robes debí na ignorancia, i esei a encurash’é pa odia e malu cu e muchanan abusador ei a haci i tog no odia e muchanan mes.—Lucas 23:34; Romanonan 12:9, 17-21.

Naturalmente, ningun mayor no kier pa hende haci bofon of abusá di nan yu. Tog, bo por imaginá bo con orguyoso Akemi su mayornan a sinti ora nan a tende tur e detayenan di loke a sosodé. Yunan asina di berdad ta un bendicion for di Jehova.—Salmo 127:3; 1 Pedro 1:6, 7.

Warda Riba Jehova cu Pacenshi

Sin embargo, promé cu bo ricibí Jehova su bendicion, tin biaha bo tin cu warda p’e actua. Jehova conocé bo situacion i ta percurá pa cada necesidad ora esei lo ta mas probechoso pa bo. (Salmo 145:16; Eclesiástes 3:1; Santiago 1:17) Kisas bo gusta come fruta, pero kico lo bo pensa di un anfitrion cu a sirbí bo fruta cu ta berde ainda? Sea ta un apel, un apelsina of algu otro, lo bo preferá bo fruta hechu, hugoso i dushi. Di igual manera, Jehova ta percurá loke bo tin mester n’e debido tempu—no muchu trempan ni muchu lat.

Corda loke a pasa cu Josef. Sin cu tabata su falta, el a bai para den un cueba di prizon egipcio. Un co-prizonero, e copero di fárao, a spera di ser librá i a primintí di trece Josef su caso n’e atencion di fárao. Pero despues di su liberacion el a lubidá limpi riba Josef. A parce como si fuera Josef a ser bandoná. Sin embargo, despues di dos aña completo, el a ser librá finalmente for di prizon i cu tempu a bira segundo gobernante di Egipto. En bes di perde pacenshi, Josef a warda riba Jehova. Pa esaki, el a ser bendicioná den un manera cu a nificá cu e bida di israelita i tambe di egipcio a keda preservá.—Génesis 39:1-41:57.

Masashi tabata anciano den un congregacion den parti nort di Hapon. E no tabata den un cueba di prizon, pero e tabatin cu warda riba Jehova. Di con? Desde cu e Scol di Entrenamentu Ministerial, un scol pa entrená ministernan cristian cualificá, a ser establecé na Hapon, el a deseá fervientemente pa asistí n’e scol ei. El a haci oracion intenso tocante e privilegio ei. Su compañero pionero a ser invitá, pero apesar di su deseo ansioso, Masashi mes no a ser invitá. El a keda sumamente decepcioná.

No obstante, el a dal pasonan pa trata cu su sintimentunan. El a studia Bijbel i publicacionnan di Sociedad Watch Tower, enfocando riba temanan cu a trata di humildad i controlá bo emocionnan. El a reahustá su manera di pensa i asina a experenciá mas satisfaccion den su asignacion. Anto, ora ménos el a spera, el a ricibí un invitacion pa asistí n’e scol.

Dor cu el a desaroyá cualidadnan manera pacenshi i humildad, el a beneficiá muchu mas dje scol. Mas despues, Masashi a ricibí e privilegio di sirbi su rumannan como superintendente biahero. Sí, Jehova tabata sa kico Masashi tabatin mester i a percur’é net ora esei lo a logra mas beneficio.

Busca Su Bendicionnan

Pues, Jehova no ta manera e boticario. Maske nos por keda sin dicerní Jehova su cuido i preocupacion, su bondadnan ta bini den vários forma—na momento i maneranan cu ta beneficiá nos mas tantu. P’esei sigui busca su bendicionnan. Corda cu ya caba bo tin hopi motibu pa ta gradicidu. Bo a ser bendicioná cu percuracionnan básico pa sigui biba riba tera. Bo a ser duná un conocimentu di Jehova i di su camindanan perfecto. Bo a ser duná perspicacia. I bo a adkerí dicernimentu. Tur esakinan ta contribuí na bo bienestar i felicidad.

Pa experenciá Jehova su bendicion mas plenamente ainda, sigui studia Bijbel cu regularidad. Pidi Jehova yudá bo comprendé i aplicá e siñansanan precioso manera hoya cu tin den su Palabra inspirá. Nan lo hací bo berdaderamente ricu, di manera cu lo bo no falta nada. Sí, nan lo nificá bo felicidad i contentamentu awor i bida na abundancia den e binidero mundu nobo.—Juan 10:10; 1 Timoteo 4:8, 9.

[Plachi na página 23]

E bendicion di Jehova ta mas precioso cu oro