Hasi Progreso den Bo Ministerio
1 Nos Tata selestial ta keda kontentu ora su sirbidónan ta progresá spiritualmente. Esei ta inkluí hasi progreso pa bira un minister madurá i efikas di e bon nobo. Pablo a animá e superintendente Timoteo pa traha diligentemente pa su progreso ta bisto. (1 Tim. 4:13-15) Nos tur mester hasi esfuerso pa mehorá e kalidat di nos ministerio, asta si algun di nos tin eksperensia kaba.
2 Pone Metanan Personal: Pa un hende hasi progreso, e tin ku pone metanan personal. Kua ta algun meta ku nos por pone pa nos mes? Nos por purba bira mas ábil den usa nos spada spiritual, e Beibel. (Efe. 6:17) Òf kisas tin otro rasgo di e ministerio ku nos mester mehorá den dje, manera prediká riba kaya, prediká via telefòn òf prediká den un teritorio di negoshi. Podisé nos por pone meta pa bira mas efikas den hasi rebishita. Un otro meta ekselente por ta pa mehorá nos abilidat di kuminsá i kondusí estudio di Beibel.
3 Loke Por Yuda Nos: A prepará reunionnan di kongregashon pa yuda nos progresá komo minister, spesialmente e Skol di Ministerio Teokrátiko i e Reunion di Sirbishi. Mas esfuerso nos hasi pa prepará i asistí na e reunionnan aki i apliká e sugerensianan ku nos haña, mas benefisio nos lo saka.—2 Kor. 9:6.
4 Tambe nos mester yuda otro progresá. (Pro. 27:17) Loke por yuda nos mehorá ta si nos skucha kuidadosamente ora nos kompañero di sirbishi ta duna su presentashon. Ademas, nos superintendente di estudio di buki por hasi areglo pa nos haña yudansa personal. Ta un bendishon si nos tin un pionero òf un publikadó ku eksperensia pa yuda nos bira mas efektivo i haña mas goso den e ministerio! Tin un publikadó nobo den nos estudio di buki? Kisas nos por tuma inisiativa pa invit’é pa traha ku nos.
5 E ministerio kristian ta e trabou di mas importante ku ta ser hasí awe. Segun ku nos ta ofresé Yehova nos “sakrifisio di alabansa,” nos ke dun’é lo mihó. (Heb. 13:15) Si nos hasi esfuerso pa progresá den e ministerio, nos lo ta un trahadó “ku no tin motibu pa tin bèrgwensa, ku ta parti e palabra di bèrdat na un manera korekto.”—2 Tim. 2:15.