Despues ku Ádam ku Eva a sali for di hòfi di Éden, nan a haña hopi yu. Nan promé yu tabata yama Kain. Kain tabata kunukero. E tabata planta fruta i bèrdura. Ádam ku Eva su di dos yu tabata yama Abel. Abel tabata wardadó di karné.

Un dia, tantu Kain komo Abel a duna Yehova un ofrenda. Bo sa kiko ta un ofrenda? Ofrenda tabata un regalo spesial ku hende tabata duna Yehova. Yehova a keda kontentu ku e ofrenda di Abel, pero Yehova no a gusta e ofrenda di Kain. Esei a pone Kain rabia. Yehova a bisa Kain pa e stòp di ta rabiá, pasobra si e keda rabiá, e por hasi malu. Pero Kain no a tende di Yehova.

Kain a bisa Abel: “Laga nos ban den kunuku.” Ora nan tabata den kunuku, Kain a mata su ruman Abel. Kiko Yehova a hasi ku Kain? Yehova a kastigá Kain. Yehova a kore ku Kain i mand’é bai leu for di su famia. Nunka mas Kain tabatin mag di bini bèk serka su famia.

Kiko nos ta siña for di e relato akí? Tin biaha, nos sa rabia si kos no bai manera nos ke. Si nos ta hopi rabiá òf si un hende bisa nos ku nan a ripará ku nos ta hopi rabiá, nos tin ku hasi algu: Nos tin ku kalma nos mes mesora, sino nos por hasi algu robes.

Abel tabata stima Yehova, i e tabata hasi loke tabata bon. P’esei, Yehova Dios lo no lubidá Abel nunka. Ora Dios hasi tera un paradeis, Dios lo lanta Abel for di morto.

Ku tempu, tabatin hopi hende riba tera. Mayoria di nan tabata mal hende. Asta algun angel den shelu a bira mal angel. Nan a sali for di shelu, kaminda nan tabata biba, i bini tera. Bo sa dikon nan a hasi esei? Wèl, nan a bini tera pa nan por tabatin kurpa humano pasobra nan tabata ke kasa ku e hende muhénan.

E angelnan ei a kasa i haña yu ku e hende muhénan ku nan a kasa kuné. Nan yunan a krese i bira grandi, i e yunan ei tabatin hopi forsa. E yunan ei tabata violento, i nan tabata hasi hende daño. Yehova no tabata ke pa e situashon sigui asina. P’esei, Yehova a disidí di manda un diluvio i mata tur e hendenan malbado. Un diluvio ta áwaseru ku ta kai duru pa hopi dia. Awa a kai i yena henter tera ku awa.

Pero tabatin un hòmber ku sí no tabata mal hende. E tabata diferente, pasobra e tabata stima Yehova. E hòmber ei tabata yama Noe. Noe a kasa, i el a haña tres yu hòmber ku su kasá. Nan yu hòmbernan tabata yama Sèm, Kam i Yáfèt. Nan tambe tabata kasá. Yehova a bisa Noe pa e traha un arka masha grandi mes pa e i su famia por keda na bida durante e diluvio ku Yehova lo a manda. E arka ku Noe a traha tabata manera un kaha masha grandi mes ku por a drif riba awa. Yehova a bisa Noe pa e hinka hopi bestia den e arka. Yehova tabata ke pa e bestianan tambe keda na bida durante e diluvio.

Mesora, Noe a kuminsá traha e arka. A tuma Noe i su famia mas o ménos 50 aña pa traha e arka. Nan a traha e arka presis manera Yehova a bisa nan pa trah’é. Tempu ku nan tabata traha e arka, Noe tabata bisa e hendenan ku ta bai tin un diluvio. Pero niun hende no a wòri kuné.

Ku tempu, e dia a yega pa drenta e arka. Laga nos wak kiko a pasa.