KUMINSÁ UN KOMBERSASHON
LÈS 3
Sea Bondadoso
Prinsipio di Beibel: “Amor ta . . . bondadoso.”—1 Kor. 13:4.
Loke Hesus A Hasi
1. Wak e VIDIO òf lesa Huan 9:1-7. Despues, analisá e siguiente preguntanan:
Kiko Hesus a hasi promé: kura e hòmber siegu òf prediká na dje?—Wak Huan 9:35-38.
Dikon bo ta kere ku e hòmber tabata mas dispuesto pa skucha Hesus?
Kiko Nos Ta Siña for di Hesus?
2. Hende lo ta mas dispuesto pa skucha nos mensahe si nos mustra interes den nan.
Imitá Hesus
3. Mustra empatia. Purba di komprondé kon e persona ku bo ta papia kuné ta sinti.
Puntra bo mes: ‘Kiko ta preokup’é? Kiko lo por yud’é i den kiko e ta interesá?’ Empatia ta yuda nos mustra bondat na un manera natural i di kurason.
Skucha bon ora un hende ta papia ku bo. Asina, bo ta mustra un persona ku bo ta interesá den loke ta importante p’e. Si un hende kuminsá papia ku bo tokante un sierto tópiko òf konta bo un problema ku e tin, no kambia di tópiko.
4. Papia ku bondat i ku rèspèt. Ora bo mustra bondat na e persona ku bo ta papia kuné i ke yud’é di bèrdat, lo e ripará esei na e manera ku bo ta papia. Skohe bo palabranan bon i paga tinu na bo tono di bos. Evitá di bisa algu ku por ofendé e persona.
5. Sea kla pa yuda. Wak kon bo por yuda e persona na manera práktiko. Si nos ta amabel, nos lo tin mas chèns di kuminsá un kòmbersashon.