OMESODEL A SUOBEL ER A MEDAL TIA EL BABIER | A KLENGAR ER A URIUL ER A KODALL​—TIANG NGSEBECHEL EL TEKOI?

Ngera Mo Duubech Sel Lemad a Chad?

“Ak ulemdasu el kmo sel lemad a chad e ngmo er a eanged me a lechub ngbeluu er a ngau me a lechub ng burkatorio. Ak medengei el kmo ngdiak rredemelel a mo er a eanged me a lechub e ngkmal kirek el mo er a beluu er a ngau. Engdi ngdimlak kungil medengelii a belkul a burkatorio e le ngdirkak kchiuii a omesodel er a Biblia, ngbai di tekingir a rechad.”​—Lionel.

“Ak mlosisechakl el kmo a rokui el chad a mo er a eanged sel lemad, engdi ngdimlak kuumerang er tia el tekoi. Ak ulemdasu el kmo a kodall a mo ulebongel er a rokui el tekoi.”​—Fernando.

Ngmla ta el molatk el kmo: ‘Ngera mo duubech sel lemad a chad? Te chuarm el ngar er a kmung ker? Ngsebeched el lmuut el mo mesterir? E kede mekerang e mo medengei?’ Me bo dekerekikl el melatk a omesodel a Tekingel a Dios el Biblia. Me a kot e bo desang el kmo ngera omesodel el kirel a kodall. E sola e bo dosaod er a omelatk el ngar er a chelsel.

Ngua ngera blekerdelel a chad sel lemad?

A NGER ER A BIBLIA: “A re chad a medengei el kmo te mo mad, e ngdi rulekoad a diak a ngeral lodengei. Ng diak omeksullir e diak a lotketerir. A ngii di le ngerang el bo moruul er ngii, msisichau el rullii, e ng diak le bor ngii a ureor ma uldasu ma lechub e ng klemedengei ma lechub e le llomeserreng er a beluu er a kodall el kau a mor ngii.”a​—Olisechakl 9:5, 10.

A “beluu er a kodall” a diak el mera el basio, e ngbai mesaod er a blekerdelel a chad el mla mad el dikea lomelechesiu e dikea el sebechel el mekerang. Ngmle ua ngera uldesuel a Job el kirel tia el basio? Ngurriid a rokui el kloklel me a rengelekel er a di chelsel a ta el sils, e dirrek el di mlo btuu a bedengel el rokir. Me ngullengit er a Dios el kmo: “A le chulekum ke mertak er a belurir a re mla mad.” (Job 1:13-19; 2:7; 14:13) A Catholic Douay Version a oleiud er ngii el “beluu er a ngau.” Me ngbleketakl el kmo a Job a dimlak lomes er a beluu er a kodall el ua basio el lebo er ngii e ngmo chuarm. Ngbai ulemes er ngii el basio er a ulengull.

Ngdirrek el sebeched el merriter a cheldecheduch er a Biblia el kirir a reteai el chad el milekiis er a kodall, me bo dodengei el kmo ngera mo duubech sel lemad a chad.​—Momes er a baks el “Teai el Chad el Milekiis er a Kodall.”

Ngdiak a ta er tirke el teai el chad el milsaod el kirel a eanged me a lechub a beluu er a ngau. Me a lsekum te mlo er a chouaika el basio e lmuut el mekiis e omomdasu e ngdiak bo losaod el kirel? Me a lechub e tia el tekoi ngdiak bai el llechukl er a Biblia me longuiu er ngii a rokui el chad? Ngar er a Biblia e ngdiak a omesodel a chouaika el tekoi. Me tirke el teai el chad a dirrek el dimlak a omesodir el kirel tia el tekoi. E ngera uchul? E le tirkang a di ua lemilechiuaiu el diak lodengei a rengrir. Me a lebebil er a taem e a Biblia a ousbech er a tekoi el mechiuaiu el ua okesiu el mesaod er a blekeradel sel lemad a chad. El ua tiang, sera lemad a Lasarus e a Jesus a dilu el kmo ngdi mechiuaiu.​—Johanes 11:11-14.

Me ngera omeltkir a rulekoad? Ngsebechir el mo mekiis?

[Footnote]

[Baks el ngar er a 4 el llel]

TEAI EL CHAD EL MILEKIIS ER A KODALLb

A ngelekel a melakl dil el sechal A profet el Elias a ulekisii a ngelekel a melakl dil er a Sarefath er a diluches er a beluu er a Israel.​—1 King 17:17-24.

A buik er a Sunem A profet el Elisa el ulemtechei er a Elias a ulekisii a buik er a Sunem e ngiluu el msang a demal me a delal.​—2 King 4:32-37.

A chad el mla er a debull A cheklechel a chad el mlad a lengiluu el osisebii er a debellel a Elisa. Me sera lenguu ngii el chad el merekedii er a chiuesel a Elisa e ngliluut el me chad.​—2 King 13:20, 21.

A ngelekel a melakl dil er a Nain A Jesus a ulekisii a ngelekel a melakl dil er a Nain er sel taem er a lengar er a omerollir el mo melakl er ngii.​—Lukas 7:11-15.

A ngelekel a Jairus el redil A Jairus el tebechelel a blil a ongdibel a ullengit er a Jesus el mo omekungil er a ngelekel. Me sera lemad e a Jesus a di mle mereched el okisii.​—Lukas 8:41, 42, 49-56.

A Lasarus el sechelil a Jesus A Lasarus a mlo eua el klebesei er a lemad er sel taem el Jesus a ulekisii er mederir a rebetok el chad.​—Johanes 11:38-44.

A Dorkas A apostol el Petrus a ulekisii ngii el dil el ble lodengelii a rechad el kirel a betok el ungil el omerellel.​—Rellir 9:36-42.

Eutikus A kekerei el chad el Eutikus a rirebet er a mado el me mad, e a apostol el Paulus a liluut el okisii er a kodall.​—Rellir 20:7-12.

[Footnote]