A Rolel a Omolemolem a Budech el Obengterir a Rechedemiu

A chebechiil a mekedbechii a beches el telungalek. Me alta e ke di mo blechoel el betik a rengum e mengull er a demam me a delam, engdi chelechang e a bechim a mla mo kot el klou a ultutelel el chad er a klengar er kau. Me tiang a locha mo meringel er a rebebil er a rechedam el mo kongei er ngii. Engdi a omellach er a Biblia a sebechel el ngosukau el mo oba tabesul el uldasu el kirel tiang, me bo el sebechem el melemolem er a budech lobengterir a rechedam e bo meringel el oureor el meleketek er a deleongel er kau lobengkel tia el beches el telungalek er kau.

1 MOLEMOLEM ER A MELEMALT EL OSENGIU EL KIRIR A RECHEDEMIU

A LOLEKOI A BIBLIA: “Mongull er a demam ma delam.” (Efesus 6:2) Ngkirem el blechoel el mengull e melengmes er a demam me a delam el diak el ultuil er a rekim. Bo modengei el kmo kau me a bechim a kiriu el omekerreu er a demmiu me a delemiu. A bltikerreng a “diak le mechechei,” me lak bo lengodech a uldesuem el kirel a delongelel a bechim me a rechedal.​—1 Korinth 13:4; Galatia 5:26.

SEBECHEM EL MERUUL:

• Molasem el diak molekoi a kmal betok el tekoi, el bebil er a taem e ngdiak el klemerang, el ua, “A rechad er a blim a blechoel el melekoi a mekngit el kirek” me a lechub “A delam a dirkak a ta el tekoi el krellii el soal”

• Molasem el omes a tekoi el ua osengel a bechim

2 BO MOBA ULTEREKOKL EL RENG A LSEKUM NGKIREL

A LOLEKOI A BIBLIA: “Isei a uchul ma sechal a mecherei a demal ma delal e mo obengkel a bechil, me bo letal chelechad.” (Genesis 2:24) Sel bo bechiil e a demam me a delam a locha mo omdasu el kmo te dirk oungerachel er kau e sorir el lmuut el mo medengei a betok er a chelsel a chebechiielem, e a mera er ngii a diak el kirir el mo medengei.

Me tiang a kmal di mo ultuil er kau me a bechim el mo oterekeklii a llemeltir er a chelsel a chebechiieliu e bo moba bltikerreng el subedeterir. Ngsebechiu el bleketakl e melemalt el mengedecheduch el diak el ngasech a rengmiu. (Osisechakl 15:1) A klengariourreng, delemedemekerreng, me a kllourreng a ngosukemiu el rullii a ungil el deleongel er kemiu me a rechedemiu, e “molecholt a bltikerreng er kemiu el outekangel a rengmiu er a blekerdelel a ta ma tang.”​—Efesus 4:2.

SEBECHEM EL MERUUL:

• A lsekum ke mla mo bekikl er a rechedal a bechim el mla soiseb el mo mesaod er a chebechiieliu, e bo msodii kau me a bechim er sel ungil el blsechel

• Bo moterekeklii a ta el uldasu el bo mousbech er ngii el mo mesaod aika el mondai