A Rolel a Omosmechokl a Mondai

Kau me a bechim sel bo momuchel er a klengar er kemiu e a kakerous el mondai a mo duubech. Ngsebechel duubech el oeak a klekakerous er a tekoi el momdasu, me a omomelechesiu, me a osengiu el kirel a klengar. Me a lechub e a mondai a mei el oeak a tekoi el ngar er a ikrel a chebechiil me a bkaischemrungel el tekoi.

A lebebil er a taem e ngsoad el olechib er kid er a mondai, engdi a Biblia a melisiich er kid el mo mesmechokl a mondai er kid. (Mateus 5:23, 24) Ke mo metik a kmal ungil el nger el kirel a semecheklel a mondai sel bo moltirakl a omellach er a Biblia.

1 MOSAOD A MONDAI

A LOLEKOI A BIBLIA: Ngar er ngii a “belsechel el dongedecheduch.” (Olisechakl 3:1, 7) Me ngkiriu el mengoit a taem el mesaod a mondai. Mouchais er a bechim a klemerang el kirel a urungulem me a uldesuem er a mondai er kemiu. Bo blechoel el ‘melekoi a klemerang’ el mo er a bechim. (Efesus 4:25) Ngmo lmuut me a lengar er ngii a mesisiich el uldesuiu el kirel a tekoi, me kemiu a kiriu el diak mkakoad. A medemedemek el omelekoi a sebechel el olleklii a beot el mondai me ngdiak bo luchul a klakoad.​—Osisechakl 15:4; 26:20.

Me ngosisiu a lsekum ngdiak el ta uldesuiu, engdi ngdirk kiriu el melemolem el olecholt a ungil el blekeradel, e lak mobes el blechoel el lolecholt a bltikerreng me a omengull el mo er a bechim. (Kolose 4:6) Molasem el mesmechokl a mondai er a mereched el taem, e lak meterob el chadecheduch.​—Efesus 4:26.

SEBECHEM EL MERUUL:

• Moterekeklii a ungil el taem el mo mesaod er a mondai

• Lak morrob er a cheldecheduch er sel temem el orrenges e le ngkuk mo er ngii a taem el bo mongedecheduch

2 MORRENGES EL OBA SEKUTABERRENG

A LOLEKOI A BIBLIA: “Bo mungil el kaubltikerreng el odam el ngar a Kristus, e bo le blak a rengmiu el kakull.” (Rom 12:10) A rolel a omorrenges a kot el klou a ultutelel. “Bo mchubechubchad . . . e moba ngariourreng er a delongeliu” e molasem el mo medengelii a uldesuel a bechim. (1 Petrus 3:8; Jakobus 1:19) Lak moruul er kau el leko korrenges. A lsebechel, e bo bechei a omoruul e bo mungil el orrenges er a bechim me a lechub e molengit er ngii me bo mosaod er tia el tekoi er a uriul. A lsekum komes er a bechim el ua el sechelim er a bai lecherrouem, e ngdiak el “di le mereched el ngmasech a rengum.”​—Olisechakl 7:9.

SEBECHEM EL MERUUL:

• Molemolem el orrenges el oba sekutaberreng, el mo lmuut er aike el tekoi el morrenges el checherd a rengum er ngii

• Momtab a belkul a tekoi, er a bai di morrenges a tekoi el tuobed er a ngerel. Momtab a blekerdelel a bechim me a delecherul a ngerel

3 MREKIR A TEKOI EL BLA MUCHELII

A LOLEKOI A BIBLIA: “Moureor me le bor ngii a ikel mousbech; a lsekum ke di dengchokl el mengedecheduch e ke mo chebuul.” (Osisechakl 14:23) A omkengei er a ungil el semecheklel a tekoi a diak el di el tiaikid el ungiang. Ngkiriu el otireklii a tekoi el kemiu el terung a ngiltii el mo meruul er ngii. Me tiang a locha mo obengkel a meringel el ureor me a blakerreng er kemiu, engdi ngmo uchul a klungioliu. (Osisechakl 10:4) Me a lsekum kom dmak el oureor el ta rengmiu, “e ng meruul a ungil ureor” el kirel a meringel el ureriu.​—Olisechakl 4:9.

SEBECHEM EL MERUUL:

• Molilt a meklou a ultutelel el tekoi el bo moltirakl el terung el mo uchul a semecheklel a mondai er kemiu

• A lebebil er a taem, e morriter a tekoi el mla meketmokl el mo uchul a klungiolel a chebechiieliu