Rolel a Domuchel a Omesubel a Biblia Olisechakl el Babier

A rebetok er kid a kmal semeriar el mo mesuub a Biblia el obengkel a chad er sel kot el mereched el techall. Tia el beches el babier el Ngerang Mera el Lolisechakl a Biblia? a sebechel el ngosukid. Aike el 3-7 el llel tia el babier a uleketmokl el sebechel el rullii a chad el mo kongei me kede dmak el mesaod er Biblia el ousbech er tia el babier. Mo lmuut er tirke el dirk kesai a klemedengei er tir er a ureor er a berkel a klumech me ngdirrek el mo beot er tir el omuchel er a omesubel a Biblia el ousbech er ngii.

◼ Ngsebechem el ousbech er tiakid el rolel el ngar er a 3 el llel:

A uriul er a omosaod er a ta er a chais er a beluu me a lechub a mondai el lolatk er ngii a rechad er a territory el mngar er ngii, e ngsebechem el omekrael er a uldesuel a chad er a blai el mo er sel ker el ngar er a 3 el llel tia el babier e olengit er ngii me louchais er a uldesuel. E sola e momiis el mo er a 4-5 el llel.

◼ Me a lechub e ngsebechem el omuchel el mesaod aike el tekoi el ngar er a 4-5 el llel:

Ngsebechem el dmu el kmo, “Ngdiak el sal ungil el tekoi oleko aika el siasing el ngar tiang a sebechel el mo tekoi?” Me a lechub e ke oker el kmo, “Ngera er aika el telbiil a soam el mo mesang a otutel?” E bo mungil el rongesii a nger er ngii.

A lsekum a chad a semeriar er a ta er aika el bades, e mochotii er ngii aike el tekoi el lolisechakl a Biblia el kirel ngii el tekoi, el ngii a mesaod aike el parakurab el ngar er tia el babier. (Momes er a baks el ngar er a chelsel el llel.) Mosaod er tia el tekoi el ua sel mosuub er a Biblia el obengkel a chad. Tia el omeruul a sebechel el meketmokl er a chelsel a eim el mo er a teruich el bung el di ngar er a medal a tuangel.

◼ A ta er a rolel a sebechem el olengit er a chad me ngouchais er a uldesuel el ousbech er sel 6 el llel:

Momekrael er a uldesuel a chad el mo er aike el ker el ngar er iou er a llel tia el babier, e moker er ngii el kmo, “Ngngar er ngii a ta er aika el ker el mla ta el molatk er ngii?” A lsekum e ngochotii a ker el lesemeriar er ngii, e momiis el mo er aike el parakurab el ngar er tia el babier el ngii a onger er a keril. (Momes er a baks el ngar er a chelsel el llel.) Me sel mdak el terung el mesaod aika el ker e ke mla muchelii a omesubel a Biblia.

◼ Ngar er a 7 el llel e ngsebechem el ousbech er ngii el ochotii a rolel a omesubel a Biblia:

Monguiu aike el kot el edei el tekoi er tia el llel, e sola e momiis el mo er a 3 el bliongel e mochotii a rolel a omesuub el ousbech er a parakurab 1-3. Moterekeklii a taem el mluut el mong me bo el sebechiu el mesaod a nger er aike el ker el ngar er a parakurab 3.

◼ A rolel a omoterekeklii a temem el lmuut el mong:

Sel bocha morekui er tia el omesubiu, e moterekeklii a taem el sebechiu el lmuut el mo chadecheduch. Ngsebechem el melekoi el kmo: “Ngdi mle chelsel a sesei el bung, e kede mla suubii a ta er a klou a ultutelel el tekoi el lolisechakl er ngii a Biblia. Me sel kluut el mei, e ngsebeched el mo mesaod er a [moker er a ta el ker el sebechiu el mo mesaod er ngii]. Ngdi ungilbesul a kluut el mei er a osisiu el taem er tia el mei el sandei?”

Me chelecha el lolekedang a temel a Jehovah, e ngmelemolem el mengetmokl aike el tekoi el dousbech el mo kutmeklii a ureor el bla loterekeklii er kid el kired el meruul er ngii. (Mt. 28:19, 20; 2 Ti. 3:17) Me bo dungil el ousbech er tia el klebokel el dongu el mo omuchel a omesubel a Biblia.

[Baks el ngar er a 3 el llel]

Omesodel aike el Bades el Ngar er a 4-5 el Llel

◻ Chocholt 21:4 (30-1 el llel, par. 1-3)

◻ Isaia 33:24; 35:​5, 6 (38 el llel, par. 22)

◻ Johanes 5:​28, 29 (81-2 el llel, par. 17-​19)

◻ Psalm 72:16 (38 el llel, par. 19)

Nger er Aike el Ker el Ngar er a 6 el Llel

◻ Ngera uchul me kede mo chuarm? (124-5 el llel, par. 6-8)

◻ Kede mekera e mo outekangel me a lechub e kede mesmechokl aike el sebekreng er a klengar er kid? (212-3 el llel, par. 1-3)

◻ Ngmekera e sebeched el lmuut el kilungii a deurreng er a chelsel a klengar er a ongalek er kid? (164-5 el llel, par. 20)

◻ Ngera duubech el mei er kid sel demad? (64-5 el llel, par. 5-6)

◻ Ngsebeched el lmuut el mo meseterir a rulekoad el betik er a rengud? (81-2 el llel, par. 17-19)

◻ Kede mekerang e mo ulterekokl a rengud el kmo a Dios a mo oltaut a telbilel el kirel a ngar er a medad el klebesei? (28 el llel, par. 17)