DXUS YUWE SAN MARKOS FXIꞌJNI
Juan Bautista nasa uꞌpnimée kiwesu Dxus yuweꞌs ptaꞌsxni
(Mt 3.1-12; Lk 3.1-9, 15-17; Jn 1.19-28)
1 Dxus Nçxiꞌk Jesukristo fxiꞌzeniꞌs ptaꞌsxnisa naꞌwẽk takh: 2 Txãniitey Dxus yuwe ptaꞌsxsa Isaiasaꞌ naꞌjĩnaga fxiꞌj Dxus weꞌweniꞌs:
Teeçx adx yuwe ptaꞌsxsaꞌs kajaçthu iidx yaçte, iidx dxiꞌjaꞌs pheuꞌkhan.
3 Nasa uꞌpnimée kiwesu sus weꞌwenik pthũuseꞌ naꞌjĩna:
Dxus paꞌjwaꞌjaꞌs mpheuꞌjwe, dxiꞌjaꞌs kuꞌle phaadena jĩꞌk. 4 Txãꞌwẽ Isaias weꞌweni kxtey yuuwaꞌj ãhteꞌ, Juanaꞌ nasa uꞌpnimée kiwesu vxyaak nasatx bautisãyna. Saꞌ naꞌjĩnak ptaꞌsxiꞌ:
—Pkaltxi nvxihtçxa Dxus tasxte misxawedwe, yuꞌte yaꞌbautisãyna, kxah iꞌkweꞌsxtxiꞌ Dxusaꞌ peltunaĩna.
5 Juan weꞌweniꞌs wẽsẽꞌjyaꞌ paꞌjtx Judea kiwesuweꞌsx vxiteꞌ Jerusalenuweꞌsxwa. Saꞌ pkalsathaꞌw jĩna Dxusaꞌs perdon pẽjxna paꞌjsatxiꞌ Juanaꞌ Jordan yuꞌwalate bautisaĩꞌk.
6 Juanaꞌ kamelxo khas atxh athçxa khaꞌtxku jxtuduꞌ, saꞌ txajx ũꞌnisa yuꞌ khãꞌsx wala çxhiꞌdx miltxi yuꞌ. 7 Saꞌ Dxus yuweꞌs naꞌjĩnak ptaꞌsxiꞌ nasatx:
—Adx eꞌsuh teeçx yujaꞌ txãꞌ adxte jxthaakwe ãjãwaꞌjsaꞌ. Adxaꞌ txajx pelgatxi wesçxáa yuhtxwa khihbxaꞌ ãjãwaꞌjmeesath. 8 Adxaꞌ iꞌkweꞌsxtxiꞌ yuꞌ yakhçxáath bautisãyyaꞌ ãjãꞌ, naapkaçxhaꞌ txãꞌ iꞌkweꞌsx ũuste Dxus Espirituꞌs kxuꞌakheꞌjyaꞌ ãjãwaꞌjsaꞌ jĩꞌk.
Jesus yaꞌbautisãyni
9 Txãn ensuꞌ Jesusaꞌ Nasaret çxhabu kasejk Galilea kiweju. Saꞌ Juan tasxte paꞌtheꞌ, Jordan yuꞌwalate bautisãyku. 10 Açaꞌ yuꞌju kasejeççxaꞌ, uyku cielu phaateeçte. Naapkaçxhaꞌ Espirituꞌ tub çxihme naꞌwẽsa txajx kajkwekhẽ kĩjaçtek uy. 11 Saꞌ cieluju teeçx naꞌjĩna weꞌweniwa pthũusek:
—Idxaꞌ adx Nçxiꞌk wala wedxnisag. Iidxpaꞌga wala weçxana ũsthu jĩk.
Eçxthẽꞌj Jesusaꞌs ĩsxii wẽeni
12 Txãa dudtey Espirituꞌ Jesusaꞌs peꞌjna uꞌkh nasa uꞌpnimée kiwesu. 13 Açaꞌ Jesusaꞌ kuarenta enku kxtee uꞌpuꞌ yuꞌkh niimal ksxavxyte. Kxtee uꞌpteꞌ, eçxthẽꞌjaꞌ paꞌkh ewmée vxit wẽeçxa. Açaꞌ txãa eꞌsuꞌ Dxus angelesweꞌsxwa paꞌjtx puꞌçxyaꞌ.
Galilea kiwesu Jesus mjĩiyaꞌ takhni
14 Juanaꞌs karcelte kxuuphni eꞌsuꞌ, Jesusaꞌ Galilea kiwen uꞌkh Dxus jxkaahwaꞌjaꞌs ptaꞌsxyaꞌ. 15 Saꞌ naꞌjĩnak ptaꞌsx:
—Enaꞌ ãjãçaꞌ. Dxus jxkaahwaꞌj enaꞌ utxa ũsaꞌ. Açaꞌ iꞌkweꞌsxaꞌ pkaltxi nvxihtçxa Dxus tasxte misxawedwe, saꞌ Dxus yuwe ewte nvxiitwaꞌjsaꞌs ũuste myuꞌakhwe jĩꞌk.
Wedx uwesáa pahzsatx Jesus paꞌyani
16 Txãa eꞌsuꞌ Jesusaꞌ Galilea ĩkh wala pukasu uꞌjweççxaꞌ, uyku pxakhsatx Simon Adresweꞌsxtxi. Txãaweꞌsxaꞌ wedx uwesaatx yuꞌ, txãasatx wedx ukheꞌs ĩkh walate akhna ũsuꞌ. 17 Açaꞌ Jesusaꞌ paꞌyak:
—Adx yakh myuhwe, açaꞌ iꞌkweꞌsxtxiꞌ Dxus jĩi nasaa pkhakhwaꞌjsa vxituꞌnja. 18 Txãꞌjĩçpkaçxhaꞌ, txãaweꞌsxaꞌ wedx ukheꞌs nvxihtnaꞌ Jesus yakh uꞌjtx.
19 Txajũꞌ Jesusaꞌ kiꞌ uꞌjçxaꞌ, Zebedeo nçxiꞌkweꞌsx pxakhsatxku uy, Jakobo Juanweꞌsxtxi. Txãaweꞌsxaꞌ wedx ukheꞌs pãꞌkhnatx uꞌp yuꞌ barkote. 20 Açaꞌ paꞌyak. Naapkaçxhaꞌ txãaweꞌsxaꞌ ney Zebedeoꞌs vxite puꞌçxsa yakh barkote nvxihtnaꞌ, Jesus yakh uꞌjtx.
Eçx iiyamunisa
21 Txajũꞌ Kapernaum çxhabte paꞌjçxaꞌ, Jesusaꞌ kaapiyaꞌjyaꞌ takhku sapatu jxkaase ensu judiuweꞌsx pkhaakhenite. 22 Açaꞌ Jesus kaapiyaꞌjniꞌs wẽsẽꞌjçxaꞌ, nasaꞌ wala kuh yajkxna neeyũutx, txãꞌwẽ leyaꞌs kaapiyaꞌjsaweꞌsx naꞌwẽmée, nwẽeseꞌjwaꞌjaꞌs ũukhnus weꞌwena kaapiyaꞌphaꞌga.
23 Txãa pkhaakheni yatte teeçx piçthẽꞌj eçx iiyamunisak ũsuꞌ, saꞌ naꞌjĩnak sus weꞌwe:
24 —Jesus, Nasarethuweꞌsx, kweꞌsxtxiꞌ ¿kĩh yaꞌwaga? ¿Ivxiituyaꞌ wáꞌga yuwéꞌ? Idx kimtewa jiith. Idxaꞌ Dxus kaahnisag jĩteꞌ, 25 Jesusaꞌ naꞌjĩnak ũusçxa weꞌwe txãa eçxaꞌs:
—Sxuunaꞌ myũu, saꞌ naa piçthẽꞌj ũusu mkaaseh jĩna jxkaatheꞌ, 26 txãa eçxaꞌ nasaꞌs kaywẽçxpaꞌjna juunaꞌ kweeyiꞌjçxa kasejk. 27 Txãꞌwẽ yũuteꞌ, nasaꞌ jxukaysa ũukhçxa naꞌwẽtx puutx paapẽyiꞌ:
—Naa piçthẽꞌjaꞌ ¿kimna? Txajx weꞌweniꞌ ¿kĩhtxki açkiꞌtx eçx yuhwa nwẽesẽꞌjeꞌ? jĩꞌtx.
28 Jesus txãꞌwẽ yũuniꞌs wala dud jiyutx Galilea kiwesuweꞌsx jxuka.
Pedro nyu njĩꞌjaꞌs Jesus nuykatxhini
29 Txajũꞌ judiuweꞌsx pkhaakheni yatu kasehçxaꞌ, Simon Adresweꞌsx yatnak uꞌj, Jakobo Juan yakh. 30 Açaꞌ kxtee yuꞌ Simon nyu njĩꞌjaꞌ kakwesektek ãçãꞌna ũsuꞌ. Açaꞌ Jesusaꞌs ptaꞌsxtxi txãꞌwẽ ãçãꞌsa ũsaꞌ jĩna. 31 Txajũꞌ Jesusaꞌ kũhçxa kuseju puꞌkisku, naapkaçxhaꞌ dudtey kakwesekaꞌ ũçxhak. Txajũꞌ kiiteçxa selpiiyaꞌ kasejk.
Jxuka çxhiꞌdxiçte maazkuẽesatxwa nuykatxhini
32 Txajũꞌ çxhiꞌdxna kĩjaçteꞌ, jxuka ãçãꞌsatx Jesus tasxte nuypaꞌjtx vxiteꞌ eçx luuku vxitnisatxwa. 33 Açaꞌ çxhabte nasaꞌ jxuka kũhtx vxitxte thegyaꞌ. 34 Txajũꞌ Jesusaꞌ nuykatxhik fxiyfxiy wee jiꞌphsatxwa, saꞌ eçx luuku vxit-satxwa wala kutxiꞌkh nasaa ũusu. Txãa eçxaꞌ Jesus kimtewa jiitx yuꞌ nawa kweꞌweꞌjmeꞌ.
Galileasu Dxus yuweꞌs Jesus ptaꞌsxni
35 Txãꞌwẽ yũuni khikhiiçte nee çxhiꞌdxtey, Jesusaꞌ Dxus yakh puutx weꞌweyaꞌ uꞌkh çxhab ekaju. 36 Açaꞌ Simonaꞌ vxite yakh Jesusna pakweyaꞌ uꞌkh. 37 Saꞌ uyçxaꞌ ptaꞌsxku:
—Jxukaysa idxaꞌs jxpeejxtaꞌ jĩtewa, 38 Jesus pasçxaꞌ:
—Ay utxasuweꞌsx vxitewa peejxtaꞌ Dxus yuwe ewsaꞌs, açaꞌ kxsũ uꞌjwega. Txãꞌwẽ ptaꞌsxna pekũjxaꞌ íiçxáath naa kiwete kĩh jĩk.
39 Saꞌ eçx iiyamuçxa luuku vxit-satx nasaa ũusu kutxiꞌjna Galilea kiwesu jxuka pekũjk Dxus yuweꞌs ptaꞌsxna, vxiteꞌ judiuweꞌsx pkhaakhenisuwa.
Teeçx piçthẽꞌj wãꞌjy weete ãçãꞌsaꞌs Jesus nuykatxhini
40 Txãn ensuꞌ teeçx piçthẽꞌj wãꞌjy wee seenaꞌ kazxsate ãçãꞌsa Jesus tasxte peejxũkweçxa naꞌjĩk:
—Adxaꞌs nuykatxhiwáꞌga ahçemeeçxaꞌ jĩna pxthaa weꞌweteꞌ, 41 Jesusaꞌ peeygãhna kuseju jxaꞌdxçxaꞌ:
—Ahçemeꞌnja, naa paꞌga katxhiçxa mneeyũu jĩçpkaçxhaꞌ, 42 txãa wãꞌjy weeju katxhiçxak neeyũu.
43 Txajũꞌ Jesusaꞌ txãa piçthẽꞌjaꞌs wala neeweꞌweçxa kaakh naꞌjĩna:
44 —Adx weꞌwenitxiꞌ jxpaꞌyakxçxa, maa yuhtxwa ptaꞌsxmeeneꞌga, naasáa sacerdoteçxáꞌs iidx kakweꞌs txwesyaꞌ meꞌj. Saꞌ txãa weeju katxhipaꞌga Dxusna peesuneꞌga Moises maꞌwẽga jxkaah txãꞌwẽy, kxah nasa jxukaysa jiyutxna idx ew katxhiçxa neeyũutewa jĩnak neeweꞌwe. 45 Nawa txãa piçthẽꞌjaꞌ nasa jxukaysatx ptaꞌsxku, Jesus maꞌwẽ yũuniꞌswa jxuka. Txãa paꞌgaçxáa Jesusaꞌ maa çxhabte yuhwa ãate paꞌjyaꞌ ãjãmeeçxaꞌ, çxhab ekaju nasa meesuçxáak uꞌjuꞌ. Makwe txãꞌwẽ yũutewa, txajx tasxte yuꞌ majũweꞌsxwa paꞌjna nestxi yuꞌ.
Esẽyaꞌ ãjasameꞌs Jesus nuykatxhini
2 Maz en skhẽwniijũꞌ Jesusaꞌ kiꞌkin paꞌkh Kapernaum çxhabte. Açaꞌ nasa jiyutx Jesusaꞌ paꞌjçxa teeçx yatte ũsaꞌ jĩniꞌs. 2 Txãasatx naa dudte nasa wala pkhaakheçxa yat vxitxte jxuka uta, açaꞌ Jesusaꞌ Dxus yuweꞌs ptaꞌsxku. 3 Naapkaçxhaꞌ pahz piçthẽꞌjsa teeçx ẽsẽyaꞌ ãjãsameeaꞌs yakhçxatx Jesus tasxte nuypaꞌj. 4 Nawa nasaa ksxavxyte Jesus tasxte kuutxaꞌjyaꞌ ãjãmeeçxaꞌ, yat kajkweju phaadeçxatx Jesus ũsnikhẽ nuykĩh aadasga khikhçxa. 5 Txajũꞌ ãçãꞌsaꞌs nuypaꞌjsaweꞌsxaꞌ Jesusaꞌ nuykatxhiyujuna sũhniꞌs jiyuçxaꞌ, txãa ãçãꞌsaꞌs weꞌwek Jesusaꞌ:
—Iidx pkalaꞌ peltunãyni yãꞌjtx neeyũu jĩteꞌ, 6 Dxus leyaꞌs kaapiyaꞌjsaweꞌsx wẽsẽꞌjna uꞌpsa maaíi yuꞌ naꞌwẽtx yajkx:
7 —¿Maꞌwẽçxaga naa piçthẽꞌjaꞌ txãꞌwẽ weꞌweꞌ? Dxus yuuçxáa pkaltxi peltunãyyaꞌ ãjawaꞌjsaꞌ, açaꞌ jweeju yuꞌ ¿kimçxáꞌ peltunãyyaꞌ ãjãmaꞌk? Açaꞌ Dxusaꞌs iiweeçx weꞌwena ũsaꞌ sũjũꞌtx. 8 Nawa Jesusaꞌ txãaweꞌsx yaakxniꞌs jiyuçxa naꞌjĩk:
—¿Kĩh yuutekwe txãꞌwẽ yaakiꞌ?9 ¿Maa thẽymeesakx? Iidx pkalaꞌ peltunãyni yãꞌjtx neeyũu ¿jĩniáꞌ? Meeçxaꞌ: Kiiteçxa iidx deeniꞌs tuꞌsçxa meꞌj ¿jĩniáꞌ? 10 Makwe thẽysatewa Dxus Nçxiꞌk Nasa Yuusaꞌ naa kiwete pkaltxi peltunãyyaꞌ ãjãwaꞌjsaꞌ naa paꞌga kaajiyuꞌjyaꞌwath ãçxhaꞌ. Txajũꞌ ãçãꞌsaꞌs naꞌjĩk: 11 Idxaꞌsthu weꞌweꞌ: Kiiteçxa iidx deeniꞌs tuꞌsçxa yatna meꞌj jĩçpkaçxhaꞌ, 12 ãçãꞌsaꞌ dudtey kiitenaꞌwa txajx deeniꞌs tuꞌsçxa uꞌkh, nasa thegna ũsiyna.
Txajũꞌ jxukaysa wala kuh yajkxna Dxusna weçxana naꞌjĩꞌtx:
—Bagaçx yuhwa naꞌwẽ yũuni yuꞌs iiuymeethaꞌw jĩꞌtx.
Mateoꞌs Jesus paꞌyani
13 Txãa eꞌsuꞌ Jesusaꞌ kiꞌ uꞌkh ĩkh wala pukan. Açaꞌ txajx tasxte nasa wala pkhaakheteꞌ, Dxus yuweꞌs kaapiyaꞌkh. 14 Txãajũ kiꞌ uꞌjçxaꞌ, Alfxeo nçxiꞌk Levxiaꞌsku uy, gobierno jĩi vxyu pkhakhna uꞌpte. Saꞌ:
—Adx yakh myuh jĩna paꞌyaçpkaçxhaꞌ, Levxiaꞌ kiitenaꞌ Jesus yakh uꞌkh.
15 Txajũꞌ Jesusaꞌ txãa yakh uꞌjusaweꞌsx yakh Levxi yatte ũꞌyaꞌ uꞌkateꞌ, gobierno jĩi vxyu pkhakhsaweꞌsx vxiteꞌ pkalsaweꞌsxwa wala kuhsa pkhaakheçxaꞌ Jesus yakh mesate ũꞌyaꞌ kaçxtxi. 16 Açaꞌ Dxus leyaꞌs kaapiyaꞌjsaweꞌsx vxiteꞌ fxariseoweꞌsxaꞌ Jesusaꞌ nasa txãꞌwẽsa ksxavxyte uꞌpte uyçxaꞌ, pẽjxtxi Jesus yakh uꞌjusaweꞌsxtxi:
—Iꞌkweꞌsxtxi kaapiyaꞌjsa ¿maꞌwẽçxaga gobierno jĩi vxyu pkhakhsaweꞌsx vxiteꞌ pkalsaweꞌsx yakh ũꞌwéꞌ? jĩteꞌ, 17 txãꞌwẽ pẽyiçte Jesus wẽsẽꞌjçxaꞌ naꞌjĩk:
—Yuꞌçeꞌjsaꞌs jxpeejxmeetaꞌ aka jiꞌphmée wẽt ũssaꞌ, naasáa ãçãꞌsa yuuçxáa yuꞌçeꞌjsaꞌs jxpeejxtaꞌ. Adxaꞌ naa kiwete nasa ewsatx pakweyaꞌ kĩhmeeth, pkalsatx pakweyaꞌçxáath kĩh jĩk.
Yũunaniꞌs Jesusaꞌs pẽyni
18 Teeçx enteꞌ, Juan yakh uꞌjusa vxiteꞌ fxariseoweꞌsx yakh uꞌjusa txãꞌwẽ yũunaana ũsteꞌ, nasaꞌ paapẽjxtxi Jesusaꞌs:
—¿Juan yakh uꞌjusa vxiteꞌ fxariseoweꞌsx yakh uꞌjusaweꞌsxaꞌ yũunaꞌtx, açaꞌ idx yakh uꞌjusaweꞌsx yuꞌ ¿kĩh yuuçxata yũunaꞌçmée? jĩteꞌ, 19 Jesusaꞌ naꞌwẽk kaajaꞌdaꞌjna pas:
—¿Novxioweꞌsx kaba ente piꞌkxnisaꞌ yũunaayaꞌ ãjãmaꞌtx? novxio txãaweꞌsx yakh nee ũsiiteꞌ. Kabani fxiesta pçumeyteꞌ, yũunaayaꞌ ãjãmeetxna. 20 Nawa novxioꞌ txãaweꞌsx tasxu txuteewaꞌj en paꞌjana, txãjũ isa yũunaatxna.
21 Ropa ĩisx suteniite, tela uꞌsesa yakh yaꞌpãꞌkheꞌçmeꞌ. Txãꞌwẽmeꞌ, tela uꞌsesaꞌ jweeíiçxáak sudeꞌ ĩisxsaꞌs. 22 Txãꞌwẽy beka uꞌse aahnisaꞌs slun ĩisxsate yaꞌawuꞌçmeꞌ. Txãꞌwẽmeꞌ, beka uꞌsesaꞌ slun ĩisxsaꞌs sudeꞌk, açaꞌ beka yakh slun yakh eꞌzíi vxituꞌtx. Txãa paꞌga beka uꞌsesaꞌs slun uꞌsesate awwaꞌjaꞌ jĩk.
Jxkaase entewa skuutxhtxi çxuktedeçxa ũꞌni
23 Teeçx sapatu jxkaase enteꞌ, Jesusaꞌ skuutxh ehsuk skhẽw. Açaꞌ txãa yakh uꞌjusaweꞌsxaꞌ skuutxhtxi çxuktedeçxa ũꞌtx. 24 Açaꞌ fxariseoweꞌsxaꞌ naꞌwẽtx pẽjx:
—¿Uyuꞌgáꞌ idx yakh uꞌjusaweꞌsxaꞌ maꞌwẽçxata mjĩi en meetewa txãꞌwẽ yũꞌ? jĩteꞌ, 25 Jesusaꞌ naꞌwẽk pas:
—Iꞌkweꞌsxaꞌ Dxus librute iilẽeymeewáꞌkwe Davxidaꞌ ¿kĩhga yuu? txãa yakh piꞌkxna uꞌjusaweꞌsx yakh teeçx enteꞌ wẽeçxaꞌ. 26 Sacerdote npiiçthẽꞌj Abiatar enteꞌ dxuus yatte uꞌkaçxa, kxtee pantxi ũꞌk, saꞌ txãa yakh uꞌjusatxwa ũsuꞌsku. Txãa panaꞌ naasáa sacerdoteweꞌsxçxáa ũꞌwaꞌthe jiiçxawa txãꞌwẽk yũu.
27 Iꞌkweꞌsxaꞌ mjiyuwe: Jxkaase enaꞌ nasatx selpiwaꞌjsa íiçxáꞌ, nawa suwwaꞌjsa yuꞌ meꞌ. 28 Txãa paꞌga Dxus Nçxiꞌk Nasa Yuusaꞌ jxkaahwaꞌj jiꞌphaꞌ makwe sapatu jxkaase entewa jĩk.
Teeçx piçthẽꞌj txajx kuse udxnisa
3 Vxite sapatu enteꞌ Jesusaꞌ kiꞌkin judiuweꞌsx pkhaakheni yatte uꞌkak. Açaꞌ kxteꞌ teeçx piçthẽꞌj teeçx kuse udxnisa kẽeseꞌjyaꞌ ãjãsameek uꞌp yuꞌ. 2 Açaꞌ fxariseoweꞌsxaꞌ Jesusaꞌs peetheguꞌnatx ũsuꞌ, sapatu jxkaase ente nuykatxhiteꞌ pãatxhĩꞌkhyaꞌ sũhçxa.
3 Txajũꞌ Jesusaꞌ txãa piçthẽꞌjaꞌs paꞌyaçxa nasaa pxãhte kxuujuꞌjçxaꞌ, 4 naꞌwẽk paapẽjx vxite kxtee ũssatx:
—Sapatu jxkaase entewa puꞌçxte ¿ewmanx? meeçxaꞌ ¿puꞌçxwaꞌjmeemanx? Nasaꞌs nweꞌwete ¿ewmanx? meeçxaꞌ nweꞌwemeete ¿ewmanx? jĩteꞌ, txãaweꞌsxaꞌ pasmée sxuunaꞌtx neeyũu.
5 Txãꞌwẽ fxariseoweꞌsxaꞌ Jesus weꞌweniꞌs jxpaꞌgayaꞌ waꞌlteꞌ, Jesusaꞌ txãaweꞌsxtxi ũusçxa thegçxa naꞌjĩnak weꞌwe txãa piçthẽꞌj kuse udxnisaꞌs:
—Kuseꞌs mkuꞌleꞌj jĩçpkaçxhaꞌ, txajx kuseꞌ ewuuk.
6 Txajũꞌ fxariseoweꞌsxaꞌ Jesusaꞌs ikhyaꞌ puutx weꞌweyaꞌ uꞌjtx Herodes juꞌgsaweꞌsx yakh.
Nasa wala kuh pehnatx ĩkh pukasu
7 Naapkaçxhaꞌ Jesusaꞌ txãa yakh uꞌjusaweꞌsx yakh uꞌkh ĩkh wala pukan. Açaꞌ Galileaju nasa wala kuh uꞌjtx Jesus eꞌstey. 8 Txãꞌwẽ Jesus kĩjkĩhwa ew yũuniꞌs nasa jiyuçxaꞌ, majũweꞌsxwa Jesus tasxte paꞌjtx thegyaꞌ, Judeajuweꞌsx, Jerusalenuweꞌsx, Idumeajuweꞌsx, Jordan yuꞌwala kutejuweꞌsx, vxiteꞌ Tiro, Sidon çxhab peekuꞌjuweꞌsxwa. 9 3:9-10 Nasa txãꞌwẽ wala paꞌtheꞌ, maazkuẽe ãçãꞌsatxwa nuykatxhik, açaꞌ jxukaysa Jesusaꞌs kpaajxaꞌdxçxa katxhi wẽesa txajx tasxteçxaçxáa utxaaçxa akaaçxpçxãhtx yuuna ũsuꞌ. Txãa paꞌgak Jesusaꞌ txãa yakh uꞌjusaweꞌsxtxi jxkaah teeçx barko ih jiꞌphukahn akaaçxhiçte kxtee khẽewaꞌj. 10 — 11 Açaꞌ eçx iiyamunisaweꞌsxaꞌ Jesusaꞌs uyçxa, txajx tasxte peejxũkwena naꞌjĩnatx weꞌweꞌ:
—Idxaꞌ Dxus Nçxiꞌkgu jĩteꞌ, 12 Jesusaꞌ txãaweꞌsxtxiꞌ wala juunaꞌ weꞌwek kimtewa ãate kaajiyuꞌkhamen.
Doce nasa Jesus txhitxhni
13 Txãa eꞌsuꞌ Jesusaꞌ thãꞌthe uꞌkh kuh nasatx piꞌkxçxa.
14 Açaꞌ kxtee kãhçxaꞌ, doce nasatx txhitxhku txãa yakh uꞌjuwaꞌjsa, txãaweꞌsxtxiꞌ Dxus yuweꞌs ptaꞌsxyaꞌ kaajxaꞌ. 15 Txãꞌwẽ txhitxhçxaꞌ, ãçãꞌsatxwa nuykatxhina eçx luuku vxit-satxwa ũusu kutxiꞌjyaꞌ ãjãwaꞌjaꞌs ũsku.
16 Txãa doce nasaꞌ naꞌwẽ yaasetaꞌ: Simon, txãꞌsaꞌ Pedro yasek kiꞌp. 17 Vxiteꞌ Zebedeo nçxiꞌkweꞌsx pxakhsa Jakobo Juanweꞌsxtxi yuꞌ. Txãa pxakhtxiꞌ Boanerges jĩnatx kxsuusuꞌ, nasa juunaꞌsa paꞌga. 18 Vxiteꞌ Andrés, Fxelipe, Bartolomé, Mateo, Tomás, Alfxeo nçxiꞌk Jakobo, Tadeo, vxiteꞌ Simón kananista nasa, 19 vxiteꞌ Judas Iskariote, Jesusaꞌs açesaweꞌsx kusete dukhwaꞌjsa.
Jesusaꞌ thãꞌju sxawedçxaꞌ, teeçx yattek uꞌka, txajx txhitxhnisaweꞌsx yakh.
Dxus Espirituꞌs açeweꞌweni
(Mt 12.22-32; Lk 11.14-23; 12.10)
20 Txãꞌwẽy nasa iiméh wala kuh pkhaakheteꞌ, ũꞌwaꞌj en yuhwa jiꞌphumeetaꞌ.
21 Txajũꞌ Jesus nweꞌsxaꞌ txãꞌwẽ yũuniꞌs jiyuçxaꞌ, Jesusaꞌ luuku yuuneꞌ sũhçxa peꞌjna uꞌjyaꞌ paꞌjtx. 22 Açaꞌ Dxus leyaꞌs kaapiyaꞌjsaweꞌsxwa Jerusalenu paꞌjçxaꞌ naꞌjĩꞌtx:
—Naa piçthẽꞌjaꞌ eçxthẽꞌjaꞌs yuu ũuste jiꞌphaꞌ. Txãꞌwẽçxaíik eçxtxi nasaa ũusuh kutxiꞌjyaꞌ ãjãꞌ jĩteꞌ, 23 Jesusaꞌ nasatx paꞌyaçxa naꞌwẽk ptaꞌsx jiyukahn:
—¿Maꞌwẽçxa eçxthẽꞌjaꞌ eçxthẽꞌjaꞌs íiçxáa kutxiꞌjyaꞌ ãjãꞌkx? 24 Maa kiwetewa gobiernoꞌ peekx nasatx íiçxáa ahçeçxa puiiçxaꞌ, çxhãçxhameena. 25 Txãꞌwẽy teeçx yatteweꞌsxwa puutx yahçena puiiçxaꞌ, pçuutxna puutx uuna. 26 Açaꞌ txãꞌwẽy eçxthẽꞌjwa txajx jxkaahnisa eçx yakh íiçxáa puiiçxaꞌ, çxhãçxhamée puutx pçuutxna.
27 Kim yuhwa ewteçxah yuꞌ nkuusaꞌjyaꞌ ãjãmeetxna, yat namu khuẽꞌyaꞌs tudmeeçxa yuꞌ. Açaꞌ txãꞌwẽ tudçxa yuuçxáa nkuusaꞌjyaꞌ ãjãtxna.
28 Iꞌkweꞌsxaꞌ mpaꞌyajkxwe: Nasa naa kiwete kĩhwa ewmée yũuni kĩhwa Dxusna ewmée nuyweꞌwetewa txãatxiꞌ jxuka yaꞌpeltunaĩna. 29 Nawa Dxus Espirituꞌs açeweꞌweteꞌ, bagaçxte yuhwa peltunãynimée yuuna, uu kiwen kaahwaꞌjçxáa nvxiituna jĩk. 30 Nasa weꞌweçxaꞌ: Eçxthẽꞌjaꞌs ũuste jiꞌphaꞌ jĩpaꞌgak txãꞌwẽ ptaꞌsx Jesusaꞌ.
Jesus njĩꞌj vxiteꞌ txajx nyakhweꞌsx
31 Naapkaçxhaꞌ paꞌjtx Jesus njĩꞌj vxiteꞌ nyakhweꞌsx jxuka. Saꞌ ekate kũhçxa, Jesusaꞌs paꞌyakaahtx. 32 Açaꞌ Jesus yakh dxiite uꞌpsaꞌ ptaꞌsxtxi naꞌjĩna:
—Iidx mama iidx nyakhweꞌsx paꞌjçxa ekate ũstaꞌ, saꞌ idxaꞌstxi yuukajaꞌ jĩteꞌ, 33 Jesusaꞌ naꞌwẽk pas:
—¿Kimtxikwe adx mama adx nyakhweꞌsx jĩna weꞌwéꞌ? 34 Saꞌ txãꞌwẽ ptaꞌsxsatx thegçxaꞌ naꞌjĩk:
—Adx mama adx nyakhweꞌsxaꞌ naataꞌ. 35 Dxus jxkaahniꞌs nwẽeseꞌjna kxtey yuusáa yuuçxáa, adx nyakh, adx npeꞌsx, adx mama naꞌwẽsataꞌ jĩk.
Skuutxh uuhsaꞌs kaajaꞌdaꞌjni
4 Jesusaꞌ kiꞌkin ĩkh wala pukate kaapiyaꞌjyaꞌ kasehteꞌ, nasa iiméh wala kuh pkhaakheçxa utaaçteꞌ, Jesusaꞌ barkote khẽeçxak ptaꞌsx. Açaꞌ nasa yuꞌ ĩkh wala pukate neeyũutx wẽsẽꞌjna. 2 Txajũꞌ kĩjkĩhwa ptaꞌsxku ejemplo yakh kaajaꞌdaꞌjna. Saꞌ naꞌwẽk kaapiyaꞌj:
3 —Mwẽesẽꞌjwe: Skuutxh uuhsaꞌ ujxaꞌ kasejk. 4 Açaꞌ mteeíi yuꞌ dxiꞌjsu ãasu neeyũuteꞌ, vxiçxakwe ũꞌtx. 5 Vxite ahsuꞌ kwet kajkwesutx neeyũu kiwe peççxáa jiꞌphsu. Saꞌ kiwe jwetmée yaꞌfxihbçxaꞌ dudtxi buçxa. 6 Nawa sek açxaateꞌ jxuka uhdxku, weçe dxiimeeneꞌ jiꞌphuꞌ naa paꞌga. 7 Vxite ahsuꞌ çhũçh ksxavxysutx ũsxi, açaꞌ çhũçh walaaçxa jxuka aphteꞌ, çutmeetaꞌ. 8 Vxite ahsuꞌ kiwe ewsatek ũsxi, saꞌ buçxaçxa wala ew çuttxi. Maa tasxíi yuꞌ treinta, vxiteꞌ sesenta, vxiteꞌ cien nxinxtxi çut.
9 Naꞌwẽ ptaꞌsxthu txãꞌsaꞌ jiyuwaꞌjsa ũsçxaꞌ, jiyuneꞌkwe jĩk.
10 Txajũꞌ nasa kuhsa yuꞌ uꞌthe, Jesusçxáak neeyũu, doce txhitxhnisaweꞌsx vxite nasa yakh. Açaꞌ txãaweꞌsxaꞌ paapẽjxtxi txãa ejemploꞌs maꞌjĩnitewa jiyuyaꞌ. 11 Açaꞌ Jesusaꞌ ptaꞌsxku:
—Dxus jxkaahni ensu maꞌwẽ yũuwaꞌjaꞌswa kim yuhwa jiyunimeesaꞌs iꞌkweꞌsx yuutxiꞌs kaajiyuꞌjwaꞌjaꞌ. Nawa jiyuwaꞌjmeesatxiꞌs ejemplo yakhçxáa ptaꞌsxwaꞌjaꞌ, 12 kxah uyçxawa, uysamée naꞌwẽçxáa neeyũutxna, saꞌ wẽsẽꞌjçxawa, wẽsẽꞌjsamée naꞌwẽçxáa neeyũuçxa Dxus tasxte sxawedmeetxna, açaꞌ txãaweꞌsxtxiꞌ Dxusaꞌ peltunaĩmeena.
13 Txajũꞌ naꞌwẽk ãate kaajiyuꞌj:
—Iꞌkweꞌsxaꞌ naa ejemploꞌs jiyuꞌçmeewáꞌkwe. Txãꞌwẽçxaꞌ ¿maꞌwẽ vxite ejemplotxwa jiyukiꞌkwe? 14 Skuutxh uuhsaꞌ Dxus yuweꞌs ptaꞌsxsa naꞌwẽsaꞌ. 15 Maa nasaíi yuꞌ skuutxh fxiw dxiꞌjsu ũsxisáa naꞌwẽsataꞌ: Dxus yuweꞌs wẽsẽꞌjçxa ũuste jxpaꞌgatewa, eçxthẽꞌj paꞌjçxa txãa yuweꞌs ũusu kutxiꞌjina. 16 Vxite nasaꞌ skuutxh fxiw kwet kajkwesu ũsxisáa naꞌwẽsataꞌ: Dxus yuweꞌs ãçxhíi yuꞌ weçxanatx jxpaꞌgaꞌ. 17 Nawa ũusuh jxuka yajkxçxa jxpaꞌgameeçxaꞌ, Dxus yuweꞌs ahçeçxa pkxuuwaꞌj en paꞌtheçxáa txaçxmeyna weteꞌtx. 18 Açaꞌ vxite nasaꞌ skuutxh fxiw çhũçh ksxavxysu ũsxisáa naꞌwẽsataꞌ: txãaweꞌsxaꞌ Dxus yuweꞌs wẽsẽꞌthewa, 19 naa kiwete kĩjkĩhwa jiꞌphu wẽenisaçxáa ũuste jxuka khẽeçxa Dxus yuwe yuꞌsaꞌ kaapeçxkanaꞌjuna. 20 Nawa maa nasaíi yuꞌ skuutxh fxiw kiwe ewsate ũsxiçxa maꞌwẽta maaíi yuꞌ treinta, vxiteꞌ sesenta vxiteꞌ cien nxinx pehna, txãꞌwẽ Dxus yuwe ũuste penawaꞌjsaꞌ.
Ãate jiyuwaꞌj yuꞌ neeyũuwaꞌjsamée
21 Txajũꞌ vxite ejemplo naꞌwẽk ptaꞌsx:
—Lamparaꞌs pkiꞌtaçxa ¿kaja dxiite meeçxaꞌ atũu dxiite sũthnisatxnáꞌ? Txãꞌwẽ yũumée, lamparaꞌs ãatek yaꞌtxajaꞌ, eenaꞌ kweethkahn. 22 Makwe sũttewa, uynimée yuꞌ kĩh yuhwa neeyũumeena. Saꞌ txãꞌwẽy makwe ũusteçxáa yaakxnisaꞌswa jiyunimée yuꞌ neeyũumeena. 23 Jiyuwaꞌjsa ũsçxaꞌ, jxpaꞌyakx mwẽesẽꞌjwe jĩçxaꞌ, 24 naꞌwẽk ptaꞌsx:
—Adx kaapiyaꞌjniꞌs jxpaꞌyakx mwẽesẽꞌjwe. Iꞌkweꞌsx waꞌlmée wẽsẽꞌtheꞌ, Dxusaꞌ jxthaakwe kaajiyuꞌjuna. 25 Dxus yuweꞌs jiyuwaꞌjsaꞌs kaajiyuꞌjni yuuna. Nawa Dxus yuweꞌs jiyuwaꞌjmeesaꞌs kaajiyuꞌjnimée yuuna jĩk.
Dxus naa kiwete jxkaajxaꞌ paꞌjnisa
26 Jesusaꞌ vxite ejemplo ptaꞌsxku:
—Dxus naa kiwete jxkaajxaꞌ paꞌjnisaꞌ naꞌwẽsaꞌ: Teeçx piçthẽꞌj mjĩisaꞌ fxiwaꞌs kiwete uhçxaçxáa 27 uꞌjweꞌk saꞌ txaçxku thegyaꞌ paꞌjaçmée. Açaꞌ uuhnisaꞌ buçxaçxa walaꞌk, nawa uuhsa yuꞌ jiimeek yuꞌ maꞌwẽ buçxana walaaçtewa. 28 Fxiwaꞌ kiwete ujxãꞌtheꞌ, peekxçxáa buçxaꞌk kĩhwa yuumeetewa, nyafxteꞌ tasx khuẽꞌy walaꞌk, txãꞌwẽ yuuçxak spiiga kasejeꞌ, txãa eꞌsuꞌk nxinx kasejeꞌ, 29 açaꞌ thẽꞌj enteꞌ, pkhakhyaꞌ kasejeꞌtx.
Mostasa fxiwaꞌs kaajaꞌdaꞌjnisa
30 Vxite ejemplok ptaꞌsx Jesusaꞌ:
—Dxus naa kiwete jxkaajxaꞌ takhnisaꞌs ¿kĩh yakh kaajaꞌdaꞌjaꞌkxthaꞌw aç jiyukiꞌkwe? 31 Mostasa fxiw naꞌwẽsaꞌ açaꞌ txãa yakh kaajaꞌdaꞌjaꞌnjaꞌw.
Txãa fxiwaꞌ maa maa fxiwtewa thaakwe musekuẽtaꞌ, 32 nawa kiwete ujxãꞌtheꞌ, maa ẽjxã tasxtewa jxthaakwek waláa, seenaꞌ wala çxhãꞌpx kasehna. Açaꞌ vxiçxakwe yuhwa txãa ẽjxã ksxavxysu yaat-yaꞌ ãjãꞌtx. Naa kiwete Dxus jxkaajxaꞌ takhnisaꞌ txãꞌwẽysaꞌ.
Ejemplo yakh kaapiyaꞌjwaꞌjaꞌs ptaꞌsxni
33 Jesusaꞌ Dxus yuweꞌs txãꞌwẽk ptaꞌsxiꞌ wala kuh ejemplo kutxiꞌjna, jiyuwaꞌjsaꞌ jiyuyaꞌ ãjãkahn. 34 Ejemplo jiꞌphmée yuꞌ kaapiyaꞌjaꞌçmeꞌ. Nawa txãa yakh uꞌjusaweꞌsx yuutxiꞌs kĩh ejemploꞌswa jxuka khiyuꞌjçxak nvxiituꞌ.
Marte wejxa walaꞌs Jesus kxuujuꞌjni
35 Txãa entey çxhiꞌdxna kĩjaçteꞌ, Jesusaꞌ naꞌjĩk txãa yakh uꞌjusaweꞌsxtxiꞌ:
—Uꞌjwega ĩkh wala kuten jĩteꞌ, 36 nasatx nvxihtnaꞌ Jesusaꞌs peꞌjna uꞌjtx txãaweꞌsx khẽeçxa uꞌpni barkote. Açaꞌ vxite barkowa ihtey uꞌjtx.
37 Ĩkh wala pxãjũy uꞌjweçpkaçxhaꞌ, wejxaa wala kiiteçxa barkoꞌs ĩkh dxiikhẽ akhyaꞌwak yuꞌ, yuꞌaꞌs barkote yuutaçxa. 38 Naapkaçxhaꞌ Jesusaꞌ deenik yuꞌ, barko eꞌste kaçxçxa dxiktheꞌs peedxikiga khikhçxa. Açaꞌ txãa yakh uꞌjusaweꞌsxaꞌ Jesusaꞌs fxĩtxtxi naꞌjĩna:
—Ĩkh dxiikhẽ khẽjeçthaꞌw açaꞌ ¿kweꞌsxtxiꞌ peeygãjaꞌçmeegaꞌ? jĩteꞌ, 39 Jesusaꞌ kiiteçxa, wejxaꞌs weꞌwek yujukahn petx ĩkh yãꞌjçxa. Naapkaçxhaꞌ wejxa yujuteꞌ, ĩkhwa yujuk.
40 Txajũꞌ Jesusaꞌ txãa yakh uꞌjusaweꞌsxtxiꞌ naꞌjĩk: ¿Kĩh yuuçxakwe Dxus yuꞌs yajkxmée txakwe wala ũukhúꞌ? jĩk.
41 Txãꞌwẽ wejxa yuhwa nwẽeseꞌtheꞌ, txãaweꞌsxaꞌ wala kuh yajkxna neeyũutx naꞌjĩna:
—Naa piçthẽꞌjaꞌ ¿kim yujkx, açkiꞌtx wejxa ĩkh txãꞌwẽsa yuhwa nwẽesẽꞌjéꞌ? jĩꞌtx.
Gadara kiweteweꞌsx eçx iiyamunisa
5 Txajũꞌ ĩkh wala kute Gadara kiwete paꞌjtx. 2 Açaꞌ Jesus barkoju kasejeçpkaçxhaꞌ, teeçx piçthẽꞌj eçx iiyamunisa uusáa pedani kafxu kasehçxa Jesus tasxte utxaak. 3 Txãa piçthẽꞌjaꞌ uusáa pedani kafxsuk uꞌpsa yuꞌ, açaꞌ txãꞌsaꞌ kim yuhwa çam kadenaju tudçxa jxpeꞌjyaꞌ ãjãꞌçmeetaꞌ. 4 Çxida petx kuse yãꞌjçxa maazkuẽe uswa tudtewa, nuywejiméek çxuktedeçxa pũsxiꞌ. Açaꞌ kim yuhwa ãjãꞌçmeetaꞌ tudçxa jxpeꞌjyaꞌ yuꞌ. 5 En maꞌk yuu kus maꞌk yuu nawa vxiçsu vxiteꞌ uusáa pedani kafxsu weynak pekũjũꞌ kwet-su kpãꞌyuuna. 6 Nawa Jesusaꞌs jxuꞌthe uyçxaꞌ, wuwuuna uꞌjçxa txajx tasxte peejxũkwek 7 sus weꞌwena:
—¿Adxaꞌs kĩh yũuyaꞌwaga? Jesus, Dxus ĩtxĩsa Nçxiꞌk. Dxus paꞌga adxaꞌs peeygãhçxa txakwe seenaꞌ wala nxuste yuꞌ kaahnu jĩk. 8 Jesusaꞌ eçx luuku vxit-saꞌs weꞌweçxaꞌ: Naa piçthẽꞌj ũusu mkaaseh jĩpaꞌgak txãꞌjĩꞌ.
9 Txajũꞌ Jesusaꞌ pẽjxku:
—¿Kĩh yaasega? jĩteꞌ, ptaꞌsxku:
—Legion yaaseth, wala kuhthaꞌw naa paꞌga jĩk. 10 Saꞌ txãa eçx luuku vxit-saꞌ wala pxthaa weꞌwek txãa kiwejũ kutxiꞌkhamen.
11 Txajũꞌ kxsũ vxiç jaꞌdasũ wala kuçxi ũsuꞌtx aphna. 12 Açaꞌ eçx luuku vxit-saꞌ naꞌjĩnatx pxthaa weꞌwe:
—Kuçxi ũuste khẽeyaꞌ uꞌkhan kweꞌsxtxi mkaah jĩteꞌ, 13 Jesusaꞌ txãa eçx luuku vxit-satx kuçxi ũuste uꞌkayaꞌ kaakh.
Txajũꞌ txãa eçx luuku vxit-sa kuçxi ũuste khẽeteꞌ, kuçxiꞌ luuku yuuçxa penxakhẽ peluçxa yuꞌteçxaçxáa khẽeçxa jxuka uutx. Txãa kuçxiꞌ dos mil ãhtx yuꞌ;
14 Txãꞌwẽ yũuteꞌ, kuçxi thegsa ũukhçxa wala dud ptaꞌsxyaꞌ uꞌjtx çxhabsu vxiteꞌ çxhab ekaju jxuka. Açaꞌ nasaꞌ wala paꞌjtx thegyaꞌ, kĩh yũutewa uyyaꞌ. 15 Saꞌ Jesus ũsnite paꞌjçxa uytxi txãa piçthẽꞌj eçx luuku vxitnisaꞌ wẽt yãꞌj ropa jiꞌph uꞌpte. Txãꞌwẽ uyçxa wala ũukhtxi.
16 Txajũꞌ maꞌwẽ yũuçxa eçx luuku vxitnisa katxhini vxiteꞌ kĩh yũuçxa kuçxi uuniꞌswa uysaaweꞌsxaꞌ jxuka ptaꞌsxtxi nasa thegyaꞌ paꞌjsatxiꞌs. 17 Txajũꞌ nasaꞌ Jesusaꞌs ũusçxa weꞌwetx txãaweꞌsx kiwejũ uꞌkhan.
18 Açaꞌ Jesusaꞌ kiꞌ sxawedxaꞌ barkote khẽjeçpkaçxhaꞌ, eçx luuku vxitnijũ katxhisaꞌ wala pxthaa weꞌwek peꞌjçxa uꞌkhan. 19 Nawa Jesusaꞌ peꞌjna uꞌjmée naꞌwẽk jxkaah:
—Iidx yatna meꞌj, saꞌ iidx nweꞌsxtxi ptaꞌsxineꞌga idxaꞌs Dxus peeygãhçxa maꞌwẽ ew yũuniꞌswa.
20 Txajũꞌ txãa piçthẽꞌjaꞌ uꞌjçxa, Dekapolis çxhabsu jxuka ptaꞌsxku Jesus maꞌwẽ yũuçxa nuykatxhiniꞌswa. Açaꞌ nasaꞌ wala kuh yaakiꞌtx jxukaysa.
Jairo niisa vxiteꞌ Jesus atxhte jxaꞌdxsa
21 Txajũꞌ Jesusaꞌ ĩkh wala kutejũ barkote khẽeçxa pesahçxa kxtee ũsteꞌ, nasa wala paꞌjtx txajx ũsnite. 22 Açaꞌ judiuweꞌsx pkhaakhenite npiiçthẽꞌjsa Jairo yaasesaꞌ Jesus tasxte peejxũkweçxa 23 naꞌwẽk pxthaa weꞌwe:
—Adx niisakuẽꞌ uuçyãꞌjaꞌ, açaꞌ uukahmén myuh jxaꞌdxyaꞌ iidx kuseju jĩteꞌ, 24 txãa yakh uꞌkh Jesusaꞌ. Açaꞌ nasa iiméh wala pehnaçxa, dxiꞌthe zuunaꞌçxáatx uꞌjweç yuꞌ. 25 Açaꞌ txãa nasa ksxavxyte teeçx uꞌy kakwe yuꞌ vxyaate doce anxuyãꞌj ãçãꞌna uꞌjusak kaseh. 26 Saꞌ txãa ãçãꞌsaꞌ wala pxthaa yuusa yuꞌk yuꞌçeꞌjsatx paapẽjxna. Saꞌ makwe yuꞌçe weyna txajx jiꞌphuni jxuka pçuutewa, kĩh yuhwa yuꞌçe yuumée jweeíiçxáak jxthaakwena uꞌjweç yuꞌ.
27 Txajũꞌ txãa uꞌyaꞌ Jesus kĩh yũusaatewa jiyuçxaꞌ paaçte eꞌsu kũhçxa, kpaajxaꞌdxku txajx atxhkhẽ. 28 Txãꞌwẽ Jesus atxhkhẽ kpaajxaꞌdxçxaçxáa katxhiꞌnja sũhçxak txãꞌwẽ yũu. 29 Saꞌ txãꞌwẽ jxaꞌdxiçpkaçxhaꞌ, kakwe yuꞌ vxyaameꞌ, açaꞌ txãa dudtey txajx kakwete wẽt yãꞌkh yajkx.
30 Txajũꞌ Jesusaꞌ teeçx ãçãꞌsa txajx atxhkhẽ jxaꞌdxçxa katxhiniꞌs jiyuk, saꞌ nasaa ksxavxyte uꞌjweçíi yuꞌthegçxaꞌ, naꞌjĩk:
—¿Kimga adx atxhkhẽ jxaꞌdx? jĩteꞌ, 31 Pedroweꞌsxaꞌ naꞌwẽtx pas:
—Nasaa ksxavxyte zuunaꞌçxáa uꞌjweçgu saꞌ ¿maꞌwẽga kimga jxaꞌdx jĩna weꞌwéꞌ? jĩtewa, 32 Jesusaꞌ nasaa ksxavxysu theguꞌgku kim jxaꞌdxtewa uyyaꞌ.
33 Txajũꞌ txãa uꞌyaꞌ txãꞌwẽ naa dudte ew katxhiniꞌs ĩsxiimée ptaꞌsxna ũukhna Jesus tasxte yayan kũhçxa peejxũkwek. 34 Açaꞌ Jesusaꞌ naꞌwẽk weꞌwe:
—Iꞌkweꞌ ũusuh jxuka yajkxçxaneꞌkwe katxhiyaꞌ sũhçxa adx tasxte utxáa, txãa paꞌga katxhini iꞌkwe neeyũu. Ãçxhaꞌ ãçãꞌmée wẽt meꞌjwe weçxana jĩk.
35 Jesusaꞌ txãꞌwẽ weꞌwena nee ũsiyna, Jairo yatu yuusa kũhçxaꞌ Jairoꞌs ptaꞌsxtxi:
—Iidx niisakuẽꞌ uuyãꞌkh, açaꞌ kuçx paꞌpçxunu kaapiyaꞌjsaꞌs peꞌjna uꞌjyaꞌ jĩteꞌ, 36 Jesusaꞌ wẽsẽꞌjçxa, Jairoꞌs kvxiisxaꞌkh naꞌjĩna:
—Nxusnu. Adx ewuwaꞌjaꞌsçxáa myajkx jĩçxaꞌ, 37 Jesusaꞌ vxite yuutxiꞌs peꞌjmée, pxakhsa Jakobo Juan vxiteꞌ Pedro txãaweꞌsxçxáatxku peꞌjçxa uꞌj. 38 Saꞌ Jairo yatte paꞌjçxaꞌ, uyku nasa wala ũꞌnena ũste. 39 Saꞌ dxiite uꞌkaçxa weꞌwek:
—¿Kĩjxaꞌkwe txakwe wala ũꞌnéꞌ? Luuçxaꞌ uunimeꞌ, Ĩꞌneeçxáa deeniꞌ jĩteꞌ, 40 nasaꞌ Jesusaꞌs npeevxysxijkatx. Açaꞌ Jesusaꞌ nasatx jxuka eka kutxiꞌjçxa, txãa luuçx neyweꞌsx vxiteꞌ txãa yakh yuusa tekhsa txãaweꞌsx yakh uusáa ũsnite utxaaçxa, 41 kuseju puꞌkisçxa naꞌwẽk weꞌwe:
—Talita kumi—txãꞌ naꞌjĩniꞌ: Ijçxaꞌsthu weꞌweꞌ mkiiteçx jĩniꞌ. 42 Txãꞌjĩçpkaçxhaꞌ txãa uusáꞌ kiiteçxa uꞌjuyaꞌ ãjãk. Açaꞌ Jesus txãꞌwẽ uusáꞌs kiꞌ ĩtxĩ vxitte uyçxaꞌ, wala kuh yajkxtxi. 43 Txajũꞌ Jesusaꞌ wala neeweꞌwek maa yuhtxwa ptaꞌsxkahmén, saꞌ txãa luuçxaꞌs puuçkaakh. Txãa luuçxaꞌ doce anxu jiꞌphsak yuꞌ.
Jesusaꞌ Nasaretna uꞌjni
6 Jesusaꞌ txãa çxhabu kasehçxaꞌ, txajx uꞌpni çxhab Nasaretnak sxawedna uꞌj txãa yakh uꞌjusaweꞌsx yakh. 2 Saꞌ sapatu jxkaase enteꞌ judiuweꞌsx pkhaakhenitek kaapiyaꞌjna ũsuꞌ, açaꞌ nasa jxukaysa wẽsẽꞌjçxaꞌ, kuh yajkxna naꞌjĩtx:
—Naa piçthẽꞌjaꞌ ¿mteega txakwe wala kĩjxaꞌwa piya? ¿Kim kaapiyaꞌthekiꞌk txakwe wala kĩjkĩh yũuyaꞌwa ãjãꞌ? 3 Naaíi kweꞌsx jiyunisa karpinteroꞌ Maria nçxiꞌk. Saꞌ txajx nyakhtxiwa jiithaꞌw, Jakobo, Jose, Judas, Simon txãaweꞌsxtaꞌ. Açaꞌ txajx npeꞌsxweꞌsxwa naa çxhabtey uꞌptaꞌ. Txãꞌwẽ kweꞌsx jiyunisaꞌ jĩçxatx Jesus kaapiyaꞌjniꞌs nwẽesẽꞌjyaꞌ waꞌl.
4 Txajũꞌ Jesusaꞌ naꞌwẽk weꞌwe txãa nasatx:
—Mteeweꞌsxwa Dxus yuwe ptaꞌsxsa yuꞌsaꞌ waꞌlmeetx jxpaꞌgaꞌ. Nawa peekx kiweteweꞌsx yuꞌ jxpaꞌgaꞌçmeetaꞌ vxiteꞌ peekx nweꞌsx, peekx yatteweꞌsx.
5 Txãꞌjĩçxaꞌ kxteeaꞌ mazkuẽçxáa nuykatxhiçxaçxáa jwee yuꞌ kĩhwa yũumeꞌ. 6 Saꞌ Jesusaꞌ nxusnak neeyũu, txãꞌwẽ txajx kiweteweꞌsx nwẽesẽꞌjmeete.
Txajũꞌ Jesusaꞌ vxite çxhabsuk ptaꞌsxyaꞌ kaseh.
Docesatx Dxus yuweꞌs ptaꞌsxyaꞌ kaahni
7 Saꞌ txãa yakh uꞌjusa docesatx paꞌyaçxaꞌ, eçx luuku vxit-satx nasa ũusu kutxiꞌjyaꞌ ãjãwaꞌjaꞌs ũsçxaꞌ, eꞌz eꞌzku kaah. 8 Nawa khãabuçxáꞌs atçxa kĩh yuhwa tuꞌsméek uꞌkhaah, yaꞌja, vxyu, kaame txãꞌwẽsatx. 9 Saꞌ pelgatxiçxáa paatçxa teeçx kmiisa yakhçxáak uꞌkhaah. 10 Saꞌ naꞌwẽ yũuwaꞌjaꞌsku ptaꞌsx: Maa yatte paadejxaꞌ paꞌjyãꞌjçxaꞌ, kxteeçxáa paadehna ũsuneꞌkwe txajũ kiꞌ kasehna uꞌphkaçx. 11 Saꞌ mteeíi yuꞌ iꞌkweꞌsx ptaꞌsxniꞌs wẽsẽꞌj wẽemeeçxa yat pkiꞌjmeeteꞌ, txãajũ kasejeneꞌkwe iꞌkweꞌsx çxidate kiwe tuhdaꞌs sakweekweçxa, kxah yuuwesa yuutxna. Isath weꞌweꞌ: Dxus kastigãywaꞌj en ãhteꞌ, txãaweꞌsxaꞌ Sodoma Gomoçxa çxhabteweꞌsxte jxthaakwe kastigoꞌs knayuutxna txãꞌwẽ iꞌkweꞌsxtxi jxpaꞌgayaꞌ waꞌlpaꞌga.
12 Txãꞌwẽ Jesus jxkaahteꞌ, txãaweꞌsxaꞌ kasehtx Dxus yuweꞌs ptaꞌsxna, pkaltxi nvxihtçxa Dxus tasxte misxawedwe jĩna. 13 Saꞌ eçx luuku vxit-satxwa nasa ũusu kutxiꞌjna maazkuẽe ãçãꞌsatxwa aceite dxikthekhẽ awna nuykatxhitx.
Juan Bautista uuníi
14 Txãꞌwẽ Jesus kĩjkĩhwa ew yũuniꞌs neꞌjweꞌsx Herodes jiyuçxaꞌ:
—Juan Bautistaneꞌ uuçxawa kiꞌ ĩtxĩ yuu, txãasaneꞌ kĩjkĩh yũuyaꞌwa ãjãꞌ jĩteꞌ, 15 vxite nasa weꞌweçxaꞌ:
—Naa piçthẽꞌjaꞌ Dxus yuwe ptaꞌsxsa Eliasna jĩꞌtx. Naapkaçxhaꞌ vxite weꞌweçxaꞌ:
—Txãniiteywa maꞌwẽta Dxus yuwe ptaꞌsxsa kasejeꞌ, txãꞌwẽysana jĩnatx ũsuꞌ.
16 Nasa txãꞌwẽ weꞌweteꞌ, Herodeswa weꞌweçxaꞌ:
—Juan Bautista txhikhaꞌs naꞌwẽ kaaspẽꞌtheꞌth txãaneꞌ kiꞌ ĩtxĩ yuuçxa kiite jĩk.
17 Herodesaꞌ Juanaꞌs naꞌwẽ yuuçxaga kiikheꞌj: Herodesaꞌ Juanaꞌs kadenaju tudçxa karcelte ktxaajaꞌkhuꞌga, Herodias ahçeçxa ewmée yuwe ũspaꞌga. Txãa Herodiasaꞌ Fxelipe nyuuk yuꞌ, açaꞌ Fxelipe yuꞌ Herodes nyakhíiçxáak yuꞌ. Nawa Herodesaꞌ Fxelipe nyu Herodiasaꞌs kusaꞌjçxa txajx nyu naꞌwẽk jxpeꞌj. 18 Txãa paꞌga kuꞌga Juanaꞌ Herodesaꞌs naꞌjĩna yuꞌkxpeh: Iidx yakhthẽꞌj nyuꞌs kusaꞌjçxaꞌ iidx nyu naꞌwẽ jxpeꞌjniꞌ ewmeꞌ jĩniꞌs 19 Herodias jiyuçxaꞌ, Juanaꞌs ahçeçxa ikh wẽeçxawa ãjãꞌçmeekuꞌga. 20 Juanaꞌs Herodias ikhyaꞌ ãjãkahmén, Herodesaꞌ karceltekuꞌga ktxaajaꞌj nweꞌwena. Juanaꞌ Dxus dxiꞌpte kĩhte yuhwa jxpubamée wala ew fxiꞌzesatewa Herodesaꞌ jiineꞌ yuꞌ, txãasaneꞌ ũukhçxa nweꞌwe, saꞌ Juan ptaꞌsxniꞌs Herodesaꞌ kxtey yuuçmeeçxawa waꞌlmeekuꞌga weçxana wẽsẽꞌjeꞌ.
21 Herodesaꞌ txajx upxni en anxu ãa iisak fxiesta vxituꞌ. Txãasak teeçx enteꞌ fxiesta kiꞌp txajx jxkaahni npiiçthẽꞌjsa vxiteꞌ Galileate jxtuhthesatx piꞌkxçxa. Txãa fxiestateneꞌ Herodiasaꞌ Juanaꞌs ewmée yũuwaꞌjaꞌs uy. 22 Txajũꞌ Herodias niisaꞌ txãa fxiestate paꞌjçxaꞌ wala zhiçxkwe kuꞌjneꞌ piꞌkxnasa dxiꞌpte. Açaꞌ neꞌjweꞌsx Herodes uyçxaꞌ naꞌjĩkuꞌga txãa knaꞌsaꞌs:
—Ijçxa kĩh pẽjxtewa, adxaꞌ ũsuꞌnja. 23 Dxus uyte, içxa pẽyniꞌs kĩhnawa ũsuçxáꞌnja, meeçxaꞌ adx jxkaahna ũsni kiweꞌs pẽjxyuhtewa pxãhn txuhdeçxa ũsuꞌnja jĩteꞌ, 24 txãa knaꞌsaꞌ kasehna uꞌjçxa, txajx njĩꞌjaꞌskuꞌga paapẽjx:
—¿Kĩh pẽyiꞌkiꞌth? jĩna. Açaꞌ njĩꞌj pasçxaꞌ:
—Juan Bautista dxiktheaꞌs mpẽyçxi jĩnakuꞌga jxkaah. 25 Txajũꞌ txãa knaꞌsaꞌ Herodes tasxte kiꞌ kũhçxaꞌ:
—Ãçxhíi Juan Bautista dxiktheaꞌs plaatute akhçxa mah jĩteꞌ, 26 neꞌjweꞌsx Herodesaꞌ: Kĩh pẽjxtewa ũsuꞌnja jĩna nasaa dxiꞌpte jurãyyãꞌjçxaꞌ, ĩsxiiyaꞌ ãjãmeekuꞌga. 27 Txajũꞌ Herodesaꞌ dudtey teeçx soldauꞌs kaakhuꞌga Juan dxiktheaꞌs nikxyaꞌ. 28 Açaꞌ txãa soldauꞌ karcelna uꞌjçxaꞌ, Juan txhikhaꞌs spẽꞌthçxa, plaatute akhçxa jxũna kũjkuꞌga txãa knaꞌsaꞌs ũsyaꞌ. Açaꞌ txãa yuꞌ jxpaꞌgaçxaꞌ, txajx njĩꞌjaꞌskuꞌga dukh. 29 Txãꞌwẽ yũuteꞌ, Juan yakh uꞌjusaweꞌsx jiyuçxaꞌ, txãa uuni kakweꞌs kiisçxa pedaakuꞌta. Txãꞌwẽ yũuniꞌsneꞌ Herodesaꞌ yajkx.
Cinko mil nasatx Jesus sãꞌjĩni
(Mt 14.13-21; Lk 9.10-17; Jn 6.1-14)
30 Txãꞌwẽ eꞌz eꞌz jxkaahnisaweꞌsxaꞌ Jesus tasxte kiꞌ sxawedna paꞌjçxaꞌ, txãaweꞌsx maꞌwẽ kaapiyaꞌjna kĩhçxa yũuçxawa Jesusaꞌs jxuka ptaꞌsxtxi. 31 Txãꞌwẽ nasa txakwe wala paꞌjna ũsteꞌ, txãaweꞌsxaꞌ ũꞌwaꞌj en yuhwa uyméetx fxiꞌzena ũsuꞌ. Txãa paꞌgak Jesus weꞌweçxaꞌ:
—Mejkawe, dudte jxkaaseyaꞌ nasaa yatmeesu jĩꞌ.
32 Txajũꞌ Jesusaꞌ txãa yakh uꞌjusaweꞌsxçxáatx peꞌjçxa, barkote khẽeçxa uꞌkh, nasaa yatmeesu paꞌjçxa jxkaaseyaꞌ. 33 Txãꞌwẽ Jesus uꞌjweçte nasa wala uyçxaꞌ, mtee paꞌjyaꞌ uꞌjweçtewa jiyutx. Txãasatx txãaweꞌsx khuẽꞌy yaçte paꞌj Jesus paꞌjwaꞌthe maa çxhabuweꞌsxwa wuwuuçxáa uꞌjçxa. 34 Açaꞌ Jesus barkoju kasejeççxaꞌ, uyku nasa wala kuh pkhaakhena ũste. Saꞌ txãaweꞌsxtxiꞌs peeygãjk txãꞌwẽ piisxáa namu jiꞌphmeesa naꞌwẽ txãaweꞌsxçxáa ũste. Txajũꞌ Dxus yuweꞌs wala kaapiyaꞌkh.
35 Kxtee kaapiyaꞌjna ũsiyna kusuçteꞌ, txãa yakh uꞌjusaweꞌsxaꞌ txajx tasxte utxaaçxa naꞌwẽtx weꞌwe:
—Aysu nasaa yatmeete ũsiyna, kusuçaꞌ. 36 Açaꞌ nasatxiꞌ mkaah, kxah yat-su meeçxawa çxhabkuẽ utxasu ũstaꞌ kxsũ paꞌjçxa ũꞌwaꞌj weyuutxna. Txãꞌwẽmeꞌ ayteꞌ kĩhwa jiꞌphmeetaꞌ jĩteꞌ, 37 Jesus pasçxaꞌ:
—Iꞌkweꞌsx mpuuçwe jĩnak jxkaah.
Açaꞌ txãaweꞌsxaꞌ naꞌwẽtx pas:
—Kweꞌsxaꞌ doscientos peso pan weyyaꞌ uꞌjçxa puuçuwáꞌnjaꞌw jĩteꞌ, 38 Jesusaꞌ pẽjxku:
—¿Maz pan jiꞌphkwe? Meꞌjwe thegyaꞌ jĩna.
Açaꞌ pan uyçxaꞌ, ptaꞌsxtxi:
—Tahç pan, eꞌz wedxçxáathaꞌw uy jĩna.
39 Txajũꞌ Jesusaꞌ nasatxiꞌ txaksũ kaçxkaakh fxiifxii txuteeçxa. 40 Açaꞌ cien ãh vxiteꞌ cinkwenta kxaztxi fxiifxii txuteeçxa kaçx. 41 Naapkaçxhaꞌ Jesusaꞌ tahç pan eꞌz wedxtxi uweçxa, cielute pagayçxa Dxusaꞌs weçxanaꞌwa pantxi peꞌltedeçxa txãa yakh uꞌjusaweꞌsxtxiꞌ ũsku, nasatx jxuka ũsuꞌskahn. Saꞌ wedxtxiwa txãꞌwẽyku ũsuꞌs jxukaysatx. 42 Txãꞌwẽ yũuteꞌ, jxukaysa ũꞌçxa txiktxi neeyũu. 43 Txajũꞌ txãa pan vxiteꞌ wedx peꞌltedenisa neeyũuteꞌ pkhakhçxaꞌ, doce kanastate utatx pkhakh. 44 Açaꞌ nasa yuꞌ piçthẽꞌjçxáatx isani cinko mil ãhtx yuꞌ.
Ĩkh kajkwega Jesus uꞌjuni
45 Txajũꞌ Jesusaꞌ txãa yakh uꞌjusaweꞌsxtxi barkote kaatekaꞌjçxa yaçte kaakh Beçaidan. Txãꞌwẽ yũuçxaꞌ txãa yuꞌ kxtee neeyũuk nasa txuteena uꞌjsatx weçxana. 46 Saꞌ nasa jxuka txuteena uꞌjweçpkaçxhaꞌ, Dxus yakh puutx weꞌweyaꞌ uꞌkh thãꞌthe.
47 Jxuka çxhiꞌdxna jxãꞌjaçteꞌ, barkoꞌ ĩkh pxãjũy uꞌjweçku yuꞌ, Nawa Jesus yuꞌ, ĩkh kutetee ũsíiçxáak yuꞌ. 48 Saꞌ khikhyna sẽjeçteꞌ, Jesusaꞌ uyku Beçaidan uꞌjsaweꞌsxtxiꞌs wejxa yupte, barkoꞌs kaajxaꞌ çxhãçxhamée ĩkhsu uꞌjute.
Txajũꞌ, Jesusaꞌ txãaweꞌsxtxi kpajkxyaꞌ ĩkhsu uꞌjçxa, txãaweꞌsx pukasu utxa sẽhçxa, barkoꞌs phyahçna skhẽuuçku yuꞌ. 49 Açaꞌ barkote uꞌjsaweꞌsxaꞌ txãꞌwẽ ĩkhsu uꞌjweçte uyçxaꞌ, eçxaꞌsthaꞌw uy sũhçxa sustxi pebée. 50 Txãꞌsaꞌ jxukaysatx uyçxa ũukh. Naapkaçxhaꞌ Jesusaꞌ weꞌwek:
—Ũukhnuwe. Adxthu jĩna.
51 Txajũꞌ Jesusaꞌ barkote khẽjeçpkaçxhaꞌ, wejxaꞌ yujuk. Açaꞌ txãaweꞌsxaꞌ iiméh wala ũukh yajkxna kuh weꞌwenatx neeyũu. 52 Txãꞌwẽ Dxus Nçxiꞌkçxa kĩjxaꞌwa ãjãwaꞌjsaçxak kuhmée pan yakh nasa txaazkuẽesatx sãꞌjĩꞌ sũhwaꞌj yuꞌsaꞌ jiꞌphmeeneꞌta yuꞌ, txãasatx txakwe wala kuh yajkxna neeyũu.
Genesaretteweꞌsxtxi Jesus nuykatxhini
53 Txajũꞌ Genesaret kiwete pesahçxaꞌ, barkoꞌs ĩkh pukatetx tudçxa txah. 54 Açaꞌ barkoju saꞌjaçpkaçxhaꞌ, txãa kiwesuweꞌsx nasaꞌ jiyutx Jesus paꞌjniꞌs. 55 Saꞌ txãa kiwesu ãçãꞌsatx jxuka pkhakhçxa yakhna paꞌjtx Jesus mtee ũstewa. 56 Txajũꞌ Jesusaꞌ çxhabna maꞌk uꞌj, meeçxaꞌ yat-su maꞌk paꞌjyaꞌ uꞌj, meeçxaꞌ dxiꞌthe maꞌk uꞌjweç yuu nawa txajx skhẽwwaꞌjsutx ãçãꞌsatx khikheꞌ. Txãꞌwẽ yũuçxatx skhẽuuçteꞌ wala pxthaa weꞌweꞌ, txajx atxh vxiçteçxáawa ãçãꞌsatx khyaꞌdxiꞌkhan. Açaꞌ maawa txajx atxh vxiçteçxáawa jxaꞌdxsaꞌ, jxuka katxhiçxatx neeyũꞌ.
Nasaꞌs ewmée vxit-sa
7 Txajũꞌ fxariseoweꞌsx vxiteꞌ Dxus leyaꞌs kaapiyaꞌjsaweꞌsxwa Jerusalenu paꞌjçxa Jesus tasxte utxaatx thegyaꞌ. 2 Açaꞌ Jesus yakh uꞌjusaweꞌsxaꞌ kusekhẽꞌ yuꞌ kaahmée ũꞌweçte uyçxaꞌ, açeweꞌwetx fxariseoweꞌsxaꞌ.
3 (Yaçgaweꞌsx maꞌwẽ jxkaatheꞌ Judiuweꞌsxaꞌ jxukaysa naꞌwẽ kuh jwed yũuwaꞌjaꞌstxi nwẽesẽꞌjẽꞌ ewmeesa pẽethekahmén jĩçxa: 4 Merkaujũ paꞌjçxaꞌ, kusekhẽ yuꞌ kaahwaꞌjaꞌ jĩꞌtx. Saꞌ waso, mitxh, kĩhwa iijxũni çam yuutxiꞌ jxuka kajkwekhẽ yuꞌ kaahçxa iijxũwaꞌjaꞌ jĩnatx kaapiyaꞌjaꞌ.)
5 Txãasatx fxariseoweꞌsx vxiteꞌ Dxus leyaꞌs kaapiyaꞌjsaweꞌsxaꞌ naꞌjĩna Jesusaꞌs pẽjx:
—Idx yakh uꞌjusaweꞌsxaꞌ ¿kĩh yũuçxata yaçgaweꞌsx kaapiyaꞌjnitxiꞌ kxtey yuꞌçmée, kusekhẽ yuꞌ kaahmée ũꞌwéꞌ? jĩteꞌ, 6 Jesusaꞌ naꞌwẽk pas:
—Iꞌkweꞌsxaꞌ yuwejuçxáa ew weꞌweçxaꞌ, ũuste yuꞌ ewméeçxáa yaakxsaiꞌkwe açaꞌ Isaiasaꞌ isa yuh Dxus weꞌweniꞌs naꞌjĩna fxiꞌjneꞌ:
Naa nasaꞌ yuweju yuꞌ adxaꞌs yaakiꞌthaꞌw jĩçxawa,
Ũusuh yuꞌ adxaꞌs yaakiꞌçmeetaꞌ.
7 Naa kiwete nasaa kaapiyaꞌjniçxáꞌs kxtey yuuna ũsçxa,
Txãꞌwẽ Dxus jxkaahniꞌsthaꞌw kxtey yuꞌ jĩteꞌ, kxul yuhna jĩna Dxus weꞌweniꞌsku fxiꞌj Isaiasaꞌ.
8 Iꞌkweꞌsxaꞌ Dxus jxkaahni yuꞌsaꞌ nvxihtçxa, naa kiwega nasaa kaapiyaꞌjniçxáꞌs iꞌkwe nwẽesẽꞌjna wala ew kiꞌsuꞌ naꞌwẽ yũuna: waso, mitxh, kĩjkĩhtxwa txãꞌwẽ iꞌkwe kiꞌsuꞌ yuꞌ kaahna.
9 Naꞌjĩꞌth naꞌ: iꞌkweꞌsxaꞌ naa kiwega nasaa kaapiyaꞌjniçxáꞌs nwẽesẽꞌjna kiꞌsçxaꞌ, Dxus jxkaahni yuꞌsaꞌ nvxihtiꞌkwe. 10 Iꞌkweꞌsx naꞌwẽ yũuniꞌs myajkxwe wakx: Moisesaꞌ naꞌjĩnak fxiꞌj: Iidx tata iidx mama txãaweꞌsxtxiꞌ peeygãhna puꞌçxwaꞌjaꞌ jĩꞌk. Açaꞌ txãꞌwẽ yũumée, neyweꞌsxtxi açeweꞌwesaꞌ uu enaꞌs jiꞌphuna jĩꞌk. 11 7:11-13 Iꞌkweꞌsx yaçgaweꞌsxaꞌ naꞌwẽtx kaapiyaꞌjaꞌ: Maa nasawa neyweꞌsxtxi peeygãhna puꞌçxmée, adx jiꞌphuni iꞌkweꞌsxtxi puꞌçxwaꞌjaꞌs Dxusna dukheꞌnja jĩna weꞌweçxaçxáa, neyweꞌsxtxiꞌ puꞌçxmeetewa ewaꞌ jĩꞌtx. Nawa iꞌkweꞌsxaꞌ txãꞌwẽ yaçgaweꞌsx kaapiyaꞌjniçxáꞌs kxtey nwẽeseꞌjçxaꞌ, Dxus jxkaahni yuꞌsaꞌ kxtey yuꞌçmeeiꞌkwe, naasáa Dxus jxkaahnimeeçxáatx iꞌkwe kĩjkĩhnawa jxuka kxtey yuꞌ.12 —13 —
14 Jesusaꞌ kiꞌkin nasatx weꞌweçxaꞌ naꞌjĩk:
—Mwẽesẽꞌjwe jxukaysa, ew jiyuyaꞌ: 15 Kĩh ũꞌwa tutxhteçxáa khẽesa yuꞌ, nasatx ewmeesa vxituꞌçmeꞌ. Naasáa ũusuh ewmée yaakxnisa yuuçxáak nasatx ewmeesa vxituꞌ. 16 Açaꞌ maawa jiyuwaꞌjsa ũsçxaꞌ, jiyuneꞌkwe jĩçxak nvxiht.
17 Txajũꞌ Jesusaꞌ nasatx txuteeçxaꞌ yattek uꞌka. Açaꞌ txãa yakh uꞌjusaweꞌsxaꞌ jiyumeeçxaꞌ pẽjxtxi txãꞌwẽ ptaꞌsxniꞌs. 18 Açaꞌ Jesusaꞌ naꞌwẽk weꞌwena ptaꞌsx:
—¿Iꞌkweꞌsxwa jiyuꞌçmeewáꞌkwe? Kĩh ũꞌwa tutxhteçxáa khẽeçxaꞌ, nasatx ewméesa yuꞌ vxitmeena sũjuꞌçmeewáꞌkwe. 19 Txãa paꞌgatey kĩh ũꞌwa ũuste yuꞌ uꞌkamée tutxhteçxáa khẽeçxaꞌ, txajũ kiꞌ kasejeꞌk jĩk.
Jesusaꞌ txãꞌwẽ weꞌweçxaꞌ: ũꞌnisa yuꞌ kĩhwa jxuka ewsaçxaçxáataꞌ jĩçxak txãꞌjĩꞌ.
20 Nawa ũusuh ewmée yaakxnisa yuuçxáak nasaꞌs ewmeesa vxituꞌ. 21 Txãa paꞌgatey, kazx yaakxni, ptamsaçxawa vxite yakh kazx yuuna fxiꞌzeni, kazx yuuni, nasa ikhni, 22 pesweeni, vxite jĩꞌs kusaꞌjçxa jiꞌphu wẽeni, pthãaweni, ĩsxĩini, vxitetx ahçena fxiꞌzeni, wẽesxuni, kazx weꞌwena fxiꞌzeni, iiwejçx iiwejçx yajkxna fxiꞌzeni, kĩhtewa ewmeeçxáa yũuna fxiꞌzeni 23 txãꞌwẽ ewmée yaakxnisaꞌ ũusteweꞌsxtaꞌ. Txãasatx txãꞌwẽ kaaũusutheꞌjçxa, nasaꞌs ewmeesa vxituꞌ.
Teeçx uꞌy judiu jiꞌjmeesa Jesusaꞌs jxpaꞌgasa
24 Jesusaꞌ txãajũ kasehçxaꞌ, Tiro Sidon çxhab jaꞌdasuk pekũjxaꞌ uꞌj. Saꞌ kxsũ paꞌjçxaꞌ, teeçx yatte uꞌkaçxa, kim yuhwa jiyu jxthãasmeꞌ. Nawa kim yuhwa jiyunimeete uꞌjuyaꞌ yuꞌ ãjãmeꞌ. 25 7:25-26 Txajũꞌ teeçx uꞌy Sirofxenicia kiweteweꞌsxaꞌ Jesus paꞌjniꞌs jiyuçxa paꞌkh. Saꞌ tasxte peejxũkweçxa pxthaa weꞌwek:
—Niisa jiꞌphthu txãꞌsaꞌ eçx luuku vxit-sak iiyamu. Açaꞌ txãa eçxaꞌs nuukutxiꞌjineꞌga ũusu jĩna piꞌkxteꞌ, 26 — 27 Jesus pasçxa naꞌjĩk:
—Mũythaswe, luuçx khuẽꞌy ũꞌkahn. Txãꞌwẽ luuçx ũꞌwaꞌjaꞌs kusaꞌjçxa alkutx ũswaꞌjmeꞌ jĩteꞌ, 28 txãa uꞌy pasçxaꞌ:
—Isa yuh weꞌweꞌg, txãꞌwẽ yujaꞌ. Nawa alkuꞌ mesa dxiisu ũsçxaꞌ, pejka ũꞌwẽꞌtx luuçx ũꞌ peꞌyaçxáatxwa jĩteꞌ, 29 Jesus pasçxaꞌ:
—Isa, txãꞌwẽ yujaꞌ. Açaꞌ meꞌjwe, iꞌkwe jxthãasniꞌs uyuuneꞌkwe, eçx luuku vxit-saꞌ iꞌkwe niisa ũusu kasejxãꞌkh jĩteꞌ, 30 txãa uꞌyaꞌ yatna sxawedçxa uyku, eçxaꞌ ũusu kasehteꞌ wẽt yãꞌj kamaga ũste.
Teeçx piçthẽꞌj wẽseꞌjyaꞌ weꞌweyaꞌwa ãjasameꞌs Jesus nuykatxhini
31 Jesusaꞌ kiꞌkin Tiro kiwejũ kasehçxa, Sidon çxhabuy vxiteꞌ Dekapolis kiwey uykhẽwna uꞌjçxa, Galilea ĩkh walatek paꞌj. 32 Kxteeaꞌ teeçx piçthẽꞌj wẽsẽꞌjyaꞌ weꞌweyaꞌwa ãjãsameꞌstxi Jesus tasxte nuypaꞌjçxa pxthaa weꞌwe nuykatxhikahn. 33 Açaꞌ Jesusaꞌ txãa ãçãꞌsaꞌs nasameete fxii peꞌjna uꞌjçxa, thũꞌwẽ kafxte pdxiꞌp jxaꞌdxnaꞌwa, txajx fxneꞌsxaꞌs kuse vxiçte kuuçheꞌjnaꞌ, thunetewa jxaꞌdxku. 34 Saꞌ ũusdxiꞌna cielute pagayçxa:
—¡Efxata!—jĩk, tee phaate jĩçxak txãꞌjĩꞌ.
35 Txãꞌjĩçpkaçxhaꞌ, thũꞌwẽ kafxaꞌ phaatetx, açaꞌ thunewa ewuuteꞌ, ew weꞌweyaꞌ ãjãk. 36 Txajũꞌ txãa nasatxiꞌ Jesusaꞌ wala neeweꞌwek, txãꞌwẽ yũuniꞌs kim yuhtxwa ptaꞌsxkahmén. Txãꞌwẽ ew neeweꞌwetewa, jweeíiçxáatx mtee mteewa ptaꞌsxna jxãꞌj. 37 Txãꞌwẽ yũuteꞌ, nasa jxukaysa wala kuh jwed yaakiꞌtx naꞌjĩna:
—Ãçãꞌ maꞌwẽsatxwa jxukak puꞌçxhiꞌ. Wẽsẽꞌjyaꞌ ãjãsameetxwa kwẽesẽꞌjeꞌkh, saꞌ weꞌweyaꞌ ãjãsameetxwa kweꞌweꞌjeꞌkh jĩꞌtx.
Kuatro mil nasatx Jesus sãꞌjĩni
8 Txãa entey nasa iiméh wala kuh pkhaakheçxa kĩh yuhwa ũꞌwaꞌj jiꞌphmeeteꞌ, Jesusaꞌ txãa yakh uꞌjusaweꞌsxtxi paꞌyaçxa naꞌjĩk:
2 —Naa nasaꞌ tekh en yãꞌj adx yakh ũstaꞌ, nawa kĩh yuhwa ũꞌwaꞌj jiꞌphmeetaꞌ açaꞌ adxaꞌ peeygãjaꞌth. 3 Kĩh yuhwa puuçmée yatna kaatheꞌ, maaíi yuꞌ jxuꞌjuweꞌsxtaꞌ naꞌ wẽeçxa dxiꞌthe çxhãçxhameetxna jĩteꞌ, 4 txãa yakh uꞌjusaweꞌsx pasçxaꞌ:
—¿Maꞌwẽ puuçyaꞌ yaꞌãjãkx, aysũꞌ nasaa yatçxáa yuhwa meetaꞌ açaꞌ? jĩteꞌ, 5 Jesus pẽjxçxaꞌ:
—Iꞌkweꞌsxaꞌ ¿maz pan jiꞌphkwe? jĩteꞌ:
—Sieteçxáa jiꞌpthaꞌw jĩnatx pas.
6 Txajũꞌ Jesusaꞌ nasatx kiwesu kaçxkaahçxaꞌ, siete pantxi jxpaꞌgaçxa Dxusna weçxanaꞌwa, peꞌltedeçxa txãa yakh uꞌjusaweꞌsxtxi ũsuꞌsku, nasa txazkuẽesatx puuçkahn. Açaꞌ txãaweꞌsxaꞌ kxtey yuutx. 7 Saꞌ wedxwa jiꞌphuꞌtx kuhmeekwe, açaꞌ Jesusaꞌ Dxusna weçxanaꞌwa, txãa wedxtxi txudeedekaakh. 8 Açaꞌ jxukaysa txiktxi ũꞌ. Txãa ũꞌ kijxaateꞌ siete kanastate utatx pkhakh. 9 Txãa ente txãꞌwẽ ũꞌsaꞌ kuatro mil ãhtx yuꞌ. Txajũꞌ Jesusaꞌ nasatx kaahnaꞌwa, 10 txãa yuꞌ barkote khẽek txãa yakh uꞌjusaweꞌsx yakh Dalmanuta kiwen uꞌjyaꞌ.
Fxariseoweꞌsx cieluju kĩhçxáawa kaavxyaꞌjaꞌkhaahni
11 Kxtee paꞌtheꞌ, fxariseoweꞌsxwa paꞌjçxa Jesus yakh puutx weꞌwetx. Saꞌ maꞌwẽ yũutewa jiyuyaꞌ Jesusaꞌs pẽjxtxi:
—Cieluju kĩhçxáawa mkaavxyaꞌjaꞌj jĩna.
12 Txãꞌjĩteꞌ, Jesusaꞌ wala nxus yajkxna naꞌjĩk:
—Naa nasaꞌ ¿kĩjxaꞌkiꞌtx txãꞌwẽ cieluju kaavxyaꞌjaꞌj jxthãasuꞌ? Isa yuꞌ txãa nasatxiꞌ kĩhwa kaavxyaꞌjaꞌjnimée wejx ewna jĩk. 13 Txãꞌjĩçxaꞌ, nasatx nvxihtnaꞌ kiꞌkin barkote khẽenaꞌwa ĩkh kuten uꞌkh.
Fxariseoweꞌsx kaapiyaꞌjniꞌs lewadura yakh kaajaꞌdaꞌjni
14 Saꞌ peçxkanaçxa ũꞌwaꞌj yuꞌ jiꞌphmée barkote uꞌjweççxatx yajkx. Naasáa teeçx pançxáatx jiꞌph yuꞌ. 15 Txajũꞌ Jesusaꞌ naꞌwẽk jxpaꞌyakx kaah:
—Mpaꞌyajkxwe, Herodes vxiteꞌ fxariseoweꞌsx lewadura ewmeesaꞌs jĩteꞌ, 16 Jesus yakh uꞌjusaweꞌsxaꞌ txãaweꞌsx pweꞌsx naꞌjĩnatx puutx weꞌwe:
—Pan jiꞌphmeethaꞌw, txãa paꞌganeꞌ txãꞌjĩꞌ jĩtx. 17 Açaꞌ Jesus wẽsẽꞌjçxa naꞌjĩk:
—¿Maa sũhçxakwe txãꞌwẽ pan jiꞌphmeethaꞌw jĩna weꞌwéꞌ? ¿Ãçxpkaçx jiyuꞌçmeewáꞌkwe, pan jiꞌphmeetewa thẽymée sãꞌjĩniꞌs yaakiꞌçmeewáꞌkwe? ¿Iꞌkweꞌsx ũuste khẽjeꞌçmeewáꞌ? 18 Iꞌkweꞌsxaꞌ yafxju yuꞌ uyçxawa, jiyuyaꞌ yuꞌ ãjãꞌçmeewáꞌkwe, saꞌ adxaꞌ kĩhnawa thẽymée ãjãniꞌs yaakiꞌçmeewáꞌkwe. 19 Miiyajkxwe wakx: Tahç pantxi txudeedeçxa cinko mil nasatx puuçteꞌ, ¿maz kanastakwe pkhakh kijxasaatxiꞌ? jĩteꞌ, txãaweꞌsx pasçxaꞌ:
—Doce kanastathaꞌw pkhakh jĩtx.
20 —Açaꞌ siete pantxi txudeedeçxa kuatro mil nasatx puuçteꞌ, ¿maz kanastakwe pkhakh kijxasaatxiꞌ? jĩteꞌ, txãaweꞌsx pasçxaꞌ:
—Siete kanastate utathaꞌw pkhakh jĩtx.
21 Açaꞌ Jesus weꞌweçxaꞌ:
—Txãꞌwẽ thẽymée yũunisatxiꞌ yaakiꞌçmeewáꞌkwe saneꞌkwe txãꞌwẽ ũꞌwaꞌj pan jiꞌphmeethaꞌw jĩna weꞌweꞌ.
Teeçx piçthẽꞌj uyyaꞌ ãjãsameꞌs Jesus nuykatxhini
22 Txajũꞌ Jesusaꞌ Beçaida çxhabte paꞌtheꞌ, kxteeaꞌ teeçx piçthẽꞌj uyyaꞌ ãjãsameꞌstxi nuypaꞌj, nuykatxhikahn pxthaa weꞌwena. 23 Açaꞌ Jesusaꞌ txãa uyyaꞌ ãjãsamée kusete puꞌkisçxa, çxhab eka peꞌjna uꞌjçxaꞌ, yafxte fxneꞌsx sxũsxnaꞌwa yafxte jxaꞌdxku. Txãꞌwẽ yũuçxa pẽjxku:
—¿Maꞌwẽçxáꞌ uyuꞌgáꞌ? jĩteꞌ, theguꞌgçxaꞌ:
24 —Nasaꞌ fxtũu tasx naꞌwẽçxáatx vxyaꞌ, nawa ẽsẽꞌseꞌtx jĩk.
25 Txajũꞌ Jesusaꞌ kiꞌkin txajx kuseju yafxte jxaꞌdxku, açaꞌ yafxaꞌ phaateteꞌ ew uyyaꞌ ãjãk.
26 Txajũꞌ Jesusaꞌ neeweꞌwek:
—Çxhabsu uꞌkameeneꞌga, saꞌ maa yuhtxwa ptaꞌsxmeeneꞌga iidx yafxtxi kim phaadetewa jĩnak yatna kaah.
Pedroꞌ jiyuk Jesusaꞌ Dxus tasxu yuusatewa
27 Jesusaꞌ txãajũ kiꞌ uꞌkh txãa yakh uꞌjusaweꞌsx yakh kasehçxa. Saꞌ Fxilipo vxitni çxhab Cesarea jaꞌdasuk pekũjxaꞌ uꞌjweç yuꞌ. Txajũꞌ dxiꞌthe uꞌjweçíi txãaweꞌsxtxi pẽjxku naꞌjĩna:
—Adxaꞌs ¿kimna jĩꞌta nasaꞌ? jĩteꞌ, 28 txãaweꞌsx pasçxaꞌ:
—Maaíi yuꞌ: Juan Bautistana jĩꞌtx. Açaꞌ vxite weꞌweçxaꞌ: Eliasna jĩꞌtx. Açaꞌ vxite weꞌwesaꞌ: Txãniiteywa maꞌwẽta Dxus yuwe ptaꞌsxsa kasejeꞌ txãꞌwẽysana jĩꞌtx jĩteꞌ, 29 Jesusaꞌ naꞌjĩnak pẽjx:
—Açaꞌ iꞌkweꞌsxaꞌ ¿kimna sũjuꞌkwe?
Txãꞌwẽ pẽjxteꞌ, Pedro pasçxaꞌ:
—Idxaꞌ Kristo, Dxus tasxu yuusag jĩteꞌ, 30 Jesusaꞌ maa yuhtxwa ptaꞌsxkaahmeꞌ.
Jesusaꞌ txajx uuwaꞌjaꞌs ptaꞌsxni
31 Txajũꞌ Jesusaꞌ ptaꞌsxku:
—Dxus Nçxiꞌk Nasa Yuusaꞌ wala pkxuuni paꞌga yuuna, saꞌ judiu nthẽꞌjsaweꞌsx vxiteꞌ sacerdote npiiçthẽꞌjweꞌsx vxiteꞌ Dxus leyaꞌs kaapiyaꞌjsaweꞌsx ahçeçxa kiikheꞌjetxna. Açaꞌ uuçxawa tekh enteꞌ kiꞌ ĩtxĩ yuuna jĩk.
32 Jesusaꞌ txãꞌwẽk ew ãate ptaꞌsx. Açaꞌ Pedroꞌ Jesusaꞌs fxiite peꞌjna uꞌjçxa, yuꞌkxpejk. 33 Txãꞌwẽ yuꞌkxpehteꞌ, Jesusaꞌ vxitetx yuꞌthegçxaꞌ, Pedroꞌs naꞌjĩnak pas:
—Eçxthẽꞌj, adx tasxu mtxutée. Idxaꞌ Dxus jxthãasni yuꞌsaꞌ kxtey yuumée, naa kiwete nasaa yaakxniçxáꞌsgu kxtey yuu wẽjẽꞌ jĩçxaꞌ, 34 Jesusaꞌ txãa yakh yuusaweꞌsxtxi paꞌyaçxa naꞌjĩk:
—Maa nasawa adx yakh yuu wẽeçxaꞌ, peekx kakwe jxthãasniꞌs kĩhnawa jxuka nvxihtçxa yuuçxáa adx yakh yujxaꞌ ãjãneꞌkwe, makwe thẽysa uuwaꞌj maꞌk paꞌj nawa txãꞌsaꞌ yajkxmée. 35 Nawa naa kiwete ĩtxĩ fxiꞌzewaꞌjçxáꞌs yaꞌnweꞌwesaꞌ, Dxus yakh fxiꞌzewaꞌj yuꞌsaꞌ ivxiituna. Naapkaçxhaꞌ Dxus yuweꞌs nwẽesẽꞌjçxa adx yakh fxiꞌzepaꞌga naa kiwete ĩtxĩ fxiꞌzeniꞌs yajkxmée ivxiitusaꞌ, Dxus yakh fxiꞌzewaꞌj yuꞌsaꞌ ivxiitumeena. 36 Makwe naa kiweteweꞌsx yuꞌsaꞌ jxuka knayçxawa peekx ũus yuꞌs ivxiituteꞌ, ¿kĩhteçxáꞌ selpiimaꞌk? 37 Peekx ũusaꞌs ivxiituyãꞌtheꞌ, ¿kimçxaꞌ nweꞌwemaꞌk? 38 Maa nasawa adxaꞌs jxpaꞌgayaꞌ waꞌlna adx ptaꞌsxnitxwa waꞌlutxna nasa ewmeesa açeweꞌwete açaꞌ txãꞌwẽ yũusaꞌs Dxus Nçxiꞌk Nasa Yuusaawa Dxus angelesweꞌsx yakh eenaꞌ kweethna kĩhçxaꞌ jxpaꞌgayaꞌ waꞌluna jĩk.
9 Txajũꞌ kiꞌkin weꞌweçxaꞌ naꞌjĩk Jesusaꞌ:
—Isath weꞌweꞌ, ayte ũssa maaíi yuꞌ uumey uyuuneꞌkwe Dxus naa kiwete jxkaajxaꞌ kĩiniꞌs jĩk.
Jesusaꞌ zhiçxkwe yuꞌpthehçxa vxyaani
2 Txajũꞌ seis en skhẽwniiteꞌ, Jesusaꞌ thãꞌj walate peꞌjna uꞌkh Pedro Jakobo Juan txãaweꞌsx tekhsaçxáatx. Kxtee paꞌtheꞌ, Jesus kakweꞌ fxiyku zhiçxkwe yuꞌptheh txãaweꞌsx yafxte. 3 Txajx athni ropaꞌ yãdx naꞌwẽk zhiçxkwe çxihme yuu; naa kiwete maa yuhwa txãꞌwẽ zhiçxkwe çxihme yuꞌ thethyaꞌ ãjãmeetxna. 4 Naapkaçxhaꞌ Pedroweꞌsx yafxte vxyaatx Elias vxiteꞌ Moises. Txãaweꞌsxaꞌ Jesus yakhtxi puutx weꞌwena ũsuꞌ. 5 Açaꞌ Pedroꞌ txãꞌwẽ uyçxaꞌ, Jesusaꞌs naꞌjĩk:
—Ayteꞌ kweꞌsx ũswaꞌj wala ewaꞌ. Açaꞌ tekh waꞌ txajaga, teeçxsaꞌ iidx jĩi, vxiteꞌ Moises jĩi, vxiteꞌ Elias jĩi jĩk. 6 Pedroweꞌsxaꞌ weçxaniite ũukhsa naꞌwẽtx neeyũu, txãasak Pedroꞌ weçxaniite txãꞌwẽ weꞌwe.
7 Txajũꞌ tãaph kĩhçxa aphku, açaꞌ tãaph dxiiju naꞌwẽk weꞌweni pthũuse:
—Naꞌ adx Nçxiꞌk wala wedxnisaꞌ, açaꞌ txãꞌsaꞌ nwẽesẽꞌjna kxtey myuuwe jĩçpkaçxhaꞌ 8 Pedroweꞌsxaꞌ theguꞌgçxawa, Moisesweꞌsxtxi uymeetaꞌ, naasáa Jesusçxáa yãꞌj ũstetx uy.
9 Açaꞌ thãꞌju uꞌjweççxaꞌ, Jesusaꞌ Pedroweꞌsxtxiꞌ wala neeweꞌwek:
—Ãçxhíi yuꞌ maa yuhtxwa ptaꞌsxmeeneꞌkwe txãꞌwẽ uyniꞌs, naasáa Dxus Nçxiꞌk Nasa Yuusáa uuçxawa kiꞌ ĩtxĩ yuuniijũ ptaꞌsxineꞌkwe.
10 Txãꞌwẽ neeweꞌweniꞌs kxtey nwẽesẽꞌjtx kim yuhtxwa tuutheꞌjmée. Nawa txãaweꞌsx pweꞌsx yuꞌ puutx paapẽyĩꞌtx: Uuyãꞌjçxaꞌ, ¿maꞌwẽ kiꞌ ĩtxĩ yuukx? jĩna.
11 Txajũꞌ naꞌwẽ kaapiyaꞌjniꞌstxi Jesusaꞌs paapẽjx:
—Dxus leyaꞌs kaapiyaꞌjsaweꞌsxaꞌ Elias khuẽꞌy yaçte paꞌjana jĩꞌtx saꞌ ¿maꞌwẽ yuuwaꞌjsakx açkiꞌtx txãꞌjĩꞌ? jĩteꞌ, 12 Jesusaꞌ naꞌwẽk ptaꞌsx:
—Isa, Elias khuẽꞌy yuh yaçte paꞌjçxa jxuka pheuꞌjwaꞌjsa yuꞌk açaꞌ isa yuh ptaꞌsxiꞌneꞌta. Txãꞌwẽy Dxus Nçxiꞌk Nasa Yuusaꞌs weꞌweçxaꞌ: wala pxthaa yuuna nasa ahçeçxa pkxuuni jĩna Dxus librute fxiꞌjni ũsaꞌ txãawa isa yujaꞌ. 13 Eliasaꞌ paꞌjana jĩꞌtx açaꞌ Eliasaꞌ paꞌjyujk, nawa txãꞌsaꞌ kĩjkĩhwa yũutx Dxus librute maꞌwẽ fxiꞌjni ũsna txãꞌwẽy.
Teeçx luuçx wẽeçxpaꞌjsaꞌs Jesus nuykatxhini
14 Txajũꞌ Jesusaꞌ vxitesa neeyũutx kxtee sxawedna kĩjaçteꞌ, nasa wala pkhaakhena ũsuꞌtx. Açaꞌ Dxus leyaꞌs kaapiyaꞌjsaweꞌsx yuꞌ txãaweꞌsx yakhtxi wala weꞌwena ũsuꞌ. 15 Naapkaçxhaꞌ Jesus yuhtewa jiimée ũsiyna, Jesus paꞌjaçyãꞌthe uyçxaꞌ, nasaꞌ jxukaysa ũukh yajkxnatx weçxayaꞌ utxáa. 16 Txajũꞌ Dxus leyaꞌs kaapiyaꞌjsaweꞌsxtxiꞌ Jesusaꞌ pẽjxku:
—¿Kĩh yũupaꞌga txakwe weeçx weꞌwena ũskwe? jĩteꞌ, 17 txãa nasa wala ksxavxyte teeçxsaꞌ Jesusaꞌs naꞌjĩnak ptaꞌsx:
—Adx nçxiꞌkaꞌs eçx luuku vxit-sa iiyamuteꞌ weꞌweyaꞌ ãjãꞌçmeꞌ txãꞌsnath ayte nuypaꞌj. 18 Txãa luuçxaꞌ mtee ũstewa eçx luuku vxit yãꞌtheꞌ, kiꞌthtxi ksuusuꞌjna yuwesu buꞌçxçxáak sẽhna wetéꞌ. Txãꞌwẽ yũuna wala talxiçaꞌ. Açaꞌ idx yakh uꞌjusaweꞌsxtxiꞌ piꞌkxyãꞌth nuykatxhikahn, nawa ãjãmeetaꞌ jĩteꞌ, 19 Jesus pasçxaꞌ:
—Dxusaꞌ puꞌçxhina sũhwaꞌj yuꞌsaꞌ jiꞌphmeesataꞌ naa nasaꞌ. ¿Bagaçxpkaçx iꞌkweꞌsx yakh puꞌçxna ũs yaꞌwatka? ¿Bagaçxpkaçx ãjãmée fxiꞌze yaꞌwakwe? Txãa luuçxaꞌs mneejxũhwe ayte jĩteꞌ, nuykũhtx Jesus tasxte. 20 Açaꞌ eçx luuku vxit-saꞌ txãa luuçxaꞌs kaywẽçxpaꞌjaꞌtheꞌ, kiwesu wetek yuwesu buꞌçxçxáa sẽhna.
21 Txajũꞌ Jesusaꞌ luuçx neyaꞌs pẽjxku:
—Txãꞌwẽ ãçãꞌni ¿makwe txaçx yuuçna? jĩteꞌ:
—Leꞌçxíik txãꞌwẽ yuꞌ. 22 Saꞌ maa entey yuꞌ txaçxmeynak wẽeçxpaꞌjçxa ipxte khẽena yuꞌkhẽwa khẽena uupçxãh yuuna uꞌjuꞌ. Açaꞌ kxahth idx yakh ewupçxãhteꞌ, maꞌwẽçxáawa puꞌçxhineꞌga peeygãhçxa jĩna piꞌkiꞌ jĩteꞌ:
23 —Idx yuu txãꞌwẽ Dxusaꞌ puꞌçxhina sũhte yuꞌ, kĩhwa jxuka kxtey yuuna txãꞌwẽ yaakxsaꞌs jĩteꞌ, 24 luuçx neyaꞌ susku weꞌwena pxthaa piꞌkx:
—Dxusaꞌ puꞌçxyujuna sũjuꞌth, saꞌ adx ũuste txãꞌwẽ yaakxwaꞌjaꞌs jweeíiçxáa wala meen kaajiyuꞌj jĩk.
25 Txajũꞌ Jesusaꞌ nasa wala kuh pkhaakhena utaaçte uyçxaꞌ, eçx luuku vxit-saꞌs naꞌjĩnak weꞌwe:
—Eçx luuku vxit-sa kweꞌweꞌjeꞌçmeeg, saꞌ wẽsẽꞌjweꞌsxte thũꞌwẽtxwa aphgu, nawa ãçxhaꞌ adx weꞌweniꞌs nwẽesẽꞌjçxa ũusu mkaaseh, peena yuꞌ uꞌkameeneꞌga jĩteꞌ, 26 eçx luuku vxit-saꞌ txãa luuçxaꞌs sus kweeyiꞌjna kaywẽçxpaꞌjaꞌjçxa kasejk. Açaꞌ txãa luuçxaꞌ uuníi naꞌwẽk wetena neeyũu.
Kxahtx nasa weꞌweçxaꞌ:
—Ãçxhaꞌ pejka uuk jĩna weꞌweꞌ.
27 Nawa Jesusaꞌ kuseju puꞌkisku, açaꞌ txãa luuçxaꞌ kiitek.
28 Jesusaꞌ txãajũ uꞌjçxaꞌ, teeçx yattek uꞌka. Açaꞌ txãa yakh uꞌjusaweꞌsxaꞌ pẽjxtxi:
—Kweꞌsxaꞌ ¿kĩh yũuçxakxthaꞌw eçxaꞌs kutxiꞌjyaꞌ ãjãmée? jĩteꞌ, 29 Jesusaꞌ ptaꞌsxku:
—Naꞌwẽsa eçxaꞌ thẽymée yuꞌ kasehmeena, wala yũunaana Dxus yakh puutx weꞌwete yuuçxáa kasejena jĩk.
Jesusaꞌ txajx uuwaꞌjaꞌs kiꞌ ptaꞌsxni
30 9:30-31 Txajũ kiꞌ uꞌjçxaꞌ, Galilea kiwenku uꞌj. Saꞌ kxteeaꞌ txãa yakh uꞌjusaweꞌsxtxik kaapiyaꞌjwaꞌj jiꞌphuꞌ naa paꞌga kim yuhwa jiyu jxthãasmeꞌ. Saꞌ dxiꞌthe uꞌjweççxaꞌ, naꞌwẽk txajx uuwaꞌjaꞌs ptaꞌsx:
—Dxus Nçxiꞌk Nasa Yuusáꞌs nasa ewmeesa kusete dukhni yuuwaꞌjaꞌ, açaꞌ txãaweꞌsxaꞌ ikhetxna. Açaꞌ uuçxawa, tekh enteꞌ kiꞌ ĩtxĩ yuuna jĩtewa, 31 — 32 txãa yakh uꞌjusaweꞌsxaꞌ jiyumeetaꞌ, nawa pẽjxyaꞌ yuꞌ ũukhtxi.
Kim wejx jxthaakwe jxtuhthesakx
33 Saꞌ Kapernaum çxhabte teeçx yatte paꞌjçxaꞌ, txãa yakh uꞌjusaweꞌsxtxi paapẽjxku naꞌjĩna:
—Iꞌkweꞌsxaꞌ dxiꞌthe yuhçxaꞌ, ¿kĩjkwe puutx weꞌweꞌ? jĩtewa, 34 txãaweꞌsxaꞌ thaameçxa pasmeetaꞌ txãꞌwẽ dxiꞌthe yuhçxaꞌ, ¿maa wejx jxthaakwe walasakxthaꞌw? jĩna puutx weꞌweçxawa.
35 Txajũꞌ Jesusaꞌ docesatx paꞌyaçxa kaçxçxa ptaꞌsxku:
—Maatewa jxthaakwe walasa yuu wẽeçxaꞌ, iiwejçx yajkxmée maatxwa jxuka selpiiçxa yuuçxáa jxthaakwe walasa yuuna. 36 Txãꞌjĩçxaꞌ teeçx luuçxkuẽꞌs txãaweꞌsx ksxavxyte txahçxa kusete yakhçxa naꞌwẽk weꞌwe:
37 —Maa nasawa adxna waꞌlmée jxpaꞌgasaꞌ adx naꞌwẽy luuçx naꞌwẽkwesatxwa ahçemée jxpaꞌgatxna. Txãꞌwẽ yũusaꞌ adxna jxpaꞌgasaçxa txãꞌwẽ yuutxna. Saꞌ adxna jxpaꞌgasaꞌ adxçxáana jxpaꞌgamée, adxna kaahsaꞌswa jxpaꞌgasa yuutxna jĩk.
Kweꞌsxtxi açesamée yuꞌ kweꞌsx yakh fxiꞌzesatxna
38 Txajũꞌ Juanaꞌ naꞌwẽk ptaꞌsx:
—Idx ¿maꞌjĩkiꞌg? Kweꞌsxaꞌ teeçx piçthẽꞌj uythaꞌw txãꞌ eçx luuku vxit-satx nasaa ũusu kutxiꞌjiꞌk Jesusku jxkaajaꞌ jĩna weꞌweçxa. Nawa txãꞌsaꞌ jwee yuꞌ txãꞌwẽ yũukaahmeethaꞌw kweꞌsx yakh uꞌjusameꞌ naa paꞌga jĩteꞌ, 39 Jesus pasçxaꞌ:
—Txãꞌwẽ yũunuwe, txãa paꞌgatey adx yaseꞌs kxsuusçxa eçx luuku vxit-satx nasaa ũusu kutxiꞌjsaꞌ adxaꞌs açeweꞌwemeena kim yuhwa. 40 Maawa kweꞌsxtxi açeweꞌwesamée yuꞌ, kweꞌsxtxi puꞌçxsa íiçxáatxna. 41 Naꞌjĩꞌth naꞌ: Iꞌkweꞌsxaꞌ Dxus luuçxiꞌkwe naapaꞌga maawa iꞌkweꞌsxtxi peeygãhna teeçx tasa yuꞌçxáawa yusuna txãꞌsaꞌ dewení yuuna.
Pkalte kweeteꞌjyaꞌmée jxpaꞌyakxwaꞌjaꞌ
42 —Mpaꞌyajkxwe, txãꞌwẽmeꞌ luuçxkuẽ adxaꞌs yaakxsatx pkalte kweeteꞌjena txãꞌsaꞌ txhikhte skuutxh ũꞌkhni kwetaꞌs tudçxa ĩkh wala dxiikhẽ akhwaççxáa, wejx ewna. 43 Meeçxawa iidx kuse txãꞌwẽ pkalte idxaꞌs kweeteꞌjeçteꞌ, mespẽꞌth. Eꞌz kuse yakh uu kiwete khẽe naꞌwẽꞌ, wejxwa teeçx kuseçxáa jiꞌphçxawa pçumée ĩtxĩ fxiꞌzewaꞌthe uꞌkani wejx ewaꞌ. Txãꞌwẽmeꞌ uu kiwete ipx wala seenaꞌsa bagaçxte yuhwa ũçxhawaꞌjsameꞌ. 44 Kxteeaꞌ bagaçxte yuhwa wesaꞌ çxhavxyna pçuwaꞌjsameetaꞌ, açaꞌ ipx seenaꞌsawa ũçxhawaꞌjsameꞌ. 45 Txãꞌwẽy iidx çxidawa pkalte kweeteꞌjeçteꞌ, txãꞌswa mespẽꞌth. Eꞌz çxida yakh uu kiwete khẽe naꞌwẽꞌ, wejxwa teeçx çxidaçxáa jiꞌphçxawa pçumée ĩtxĩ fxiꞌzewaꞌthe uꞌkani wejx ewna. Txãꞌwẽmeꞌ infxiernote ipxaꞌ bagaçxte yuhwa ũçxhawaꞌjsameꞌ. 46 Kxteeaꞌ bagaçxte yuhwa wesaꞌ çxhavxyna pçuwaꞌjsameetaꞌ, açaꞌ ipx seenaꞌsawa ũçxhawaꞌjsameꞌ. 47 Txãꞌwẽy iidx yafxwa pkalte kweeteꞌjpçxãh yuuçteꞌ, mkuutxiꞌj. Eꞌz yafx yakh infxiernote khẽe naꞌwẽꞌ, wejxwa teeçx yafx yakhçxáawa Dxus jxkaahna ũsnite uꞌkani wejx ewna. 48 Txãꞌwẽmeꞌ kxteeaꞌ bagaçxte yuhwa wesaꞌ çxhavxyna pçuwaꞌjsameetaꞌ, açaꞌ ipx seenaꞌsawa ũçxhawaꞌjsameꞌ. 49 Txãa paꞌgatey txãa ipxaꞌ kaapçuꞌjuꞌjwaꞌjsameꞌ.
50 Negaꞌ wala seelpisaꞌ. Nawa sxũukãhteꞌ, ¿maꞌwẽ kselpiꞌjyaꞌ ewuutxki? Iꞌkweꞌsxaꞌ nega naꞌwẽy selpiina mfxiꞌzewe, jxukaysa yakh ewçxáa.
Ptamsa txuteewaꞌjmeꞌs Jesus kaapiyaꞌjni
10 Jesusaꞌ Kapernaum çxhabu kasehçxaꞌ, Judea kiwen vxiteꞌ Jordan yuꞌwala kutenku uꞌj kxsũ pekũjxaꞌ. Saꞌ Jordan yuꞌwala kuteju ũsteꞌ, wala nasa pkhaakheꞌtx txajx ũsnite. Açaꞌ kxteewa kaapiyaꞌjaꞌkh vxite ahsũ naꞌwẽy.
2 Naapkaçxhaꞌ fxariseoweꞌsxaꞌ Jesus tasxte utxaaçxaꞌ naꞌwẽtx paapẽjx, pasyaꞌ sxiigteꞌ ewmée vxit-yaꞌ sũhçxa:
—Ptamsaçxawa, nyuꞌs wãatãhte ¿ewmanx? jĩteꞌ, 3 Jesus pasçxaꞌ:
—Jiimeewáꞌkwe Moises jxkaahniꞌs jĩna pẽjxteꞌ, 4 txãaweꞌsx pasçxaꞌ:
—Moises jxkaahçxaꞌ, nyuꞌs wãatãjxaꞌ ewuweçxteꞌ, nyu kazx yuuna fxiꞌzeniꞌs eçte fxiꞌjçxa dukhçxak txuteekajaꞌ jĩteꞌ, 5 Jesus pasçxaꞌ:
—Moisesaꞌ txãꞌwẽ yũuwaꞌjaꞌs nvxiht yujk, nawa peekx nyu kĩhwa yũumeetewa wãatãhna fxiꞌzepaꞌga íiçxáak txãꞌwẽ yũuwaꞌjaꞌs nvxiht, peekxçxáa yuꞌ wãatãjxaꞌ ãjãkahmén. 6 Nawa Dxusaꞌ nyafxiitey naa kiweꞌs pheuꞌjíi eꞌzíitx jaꞌdaçxajk vxit piçthẽꞌj petx uꞌy yãꞌjçxa. 7 Açaꞌ txãa paꞌga piçthẽꞌjaꞌ peekx neyweꞌsx tasxu txuteewaꞌjsaꞌ, nyu yuuwaꞌjsa yakh utxaayaꞌ, 8 txãꞌwẽ eꞌzçxawa, teeçxsaçxáa naꞌwẽ yuuna paꞌjyaꞌ. Açaꞌ txãꞌwẽ yũuniijũꞌ eꞌzmée teeçxçxáak yuuna paꞌjaꞌ. 9 Txãa paꞌga Dxus pũpxçxa nvxiitni ptamsayãꞌtxhiꞌ kim yuhwa txuhdeyaꞌ ãjãwaꞌjsameetaꞌ jĩk.
10 Txajũꞌ Jesusaꞌ teeçx yatte uꞌkateꞌ, txãa yakh uꞌjusaweꞌsxaꞌ txãꞌwẽ ptaꞌsxniꞌs kiꞌ pẽjxtxi. 11 Açaꞌ Jesusaꞌ ptaꞌsxku:
—Maa piçthẽꞌjwa peekx nyuꞌs wãatãhçxa vxite yakh ptamuuçxaꞌ, pkalte weteena, peekx nyuꞌs wãatãhçxa vxite yakh ptamuupaꞌga. 12 Açaꞌ uꞌywa txãꞌwẽy nmiꞌaꞌs wãatãhçxa vxite yakh ptamuuçxaꞌ, txãawa pkalteyçxáa weteena peekx nmiꞌaꞌs wãatãhçxa vxite yakh ptamuupaꞌga jĩk.
Luuçxkuẽtx Jesus bedekĩyni
13 Txãa eꞌsuꞌ Jesus tasxte luuçxkuẽtx nuypaꞌjtx Dxus kusete neeweꞌwekahn. Açaꞌ Jesus yakh uꞌjusaweꞌsxaꞌ yuptxi luuçxkuẽtx nuypaꞌjsatx. 14 Txãꞌwẽ yũuteꞌ, Jesusaꞌ naꞌjĩnak ũusçxa weꞌwe:
—Luuçxkuẽ adx tasxte yuusaatxiꞌ kuçx yupnuwe, txãa paꞌgatey Dxus jxkaahna ũsnisaꞌ naa luuçxkuẽweꞌsx naꞌwẽsa jĩi íiçxáꞌ. 15 Naꞌjĩꞌth naꞌ: maawa luuçxkuẽ naꞌwẽ Dxus jxkaahwaꞌj enaꞌs waꞌlmée jxpaꞌgameeçxa yuꞌ, bagaçxte yuhwa Dxus tasxte uꞌkayaꞌ ãjãmeetxna. 16 Txãꞌjĩnaꞌwa luuçxkuẽtx yakhnaꞌ dxikthesu peekizeçxa Dxus kusete neeweꞌwek.
Piçtakx wala jiꞌphsa Jesus yakh puutx weꞌweni
17 Txajũꞌ Jesusaꞌ vxite ahn uꞌjweçteꞌ, teeçx piçtakx dxiꞌthe wuwuuna kũhçxaꞌ, Jesus tasxte peejxũkwek naꞌwẽ paapẽjxna:
—Kaapiyaꞌjsa wala ewsa mpeetaꞌsx. Adxaꞌ ¿maꞌwẽ yũuçxa pçuwaꞌjmée ĩtxĩ fxiꞌzewaꞌjaꞌs jiꞌphukiꞌth? jĩteꞌ, 18 Jesus pasçxaꞌ:
—¿Kĩh yuupaꞌgaga adxaꞌs ewsa jĩꞌ? Naa kiweteꞌ teeçx nasaçxáa yuhwa ewsa yuꞌ meetaꞌ. Dxus yuuçxáa ewsa ũsaꞌ. 19 Idxaꞌ jiineꞌga Dxus jxkaahni naꞌwẽsatxiꞌ: Ptamsaꞌ vxite yakh pkal yuuwaꞌjmeꞌ, nasa ikhwaꞌjmeꞌ, pesweewaꞌjmeꞌ, vxitetx ĩsxiina nuyweꞌwewaꞌjmeꞌ, vxitee jĩitx kusaꞌjwaꞌjmeꞌ. Neyweꞌsxtxi peeygãhna ewçxáa yũuna fxiꞌzewaꞌjaꞌ jĩteꞌ, 20 txãa piçtakx txãꞌwẽ wẽsẽꞌjçxaꞌ naꞌwẽk pas:
—Txãꞌwẽ jxkaahnisatxiꞌ leꞌçxkuẽjũjx jxuka kxtey yuunath waláa jĩteꞌ, 21 Jesusaꞌ txãa piçtakxaꞌs peeygãhna thegçxaꞌ naꞌjĩk:
—Naꞌwẽ yũuwaꞌjçxáa peejxaꞌ: Iidx jiꞌphuniꞌs jxuka txweyçxa, puuple jiꞌphmeesatx peesyaꞌ meꞌj. Txãꞌwẽ yũuçxaꞌ, cielute jiꞌphsa yuuneꞌga. Txãꞌwẽ yũuçxa adx yakh myuh, makwe seenaꞌ nxussa paꞌthewa txãatxiꞌ yajkxmée jĩteꞌ, 22 txãa piçtakxaꞌ wala jiꞌphsa yuꞌk, saꞌ txãꞌwẽ wẽsẽꞌjçxaꞌ, wala nxusna uꞌkh.
23 Txajũꞌ Jesusaꞌ nasatx thegçxaꞌ ptaꞌsxku txãa yakh uꞌjusaweꞌsxtxi:
—Maawa wala jiꞌphsa yakhaꞌ Dxus jxkaahna ũsnite uꞌkawaꞌj wala yuh thẽyaꞌ jĩteꞌ, 24 txãa yakh uꞌjusaweꞌsx wẽsẽꞌjçxaꞌ, jiyumée kuh jwed yajkxnatx neeyũu. Açaꞌ Jesusaꞌ ãatek ptaꞌsx:
—Naa kiwete jiꞌphuniçxáꞌs jxthaakwe yaakxsa yakhaꞌ wala yuh thẽyaꞌ Dxus jxkaahnite uꞌkawaꞌjaꞌ. 25 Maawa wala jiꞌphsaꞌ Dxus jxkaahnite wala thẽy uꞌkatxna. Açaꞌ txãꞌwẽ thẽysaꞌs yajkxte yuꞌ, kamelxo yuhwa thẽymée wáa yũz kafxga uꞌkayaꞌ ãjãtxna jĩk. 26 Txãꞌwẽ wẽsẽꞌjçxaꞌ, wala kuh yajkxna naꞌwẽtx puutx paapẽyiꞌ:
—Txãꞌwẽteꞌ, jiꞌphsaꞌ ¿kimçxáꞌ cielute uꞌkayaꞌ ãjamaꞌtx? jĩteꞌ, 27 Jesusaꞌ txãaweꞌsxtxi thegçxaꞌ naꞌwẽk weꞌwe:
—Naa kiwete nasaꞌ Dxus ũsnite uꞌka wẽeçxa txãaweꞌsx kakwejuçxáa paꞌpçxuçxaꞌ ãjãmeetxna. Nawa Dxusna piꞌkxçxa yuꞌ, thẽymée ãjãtxna. Dxus yakhaꞌ kĩh yuhwa thẽysa meeaꞌ.
28 Txajũꞌ Pedroꞌ naꞌwẽk weꞌwe:
—Kweꞌsxaꞌ idx yakh yujxaꞌ, kweꞌsx jiꞌphuniꞌs jxuka nvxihtthaꞌw kĩhnawa jĩteꞌ, 29 Jesusaꞌ naꞌwẽk ptaꞌsx:
—Adxaꞌ isath weꞌweꞌ: Dxus yuwe ewsaꞌs jxpaꞌgaçxa adx yakh fxiꞌze wẽeçxaꞌ, kĩhnawa jxuka nvxiitutxna yat, kiwe, nyakhweꞌsx, npeꞌsxweꞌsx, neyweꞌsx, nyu, nçxiꞌkweꞌsx, niisaweꞌsx txãꞌwẽsatx. 30 Açaꞌ txãꞌwẽ yũusaꞌ makwe yahçena fxiꞌzeçxawa txãaweꞌsx nvxiitniite puutejka jxthaakwe wala uyuutxna naa kiwetey: yat, kiwe, nyakhweꞌsx, npeꞌsxweꞌsx, njĩꞌjweꞌsx, nçxiꞌkweꞌsx, niisaweꞌsx txãꞌwẽysatx. Saꞌ vxite kiweteꞌ, pçumée ĩtxĩ fxiꞌzewaꞌjaꞌs jxpaꞌgatxna. 31 Nawa jxpaꞌyakxmeeteꞌ, makwe yaçteweꞌsxçxawa, nmehteweꞌsx yuutxna; naapkaçxhaꞌ nmehteweꞌsx yuꞌ, yaçteweꞌsx yuutxna jĩk.
Jesusaꞌ txajx uuwaꞌjaꞌs kiꞌ ptaꞌsxni
32 Jesusaꞌ Jerusalente paꞌjyaꞌ uꞌjweçku yuꞌ, açaꞌ txãa yakh uꞌjusaweꞌsxaꞌ ũukhçxa eꞌstetx uꞌjweꞌ Jesusaꞌs yaçte akhçxa. Txajũꞌ Jesusaꞌ docesaçxáatx fxiite paꞌyaçxa ptaꞌsxku txãꞌsaꞌ kĩh yũuyaꞌwatewa:
33 —Iꞌkweꞌsxaꞌ jii yãꞌjiꞌkwe Jerusalente paꞌjyaꞌ uꞌjweçthaꞌw. Açaꞌ kxteꞌ Dxus Nçxiꞌk Nasa Yuusaꞌs uweçxa dukhni yuuna Dxus leyaꞌs kaapiyaꞌjsaweꞌsx vxiteꞌ sacerdote npiiçthẽꞌjweꞌsx kusete. Açaꞌ txãaweꞌsxaꞌ ikhwaꞌj vxitçxa judiu jiꞌjmée vxite nasatx dukhetxna ikhkahn. 34 Açaꞌ txãa nasaꞌ npeevxysxijkana peçxujkwena fxneꞌsx avxythethna txãꞌwẽ yũuçxa ikhetxna. Nawa tekh enteꞌ kiꞌ ĩtxĩ yuuna jĩk.
Jakoboweꞌsx njĩꞌj Jesusaꞌs pẽyni
35 Txajũꞌ Zebedeo nçxiꞌkweꞌsx Jakobo vxiteꞌ Juan txãaweꞌsxaꞌ Jesus tasxte utxaaçxa naꞌwẽtx pẽjx:
—Kweꞌsxaꞌ idxaꞌsthaꞌw pẽyiꞌ kweꞌsx pẽyniꞌs kxtey yuukahn jĩteꞌ, 36 Jesusaꞌ pẽjxku:
—¿Kĩjkwe yũu jxthãasuꞌ? jĩna.
37 Açaꞌ txãaweꞌsx eꞌzsaꞌ naꞌwẽtx pẽjx:
—Idxaꞌ naa kiwete jxkaajxaꞌ kĩhçxaꞌ, kweꞌsx eꞌzsatx iidx pukakhẽ pdxiꞌp kaçxwaꞌjaꞌs ũsuneꞌga jĩnatx pẽjx. 38 Açaꞌ Jesus pasçxaꞌ:
—Iꞌkweꞌsxaꞌ jiimeeçxa iꞌkwe txãꞌwẽ pẽyiꞌ. Iꞌkweꞌsxaꞌ adx naꞌwẽy pxthaa yuuçxa uuwaꞌjaꞌs ũukhmée jxpaꞌgayaꞌ ¿ãjamaꞌkwe? jĩna pẽjxteꞌ, 39 txãaweꞌsxaꞌ:
—Ãjaꞌnjaꞌw jĩnatx pas.
Açaꞌ Jesusaꞌ naꞌwẽk ptaꞌsx:
—Isa, iꞌkweꞌsxaꞌ adx naꞌwẽy pxthaa yuuçxa uuwaꞌjaꞌs ũukhmée jiꞌphuyujuneꞌkwe. 40 Nawa adx pukakhẽ pdxiꞌp kaçxwaꞌjaꞌs adx ũsuꞌçmeeth pẽysatx. Txãꞌsaꞌ txãn ente kim jxpaꞌgawaꞌjsa yuuna txãꞌsçxáa ũsni yuuna jĩk.
41 Açaꞌ vxite diezsaweꞌsx txãꞌwẽ Jakoboweꞌsx pẽyniꞌs wẽsẽꞌjçxaꞌ ũusaçxatx txãaweꞌsxtxiꞌ. 42 Txãꞌwẽ yũuteꞌ, Jesusaꞌ paꞌyaçxa naꞌwẽk yuꞌkxpeh:
—Iꞌkweꞌsxaꞌ miiyajkxwe: Naa kiwete jxkaahsa walasaꞌ nasatx jxuka jxkaajaꞌtx juunaꞌçxáa yuuna khaawãsxiꞌjna. 43 Nawa iꞌkweꞌsxaꞌ txãꞌwẽy yuuwaꞌjsameeiꞌkwe. Makwe jxthaakwesaçxawa, wejxwa vxitetx selpiina mfxiꞌzewe. 44 Iꞌkweꞌsxaꞌ walasa yuu wẽeçxaꞌ, vxitee jxkaahni selpisáa myuuwe. 45 Txãa paꞌgatey Dxus Nçxiꞌk Nasa Yuusáa yuhwa txãꞌsna selpíi jxthãasyaꞌ kĩhmeꞌ, wejxwa maazkuẽe nasatxwa nweꞌwena selpiiyaꞌ kĩhçxak yaꞌdukh nxuste uuyaꞌ.
Teeçx piçthẽꞌj uyyaꞌ ãjãsameꞌs Jesus nuykatxhini
46 Txajũꞌ Jerikote paꞌjçxaꞌ, Jesusaꞌ txãa yakh uꞌjusaweꞌsx vxiteꞌ kuhsa yakh çxhabu kasehna uꞌjweçteꞌ, teeçx piçthẽꞌj uyyaꞌ ãjãsameek dxiꞌj pukate lmusxnu thãasna uꞌpuꞌ. Txãꞌ Bartimeok yaase yuꞌ, Timeo nçxiꞌk. 47 Saꞌ Jesus Nasarethuweꞌsx utxaaçte wẽsẽꞌjçxaꞌ, naꞌjĩnak sus weꞌwena uꞌpuꞌ:
—Jesus, Davxid jiꞌj, adxaꞌs meen peeygãh jĩna.
48 Açaꞌ nasa yuꞌ:
—Sxuunaꞌ myuu, kuçxgu susuꞌ jĩtewa, jweeíiçxáak sus weꞌwe:
—Davxid jiꞌj, adxaꞌs meen peeygãh jĩna.
49 Txajũꞌ Jesusaꞌ tudte yujuçxa, paꞌyakaakh. Açaꞌ paꞌyatx naꞌjĩna:
—Kiiteçxa ũukhmée myuh, Jesusaꞌ idxaꞌs paꞌyaçaꞌ jĩçpkaçxhaꞌ, 50 txajx atxhaꞌs nvxihtçxa ũphçxak kiiteçxa Jesus tasxte utxáa.
51 Txajũꞌ Jesusaꞌ ¿kĩhga yũu jxthãasuꞌ? jĩna pẽjxteꞌ, txãa uyyaꞌ ãjãsamée pasçxaꞌ:
—Adxaꞌ uyyaꞌ ãjã wẽjẽꞌth jĩk.
52 Açaꞌ Jesus weꞌweçxaꞌ:
—Kaauyuꞌjuna sũhçxaneꞌga adxaꞌs piꞌkx txãa paꞌga ãçxhaꞌ uyna mneeyũu jĩçpkaçxhaꞌ uyyaꞌ ãjãk, saꞌ Jesus eꞌstey uꞌkh piꞌkxna.
Jesus Jerusalente uꞌkani
(Mt 21.1-11; Lk 19.28-40; Jn 12.12-19)
11 Txajũꞌ Jesusaꞌ Jerusalenna uꞌjweççxaꞌ, eꞌz çxhabkuẽ Betania Betfxagé utxatek paꞌj. Txãa çxhabaꞌ Oliwos vxiç dxiꞌpgatx neeyũꞌ. Açaꞌ kxtee paꞌjçxaꞌ txãa yakh uꞌjusaweꞌsx eꞌzsatx yaçte kaakh naꞌjĩna:
2 —Çxhab leꞌçxkuẽ vxyaꞌk kxtee meꞌjwe. Saꞌ kxtee paꞌjçxaꞌ, teeçx buçxu kim yuhwa aꞌjnimeesa tudni ũsna txãꞌsna jxũkhwedeçxa jxũna yuweeneꞌkwe. 3 Txãꞌwẽ yũuçte kim pẽyiwáatxna açaꞌ kweꞌsxtxi jxpeꞌjsak nikxyaꞌ kaah nawa kiꞌ kaasxweduꞌjuna jĩneꞌkwe. 4 Txãꞌjĩteꞌ, txãaweꞌsxaꞌ uꞌjçxa buçxuꞌs uytxi vxitx pukate dxiꞌj juꞌgu tudni ũste. Açaꞌ jxũna uꞌjyaꞌ jxũkhwedeçtxi yuꞌ. 5 Naapkaçxhaꞌ kxtee thegna ũssaꞌ weꞌwetx:
—Buçxuꞌs ¿kĩh yũuyaꞌ jxũkhwedeçkwe? jĩna.
6 Txajũꞌ Jesus maꞌwẽneꞌ kweꞌweꞌj txãꞌwẽy txãaweꞌsxaꞌ pasteçxáa jxũna kaahtx. 7 Txajũꞌ txãa buçxuꞌs Jesus tasxte nuykũhçxaꞌ, txãaweꞌsx atxhtxi tpeguꞌgçxa pustxi, açaꞌ Jesusaꞌ aꞌjçxa uꞌkh. 8 Naapkaçxhaꞌ vxite yuꞌ Jesus uꞌjwaꞌj dxiꞌjsu yaçtetx txãaweꞌsx atxhtxi pusna uꞌjweꞌ, açaꞌ vxiteꞌ ẽjxã spẽꞌthçxatx txãꞌwẽy dxiꞌjsu pusna uꞌjweꞌ yaçsu. 9 Naapkaçxhaꞌ yaçte uꞌjsa vxiteꞌ eꞌste yuusa txãaweꞌsxaꞌ naꞌjĩnatx weyna uꞌjweꞌ:
—Dxus kaahnisa wala yuh jxtuhthesa yujaꞌ. 10 Wala yuh ew jxkaajana, kweꞌsx yaçgaweꞌsx Davxid naꞌwẽy. Dxusaꞌs weçxaaga wala ew yũupaꞌga jĩꞌtx. 11 Jesusaꞌ txãꞌwẽk Jerusalente uꞌka dxuus yatte paꞌj. Saꞌ dxuus yatte kĩh ũstewa jxuka thegçxaçxáa kiꞌ kasehna uꞌkh Betania çxhabnay doce txãa yakh uꞌjusaweꞌsx yakh, kusuçyãꞌkh yuꞌ naa paꞌga.
Higwera fxtũu tasx yũnsameꞌs Jesus açeweꞌweni
12 Txajũꞌ kuskuskhẽꞌ Jesusaꞌ Betania çxhabu kiꞌ kasehçxaꞌ wẽek. 13 Saꞌ higwera-tasx wala yehçsa ũste uyçxaꞌ, thegyaꞌ uꞌkh yũn jiꞌphwáana sũhçxa. Nawa yũnmée eççxáak jiꞌph yuꞌ, yũn en meek yuꞌ naa paꞌga. 14 Txajũꞌ Jesusaꞌ naꞌjĩnak weꞌwe txãa fxtũu tasxaꞌs:
—Naa fxtũu tasxte yũnniꞌs kim yuhwa ũꞌmeetxna peena yuꞌ jĩna weꞌweçteꞌ, txãa yakh uꞌjusaweꞌsxaꞌ wẽsẽꞌjnatx ũsuꞌ.
Dxuus yatte txweysaatx Jesus kasxisxni
(Mt 21.12-17; Lk 19.45-48; Jn 2.13-22)
15 Txajũꞌ Jesusaꞌ Jerusalen çxhabte kiꞌ sxawedna paꞌjçxaꞌ, dxuus yatte uꞌkaçxa kxtee kĩjkĩhwa txweyna kiꞌ weyna ũssatx eka kasxisxku, vxyu yuꞌpthehsa mesa vxiteꞌ tub çxihme txweysa kaçxni pagutx jxuka pũsxna. 16 Saꞌ kxtee kĩjkĩhwa tuꞌsçxa paꞌjsatx kaakũjuꞌjmeꞌ. 17 Txajũꞌ naꞌjĩnak yuꞌkxpeh:
—Dxus libruteꞌ naꞌwẽ fxiꞌjni ũsaꞌ: Adx yataꞌ Dxus yakh puutx weꞌwena ũswaꞌj yatçxáꞌ nasa majũweꞌsxwa jĩꞌk. Nawa iꞌkweꞌsxaꞌ peswée pkhaakhena ũsni kafx naꞌwẽçxáa vxitçxa jiꞌphiꞌkwe jĩteꞌ, 18 Dxus leyaꞌs kaapiyaꞌjsaweꞌsx vxiteꞌ sacerdote npiiçthẽꞌjweꞌsx wẽsẽꞌjçxaꞌ, maꞌwẽçxáawa yũuçxa ikhyaꞌ ãjãwaꞌjaꞌs pakwetx. Nawa isa ikhyaꞌ yuꞌ ũukhtxi, nasa thaakwe kuhsa yuꞌ Jesus kaapiyaꞌjniꞌs nwẽesẽꞌjsaçxaçxáa ũspaꞌga. 19 Txajũꞌ jxuka çxhiꞌdxiçteꞌ, Jesusaꞌ txãa çxhabuh kasehna uꞌkh.
Higwera fxtũu tasx udxni
20 Kuskuskhẽ kusíi kxuy jxkhẽuuççxaꞌ, higwera fxtũu tasxaꞌ weçete paꞌj udxni ũstetx uy. 21 Açaꞌ Pedroꞌ Jesus weꞌweniꞌs yajkxçxa naꞌjĩk:
—Mtheg naa higwera fxtũu tasxaꞌs jũꞌna weꞌweçxaꞌ: naa fxtũu tasxte yũnniꞌs kim yuhwa ũꞌmeetxna peena yuꞌ jĩnag weꞌwe txãa fxtũu tasxaꞌ jxuka uhdxga jĩteꞌ, 22 Jesusaꞌ naꞌwẽk pas:
—Iꞌkweꞌsxaꞌ kĩh pẽyiççxawa, kuh jwed yajkxmée Dxusaꞌ kxtey yuuna sũhnaçxáa mpẽjxwe. 23 Adxaꞌ isath weꞌweꞌ: maawa Dxusaꞌs txãꞌwẽ ũusuh jxuka yajkxna, naa vxiç wala ayjxu uꞌjçxa ĩkh walate meꞌj khẽeyaꞌ jĩtxna açaꞌ kxtey yuuna. 24 Kxtey yuuwaꞌjaꞌs adxaꞌ jiiçxath txãꞌwẽ iꞌkweꞌsxtxiꞌ Dxus yakh puutx weꞌwekajaꞌ pẽyniꞌs jxpaꞌgayãꞌthaꞌw sũhna. 25 Saꞌ Dxus yakh puutx weꞌwena ũsíi yaakiwáꞌkwe vxitesa yakh ãhmée yũuniꞌs. Saꞌ txãꞌwẽ yajkxçxaꞌ, txãa yakh peltunãyyaꞌ uꞌjweneꞌkwe, kxah iꞌkweꞌsx Tata cieluteweꞌsxwa iꞌkweꞌsx pkaltxi peltunaĩna. 26 Nawa iꞌkweꞌsx txãꞌwẽ vxitesa yakh ãhmée yũuniꞌs peltunaĩmeeteꞌ, iꞌkweꞌsx Tata cieluteweꞌsxwa iꞌkweꞌsx pkaltxiꞌ peltunaĩmeena jĩk.
Dxuus yatte Jesus juunaꞌ yũuniꞌs pẽyni
27 Txajũꞌ Jerusalente sxawedna paꞌjçxa, dxuus yat-su uꞌjuteꞌ, sacerdote npiiçthẽꞌjweꞌsx vxiteꞌ Dxus leyaꞌs kaapiyaꞌjsaweꞌsx vxiteꞌ judiu nthẽꞌjsaweꞌsx Jesus tasxte utxaaçxaꞌ, 28 naꞌjĩnatx pẽjx:
—Idxaꞌ ¿kimga saga dxuus yatte txãꞌwẽ juunaꞌ yũu? ¿Kimga txãꞌwẽ yũuyaꞌ jxkaah? jĩteꞌ, 29 Jesus pasçxaꞌ:
—Adxwa iꞌkweꞌsxtxiꞌ pẽjx yaꞌwath açaꞌ adx pẽyniꞌs pasuneꞌkwe. Txãꞌwẽ yũꞌ adxwa ptaꞌsxiꞌnja kim jxkaathe txãꞌwẽ yũuçxawa. 30 Saꞌ pẽjxku naꞌjĩna:
—Juan Bautistaꞌs ¿kimga jxkaah bautisãyyaꞌ? ¿Dxusáꞌ, meeçxaꞌ naa kiwega piçthẽꞌjáꞌ? Mpaaswe jĩnak pẽjx.
31 Txajũꞌ txãaweꞌsx pweꞌsx naꞌjĩnatx puutx weꞌweꞌ:
—Dxusneꞌ jxkaah jĩꞌnjaꞌw açaꞌ txãꞌwẽteꞌ ¿mjĩyaꞌkwe Juan ptaꞌsxniꞌs jxpaꞌgamée? jĩna pasuna. 32 Meeçxaꞌ naa kiweteweꞌsxneꞌta jxkaah jĩwaçwa, kxul yuhna, nasa jxukaysa Juanaꞌs weꞌweçxaꞌ: Dxus jxkaahnisaꞌ jĩꞌtx. 33 Txãꞌjĩna ũukh weꞌweçxaçxáa:
—Kweꞌsxaꞌ jiimeethaꞌw jĩnaçxáatx Jesusaꞌs pas.
Açaꞌ Jesusaꞌ naꞌjĩk:
—Adxwa ptaꞌsxmeꞌnja kim jxkaathe txãꞌwẽ yũuçxawa jĩk.
Mjĩisaweꞌsx patron nçxiꞌkaꞌs ikhni yakh kaajaꞌdaꞌjni
12 Txajũꞌ Jesusaꞌ naa ejemplo yakhku kaajaꞌdaꞌjna ptaꞌsx:
—Teeçx piçthẽꞌjaꞌ txajx kiwete uwa wala uhçxa, ktadxíi jxuka uphku, saꞌ uwa ee thegwaꞌj yatwa txahçxa uwa thẽꞌthe ũhdeçxa kuꞌswaꞌj yatwa fxii txajk. Txãꞌwẽ yũuçxak txãa kiwete mjĩiwaꞌjsatx ew neeweꞌwena nvxihtçxa jxuꞌj kiwen uꞌj. 2 Txajũꞌ uwa thẽꞌjwaꞌj en ãhteꞌ, txãꞌsna selpisáa teeçx kaakh kxtee mjĩisatx pẽjxyaꞌ txãa jĩi yuuwaꞌjaꞌs. 3 Nawa txãa kiwete mjĩisaweꞌsxaꞌ pẽjxna paꞌjsaꞌs uweçxa wala pkxuutx, saꞌ kĩh yuhwa dukhmeetx kaah. 4 Açaꞌ kiwe namuꞌ vxite selpisáa kiꞌ kaakh txãꞌsnawa wala wẽesxuna kwet wãatãtãhna dxikthesu kpãꞌvxittxi. 5 Txajũꞌ kiwe namuꞌ kiꞌ kaakh vxite selpisáa, açaꞌ txãꞌsaꞌ ikhtxi. Txãa eꞌsuꞌ maazkuẽe selpisaawa kaakh, açaꞌ txãaweꞌsxtxiꞌ maaíi yuutxiꞌ kpãꞌvxitna, vxitetxiꞌ ikhtxi.
6 Txãꞌwẽ yũuteꞌ, teeçx nçxiꞌk wala wedxnisa jiꞌphuk txãꞌsnak nmehte kaah, adx nçxiꞌkaꞌs pejka nwẽesẽꞌjetxna sũhna. 7 Nawa txãa kiwete mjĩisaweꞌsxaꞌ txãa nçxiꞌkaꞌs uyçxaꞌ: Naa nçxiꞌk txãꞌwẽ naa kiweꞌs uwewaꞌjsana, açaꞌ txãꞌsaꞌ ikhçxa kiweꞌs kweꞌsx iiyamuꞌnjaꞌw jĩnatx puutx weꞌwe. 8 Saꞌ txãa nçxiꞌkaꞌs uweçxa ikhçxa uuníi kakweꞌs txãa kiweju kutxiꞌjtx jĩnak ptaꞌsx.
9 Txãꞌwẽ ptaꞌsxçxa Jesusaꞌ pẽjxku:
—Txãꞌwẽ yũuteꞌ, kxtee kiwe namuꞌ ¿kĩh yũukx? Txãa sxawedna paꞌjçxa, kxtee mjĩisatxiꞌs ikhçxa kiweꞌs vxitetx ũsuna sũjuꞌth jĩk.
10 Dxus librute naꞌwẽ fxiꞌjni ũsaꞌ txãꞌsaꞌ iilẽeymeewáꞌkwe iꞌkweꞌsxaꞌ:
Yat txaahsaweꞌsxaꞌ: Naa kwetaꞌ seelpimeꞌ jĩçxa wãatãhtx.
Nawa txãaíik yat makwesanawa çxhãçxha neewewaꞌjsa yuuna paꞌj.
11 Txãꞌwẽ neewewaꞌjsa yuuna paꞌjwaꞌjaꞌs Dxusku vxitçxa nvxiht,
Txãa paꞌga kweꞌsx yakhaꞌ wala weçxa yujaꞌ ¿jĩꞌçmeenaꞌ?
12 Txajũꞌ Dxus leyaꞌs kaapiyaꞌjsaweꞌsx vxiteꞌ sacerdote npiiçthẽꞌjweꞌsxaꞌ txãa ejemploꞌ txãaweꞌsxtxi weꞌwenitewa jiyuçxaꞌ, Jesusaꞌs uweçxa tud wẽetx. Nawa nasatx ũukhçxa tudmée uꞌjtx.
Gobiernoꞌs dukhwaꞌjaꞌswa pẽyni
13 Txajũꞌ fxariseoweꞌsx vxiteꞌ Herodes nasa txãaweꞌsxtxi paꞌyaçxatx maz kaah Jesus tasxte, kĩh ewmée weꞌwetewa kpajkxyaꞌ. 14 Açaꞌ txãaweꞌsxaꞌ naꞌwẽtx paapẽjx Jesusaꞌs:
—Idxaꞌs kweꞌsxaꞌ jiithaꞌw. Idxaꞌ isasaçxáꞌsgu weꞌweꞌ, Dxus tasxte paꞌjwaꞌj dxiꞌjaꞌs kaapiyaꞌjna. Saꞌ nasaa jxkaahna yuꞌkxpehnitx nwẽeseꞌjeꞌçmeeg, txãa paꞌgatey idxaꞌ nasa ewsa naꞌwẽ thegsatx jiyumey juꞌgu yuꞌçmeeg. Idx ¿maꞌjĩkiꞌg? Jxkaahsa Cesaraꞌs vxyu dukhte ¿ewmanx? Meeçxaꞌ dukhmeete wáa ¿ewna? jĩna pẽjxteꞌ, 15 Jesusaꞌ txãaweꞌsx ũuste ewmée yajkxçxa txãꞌwẽ pẽyniꞌs jiyuçxaꞌ, naꞌwẽk pas:
—¿Kĩjxaꞌkwe adxaꞌs ewmeete nvxiit wẽeçxa txãꞌwẽ pẽyíꞌ? Vxyuꞌs mneejxũhwe wakx, thegyaꞌwath jĩteꞌ, 16 teeçx vxyuꞌs jxũna kũhtx, açaꞌ thegçxaꞌ naꞌjĩk:
—Ayteꞌ ¿kiim dxiꞌpaꞌs kiꞌpnina, saꞌ kiim yaseꞌs fxiꞌjnina? jĩteꞌ, txãaweꞌsx pasçxaꞌ:
—Cesar dxiꞌpaꞌs kiꞌpçxa Cesar yaseꞌs fxiꞌjniꞌ jĩtx.
17 Açaꞌ Jesusaꞌ naꞌwẽk jxkaah:
—Cesar jĩꞌs Cesaraꞌs dukhwaꞌjaꞌ, saꞌ Dxus jĩꞌs Dxusaꞌs dukhwaꞌjaꞌ jĩteꞌ, paapẽysaweꞌsxaꞌ pasyaꞌ ãjãmée kuh yajkxnatx neeyũu.
Uusaaweꞌsx kiꞌ ĩtxi yuuwaꞌjaꞌswa pẽyni
18 Txajũꞌ saduceoweꞌsxtxi paapẽjxyaꞌ kũh Jesus tasxte. Txãaweꞌsxaꞌ uusaaweꞌsxaꞌ peena yuꞌ ĩtxĩ yuumeetxna sũhna yaakxsatx yuꞌ. Saꞌ Jesus tasxte kũhçxaꞌ, pẽjxtxi:
19 —Idxaꞌ jiineꞌga, Moisesaꞌ naꞌwẽk fxiꞌjçxa nvxiht: Maa piçthẽꞌjwa nyu jiꞌphçxawa, luuçx jiꞌphumey uuteꞌ, uusáa nyakhaꞌ txãa neeyũusáa uꞌy yakh kabaana açaꞌ txãate luuçx nyafxteweꞌsxaꞌ uusáa nçxiꞌk naꞌwẽ neeyũuna jĩnak fxiꞌj.
20 Kweꞌsxaꞌ jiithaꞌw siete piçthẽꞌj pxakhtxi uꞌp yuꞌ. Saꞌ nyakh nthẽꞌjsaꞌ iiyuuçxawa luuçx jiꞌphumey uuk. 21 Açaꞌ nyakh eꞌsteweꞌsxaꞌ txãa uꞌy neeyũusáa yakh kabaçxawa, txãawa luuçx jiꞌphumey uuk. Saꞌ tekhteweꞌsx nyakhwa txãa uꞌy neeyũusaꞌs íiçxáak kaba. Nawa txãawa txãꞌwẽyçxáak yuu. 22 Açaꞌ sietesay teeçx uꞌysaçxaçxáana kabana jxãꞌjçxawa, txãꞌwẽçxaçxáatx yuu. Nmehteꞌ txãa uꞌywa uuk. 23 Açaꞌ uusaaweꞌsx kiꞌ ĩtxĩ yuu enteꞌ, txãa uꞌyaꞌ ¿maa yakh isa nyu yuuwaꞌjsakx cieluteꞌ? jĩnatx paapẽjx. 24 Açaꞌ Jesusaꞌ naꞌwẽk ptaꞌsx:
—Iꞌkweꞌsxaꞌ Dxus libruꞌs jiimeeiꞌkwe, saꞌ Dxus tasxte maꞌwẽ fxiꞌzewaꞌjaꞌswa jiimeeçxaꞌ jxpubana ũsiꞌkwe. 25 Nawa uusaaweꞌsxaꞌ kiꞌ ĩtxĩ yuuçxaꞌ, nyu jiꞌphuwaꞌjsa meetaꞌ. Kxteꞌ kaaptamuꞌjna ũskiwemeꞌ, txãa paꞌgatey cieluteꞌ txãaweꞌsxaꞌ angelesweꞌsx naꞌwẽsaçxáa yãꞌthaꞌ. 26 Iꞌkweꞌsxaꞌ jxpubanuwe: Uusaaweꞌsxaꞌ kiꞌ ĩtxĩ yuuwaꞌjsa yuhtaꞌ. Iꞌkweꞌsxíiwa Moises librute iilẽeyneꞌkwe: Kxteꞌ çhũçh yuꞌkh behna ũsni pxãjũ naꞌwẽk Dxusaꞌ weꞌwe: Adxaꞌ Abrahan, Isaak, Jakob txãaweꞌsx Dxusthu jĩk. 27 Dxusaꞌ uusaaweꞌsx Dxusmeꞌ, txãꞌ ĩtxĩsaweꞌsx Dxusaꞌ. Açaꞌ iꞌkweꞌsxaꞌ wala jxpubana ũsiꞌkwe jĩk.
Dxus ley maatewa jxthaakwesa
28 Txãꞌwẽ pãapẽjxteꞌ, Jesus sxiigmée pasuçte wẽsẽꞌjna ũsuꞌk Dxus ley kaapiyaꞌjsa teeçxsaꞌ. Saꞌ txãawa naꞌwẽk pẽjx:
—Dxus leyaꞌ maatewa jxthaakwesaꞌ ¿maana? jĩteꞌ, 29 Jesusaꞌ ptaꞌsxku:
—Dxus ley maatewa jxthaakwesa nyafxteweꞌsxaꞌ naꞌwẽꞌ: Israelweꞌsx, mwẽesẽꞌjwe: Kweꞌsxtxi takiꞌsa Dxusaꞌ teeçx yuuçxáꞌ. 30 Txãꞌsaꞌ ũusuh jxuka yajkxçxa txãa yuuçxáana selpiina fxiꞌzewaꞌjaꞌ bagaçxte yuhwa txutemée uu entepkaçx. 31 Açaꞌ eꞌsteweꞌsxaꞌ txãꞌwẽydxiꞌaꞌ: Peekíi maꞌwẽga yaꞌpeeygãjaꞌ, txãꞌwẽy mpeeygãh vxite nasatxwa. Naa ley eꞌzsa maatewa jxthaakwesataꞌ jĩteꞌ, 32 Dxus leyaꞌs kaapiyaꞌjsa pasçxaꞌ:
—Ew yuh ptaꞌsxgu. Dxusaꞌ teeçxçxáa yuh ũsaꞌ, açaꞌ vxite Dxus yuꞌ meetaꞌ. 33 Saꞌ txãꞌwẽ ũusuh jxuka yajkxçxa txãa yuuçxáana bagaçxte yuhwa txutemée selpiina fxiꞌzeçxa, txãꞌwẽy maꞌwẽ peekíi yaꞌpeeygãjaꞌkx txãꞌwẽ vxite nasatxwa peeygãhna fxiꞌzeniꞌ Dxusna peesna maazkuẽe niimalwa altalte kabnite jxthaakwe ewsaꞌ jĩk.
34 Txajũꞌ Dxus leyaꞌs kaapiyaꞌjsa txãꞌwẽ jxpaꞌyakx pasteꞌ, Jesusaꞌ naꞌjĩk:
—Dxus jxkaahnite uꞌkayaꞌ utxa ũsgu jĩk.
Açaꞌ txajũyãꞌjaꞌ vxite yuꞌ peena pẽjxmeetaꞌ.
Dxus tasxu yuusaꞌ ¿kiim nçxiꞌkki? jĩna Jesus pẽyni
35 Txajũꞌ Jesusaꞌ dxuus yatte nasatx kaapiyaꞌjna naꞌwẽk ptaꞌsx:
—Dxus ley kaapiyaꞌjsaweꞌsxaꞌ ¿maꞌwẽtekiꞌtx Kristoꞌ Davxid nçxiꞌkaꞌ jĩna ptaꞌsxiꞌ? 36 Naapkaçxhaꞌ Dxus Espiritu kaayakiꞌtheꞌ Davxidaꞌ Kristoꞌs weꞌweçxaꞌ naꞌjĩk:
Adxna jxpeꞌjsa Kristoꞌs Dxusaꞌ naꞌjĩk:
Adx pukate paçu juꞌgte mkaaçx,
Idxna açesatx idxçxaçxáana nwẽeseꞌjwaꞌjaꞌs vxitna jxãꞌphkaçx jĩk. 37 Açaꞌ Kristoꞌ ¿maꞌwẽçxa Davxid nçxiꞌk yuukx? Davxid íiwa Kristoꞌs weꞌweçxaꞌ: Adxna jxpeꞌjsa jĩk. Txãꞌwẽ Jesus ptaꞌsxteꞌ, nasa txazkuẽesay wala weçxana wẽsẽꞌjeꞌtx.
Ley kaapiyaꞌjsaweꞌsxtxi yuuwesa Jesus nvxiitni
(Mt 23.1-36; Lk 11.37-54; 20.45-47)
38 Txajũꞌ Jesusaꞌ naꞌwẽ yuꞌkxpehnak kaapiyaꞌj:
—Dxus ley kaapiyaꞌjsaweꞌsxtxiꞌ jxpaꞌyakx meꞌjuwe. Txãaweꞌsxaꞌ ropa jxuꞌjsa athçxatx nasatx weçxaa jxthãasna pekũjuꞌ msuuwa. 39 Saꞌ judiuweꞌsx pkhaakhenisuwa kaçxni wejx ewsaçxáanatx pakwéꞌ, vxiteꞌ sãꞌjĩyaꞌ piꞌkxni yat-suwa txãꞌwẽytxi yuꞌ. 40 Saꞌ vxiudaweꞌsx kĩh jiꞌphuniꞌswa jxuka kusaꞌjçxatx txãa pesweniꞌs kaapeçxkanaꞌjyaꞌ wala jxuꞌj weꞌwena lisáꞌ. Txãꞌwẽ yũupaꞌga txãaweꞌsxaꞌ wejx jxthaakwe Dxus kastigãyni yuutxna jĩk.
Vxiuda ofxreda akhni
41 Saꞌ Jesusaꞌ dxuus yatte vxyu ãsxni dxiꞌpte kaçxçxa thegnak uꞌpuꞌ ofxreda ãsxyaꞌ kũusatx. Açaꞌ maaíi yuꞌ vxyu wala jiꞌphsaꞌ seenaꞌ wala akhetx. 42 Naapkaçxhaꞌ teeçx uꞌy vxiuda puuplesa kũhçxaꞌ, eꞌz vxyuu musxkuẽçxáak akh. 43 Açaꞌ Jesusaꞌ txãa yakh uꞌjusaweꞌsxtxi paꞌyaçxa naꞌwẽk ptaꞌsx:
—Naa uꞌy vxiudaꞌ kĩh yuhwa jiꞌphmeesaçxawa maa maatewa jxthaakwek akh. 44 Vxite yuꞌ akheꞌtx, nawa txãaweꞌsx peejinimée kijxasaçxáanatx akheꞌ. Nawa naa uꞌyaꞌ kĩh yuhwa jiꞌphmeesaçxawa txajx ũꞌ weywaꞌjaꞌs jxukak akh jĩnak ptaꞌsx.
Dxuus yat pçuwaꞌjaꞌs Jesus ptaꞌsxni
13 Txajũꞌ Jesusaꞌ dxuus yatu kasejeçteꞌ, txãa yakh uꞌjusa teeçxsaꞌ naꞌjĩnak weꞌwe:
—Mtheg, naa yataꞌ naꞌwẽ seenaꞌ wala txaahniꞌ kwet zhiçxkwesa yakh jĩteꞌ, 2 Jesus pasçxaꞌ:
—Naa yat walaꞌs wáꞌga theguꞌ, açaꞌ txãꞌwẽ yujaꞌ. Nawa jxuka pçuuna, açaꞌ teeçx kwetçxáa yuhwa kẽeseꞌjnimeesa yuꞌ neeyũumeena jĩk.
Naa kiwe pçuwaꞌj en ãjaçte seenaꞌsa vxyaawaꞌj
(Mt 24.3-28; Lk 21.7-24; 17.22-24)
3 Saꞌ txajũ kasehçxaꞌ, Oliwos thãꞌj dxuus yat dxiꞌptek neeyũꞌ kxteetx uꞌj. Kxtee paꞌjçxa Jesusaꞌ kaçxçxa uꞌpteꞌ, Pedro, Jakobo, Juan, Adres txãaweꞌsxaꞌ naꞌwẽtx paaçte pẽjx:
4 —Bagaçx txãꞌwẽ dxuus yataꞌ pçuwaꞌjsakx txãꞌsaꞌ ptaꞌsxwaçaꞌ, sũjuꞌthaꞌw. Saꞌ txãꞌwẽ yuuwaꞌj en ãjãçteꞌ, ¿kĩhçxa yuukx? txãꞌsnathaꞌw jiyu wẽjẽꞌ jĩteꞌ, 5 Jesusaꞌ ptaꞌsxku:
—Mpaꞌyajkxwe kaypubaꞌjweꞌsxte. 6 Txãꞌwẽmeꞌ, wala kasejetxna: Adxíi Kristoth jĩna. Txãꞌwẽ yũuçxa maaíi yuutxiꞌ wala kaypubaꞌjatxna.
7 Saꞌ iꞌkweꞌsxaꞌ wẽsẽꞌjeneꞌkwe gweçxa uꞌpaꞌ saꞌ aysuwa gweçxa paꞌjana jĩniꞌs, nawa ũukhmeeneꞌkwe. Txãꞌwẽ kxtey yuuyujuna, nawa nmeh en meeaꞌ. 8 Açaꞌ gobiernoꞌ vxite kiwete gobierno yakh puutx puiitxna. Naapkaçxhaꞌ puutx jxuꞌj kiwejũ pweꞌsxwa puutx puiitxna. Mtee mteewa seenaꞌ ehd uꞌjwena. Seenaꞌ wẽjẽ enwa paꞌjana. Saꞌ nasawa wala susutxna gobiernotx açeweꞌwena. Nawa pxthaa nxuswaꞌj en takhnaçxáa txãꞌwẽ yuuna.
9 Nawa iꞌkweꞌsxaꞌ jxpaꞌyakx meswe. Txãꞌwẽmeꞌ judiu nthẽꞌjsaweꞌsx kusete iꞌkweꞌsxtxi dukhçxa, txãaweꞌsx pkhaakhenite nuypaꞌjçxa pkxuutxna. Saꞌ iꞌkweꞌsxaꞌ adxna selpiiyaꞌ utxaapaꞌga ahçeçxa neꞌjweꞌsx tasxsu vxiteꞌ jxkaahsa tasxsu kuutxaꞌjni yuuneꞌkwe. Txãꞌwẽ kxsũ paꞌjçxaꞌ, jxkaahsaweꞌsxtxiwa ptaꞌsxyaꞌ ãjãneꞌkwe adx kaapiyaꞌjniꞌs. 10 Nmeh en utxaaçteꞌ, Dxus yuwe ewte nvxiitwaꞌjsaꞌs mtee mteewa jxuka ptaꞌsxni yuuna.
11 Txãꞌwẽ iꞌkweꞌsxtxiꞌ jxkaahsa kusete dukhyaꞌ jxũna uꞌtheꞌ, ¿maꞌwẽ pasukxthaꞌw? sũhna kuh yaakxnuwe ũukhna. Dxusaꞌ txãa dudte kaaũusutheꞌjena txãꞌsçxáa mweꞌwewe, txãa paꞌgatey iꞌkweꞌsx weꞌwewaꞌjsameeiꞌkwe. Dxus Espiritu iꞌkweꞌsx ũuste kaayakiꞌjwaꞌjsaꞌ iꞌkweꞌsx weꞌwewaꞌjaꞌs, açaꞌ txãꞌsçxáa weꞌwewaꞌjsaiꞌkwe. 12 Naa kiwete nasaꞌ peekx nyakhtxi ahçeçxa kiikheꞌjetxna, açaꞌ neyweꞌsxwa peekx nçxiꞌktxi ahçeçxa kiikheꞌjetxna. Txãꞌwẽy nçxiꞌkweꞌsxwa neyweꞌsxtxi ahçeçxa kiikheꞌjetxna. 13 Iꞌkweꞌsxaꞌ adxna selpiipaꞌgaçxáa naa kiweteweꞌsx jxuka yaaçeni fxiꞌzeneꞌkwe. Nawa uu entepkaçx Dxus yakh txutemée fxiꞌzeçxaꞌ, ewte neeyũuneꞌkwe.
14 Naꞌwẽ fxiꞌjniꞌs jiyuyaꞌ jxpaꞌyakx mlẽeywe: Dxus yuwe ptaꞌsxsa Danielaꞌ fxiꞌkh dxuus yatte kazx ewmée yuuna paꞌjwaꞌjaꞌs. Açaꞌ txãꞌwẽ kxtey yuuçte uyçxaꞌ, Judea kiwete ũssa nasaꞌ çxhab peekuꞌj yuꞌkhsuçxaçxáa ũphna kasejeneꞌkwe. 15 Açaꞌ txãꞌwẽ seenaꞌ yuuçyãꞌtheꞌ, ẽe yat-su uꞌpsa ũphna saꞌjçxawa, kĩh yuhwa kutxiꞌjwaꞌj en jiꞌphumeetxna. 16 Txãꞌwẽy mjĩi ehsu uꞌjusawa txajx atxhçxáꞌswa yatuh kutxiꞌjyaꞌ paꞌjwaꞌj en jiꞌphumeetxna. 17 Txãa ensuꞌ nasa jiꞌphsa vxiteꞌ luuçx ãpãkuẽ jiꞌphsaꞌ wala yuh nxus pxthaa yuutxna. 18 Iꞌkweꞌsxaꞌ Dxusna mpiꞌkxwe, txãꞌwẽ ũphwaꞌj enaꞌ nus ente yuukahmén. 19 Txãꞌwẽmeꞌ iiméh seenaꞌ wala nxuswaꞌj en yuuna. Naa kiweꞌs Dxus pheuꞌjiyna, bagaçxte yuhwa nxuswaꞌj en txãꞌwẽsa yuꞌ uꞌpuꞌçmeꞌ, saꞌ txãa skhẽwniijũyãꞌjaꞌ bagaçxte yuhwa txãꞌwẽy nxussa yuꞌ uꞌpumeena. 20 Kweꞌsxtxi takiꞌsa Dxusaꞌ txãꞌwẽ seenaꞌ nxuswaꞌj enaꞌs txaçxmée vxitmeete yuꞌ, naa kiwete nasa kim yuhwa ĩtxĩ neeyũumeetxna. Nawa txãꞌwẽ seenaꞌ nxuswaꞌj en uꞌpuwaꞌjaꞌs Dxusaꞌ txaçxmeek vxit txajx nasa txhitxhnisatx peeygãhçxa.
21 Txajũꞌ maaíi yuꞌ iꞌkweꞌsxtxi naꞌjĩtxna: Myuhwe thegyaꞌ, Kristoꞌ ayte ũsaꞌ jĩtxna. Meeçxawa: Meꞌjwe thegyaꞌ, Kristoꞌ kxtee ũsaꞌ jĩtewa, iꞌkweꞌsxaꞌ kxtey yuunuwe. 22 Txãa ensuꞌ wala ĩsxĩisa kasehçxa: Kristothaꞌw jĩtxna, naapkaçxhaꞌ vxiteꞌ: Kweꞌsxaꞌ Dxus yuwe ptaꞌsxsathaꞌw jĩna pekũjutxna, kaypubaꞌj wẽeçxa kĩjkĩhwa kaavxyaꞌjaꞌjna. Jxpaꞌyakxmeeteꞌ, Dxus txhitxhnisa yuhtxwa kaypubaꞌjatxna. 23 Açaꞌ txãꞌwẽ yũuweꞌsxte, adxaꞌ dxiikhẽy ptaꞌsxiçthu iꞌkweꞌsx jxpaꞌyakx ũskahn.
Dxus Nçxiꞌk Nasa Yuusáa seenaꞌ zhiçxkwe vxyaana
(Mt 24.29-35, 42-44; Lk 21.25-36)
24 Nawa txãꞌwẽ nxusni en skhẽwniijũꞌ, sekaꞌ çxhiꞌdxina, açaꞌ aꞌtewa kweethmeena. 25 Naapkaçxhaꞌ estrelxaꞌ cielujũ ũsxitxna, açaꞌ kĩjkĩhwa seenaꞌ walasa ẽe walate ũstxna txãawa jxuka kẽeseꞌjni yuutxna. 26 Txãꞌwẽ yũunijũꞌ, Dxus Nçxiꞌk Nasa Yuusaꞌs uyuutxna tãaph pxãhte seenaꞌ zhiçxkwe kweethna kĩjaçte. 27 Saꞌ kĩhçxaꞌ txajx angelesweꞌsxtxi jxkaajana txajx nasa txhitxhnisa mtee mteewa ũstxna txãatx jxuka pkhakhkahn.
28 Naa ejemploꞌs peçxkananuwe: higwera fxtũu tasx uꞌse yeeçuçte uyçxaꞌ, jiyuꞌiꞌkwe yũnyaꞌwatewa. 29 Txãꞌwẽy naꞌwẽ ptaꞌsxthu txãatx uyçxaꞌ, jii mfxiꞌzewe nmeh enaꞌ utxaaçna sũhna. 30 Isath weꞌweꞌ: txãꞌwẽ seenaꞌ nxuswaꞌj enaꞌs uyuutxna naa ensu nasa uumey. 31 Cielu naa kiwe jxuka skhẽuutxna, nawa adx weꞌweniꞌ jxuka kxtey yuumey yuꞌ skhẽwmeetxna. 32 Nawa txãꞌwẽ Dxus Nçxiꞌk kĩh orate kĩiwaꞌjsatewa, txãa en yuꞌsaꞌ kim yuhwa jiimeetaꞌ cielute Dxus angelesweꞌsxwa jiimeetaꞌ, açaꞌ Dxus Nçxiꞌk íi yuhwa jiimeꞌ, naasáa Dxus yuuçxáa jiiaꞌ.
33 Txãa paꞌga iꞌkweꞌsxaꞌ wala jxpaꞌyakx meswe, Dxusna yuuçxáa neeweꞌwena. Txãꞌwẽmeꞌ jiimeeiꞌkwe bagaçx kĩiwaꞌjsatewa. 34 Txãꞌ naꞌwẽ yuuna: Teeçx piçthẽꞌj jxuꞌj kiwen uꞌjweççxaꞌ, yatu kasehmey selpisaatx teeçxsa naꞌwẽçxah mjĩi ũsçxa kxtee jxpaꞌyakx ũskahn teeçx thegwaꞌjsa txajana. 35 Txãꞌwẽy iꞌkweꞌsxwa wala jxpaꞌyakx meswe. Txãꞌwẽmeꞌ jiimeeiꞌkwe çxhiꞌdxiçte maꞌk yuu, meeçxaꞌ kuspxãh atalx weꞌweçte maꞌk yuu, meeçxaꞌ kusíi maꞌk yuu nawa paꞌjçxáa yuuna. 36 Txãꞌwẽmeꞌ yajkxmée ũsiyna, naa dudte paꞌjçxáa wáa yuuna. 37 Iꞌkweꞌsxçxáatx ptaꞌsxmée, jxukaysatxthu ptaꞌsxiꞌ jxpaꞌyakx ũskahn.
Jesusaꞌs ikhwaꞌjaꞌs puutx weꞌweni
(Mt 26.1-5; Lk 22.1-2; Jn 11.45-53)
14 Paskuaꞌs ũꞌni vxiteꞌ pan lewadura jiꞌphmée ũꞌni fxiesta txãa eꞌz fxiesta ãjxaꞌ eꞌz ençxáak peejx yuꞌ. Txãa ente Dxus leyaꞌs kaapiyaꞌjsaweꞌsx vxiteꞌ sacerdote npiiçthẽꞌjweꞌsxaꞌ puutx weꞌwetx maꞌwẽ yũuçxa kimwa jiyunimeete Jesusaꞌs kiikheꞌjyaꞌ ãjãwaꞌjaꞌs. 2 —Nawa fxiesta entemée kiikheꞌjeꞌnjaꞌw. Txãꞌwẽmeꞌ, nasa wala susutxna jĩnatx puutx weꞌwe.
Wẽt putasá paꞌgasaꞌs teeçx uꞌy Jesus dxikthekhẽ awni
3 Naapkaçxhaꞌ Jesusaꞌ Betaniate Simon wãꞌjy weeju katxhisa yattek uꞌp yuꞌ. Açaꞌ kxtee uꞌpteꞌ, teeçx uꞌy wẽt putasá kĩh yuhwa kaꞌdnimeesa wala paꞌgasaꞌs atçxak kũh. Saꞌ fxraskoꞌs uhdçxa Jesus dxikthekhẽk aw. 4 Açaꞌ kxtee ũssaꞌ maaíi yuꞌ ũusaçxatx txãaweꞌsx pweꞌsx naꞌjĩna:
—¿Kĩh yũupaꞌgaçxáaga naa wẽt putasá txakwe paꞌgasaꞌs kxul psuwúꞌ? 5 Wejx yuuwa trescientos pesote txweyçxa puupletx puꞌçxyaꞌ ewneꞌ yuꞌ jĩnatx txãa uꞌyaꞌs ahçena wẽesxũu.
6 Açaꞌ Jesusaꞌ naꞌjĩnak weꞌwe:
—¿Kĩjxaꞌkwe wẽesxúꞌ? Kuçx yuunuwe. Naꞌwẽ yũuk txãꞌ kxul vxituni yuumeꞌ. 7 Puupletx peeswaç ewneꞌ yuꞌ jĩꞌiꞌkwe naꞌ puuplesatxiꞌ bagaçxtewa peesyaꞌ ãjãneꞌkwe, iꞌkweꞌsx yakh nes yuutxna naa paꞌga. Nawa adxaꞌ iꞌkweꞌsx yakh nes yuuyaꞌwameeth. 8 Adx uute adx kakwete sxũsxwaꞌjaꞌs maꞌwẽçxáawa yũuk adx uumeyna. 9 Isath weꞌweꞌ, naa kiwete mtee mteewa Dxus yuweꞌs ptaꞌsxna pekũhsaꞌ, naa uꞌy txãꞌwẽ yũuniꞌswa jaꞌda ptaꞌsxni yuuna peçxkanamée jĩk.
Jesusaꞌs preesuꞌjwaꞌjaꞌs Judas dukhyaꞌ neeyũuni
10 Txajũꞌ txãa yakh uꞌjusa teeçxsa Judas Iskarioteꞌ sacerdote npiiçthẽꞌjweꞌsx kusete Jesusaꞌs dukhyaꞌ puutx weꞌweyaꞌ uꞌkh. 11 Açaꞌ txãaweꞌsxaꞌ wala weçxana vxyu dukhyaꞌ neeyũutx. Txajũꞌ Judasaꞌ ¿maꞌwẽ yũuçxa Jesusaꞌs açesaweꞌsx kusete dukhekiꞌth? sũhna wala yajkxku.
Jesusaꞌ docesaweꞌsx yakh nmeh ũꞌni
(Mt 26.17-29; Lk 22.7-23; Jn 13.21-30; 1 Ko 11.23-26)
12 Pan lewadura jiꞌphmée ũꞌni fxiesta en ãjãçteꞌ, Paskuaꞌjwaꞌj piisxaatx ikheꞌ txãa enteꞌ txãa yakh uꞌjusaweꞌsxaꞌ Jesusaꞌs pẽjxtxi:
—¿Paskuateweꞌsxaꞌs ũꞌyaꞌ mtee pheuꞌjyaꞌ kaajxaꞌwaga? jĩteꞌ, 13 txãa yakh uꞌjusaweꞌsx eꞌzsatx naꞌwẽk jxkaah:
—Meꞌjwe Jerusalenna. Saꞌ kxtee teeçx piçthẽꞌj uyuuneꞌkwe yuꞌ mitxhaꞌs yakhçxa uꞌjweçte. Saꞌ eꞌstey uꞌjweneꞌkwe, 14 açaꞌ txãa mtee uꞌkateꞌ, iꞌkweꞌsxwa kxtee uꞌkaçxa yat namuꞌs pẽyineꞌkwe: ¿Mtee piesa ũsukiꞌg Paskuateweꞌsxaꞌs pheuꞌjçxa adx yakh uꞌjusaweꞌsx yakh ũꞌwaꞌjaꞌs? jĩnak kweꞌsxtxi jxpeꞌjsaꞌ yuwe kaah jĩneꞌkwe. 15 Açaꞌ txãꞌ ptaꞌsxina ẽe yatte teeçx piesa walasa pheuꞌjniyãꞌjsa. Kxtee Paskuate ũꞌwaꞌjaꞌs pheuꞌjuneꞌkwe.
16 Txãꞌwẽ jxkaatheꞌ, txãaweꞌsxaꞌ çxhabna uꞌjçxaꞌ Jesus maꞌwẽ jxkaahniꞌs jxuka kxtey uyçxaꞌ, Paskuate ũꞌwaꞌjaꞌs pheuꞌjtx.
17 Jxuka çxhiꞌdxiçteꞌ, Jesuswa kxtee paꞌkh txãa yakh uꞌjusaweꞌsx yakh. 18 Saꞌ mesate ũꞌna uꞌpçxaꞌ, naꞌjĩk:
—Isath weꞌweꞌ, ayte adx yakh ũꞌna uꞌpsa teeçxsaꞌ adxaꞌs açesaweꞌsx kusete dukhyaꞌwaꞌ jĩteꞌ, 19 jxukaysa nxus weꞌwena puutx yaꞌpaapẽyĩꞌtx:
—Meeçxaꞌ ¿adx wáa txãꞌwẽ açesaweꞌsx kusete dukhwaꞌjsaneꞌtka? jĩnatx jxukaysa txãꞌwẽçxaçxáa weꞌweꞌ.
20 Açaꞌ Jesusaꞌ ptaꞌsxku:
—Adx yakh uꞌjusa teeçxsaꞌ maa txãꞌwẽ adx yakh jaꞌdaçxah kuseꞌs plaatukhẽ akhena txãa adxaꞌs açesaweꞌsx kusete dukhwaꞌjsaꞌ. 21 Dxus Nçxiꞌk Nasa Yuusaꞌ maꞌwẽ uuwaꞌjsatewa Dxus librute ptaꞌsxiꞌk txãꞌsaꞌ kxtey yuuyujuna. Nawa adxaꞌs açesaweꞌsx kusete dukhsaꞌ seenaꞌ yuh nxuste khẽjena. Txãa piçthẽꞌjaꞌ wejx yuuwa naa kiwete kasehmeewaçneꞌ wejx ew yuꞌ jĩnak weꞌwe.
22 Nee ũꞌna uꞌpíi, Jesusaꞌ panaꞌs jxpaꞌgaçxa Dxusna weçxanaꞌwa peꞌltedeçxa ũsuꞌsku naꞌjĩna:
—Mẽꞌwe, naa panaꞌ adx kakwe naꞌwẽsaꞌ jĩçxaꞌ, 23 wasoꞌswa jxpaꞌgaçxa Dxusna weçxanaꞌwa jxukaysatx tudxkaatheꞌ, jxukaysa tudtxi txãa wasoteweꞌsxaꞌs. 24 Açaꞌ Jesusaꞌ naꞌwẽk weꞌwe:
—Naa wasoteweꞌsxaꞌ adx ee naꞌwẽsaꞌ, maazkuẽesatewa ãh uwuwaꞌjsaꞌ. Dxusaꞌ txãꞌwẽk adx eeaꞌs pkawçxa yuuçxáa iꞌkweꞌsxtxi nweꞌwewaꞌjaꞌs nvxiht uꞌse pheuꞌjçxa. 25 Isath weꞌweꞌ: Ãçxhũyãꞌjaꞌ peena yuꞌ tudxmeꞌnja naa uwa yuꞌaꞌs, naasáa Dxus jxkaahwaꞌj ente yuuçxáa kiꞌ tudxiꞌnja.
Pedro ĩsxiiwaꞌjaꞌs Jesus ptaꞌsxni
(Mt 26.30-35; Lk 22.31-34; Jn 13.36-38)
26 Txajũꞌ Dxusna weçxana memçxaꞌ, Oliwos vxiçna uꞌjtx.
27 Kxtee paꞌjçxaꞌ, Jesusaꞌ naꞌwẽk ptaꞌsx:
—Dxus librute weꞌweçxaꞌ: piisxáa-thegsaꞌs ikhteꞌ, piisxáꞌ jxuka ũphuutxna jĩꞌk txãa paꞌga naa kusteꞌ iꞌkweꞌsxaꞌ adx tasxu jxuka ũphuuneꞌkwe. 28 Txãꞌwẽ yuutewa, adxaꞌ kiꞌ ĩtxĩ yuuçxa iꞌkweꞌsx yaçte uꞌjweꞌnja Galilean jĩteꞌ, 29 Pedro pasçxaꞌ:
—Vxite yuꞌ makwe ũukhçxa ũphtewa, adx yuꞌ txãꞌwẽ yũumeꞌnja jĩk. 30 Açaꞌ Jesusaꞌ naꞌwẽk ptaꞌsx:
—Idxaꞌs isath weꞌweꞌ, naa kuste atalx eꞌz us weꞌwemeyna, tekh us ĩsxĩijaç yuuneꞌga adxaꞌs jiimeeth jĩna. 31 Txãꞌjĩtewa, Pedroꞌ jweeíiçxáak çxhãçxha weꞌweꞌ:
—Makwe idx yakh ih uuneꞌjçxawa, idxaꞌs jiimeeth jĩna yuꞌ ĩsxĩimeꞌnja jĩteꞌ, jxukaysa txãꞌwẽçxaçxáatx weꞌwe.
Jesusaꞌ Geçemanite Dxus yakh puutx weꞌweni
32 Txajũꞌ teeçx ahte paꞌjtx, Geçemaní yaasesate. Saꞌ Jesusaꞌ txãa yakh uꞌjusaweꞌsxtxi:
—Ayte meꞌpwe, naapkaçxhaꞌ adxaꞌ Dxus yakh puutx weꞌweyaꞌ uꞌjweçthu jĩçxaꞌ, 33 Pedro, Jakobo, Juan txãaweꞌsxçxáatx peꞌjçxa uꞌkh. Txajũꞌ Jesusaꞌ wala nxus yajkxçxaꞌ, 34 naꞌjĩnak ptaꞌsx:
—Txakwe wala pxthaa yuuçxa uuwaꞌjaꞌs yajkxteꞌ, wala nxus yujaꞌ. Açaꞌ iꞌkweꞌsxaꞌ ayte dehmée meꞌpwe jĩçxaꞌ, 35 jxuꞌjmeekuẽ uꞌjçxa kiwega pkipha weteçxa Dxusna pẽjxku txãꞌwẽ seenaꞌ yuuçxa uuwaꞌjaꞌs yuꞌpthejkahn naꞌjĩna: 36 Tata, idx yakhaꞌ kĩh yuhwa thẽysa yuꞌ meeaꞌ. Açaꞌ txãꞌwẽ seenaꞌ nxuste uuwaꞌjũ meen nweꞌwe. Nawa adx jxthãasniꞌs kxtey yuumeeçxawa, iidx jxthãasniçxáꞌs kxtey meen yũu jĩk.
37 Txajũꞌ Jesusaꞌ txãa tekhsatx thegyaꞌ kũhçxaꞌ, dehna ũstek uy. Saꞌ Pedroꞌs weꞌwek:
—Dehmée uꞌpkaatheꞌ, ¿teeçx oraçxáawa ĩtxĩ uꞌpmée dehwáꞌga? 38 Ewmeete weteyaꞌmée, Dxus yakh puutx weꞌwena meꞌpwe dehmée. Iꞌkweꞌsxaꞌ ũusuh yuꞌ çxhãçxhaiꞌkwe yaakiꞌ, nawa kakwe yuꞌ çxhãçxhaçmeꞌ kxtey yuuyaꞌ.
39 Txajũꞌ kiꞌkin Jesusaꞌ uꞌjçxaꞌ, txãꞌwẽyçxáak weꞌwena Dxus yakh puutx weꞌweꞌ. 40 Saꞌ thegyaꞌ kiꞌ sxawedçxaꞌ, txãꞌwẽy deeni ũstek uyna kũh, txãaweꞌsx yafxaꞌ dee wẽeçxa çxhãçxhaçmeeneꞌta naa paꞌga. Txãꞌwẽ Jesus uyna kũhte, maꞌwẽ pasyaꞌ yuhwa ãjãꞌçmeetaꞌ.
41 Txajũꞌ tekh uswa txãaweꞌsxtxi thegna kũhçxaꞌ, Jesusaꞌ naꞌjĩk:
—Ãçxh yuuçxáꞌ jxkaaseyaꞌ mdejxujíiwe. Nawa ãçxhaꞌ pejka en ãjk, Dxus Nçxiꞌk Nasa Yuusaꞌs ewmeesaweꞌsx kusete dukhwaꞌj. 42 Txãꞌwẽyãꞌjaꞌ açaꞌ kiiteçxa mejkawe. Adxaꞌs açesaweꞌsx kusete dukhwaꞌjsaꞌ yujxãꞌjaꞌ jĩk.
Jesusaꞌs preesuꞌjni
(Mt 26.47-56; Lk 22.47-53; Jn 18.2-11)
43 Kxtee weꞌwena nee ũsiyna, Judasaꞌ kũjk. Txãa yuꞌ Jesus yakh uꞌjusa docesateweꞌsxíiçxáak yuꞌ, açaꞌ txãa Judas yakh nasa wala kũhtx kçxilx fxtũ txãꞌwẽ atçxa. Txãaweꞌsx yuꞌ Dxus leyaꞌs kaapiyaꞌjsaweꞌsx vxiteꞌ sacerdote npiiçthẽꞌjweꞌsx vxiteꞌ judiu nthẽꞌjsaweꞌsx jxkaahnitx yuꞌ. 44 Judasaꞌ Jesusna uwewaꞌjsatx naꞌwẽkuꞌga yuꞌkxweꞌweçxa peꞌjna yuwéꞌ: Maꞌsna dxiꞌpte weçxaꞌnja txãꞌsna iꞌkweꞌsxaꞌ tudçxa jxũna uꞌjweneꞌkwe jĩnaga yuꞌkxweꞌwe.
45 Txajũꞌ Jesus tasxte utxaana kũhçxaꞌ:
—Kweꞌsxtxi jxpeꞌjsa jĩçxa weçxak. 46 Naapkaçxhaꞌ nasaꞌ Jesusaꞌs tudtxi jxũna uꞌjyaꞌ.
47 Txãꞌwẽ Jesusaꞌs tuduçteꞌ, Jesus yakh uꞌjusa teeçxsaꞌ kçxilxaꞌs jxkuutxiꞌjçxa sacerdote npiiçthẽꞌjna selpisáa thũꞌwẽꞌs spẽꞌthku.
48 14:48-49 Txajũꞌ Jesusaꞌ nasatxiꞌ naꞌjĩk:
—Adxaꞌ een isath dxuus yatte kaapiyaꞌjna ũsuꞌ iꞌkweꞌsx ksxavxyte. Nawa txagaçxhíi yuꞌ tudmeeçxaꞌ, ãçxh yuꞌ peswéethasiꞌkwe kçxilx petx fxtũ atçxa paꞌj, tudçxa jxũna uꞌjyaꞌ. Nawa Dxus librute fxiꞌjni ũsaꞌ txãa kxtey yuukahn txãꞌwẽ yuuçaꞌ jĩnak weꞌwe. 49 —
50 Txajũꞌ Jesus yakh uꞌjusaweꞌsxaꞌ txãꞌsçxáana nvxihtçxa jxuka ũphna uꞌjtx.
Teeçx piçtakx iyuna uꞌjni
51 Naapkaçxhaꞌ teeçx piçtakx dee paꞌçxni yakhçxáak Jesus eꞌstey uꞌjweç yuꞌ, açaꞌ txãꞌsnawa tuduçtxi yuꞌ. 52 Nawa dee paꞌçxniꞌs nvxihtçxa, iyuna uꞌkh sũpxçxáa.
Judiu nthẽꞌjsaweꞌsx tasxte Jesusaꞌs kuutxaꞌjni
(Mt 26.57-68; Lk 22.54-55, 63-71; Jn 18.12-14, 19-24)
53 Txajũꞌ Jesusaꞌs sacerdote npiiçthẽꞌj tasxte nuypaꞌjtx. Açaꞌ kxteꞌ sacerdoteweꞌsx, judiu nthẽꞌjsaweꞌsx Dxus leyaꞌs kaapiyaꞌjsaweꞌsx jxukay pkhaakhetx. 54 Açaꞌ Pedroꞌ Jesus eꞌste jxuꞌkh neeyũuna uꞌjna ũsuꞌ, sacerdote npiiçthẽꞌj yat patxute paꞌphkaçx. Saꞌ patxute neeyũuk policiaweꞌsx yakh ipx bajçxna. 55 Naapkaçxhaꞌ sacerdoteweꞌsx vxiteꞌ judiu nthẽꞌjsaweꞌsx jxukay pkhaakheçxa, Jesus ewmée yũuniꞌs pakwetx, ewmée yũuniꞌs kpajkxçxa kiikheꞌjyaꞌ sũhçxa. Nawa uymeetaꞌ. 56 Txãꞌwẽ uymeetewa maaíi yuꞌ: Jesusaꞌ yuuwesa yujaꞌ jĩna yuwe ũsuꞌtx. Nawa txãaweꞌsx ptaꞌsxniꞌ isamée fxiyfxiyçxáak kasejeꞌ. 57 Txãꞌwẽtewa maaíi yuꞌ naꞌwẽtx weꞌweyaꞌ yajkx:
58 —Jesus weꞌweçxaꞌ: Naa dxuus yat nasaa txaahniꞌs pẽtxçxa, tekh enteꞌ kiꞌ vxite txajaꞌnja nasa vxitnimeesa jĩna weꞌweniꞌs kweꞌsxaꞌ iiwẽsẽꞌthaꞌw jĩnatx pãatxhĩꞌkheꞌ.
59 Makwe txãꞌwẽ weꞌwetewa, txãawa isamée íiçxáak kasejeꞌ.
60 Txajũꞌ sacerdote npiiçthẽꞌjaꞌ kiiteçxaꞌ, Jesusaꞌs naꞌwẽk weꞌwe:
—Naꞌwẽtx pãatxhĩꞌkheꞌ ¿txãꞌsaꞌ maꞌwẽçxáawa pasyaꞌwameegáꞌ? Meeçxaꞌ ¿isa yuh txãꞌjĩwáꞌnta? jĩtewa, 61 Jesusaꞌ teeçx yuweçxáa yuhwa pasmeꞌ. Açaꞌ sacerdote npiiçthẽꞌjaꞌ kiꞌkin pẽjxku:
—¿Idxaꞌ Kristo, Dxus Nçxiꞌk dxihgáꞌ? jĩteꞌ, 62 Jesus pasçxaꞌ:
—Txãꞌwẽíith. Açaꞌ iꞌkweꞌsxaꞌ uyuuneꞌkwe Dxus Nçxiꞌk Nasa Yuusaꞌ Dxus pukate kaçxçxa uꞌpte. Saꞌ cieluju tãaphte kĩjaçtewa uyuuneꞌkwe jĩk.
63 Txajũꞌ sacerdote npiiçthẽꞌjaꞌ peekx athni ropaꞌs ũusçxa sudeçxa naꞌwẽk weꞌwe:
—¿Kĩjxaꞌçxáa testigo jwee pejiikxthaꞌw? 64 Iꞌkweꞌsx wẽsẽꞌjna ũste naꞌwẽk Dxusaꞌs açeweꞌwe. Açaꞌ iꞌkweꞌsxaꞌ ¿maa sũjũꞌkwe? jĩteꞌ, jxukaysa pasçxaꞌ:
—Txãꞌsaꞌ ikhteçxáa ewna jĩtx.
65 Txajũꞌ vxite yuꞌ dxiꞌpte fxneꞌsx avxythethna dxiꞌpaꞌs aphçxatx ukaꞌkana naꞌjĩꞌ:
—Mjiyu wakx ¿kimga idxaꞌs ukaꞌkaꞌ? jĩnatx npeevxysxikaꞌ. Açaꞌ policiaweꞌsxwa txãꞌwẽytxi dxiꞌpte ukaꞌkaꞌ.
Jesusaꞌs jiimeeth jĩna Pedro weꞌweni
(Mt 26.69-75; Lk 22.56-62; Jn 18.15-18, 25-29)
66 Pedroꞌ patxute ũsteꞌ, teeçx uꞌy sacerdote npiiçthẽꞌjaꞌs selpisáa kũhçxaꞌ, 67 Pedroꞌs uyku txãꞌwẽ ipx bajçxna uꞌpte. Saꞌ dxiꞌpte ew thegçxa, naꞌjĩnak weꞌwe:
—Idxwa Nasarethuweꞌsx Jesus yakh uꞌjusag jĩteꞌ, 68 Pedroꞌ ĩsxĩik:
—Adxaꞌ txãꞌsaꞌ jiimeeth kimnaneꞌkwe weꞌwe naꞌswa jĩçxaꞌ, kasehna uꞌjçxa ekajuk ũsuꞌ. Naapkaçxhaꞌ atalx weꞌwek. 69 Açaꞌ txãa uꞌyaꞌ Pedroꞌs kiꞌ uyçxaꞌ kxtee ũssatxiꞌ naꞌjĩnak ptaꞌsx:
—Naa piçthẽꞌjaꞌ pejka Jesus yakh yuh uꞌjusaꞌ jĩnak weꞌwe. 70 Nawa Pedro yuꞌ kiꞌkin ĩsxĩik. Açaꞌ txãa eꞌsuꞌ kxtee ũssawa Pedroꞌs naꞌjĩnatx weꞌwe:
—Isa, idxaꞌ txãa yakh yuh uꞌjusag. Galileajuweꞌsxçxa íig txãjũ nasa naꞌwẽ weꞌweꞌ jĩteꞌ, 71 Pedroꞌ ũusçxa weꞌwena jurãyku:
—Isa Dxus uyte, iꞌkweꞌsx kxsuusuꞌiꞌkwe txãa piçthẽꞌjaꞌs jiimeeth jĩçpkaçxhaꞌ, 72 atalxaꞌ eꞌz us weꞌwek. Txajũꞌ Pedroꞌ Jesus weꞌweniꞌs yajkxku: Atalx eꞌz us weꞌwemeyna, idxaꞌ tekh us ĩsxĩijaç yãꞌj yuuneꞌga adxaꞌs jiimeeth jĩniꞌs. Açaꞌ Jesus weꞌweni kxtey yuuteꞌ, Pedroꞌ wala ũꞌnek.
Jesusaꞌs Pilato kusete dukhni
(Mt 27.1-2, 11-14; Lk 23.1-5; Jn 18.28-38)
15 Txajũꞌ khikhyna sẽjẽçteꞌ, sacerdoteweꞌsx judiu nthẽꞌjsaweꞌsx, Dxus leyaꞌs kaapiyaꞌjsaweꞌsx yãꞌjçxa walasa pweꞌsx pkhaakheçxa Jesusaꞌs tudçxa jxũna uꞌjtx Pilato tasxte kuutxaꞌjyaꞌ. 2 Açaꞌ Pilatoꞌ Jesusaꞌs naꞌjĩnak pẽjx:
—¿Idx wáa judiuweꞌsxtxi jxkaahsaneꞌga? jĩteꞌ, Jesusaꞌ pasku:
—Txãꞌwẽ íith. Isa yuh weꞌweg jĩk.
3 Txajũꞌ sacerdoteweꞌsxaꞌ Jesusaꞌ kĩhtewa jxuka ewmeesaꞌ jĩnatx yuwe ũsuꞌ. 4 Açaꞌ Pilatoꞌ kiꞌ weꞌwek Jesusaꞌs:
—Mwẽesẽꞌj, idxaꞌs naꞌwẽtx kĩhtewa jxuka ewmeesaꞌ jĩna yuwe ũsuꞌ, açaꞌ ¿maꞌwẽçxáawa pasyaꞌwameegáꞌ? jĩteꞌ, 5 Jesusaꞌ teeçx yuweçxáa yuhwa weꞌwemeꞌ, açaꞌ Pilatoꞌ kujk yajkxna neeyũu.
Jesusaꞌs ikhwaꞌj vxitni
(Mt 27.15-31; Lk 23.13-25; Jn 18.38–19.16)
6 Pilatoꞌ Paskua fxiesta iisa teeçx preesu txhweeteꞌk nasaa pẽyniꞌs. 7 Txãa ensuꞌ kxte preesu ũsuꞌk Barabás yaasesa. Txãa piçthẽꞌjaꞌ vxite nasa yakh pkhaakheçxa gobierno yakh puíi kiisçxa nasatx wala kiikheꞌjsa npiiçthẽꞌkh yuꞌ. Txãa paꞌgak preesu ũsuꞌ. 8 Txajũꞌ kxtee nasa paꞌjsaꞌ, Pilatoꞌs pẽjxtxi fxiesta iisa maꞌwẽneꞌ yũꞌ txãꞌsaꞌ ãçxwa txãꞌwẽy yũukahn. 9 Açaꞌ Pilatoꞌ pẽjxku:
—Iꞌkweꞌsxaꞌ ¿judiuweꞌsxtxi jxkaahsaꞌskwe txhweete jxthãasuꞌáꞌ? jĩk. 10 Nawa Pilato yuꞌ sacerdote neꞌjweꞌsxaꞌ Jesusaꞌs ahçeçxa dukhtewa jiiçxak txãꞌwẽ weꞌwe. 11 Nawa sacerdoteweꞌsxaꞌ nasa jxukaysatx yuꞌkxweꞌwetx, wejxwa Barabasna mitxhwete jĩkahn. 12 Açaꞌ Pilatoꞌ pẽjxku:
—Iꞌkweꞌsx weꞌweçxaꞌ, Judiuweꞌsxtxi Jxkaahsa jĩꞌiꞌkwe ¿txãꞌsaꞌ kĩjkwe yũu jxthãasuꞌ? jĩteꞌ, 13 txãaweꞌsx sus weꞌwena pasçxaꞌ:
—Txãꞌsaꞌ kluuskhẽ mkaafxuçuꞌj jĩtx.
14 Txajũꞌ Pilatoꞌ pẽjxku:
—Txãꞌwẽ yũukahnaꞌ naa piçthẽꞌjaꞌ ¿kĩhga ewmée yũu? jĩtewa,
txãaweꞌsx yuꞌ:
—Kluuskhẽ mkaafxuçuꞌj jĩnaçxáatx sus weꞌweꞌ.
15 Açaꞌ Pilatoꞌ nasa yakh ew neeyũu wẽeçxa, Barabasaꞌs txhweetekaakh, saꞌ Jesus yuꞌsaꞌ kaapeçxukweꞌjçxa kluuskhẽ fxuçkahn dukhku.
16 Txajũꞌ soldauweꞌsxaꞌ Jesusaꞌs jxũna uꞌjtx txãaweꞌsx ũsni patxute. Saꞌ soldauweꞌsx jxukaysatx kxteeçxaçxáatx paꞌya. 17 Khĩçxatx Jesusaꞌs jxkaahsa ropa naꞌwẽsa kaapãꞌçxiꞌjçxa, dxikthete yuꞌ çhũçh korona vxitçxa kaafxĩkheꞌj. 18 Txajũꞌ naꞌwẽ sus weyna:
—Judiuweꞌsxtxi jxkaahsath jĩꞌneꞌga jĩnatx weeçx weꞌwe.
19 Saꞌ dxikthega fxtũu zuzsaju pekweꞌkwena, fxneꞌsx avxythethnatx txajx tasxte peejxũkweꞌ. 20 Txãꞌwẽ yũuna jxãꞌjçxaꞌ, jxkaahsa ropa naꞌwẽsaꞌs ksũupiꞌjçxa, txajx ropaꞌs kiꞌ kaatheꞌjtx. Txãꞌwẽ yũuçxatx kluuskhẽ fxuçyaꞌ jxũna uꞌj.
Jesusaꞌs kluuste fxuçni
(Mt 27.32-44; Lk 23.26-43; Jn 19.17-27)
21 Açaꞌ çxhabu kasehna uꞌjweçteꞌ, teeçx piçthẽꞌj Simon yaasesaꞌs puutx uyçxa soldauweꞌsxaꞌ txãꞌsnatx Jesus yakhni kluusaꞌs kxaakheꞌjçxa peꞌjna uꞌj. Txãa Simon yuꞌ Alejandro Rufxoweꞌsx neyku yuꞌ, Cirene kiweteweꞌsx.
22 Txajũꞌ Jesusaꞌs teeçx ahte Golgota yaasesatetx peꞌjna uꞌj. Txãa Golgota yuꞌ Uusáa Dxikthé Dxiꞌthçxáasa jĩniꞌ. 23 Kxtee paꞌjçxaꞌ, vxinote yaasa kaꞌdaçxatx yus wẽe, nawa Jesusaꞌ tudxmeꞌ.
24 Txajũꞌ kluuskhẽ fxuççxaꞌ, soldauweꞌsxaꞌ Jesus ropatxiꞌs txudeedeçxa swerte kaahtx txajx kaaçni atxhaꞌs maa soldau knaytewa jiyuyaꞌ.
25 Kusíi las nwewetetx Jesusaꞌs kluuskhẽ fxuç. 26 Saꞌ kĩh yũusate txãꞌwẽ kluuskhẽ fxuççxawa ptaꞌsxna fxiꞌjçxa kiꞌptxi kluus vxiçte: Judiuweꞌsxtxi Jxkaahsaꞌ jĩna. 27 Eꞌz nasa seenaꞌ yuuwesa yuꞌtx txãaweꞌsx yakhtxi Jesusaꞌs pdxiꞌp kluuskhẽ fxuç. 28 Açaꞌ Dxus librute fxiꞌjniꞌ kxtey yuuk: Nasa ewmeesathas yuuwesa yakhku kiꞌpni yuu jĩna fxiꞌjniꞌ.
29 Txajũꞌ kluus tasxuy uykhẽwsaꞌ dxikthetx kaawũhnatx weeçx weꞌweꞌ:
—Dxuus yataꞌs idxaꞌ pẽtxçxa tekh enteꞌ kiꞌ kiisuꞌnja ¿jĩꞌçmeegáꞌ? 30 Txãꞌwẽ ãjãwaꞌjsaçxaꞌ ¿mjĩitega kluusuh peekíi iyuçxa saꞌjaꞌçmée? jĩꞌtx. 31 Açaꞌ Dxus leyaꞌs kaapiyaꞌjsaweꞌsx, vxiteꞌ sacerdoteweꞌsxwa naꞌjĩnatx weeçx weꞌweꞌ:
—Vxite yuutxiꞌ nweꞌweçxawa, peekíi yuꞌ yaꞌnweꞌweyaꞌ ãjãꞌçmeꞌ. 32 Israelweꞌsxtxi jxkaahsa Kristoth jĩꞌk naꞌ txãꞌwẽ dxihçxaꞌ, ãçxhíi kweꞌsx uyna ũste kluusuh saꞌjana aç yuuçxáa txãꞌwẽ dxih yuꞌga sũjũꞌnjaꞌw jĩꞌtx. Txãꞌwẽy txãa yakh kluuskhẽ fxuçni uꞌpsaweꞌsxwa Jesusaꞌs wẽesxuꞌtx.
Jesus uunii
(Mt 27.45-56; Lk 23.44-49; Jn 19.28-30)
33 Txajũꞌ ẽepxãh wala ãaniteꞌ, naa kiwete jxuka çxhiꞌdxku kusuçte las trestepkaçx. 34 Txãꞌwẽ çxhiꞌdxni las tres ãjãçpkaçxhaꞌ, Jesusaꞌ naꞌjĩnak sus weꞌwe:
—Eloi, Eloi ¿lama sabaktani? jĩk. Txãꞌ: Adx Dxusgu saꞌ ¿mjĩi paꞌgaga adxçxáana nvxiht? jĩniꞌ.
35 Açaꞌ nasa kxtee wẽsẽꞌjna ũssaꞌ Eliasaꞌs paꞌyaçaꞌ jĩtx. 36 Naapkaçxhaꞌ teeçxsaꞌ wuwuuna uꞌjçxa, vxino pussate esponjaꞌs akhçxa fxtũute açhçxa Jesus yuwete utxak çxazxakahn. Saꞌ naꞌjĩk:
—Sxuunaꞌ thegna meswe, aan Eliasaꞌ kluusuh spajkxyaꞌ paꞌjana jĩk.
37 Txajũꞌ Jesusaꞌ kiꞌkin sus weꞌwenitee uuna kãjk. 38 Naapkaçxhaꞌ dxuus yatte txudenisa liensu pesath aꞌkxnisaꞌ peekxçxáa sutek puupxãjkhẽ kute ẽeju kiwete kĩh. 39 Açaꞌ kluus dxiꞌpte ũssa soldau kpiitanaꞌ Jesus txãꞌwẽ sus weꞌweçxa uuçte uyçxaꞌ, naꞌwẽk weꞌwe:
—Naa piçthẽꞌjaꞌ isa Dxus Nçxiꞌk yuh yuꞌga jĩk.
40 Txãꞌwẽy uꞌyweꞌsxwa jxuꞌju thegna ũsuꞌtx. Açaꞌ txãaweꞌsx ksxavxyteꞌ, Salomé, vxiteꞌ Maria Magdalena vxiteꞌ Maria Jakobo Joseweꞌsx njĩꞌj txãaweꞌsxtxi yuꞌ. (Txãa Jakoboꞌs nuuçxsaꞌ jĩꞌtx) 41 Naa tekh uꞌysaꞌ Jesusaꞌs selpiina uꞌjusatx yuꞌ Galilea kiwesu. Nawa txãaweꞌsxçxáamée, vxite uꞌyweꞌsxwa Jesus yakh ih Jerusalente paꞌjsatx ũsuꞌ.
Jesusaꞌs pedani
(Mt 27.57-61; Lk 23.50-56; Jn 19.38-42)
42 Jxkaasewaꞌj en ãjãçteꞌ, kĩhnawa jxuka pheuꞌjçxatx nvxiituꞌ. 43 Txãa paꞌgak kusuçteꞌ José Arimateajũweꞌsxaꞌ Pilato tasxte ũukhmée utxáa Jesus kakweꞌs pẽjxyaꞌ. Txãa José yuꞌ judiu neꞌjweꞌsxsa íiçxáak yuꞌ, saꞌ Dxus jxkaahwaꞌj enaꞌ dud ãhwaçaꞌ sũhna yaakxsak yuꞌ. 44 Txãꞌwẽ Jesusaꞌ uuyãꞌkh jĩniꞌs jiyuçxaꞌ, Pilatoꞌ wala kuh yajkxçxa soldau kpiitanaꞌs paꞌyak pẽjxyaꞌ txãꞌwẽ Jesus uudxihtewa jiyuyaꞌ. 45 Txajũꞌ kpiitanaꞌ: Jesusaꞌ uuyãꞌkh jĩna ptaꞌsxteꞌ, Pilatoꞌ Jesus kakweꞌs jxũna uꞌkhaakh. 46 Açaꞌ Joseaꞌ Jesus kakweꞌs spajkxçxa, liensu fxinusa weyçxa kxteek yap. Saꞌ jxũna uꞌjçxa kwet kafx uꞌse phadenisa jiꞌphuk txkaa khikhçxa, uꞌkani kafxte yuꞌ kwet walasajuk aph. 47 Txãꞌwẽ yũuçteꞌ, Maria Magdalena vxite Maria José njĩꞌj txãaweꞌsxaꞌ Jesus kakweꞌs mkaa khikheçtewa uytxi.
Jesus kiꞌ ĩtxi yuuni
(Mt 28.1-10; Lk 24.1-12; Jn 20.1-10)
16 Txajũꞌ jxkaase en skhẽwniiteꞌ, Maria Magdalena vxiteꞌ Maria Jakobo njĩꞌj, vxiteꞌ Salomé txãaweꞌsxaꞌ wẽt putasá weytxi Jesus kakwete sxũsxyaꞌ uꞌjyaꞌ.
2 Txajũꞌ kuskuskhẽ wala kusíi uꞌjtx, saꞌ sek kãjaçteꞌ pedaní kafxte paꞌjtx. 3 Saꞌ kxtee paꞌjaççxaꞌ, naꞌjĩnatx txãaweꞌsx pweꞌsx weꞌweꞌ:
—¿Kim pedaní kafxte aphnisa kwet walaꞌs kiisukx? jĩꞌtx. 4 Txajũꞌ pedaní kafxte thegçxaꞌ, aphnisa kwet walaꞌ kiisçxa pukate kiꞌpni uꞌptetx uy. 5 Açaꞌ pedaní kafxte uꞌkaçxaꞌ, teeçx piçtakx ropa çxihmesa jxuꞌjsa athçxa paçu juꞌgu kaçxçxa uꞌpte uyçxaꞌ, wala ũukhtxi. 6 Nawa txãa piçtakxaꞌ naꞌwẽk ptaꞌsx:
—Ũukhnuwe. Iꞌkweꞌsxaꞌ Jesus Nasarethuweꞌsxaꞌs kluuskhẽ fxuçni uuk txãꞌsnaiꞌkwe pakwéꞌ. Nawa txãꞌ ĩtxĩ yuuyãꞌkh, txãasa ayga meeyãꞌjaꞌ. Açaꞌ khikhniga mthegwe wakx, kĩhwa meeaꞌ jĩçxaꞌ kaakh naꞌjĩna: 7 Txãa yakh uꞌjusaweꞌsx vxiteꞌ Pedro txãaweꞌsxtxi naꞌjĩneꞌkwe: Jesusaꞌ iꞌkweꞌsx yaçte uꞌjweçaꞌ Galilean, açaꞌ kxtee txãꞌsaꞌ uyuuneꞌkwe maꞌwẽga uumeywa ptaꞌsx txãꞌsaꞌ kxtey yuuna jĩkaatheꞌ, 8 txãaweꞌsxaꞌ pedaní kafxu wala ũukhna ũphna uꞌjçxa, kuh yaakxnite vxitesa yuutxiꞌ dxiꞌthe kim yuhtxwa ptaꞌsxmeetx uꞌj.
Maria Magdalenaꞌs Jesus vxyaani
9 Txãꞌwẽ jxkaase en skhẽwnijũꞌ Jesusaꞌ kiꞌ ĩtxĩ yuuçxaꞌ, Maria Magdalena khuẽꞌyna vxyaak, naꞌwẽ siete eçx luuku vxit-satx kutxiꞌkh txãꞌsna. 10 Açaꞌ txãa uꞌyaꞌ Jesus yakh uꞌjusaweꞌsx tasxna uꞌjçxa, ptaꞌsxku. Txãaweꞌsxaꞌ nxusçxa ũꞌnenatx uꞌp yuꞌ. 11 Saꞌ Jesusaꞌ ĩtxĩ yuuga açaꞌ ũꞌkweꞌ uythu jĩna ptaꞌsxtewa, weh yuhwa txãꞌwẽ yũuneꞌ sũjũꞌçmeetaꞌ txãaweꞌsxaꞌ.
Jesus fxiy yuuçxa vxyaani
12 Txãa entey Jesusaꞌ kiꞌ vxyaak fxiy yuuçxa, txãa yakh uꞌjusaweꞌsx eꞌzsa dxiꞌthe uꞌjweçte. 13 Açaꞌ txãaweꞌsxwa kiꞌ sxawedçxa, Jesusaꞌs txãꞌwẽ uythaꞌw jĩna vxitetx ptaꞌsxtewa, txãꞌwẽ uyneꞌta sũjũꞌçmeetaꞌ.
Jesusaꞌ txãa yakh uꞌjusaweꞌsxtxi neeweꞌweçxa nvxiitni
(Mt 28.16-20; Lk 24.36-49; Jn 20.19-23)
14 Txãꞌwẽ ptaꞌsxna jxãꞌjaçpkaçxhaꞌ, txãa yakh uꞌjusa oncesa mesate kaçxçxa uꞌpte kiꞌ vxyaaçxaꞌ, naꞌjĩk:
—¿Kĩh yuuçxakwe adxaꞌsaꞌ kiꞌ ĩtxĩ yuuneꞌ sũjũꞌçmée? Adx ptaꞌsxniꞌs ũuste yuꞌakhyaꞌ ãjãꞌçmeeiꞌkwe, saꞌ ĩtxĩ yuute uysáa ptaꞌsxtewa txãꞌwẽ uyneꞌta sũjũꞌçmeeiꞌkwe.
15 Txajũꞌ naꞌjĩnak jxkaah:
—Meꞌjwe, Dxus yuweꞌs ptaꞌsxyaꞌ nasa jxukaysatx maa kiwete mteewa jxuka. 16 Açaꞌ maawa adxaꞌs ũusuh jxuka yajkxna jxpaꞌgaçxa yuꞌte yaꞌbautisaĩna txãꞌ nweꞌweni yuuna. Nawa adxaꞌs ũusuh jxuka yajkxna jxpaꞌgasameꞌ Dxus kastigoꞌs knayuuna. 17 Adxaꞌs ũusuh jxuka yajkxna jxpaꞌgasaꞌ naꞌwẽ yũuyaꞌ ãjãtxna: Adx puꞌçxteꞌ, eçx luuku vxit-satxwa nasaa ũusuh kutxiꞌjitxna. Saꞌ yuwe fxiysajuwa weꞌwetxna. 18 Ul wesweetxwa kuseju uweetxna. Saꞌ makwe wenenoꞌs tudxtewa, kĩh yuhwa kãaçãꞌjmeena kakwete. Saꞌ ãçãꞌsa kakwete peekiizeçxa, Dxus yakh puutx weꞌweteꞌ, katxhitxna jĩk.
Jesus cielun uꞌjni
19 Txãꞌwẽ yuꞌkxpehni eꞌsuꞌ, kweꞌsxtxi jxpeꞌjsa Jesusaꞌ cielun peꞌjna uꞌjni yuuçxa, Dxus pukate kaçxku paçu juꞌgte. 20 Açaꞌ txãa yakh uꞌjusaweꞌsxaꞌ uꞌjçxaꞌ, Dxus yuweꞌs mtee mteewa ptaꞌsxtxi. Txãꞌwẽ kweꞌsxtxi jxpeꞌjsa puꞌçxteꞌ, kĩjkĩh yũuyaꞌwa yaꞌãjãk, txãa paꞌgatx txajx weꞌweniꞌ isasa yuhna sũhwaꞌjaꞌs jiꞌphuꞌ.