‘Trust Jehovah and Do Wetin Good’

1. Wetin Jehovah make us to fit do?

JEHOVAH make human being to fit do many things. For example, we fit think about how to handle problem and plan for tomorrow. (Prov. 2:11) We fit do the better thing wey we don plan. (Phil. 2:13) E give us the kind mind wey fit help us know whether wetin we want do good or bad and wey fit correct us.​—Rom. 2:15.

2. How Jehovah want make we dey use wetin e don give us?

² Jehovah want make we dey use the gift wey e don give us well. Why? Because e love us and e know sey anytime wey we use wetin e don give us, we dey happy. For the two part for Bible wey dem use Hebrew and Greek language write, Jehovah tell us sey make we dey use wetin e don give us do better thing. For example, Bible talk for Hebrew part sey: ‘The plan of person wey serious for wetin e dey do dey succeed’; and ‘anything wey you fit do now, do am with all your power.’ (Prov. 21:5; Eccl. 9:10) The Greek part sey: ‘As far as we get the time, make we do good for everybody’; and ‘as the gift take reach una hand one by one, use am dey help unaself.’ (Gal. 6:10; 1 Pet. 4:10) E clear sey Jehovah want make we do wetin we fit do to help ourself and other people.

3. Wetin be some things wey we no fit do?

³ But no be everything we fit do. Jehovah know wetin we fit do and wetin we no fit do. We no fit by ourself stop to do mistake, comot sin and death; and we no fit control other people life because everybody get freedom to do wetin e want do. (1 Ki. 8:46) Apart from that one, no matter how we know book reach or how we old reach, we go still be pikin for where Jehovah dey.​—Isa. 55:9.

4. Wetin we go learn for this topic?

⁴ For everything wey we dey do, e good make we let Jehovah direct us, make we trust am and allow am help us do wetin we no fit do. But e still good make we do wetin we fit do to help ourself and other people. (Read Psalm 37:3.) The thing be sey, we no go only ‘trust Jehovah’ but we go ‘do wetin good.’ Yes, we go ‘do things wey show sey we dey serve God well.’ So, make we see wetin we fit learn from Noah, David, and other people wey serve God well, wey trust am and do wetin dem fit do. We go learn sey dem leave wetin dem no fit do for Jehovah hand and do wetin dem fit do.

WHEN KATAKATA FULL EVERYWHERE

5. How things be for Noah time?

⁵ Bible talk sey for Noah time, katakata full everywhere and people dey put hand for sex wey no clean for God eye. (Gen. 6:​4, 9-13) Noah know sey Jehovah go kill the bad people when the time reach. But, this one no mean sey the bad things wey dey happen no worry Noah; the things disturb am. As Noah see imself for this kind condition, e know sey e get some things wey e no fit do but e still get things wey e fit do.

6, 7. (a) Wetin Noah no fit do? (b) How our condition today take be like Noah own?

⁶ Wetin Noah no fit do: Even as Noah dey warn the people about wetin Jehovah want do, e no fit force dem listen to wetin e dey preach or make dem stop to do bad things; and e no fit control the time wey the rain go start. Jehovah don promise before sey e go stop the bad things wey dey happen. So Noah need to trust Jehovah sey e go do wetin e promise, when the time reach.​—Gen. 6:17.

⁷ Today, we self dey stay for world wey katakata full. We know sey Jehovah don promise to stop bad things wey dey happen. (1 John 2:17) As e be, we no fit force people listen to the ‘good news about God Kingdom.’ And we no fit do anything to control when ‘great tribulation’ go start. (Matt. 24:14, 21) Like Noah, make we get strong faith and trust God sey e go soon stop the bad things wey dey happen. (Ps. 37:10, 11) We dey sure sey Jehovah no go let the bad things continue to happen when the time to stop dem don reach; e no go add even one day join the day wey e get for mind.​—Hab. 2:3.

8. How Noah take show sey e put mind for wetin e fit do? (Go check the first picture.)

⁸ Wetin Noah fit do: Noah no let the things wey e no fit do make am tire for life. Instead, e put mind for the things wey e fit do. Because Noah na ‘person wey dey preach wetin good,’ e continue to warn the people about wetin Jehovah tell am. (2 Pet. 2:5) We dey sure sey, this one help Noah continue to get strong faith. Apart from sey e preach, e still use the power and sense wey God don give am take build the ark wey God sey make e build.​—Read Hebrews 11:7.

9. How we fit do like Noah?

⁹ Like Noah, make we try get ‘plenty work wey we fit dey do’ for Jehovah. (1 Cor. 15:58) Some work wey we fit dey do na: to build and repair Kingdom Hall, Assembly Hall and branch office; to join do work for assembly or convention; or to go help for branch office or remote translation office. On top all this one, make we continue to use plenty time preach, because the preaching work go help us continue to get hope for the better things wey Jehovah don promise. One sister wey don dey serve Jehovah well, sey: ‘When you preach to people about the better things wey God Kingdom go do, you go see sey dem no get hope at all. Dem get the mind sey their problem no go ever end.’ True true, preaching go make us continue to put mind for wetin Jehovah don promise and we no go tire to run the race wey go give us life.​—1 Cor. 9:24.

WHEN WE SIN

10. Wetin happen to David?

¹⁰ Jehovah talk sey King David na ‘person wey dey do wetin dey sweet am.’ (Acts 13:22) David use im life serve God well. But, e get when e do wetin God no like. E sleep with Bath-sheba, another man wife. No be only that one. E come even arrange make Bath-sheba husband, wey be Uriah, die for war so that people no go know wetin happen. Na even Uriah David use send the letter about how dem go take kill Uriah! (2 Sam. 11:1-21) But, like smoke wey dem no fit hide, wetin David do later come out. (Mark 4:22) How David come behave?

11, 12. (a) After David sin, wetin e no fit do? (b) If we repent after we sin, wetin we trust Jehovah sey e go do for us?

¹¹ Wetin David no fit do: David no fit clean wetin e don do. And e no fit run from the suffer wey go come because of wetin e do. The truth be sey, e go suffer some things till e die. (2 Sam. 12:10-12, 14) So, e need faith. E need to believe sey, when e don repent, Jehovah go forgive am and help am bear the suffer.

¹² Because all of us get sin for body, we dey do mistake. Some mistake big pass some. E get some mistake wey we no fit clean. So we go bear anything wey come out from the mistake. (Gal. 6:7) But we know sey God no fit lie. So, we trust am sey if we repent, e go help us bear any problem wey come from the mistake, even if na we cause am.​—Read Isaiah 1:18, 19; Acts 3:19.

13. Wetin David do to be Jehovah friend again?

¹³ Wetin David fit do: David let Jehovah help am. How? E no vex when Nathan wey be Jehovah prophet correct am for wetin e do. (2 Sam. 12:13) E still pray to Jehovah and confess wetin e do to show sey e want be Jehovah friend again. (Ps. 51:1-17) Instead of im mind to dey worry am every time, David learn from im mistake. E no ever do the bad things again. And when e die, e die as person wey serve Jehovah well; and na wetin Jehovah take dey remember am till tomorrow.​—Heb. 11:32-34.

14. Wetin we fit learn from David example?

¹⁴ Wetin we fit learn from David example? If we do wetin bad well well, make we repent from our mind and beg Jehovah make e forgive us. We must confess our sin to am. (1 John 1:9) We still need to tell elders, because na dem fit help us near Jehovah again. (Read James 5:14-16.) When we follow wetin Jehovah want make we do after we sin, we dey show sey we believe wetin Jehovah promise, sey e go forgive us. And e good make we learn from our mistake, continue to dey serve Jehovah, and get strong mind sey tomorrow go better.​—Heb. 12:12, 13.

WHEN WE GET OTHER PROBLEM

15. Wetin we learn from Hannah example?

¹⁵ Bible talk about other people wey trust Jehovah and wey serve am well. This people no stop to do things wey help dem when dem get problem. For example, Hannah no fit give imself pikin. But e trust sey Jehovah go help am. Na im make am continue to dey go serve Jehovah for tabernacle and dey pray to Jehovah about everything wey dey worry am. (1 Sam. 1:9-11) This one no be better example wey we fit follow? When e be like sey sickness or anything don pass our power, make we tell Jehovah everything wey dey worry us. Jehovah go help us. (1 Pet. 5:6, 7) And make we do everything wey we fit do to make sure sey we dey go meeting and gain from other things wey Jehovah dey teach.​—Heb. 10:24, 25.

16. Wetin papa and mama fit learn from Samuel example?

¹⁶ What of papa and mama wey still dey serve Jehovah, but their children don comot for truth? Samuel na old man when im children start to dey do wetin Jehovah no like. E no fit force im children wey don grow make dem do wetin e teach dem about Jehovah. (1 Sam. 8:1-3) Even as im children no gree do wetin Jehovah want, e still continue to serve Jehovah and do wetin go make am happy. E leave the matter for Jehovah hand. (Prov. 27:11) This kind thing dey happen to many papa and mama today. Dem believe sey Jehovah be like the papa for the story of ‘the pikin wey go waste im papa money.’ Like that papa, Jehovah ready to welcome sinners wey repent. (Luke 15:20) Any papa and mama wey get this kind children go continue to hold Jehovah tight. Make dem get hope sey their pikin go follow their example and come back to Jehovah.

17. Wetin we fit learn from the poor woman example?

¹⁷ Still think about the poor woman for Jesus time wey im husband don die. (Read Luke 21:1-4.) E no fit do anything about the bad things wey people dey do for temple. (Matt. 21:12, 13) And e no fit still do anything about im condition. But, e use all im mind give the ‘two small coins,’ wey be all the money wey e get. That woman show sey e use all im mind trust Jehovah. And e know sey if e do Jehovah own first, Jehovah go give am the things wey e need. Na because the woman trust Jehovah, na im make e still dey go worship Jehovah for temple. Na so e still be today. If we put God Kingdom first for our life, Jehovah go make sure sey we get the things wey we need.​—Matt. 6:33.

18. Give example of one brother wey use better eye look problem.

¹⁸ Many of our brothers and sisters don show sey dem trust Jehovah and do wetin dem fit do to help theirself. Think about one brother wey im name na Malcolm, wey hold Jehovah tight until e die for 2015. For all the years wey im and im wife serve Jehovah, dem face different different problem. The brother talk sey: ‘Many times, things wey we no plan dey happen. Nobody know tomorrow, and life no easy. But Jehovah dey bless the people wey trust am.’ Malcom still talk sey: ‘Pray make you fit dey do well for Jehovah work as your power reach. Do wetin you fit do, no be wetin you no fit do.’a

19. (a) Wetin make our 2017 yeartext make sense? (b) How you go take do wetin the yeartext talk for your life?

¹⁹ As this world dey bad more more, make we get am for mind sey problem wey pass the one wey we dey face now go come. (2 Tim. 3:​1, 13) So make we no allow fear of problem worry us for mind sotey we forget Jehovah. Instead, make we trust Jehovah and do wetin we fit do. Na im make our yeartext for 2017 really make sense: ‘Trust Jehovah and do wetin good’!​—Ps. 37:3.