You Fit Know Where to Do Reach Even When E Hard

1-3. Wetin the prophet wey Jehovah send go meet Jeroboam no do, and wetin come happen? (Check the first picture.)

KING JEROBOAM wey rule Israel one time, no worship Jehovah. Na other god e worship. Jehovah come send one prophet go tell am how E go take judge am. The prophet no carry shoulder up, so e do wetin Jehovah send am. The message vex the king well well but Jehovah save the prophet from the king hand.​—1 Ki. 13:1-10.

² Jehovah don tell the prophet before sey make e ‘no chop bread or drink water for Israel’ and make e ‘no follow the road wey e follow go, come back.’ As e dey go back, e come see one old man wey come from Bethel. The old man sey e be Jehovah prophet. E come deceive the prophet to do wetin Jehovah sey make e no do. This one no make Jehovah happy. Later, as the prophet dey go house, one lion come kill am for road.​—1 Ki. 13:11-24.

³ This Jehovah prophet first know where e suppose do reach. But wetin make am do oversabi when e follow wetin that old man talk? Bible no tell us. E fit be sey this time, e no ‘know where e suppose do reach as e dey follow God waka.’ (Read Micah 6:8.) When Bible sey person dey waka with God, e mean sey the person trust God, e dey support God as King, and e dey let God direct am. Person wey no dey do oversabi know sey e suppose pray to Jehovah everytime. The prophet for ask Jehovah to know whether wetin e first tell am don change. But Bible no tell us sey e ask Jehovah. Sometimes, we fit no know the correct thing to do for some serious matter. To show sey we no dey do oversabi, e good make we beg Jehovah to help us so that we no go make serious mistake.

4. Wetin we go learn for this topic?

⁴ For the topic wey dey before this one, we don learn wetin e mean and why e good for person to know where e suppose do reach. Wetin fit make am hard for us to know where we suppose do reach? And wetin fit help us continue to know where we suppose do reach even if e hard? To answer this question dem, we go talk about three things wey fit make am hard for us to know where we suppose do reach. And we go see how we fit use sense follow this three things.​—Prov. 11:2.

WHEN SOME THINGS FOR OUR LIFE CHANGE

5, 6. How Barzillai take show sey e know where e suppose do reach?

⁵ When our work for congregation or some things for our life change, this one fit make am hard for us to know where we suppose do reach. When Barzillai dey 80 years, David tell am sey make e come dey stay for king palace. This one fit don make Barzillai happy. If e do wetin David tell am, e for continue to enjoy life with king. But e no gree. Why? Because e don old, e no want be wahala for the king. So Barzillai come sey make Chimham, wey fit be one of im pikin, follow the king instead of am.​—2 Sam. 19:31-37.

⁶ Why Barzillai no gree do the work wey David give am? Na because e no fit do am or because e no want stress im life? No. But, na because e know where e suppose do reach. E know sey im condition don change and sey e no fit work like before. E no want carry load wey heavy pass am. (Read Galatians 6:4, 5.) If we dey put mind to get more work so that people go sabi us, e go make us dey feel sey we better pass dem. We go dey carry shoulder up and we fit come land for trouble. (Gal. 5:26) If we know where we suppose do reach, we go join hand with our brothers to praise Jehovah and help other people.​—1 Cor. 10:31.

7, 8. If we know where we suppose do reach, how e go make us no trust ourself?

⁷ E fit hard us to know where we suppose do reach if dem add join our work for congregation. Why? Because more work dey make us work with more people. When Nehemiah hear sey people for Jerusalem dey for wahala, e pray make Jehovah help dem. (Neh. 1:4, 11) Jehovah answer im prayer when King Artaxerxes make am governor for the area. Even though sey Nehemiah get money, na governor, and many people dey work with am, e no put mind for wetin e fit do. E continue to waka with God. E no stop to ask Jehovah to direct am, na im make am dey read God Law everytime. (Neh. 8:1, 8, 9) Nehemiah no control people anyhow. Instead, e use im money do things for dem.​—Neh. 5:14-19.

⁸ Wetin Nehemiah example teach us? If we know where we suppose do reach, we no go trust ourself when our work for congregation change or dem add join am. If elder for congregation dey trust imself, this one fit make am forget to pray make Jehovah help am before e handle any matter for congregation. Some people dey first choose wetin dem want do, later dem go beg Jehovah to bless wetin dem choose. This kind people know where dem suppose do reach? Person wey know where e suppose do reach go always remember sey God high pass am and e give am work for congregation. We no go put mind for wetin we fit do, especially if na matter or problem wey we don handle before. (Read Proverbs 3:5, 6.) As people wey dey serve Jehovah, we be one family. Make we dey see our work for Jehovah house as work wey we dey do to help our brothers and sisters for congregation, no be to find position!​—1 Tim. 3:15.

WHEN PEOPLE TALK WETIN WE NO DO OR PRAISE US

9, 10. If we know where we suppose do reach, how e go take help us when people talk wetin we no do?

⁹ E fit hard us to control ourself when person talk wetin we no do. For example, Hannah husband love am. But Peninnah im husband second wife show am pepper because e no fit born. This one make Hannah cry many times. After, when e go pray for tabernacle, Eli wey be High Priest come talk wetin Hannah no do. E tell Hannah sey e don drink. But even with all this one, Hannah no talk to Eli anyhow because e know where e suppose do reach. The better prayer wey e take praise and thank Jehovah dey for Bible. The prayer show the kind faith wey Hannah get.​—1 Sam. 1:5-7, 12-16; 2:1-10.

¹⁰ When we know where we suppose do reach, e go help us ‘continue to dey win bad thing with good thing.’ (Rom. 12:21) Many times for this wicked world, things dey happen upside down. People fit talk sey you do wetin you no do. No let their bad mind come dey make you vex. (Ps. 37:1) E dey pain well well if na brother or sister for congregation do us this kind thing. Person wey know where e suppose do reach, go do like Jesus. Bible talk sey: ‘When dem dey curse am, e no curse dem back but e put im life for the hand of the Judge wey no dey do partial.’ (1 Pet. 2:23) Jesus know sey na Jehovah go pay dem for wetin dem do. (Rom. 12:19) So, Bible still advise us sey make we carry body down and make we no do bad to people wey do us bad.​—1 Pet. 3:8, 9.

11, 12. (a) How we fit know where we suppose do reach, even when people dey over praise us? (b) Why e be sey e good to know where we suppose do reach for our dressing and character?

¹¹ Another thing wey fit make am hard to know where we suppose do reach, na when dem too dey praise us. Make we talk about the fine example of Esther wey this kind thing happen to. Esther over fine and e live big woman life for one year for Persia. E stay with many young women wey dem carry from different different place for Persia. All of dem want make Persia king see as dem fine reach so that e go like dem. Even with all this one, Esther no stop to respect people and behave well. E no start to carry body up or dey overdo, even after the king select am as im queen.​—Esther 2:9, 12, 15, 17.

¹² Person wey know where e suppose do reach, dey always dress and behave well; e dey respect imself and other people. E good make we know sey people go love us when we dey ‘quiet and we no dey make trouble.’ No be when we dey make mouth or dey do “notice me.” (Read 1 Peter 3:3, 4; Jer. 9:23, 24) The kind person wey we really be go show for the things wey we dey do. For example, we fit want make other people feel sey we get level because of wetin we dey do, wetin we know, or people wey we know for Jehovah organization. Or for work wey other people follow us do, we fit come dey talk about am like sey na only we do am so that dem go praise us. Jesus still show us better example for this matter. Almost everything wey e talk when e dey this world na from Bible. E do like that so that people go know sey na Jehovah teach am everything.​—John 8:28.

WHEN WE NO DEY SURE OF TOMORROW

13, 14. How person wey know where e suppose do reach fit choose the correct thing?

¹³ Another thing wey fit make am hard for us to know where to do reach, na when we dey choose wetin to do. When apostle Paul dey stay for Caesarea e sey e want go Jerusalem. But prophet Agabus tell am sey if e go, people go arrest am and dem fit even kill am. Because of wetin fit happen, the brothers beg Paul make e no go. But, dem no fit make Paul change im mind. Paul no fear, but no be sey e want show sey e too get mind. E trust Jehovah finish, and e ready to go anywhere wey Jehovah want make e go. After Paul tell dem wetin dey im mind, dem no continue to tell am make e change im mind because dem know where dem suppose do reach.​—Acts 21:10-14.

¹⁴ Person wey know where e suppose do reach go fit choose the correct thing, even if e no know or e no fit control wetin go happen tomorrow. For example, we fit dey think am sey if we enter full-time service now wetin go happen to us if we sick? What if our papa and mama wey don old dey sick, who go help dem? Who go take care of us when we don old? Even if we pray well well or we do research, we no fit get the answer to this kind question dem. (Eccl. 8:16, 17) The trust wey we get for Jehovah go make us gree sey, no be everything we fit do. After we don do research, people don advise us, and we don pray, make we let God spirit direct us. (Read Ecclesiastes 11:4-6.) Jehovah go bless wetin we don choose, or e fit help us change am.​—Prov. 16:3, 9.

CONTINUE TO KNOW WHERE YOU SUPPOSE DO REACH

15. How e be sey, the kind person wey Jehovah be fit make us dey carry body down?

¹⁵ We don see sey we go gain many better things, if we know where we suppose do reach. But, how we go take continue to know where we suppose do reach? Make we learn four things wey go help us. The first thing be sey, make we like to dey think about the kind person wey Jehovah be and how e take high pass us for everything. (Isa. 8:13) Remember sey, na the God wey get power pass we dey do things with, no be angel or human being. That one go make us carry body down and put ourself for God hand.​—1 Pet. 5:6.

16. How e be sey the love wey Jehovah get for us, fit make us know where we suppose do reach?

¹⁶ The second thing wey go help us na to dey think about the love wey Jehovah get for us. Apostle Paul talk for Bible sey Jehovah put value for the part of body wey people think sey no dey do work. (1 Cor. 12:23, 24) Na so all of us still get value for Jehovah eye, even if e get things wey we no fit do. E no dey use wetin other people do dey check wetin we dey do and e no dey fail to show us love, even when we make mistake. Because Jehovah love us, we no go fear to do any work wey e give us for im organization.

17. Why e good make we dey see the good character wey other people get?

¹⁷ The third thing wey go help us na to see the good character wey our brothers and sisters get, like Jehovah. Make e no dey our character to dey control other people or dey do “notice me.” Instead, make we dey ask people wetin dem think about wetin we want do and try follow wetin dem talk. This one go show sey we know where we suppose do reach. (Prov. 13:10) When Jehovah give our brothers or sisters work for congregation, make we dey happy with dem. And we go dey praise Jehovah as e dey bless our ‘brothers and sisters wey dey everywhere for this world.’​—1 Pet. 5:9.

18. How we fit train ourself to know wetin Jehovah like, even for matter wey Bible law no dey?

¹⁸ Make we dey train ourself to know wetin Jehovah like, even for matter wey Bible law no dey. Na this one be the fourth thing wey go help us continue to know where we suppose do reach. This kind training go help us fit dey do things the way Jehovah want and dey see things the way e dey see dem. If we dey read Bible everytime, dey pray and do wetin we learn, we dey train ourself small small. (1 Tim. 1:5) We dey learn to put other people matter before our own. So, if we do wetin we suppose do, Jehovah promise sey, e go ‘finish our training’ so that we fit know where we suppose do reach and get other better character wey God like.​—1 Pet. 5:10.

19. Wetin go help us continue to know where we suppose do reach?

¹⁹ You remember wetin happen to the prophet wey we talk about for paragraph two? Jehovah vex for am and e die because e forget where e suppose do reach. But, we fit know where we suppose do reach even when e no easy? Yes! Example of many people for Bible and example of our brothers and sisters for congregation, show sey we fit. As we dey serve Jehovah dey go, we go know where we suppose do reach. (Prov. 8:13) No matter wetin we dey do for Jehovah now, the chance wey we get to follow Jehovah waka na better gift wey no suppose reach us. So make we value am well well, and continue to do everything wey we fit do to know where we suppose do reach as we dey follow Jehovah waka.