‘God Go Bless Person Wey No Dey Tight Hand’

NO BE today people start to give Jehovah wetin dem value, because na part of wetin dem dey use worship am. For example, Israel people sacrifice animal to Jehovah. Christians ‘dey always praise God,’ and this one be like sacrifice. Apart from that one, e still get other things wey we dey do to make God happy. (Heb. 13:15, 16) Some example for Bible show sey when we do this things, we go happy and Jehovah go bless us. Make we talk about some of this example.

Hannah na better example of person wey serve Jehovah. But Hannah no fit born pikin. E come tell Jehovah for prayer sey if e give am pikin, e go ‘carry am give Jehovah make e dey im house until e die.’ (1 Sam. 1:10, 11) Later, Hannah come get belle, and e born Samuel. When the pikin stop to dey suck, Hannah do wetin e promise Jehovah. E carry the pikin go tabernacle (where dem dey worship Jehovah). Jehovah bless Hannah for wetin e do. Jehovah help am born another five children. Later, Samuel come be Jehovah prophet and e dey among the people wey write Bible.—1 Sam. 2:21.

We fit give Jehovah something like Hannah and Samuel? Yes. Na when we use our life serve am, since na im give us life. Jesus talk sey Jehovah go bless us if we do anything wey we fit do to serve am.—Mark 10:28-30.

For the apostle dem time, e get one woman wey im name na Dorcas. People know this woman well well. E ‘dey always do good and e like to help people wey no get.’ But the woman ‘come dey sick and e come die.’ E pain people for congregation well well. So when dem hear sey Peter dey the area, dem beg am make e come. Think about how dem happy reach when Peter bring am back to life. This na the first time wey Jesus apostle do this kind miracle. (Acts 9:36-41) God no forget the better things wey Dorcas do. (Heb. 6:10) Jehovah make sure sey this woman story dey Bible. This na better example for us to follow.

Apostle Paul na another better example wey we fit follow. E use im time take help people. When e write letter to the brothers for Corinth, e tell dem sey: ‘As for me, I happy to use everything wey I get to help una. I even ready to add myself join.’ (2 Cor. 12:15) Paul happy as e dey help other people. Wetin e do still make Jehovah happy and e bless am.—Acts 20:24, 35.

Jehovah dey happy when we dey use our time and power do im work. E still like am when we dey help our brothers and sisters. But e get other things wey we fit do to support the preaching work? Yes, e dey! Apart from things wey we dey do to show sey we love Jehovah, we fit still use our mind contribute wetin we get. Dem dey use wetin we contribute take support the work wey we dey do for the whole world. Dem dey use am support people wey be missionary, and other people wey dey special full-time. Dem dey use am do our book and video. And when our brothers dey wahala, na our contribution dem dey use help dem. Dem still dey use am build our Kingdom Hall. Get am for mind sey, Jehovah dey ‘bless person wey no dey tight hand.’ Apart from that one, when we give Jehovah the things wey we value, we dey praise am.—Prov. 3:9; 22:9.

How Some People Take Dey Contribute To Support Jehovah Work

As e be for apostle Paul time, many people today dey ‘keep something’ or plan how much dem want give, and dem dey put am for the contribution box wey dem write “Worldwide Work.” (1 Cor. 16:2) Every month, congregation dey send wetin dem see for inside the box go branch office wey dey serve the country wey dem dey. You fit still send your contribution to Jehovah Witness branch office for your country. Abeg, call the branch office for the country wey you dey if you want know how you go take contribute. You fit still see the address for www.jw.org. The kind contribution wey you fit send for the country wey you dey fit be:

CONTRIBUTION WEY BE GIFT

For this one, person fit use Internet, ATM card or im phone take send money. For some country, person fit use jw.org or another website from the branch office.
Person fit contribute money, better earring, ring, necklace or other better better things wey e get. E go write letter to show sey e no dey borrow am to branch office but na gift.

CONTRIBUTION WEY PERSON FIT COLLECT BACK

Person fit contribute money, and talk sey branch office go give am back if e need am.
E go write am for letter sey if e need the money, branch office go return am.

OTHER WAY TO TAKE SUPPORT JEHOVAH WORK

Apart from money and other better things wey you fit contribute, other way still dey wey we fit use support Jehovah work. Na dem we want talk about. No matter how you want take contribute, abeg first ask the branch office wey dey your country to know how you go do am. Because every government get their law about tax, e good to ask lawyer or person wey fit advice you about tax matter before you choose how you go take contribute.

Insurance and Pension Money: This na contribution wey person go talk sey na Jehovah Witness branch office wey dey im country, go collect im life insurance or pension money.

Bank Account: This na contribution wey person go arrange with im bank sey if e die, make the bank give Jehovah Witness branch office for im country the money wey dey im bank account.

Shares, Stocks and Bonds: When person buy shares or e get stocks and bonds wey dey bring money for am, e fit contribute am as gift to Jehovah Witness branch office for im country, or e go write agreement sey make dem give am to the branch office when e die.

Land and House: Person fit contribute land or house as gift to Jehovah Witness branch office for im country. But for some people wey still dey stay for their house when dem make this kind contribution, na when dem die, the branch office go take am.

Wills and Trusts: Before person die, e fit use im lawyer write sey na Jehovah Witness branch office for im country, go get im money and property when e die. This one fit make government reduce the tax wey the person dey pay.

All this way to take support Jehovah work wey we don talk about show sey for person to do this kind contribution, e must plan am well. The brochure Charitable Planning to Benefit Kingdom Service Worldwide, don dey to help people wey like to support the work wey Jehovah Witness dey do for the whole world. Dem write this brochure to help people know the different different way person go fit contribute, whether na now or later as part of their will. Dem write this brochure for English and Spanish. Because of tax law and other law for your country, some things wey dey the brochure fit no concern you. Many people don use all this different different way support the work wey we dey do for Jehovah and our neighbor for the whole world. And e don still help dem make government reduce their tax. If this brochure dey your country, you fit tell the secretary for your congregation make e give you one.

If you want know more, press “Contribute to Support the Work Wey We Dey Do for the Whole World” wey dey the bottom of any page for our website or ask the branch office for your country.