Question From People Wey Dey Read Our Book

Why we no dey allow people carry anything from our website go put for another website?

We no dey sell our book and other things wey we get. Because of this one, some people fit dey think sey dem fit put am for another website or for social media. (Social media na website or computer program wey people dey use take send message to other people wey dey use the same website.) But person wey dey do like that no dey follow the things wey person wey want use our website suppose do. And this one don cause serious problem. When you enter our website, you go see one place for bottom wey dem write “Things Wey You Go Do if You Want Use This Website.” We talk for there sey make anybody “no carry anything wey we get for our website go put for another website whether na website wey dem dey share video or na website wey people dey chat or any other website for Internet.” Why we put this kind law for our website?

Our website get law wey dey protect everything. Apostates and other people wey no like the organization dey try to put some things wey we get for their website. Dem want take am draw Jehovah Witness and other people. For this their website, dem dey take style put some things wey go make people doubt the things wey Jehovah organization dey talk. (Ps. 26:4; Prov. 22:5) Some people don still use things for our book, logo and other things wey we get take do advert. Some even dey put am for things wey dem want sell, and inside computer program for phone. Because of the right wey the law give us, we no go allow anybody use anything for our website anyhow. (Prov. 27:12) If we allow people, or even our brothers, to dey carry things wey we get go put for other website, how e go be? Or what if we allow dem dey use jw.org logo take dey do business? The truth be sey, court people fit no support us as we dey try to stop people wey dey talk bad about us, or wey dey use wetin dey our website take do business.

To download our book and other things for any other website fit put person for trouble. Jehovah dey use only the “slave wey get sense and wey dem fit trust” take teach im people. (Matt. 24:45) This “slave” no dey use any other website take teach us apart from www.jw.org, tv.jw.org, and wol.jw.org. The only program wey we get for phone and small computer na JW Language^®, JW Library^®, and JW Library Sign Language^®. This program no get advert, or other things wey no correct wey people for this world dey talk. But if we go download our book and other things from another place, dem fit don put lie lie inside, or dem fit don change some things for inside.—Ps. 18:26; 19:8.

E get some website wey people fit write wetin dem think about any matter. If we go put our book and other things for this kind website, e go give apostates and other people chance to talk wetin go fit spoil people mind about Jehovah organization. Some brothers dey argue with this kind people for Internet, and this one don even spoil Jehovah name more more. All this kind website no be the correct place to take “sofri sofri tell people wey stubborn wetin dem go do.” (2 Tim. 2:23-25; 1 Tim. 6:3-5) We don notice sey the name wey some people dey use for their website and for social media na the organization name, Governing Body name, and Governing Body member name. But the truth be sey, no Governing Body member dey use social media, and dem no get their own website.

Direct people to jw.org make dem hear the “good news.” (Matt. 24:14) E get many things wey the organization dey give us wey we dey use for phone and computer. We dey use this things for preaching, and as time dey go, this things dey better. We want make everybody enjoy dem. Na im make for our website, we talk sey e no bad if you use e-mail take send our book give person. And you fit still send am the place for our website (link) wey e go fit find something. Make we dey direct people go the website wey Jehovah organization dey use. If we dey do this one, dem go know sey na the “slave wey get sense and wey dem fit trust,” na im Jehovah dey use teach people.