Young People, Put Mind for Wetin Una Want Do for Jehovah

1-3. (a) Wetin young people dey face today, and which example we fit use explain am? (Check the first picture.) (b) How young people fit handle this matter well?

MAKE we talk sey e get one special thing wey dem want do for one town wey far well well, and you want travel go there. To fit reach there, you go need to enter bus. When you reach motor park, you fit confuse because of the many passengers and many bus. But, since you don already get where you dey go for mind, you think sey you go confuse? So, e good to know where you dey go! If you enter bus wey dey go another place, e no go carry you go where you get for mind.

² Life just be like when person dey travel. And young people be like the passengers for the park. Dem get many things wey dem fit choose from, or wey dem fit use their life do. This one fit confuse dem. But e go easy for young people if dem don already plan wetin dem want do for their mind. Which kind plan you suppose get for mind?

³ This topic go answer that question. Young people go come see sey, to make Jehovah happy, dem need to put mind for wetin dem want do for Jehovah. This one mean sey, dem need to follow Jehovah advice for school matter, the kind work wey dem go do, or whether dem go marry or get pikin. And dem need to try follow wetin dem plan to do for Jehovah. When young people put mind for Jehovah work, Jehovah go bless dem and their life go get head.—Read Proverbs 16:3.

WHY E GOOD TO PLAN WETIN YOU WANT DO FOR JEHOVAH?

4. Wetin we go talk about for this topic?

⁴ Na better thing if person plan wetin e want use im life do for Jehovah when e still dey young. Why? Because of three things wey we go talk about for this topic. The first two things go show sey when young people try do wetin dem plan, dem go near Jehovah more more. The third one go show sey, when person plan wetin e want use im life do for Jehovah when e still dey young, e go gain.

5. Wetin be the main thing wey go make young people plan wetin dem want do for Jehovah?

⁵ If young people plan wetin dem want do for Jehovah, e show sey dem value wetin e don do for dem and the love wey e show dem. Na this one be the main thing wey go make young people plan to use their life do something for Jehovah. Bible talk for Psalm 92:1, 4 sey: “Na good thing to thank Jehovah. . . . You don make me happy well well because of the things wey you do, O Jehovah. I dey use all my heart sing because of the things wey you take your hand do.” E good make young people think about all the things wey Jehovah don do for dem. For example, e give you life, im Word, and brothers and sisters for congregation. E still allow you draw body near am and learn about am, and e give you hope sey your tomorrow go better. When you put Jehovah first for your life, e dey show sey you like all this things wey e don do for you. This one go come make una friendship strong pass before.

6. (a) Wetin young people go gain if dem plan to use their life serve Jehovah? (b) Wetin person fit plan to do when e dey young?

⁶ The second thing be sey, for Jehovah eye, na better thing you dey do, as you don start to do wetin go make your plan work. This one go make you near am well well. Apostle Paul talk sey: “God no dey do bad, to come forget all una work and the love wey una show for im name.” (Heb. 6:10) You no too small to plan wetin you want use your life do for Jehovah. For example, Christine dey ten years when e make up im mind to dey read story of people wey don serve Jehovah well. When Toby dey 12 years, im plan na to finish Bible before e baptize. Maxim dey 11 years and im sister Noemi dey 10 years when dem baptize. Two of dem come dey plan to go work for Bethel. So that their mind no go comot from their plan, dem come put Bethel form for wall for their house. What of you? Wetin be the main thing wey you want use your life do? You dey do wetin go make your plan work?—Read Philippians 1:10, 11.

7, 8. (a) If you plan wetin you want use your life do, why e no go hard you to choose better thing? (b) Why one young sister no gree go university?

⁷ The third thing wey go make person get better plan when e dey young, na because many things dey to choose from. Na young people go choose wetin dem want do for matter like school, work, and other things. To choose wetin you want do be like person wey dey junction. E go need to choose which road e want follow. If e know where e dey go, e no go hard am to know which road to follow. So if you don plan wetin you want use your life do, e no go hard you to choose better thing. Proverbs 21:5 talk sey: “The plan of person wey dey work hard go succeed.” If you quick plan better thing wey you want use your life do, e no go tey before your plan go get head. Na wetin happen to Damaris be that. When this sister dey young, e choose wetin e go do about one serious matter.

⁸ When Damaris finish secondary school, im result good well well. If to sey e want go study law for university, e for go and e for no pay money. But, e start to do part-time work. Why e do like that? E talk sey: “Na since when I dey young I make up my mind sey I go pioneer. This one mean sey na part-time work I go do. If to sey I go study law for university, I for make plenty money. But e for hard me to see part-time work.” Damaris don dey pioneer for 20 years now. E regret im plan and wetin e choose when e dey young? No. E sey: “For where I dey work, I dey meet many lawyers. Dem dey do the kind work wey I for do, if to sey I study law. But many of dem no dey happy with their work. The pioneer work wey I choose help me run from the wahala wey dey inside other work. And e don help me enjoy many things as I dey do Jehovah work.”

9. Why we suppose praise young people wey dey Jehovah organization?

⁹ Many young people for Jehovah organization dey try well well, and we suppose praise dem. Dem dey put Jehovah first and dey try do wetin dem plan to use their life do for am. Dem dey enjoy their life, and still dey try follow wetin Jehovah talk for different different matter. E fit be matter about school, work, or whether dem go marry or get pikin. King Solomon talk for Bible sey: “Take all your mind trust Jehovah, . . . for everything wey you dey do, put Jehovah for mind and e go make your way smooth.” (Prov. 3:5, 6) Jehovah value young people wey dey serve am. E love dem well well. E dey protect dem, show dem how to live better life, and e dey bless dem.

PREPARE WELL TO PREACH

10. (a) Why preaching suppose dey among the things wey go dey our mind pass? (b) How we fit take sabi preach well?

¹⁰ Young person wey dey use im life do wetin Jehovah like, go put mind for preaching. Jesus Christ talk sey “na the good news dem go first preach for the whole world.” (Mark 13:10) Because the preaching work dey important, e suppose dey among the things wey dey our mind pass. You fit plan to dey preach more? You fit pioneer? But what if you no dey too enjoy preaching? And how you fit sabi preach well? Two things fit help you: (1) Prepare well, and (2) no tire to tell people wetin you don learn. If you do this one, the way you go take enjoy preaching fit surprise you.

11, 12. (a) How young people fit prepare to preach well? (b) How one young brother take use the chance wey e get to preach for school?

¹¹ The first thing wey you fit do na to prepare answer to question wey people for your school dey like to ask. For our jw.org website and our book, we get topic wey go help young people prepare how to answer that kind question. For example, dem fit ask you sey “Wetin bad if you sleep with person?” For the book Answer to 10 Question Wey Dey Worry Young People for Mind, e get one topic wey be “Wetin I Go Do if Person Dey Worry Me Make I Sleep With Am?” This topic go help you prepare your own answer.—Read 1 Peter 3:15.

¹² Use any chance wey you get take tell people for your school make dem check our website. Na wetin one young brother wey im name na Lucas do. Dem dey learn about different different religion for class. But Lucas come see sey the textbook wey dem dey use, talk some things about Jehovah Witness wey no correct. Even though sey small fear dey im body, e still tell the teacher to allow am correct wetin the book talk. The teacher come allow am. Lucas no only tell dem wetin e believe, but e still show our website to everybody for the class. The teacher come give the class homework to watch the video wey be Wetin You Go Do If Person Dey Find Your Trouble. Lucas really happy as e fit preach well.

13. Why we no suppose tire when problem come?

¹³ Even if problem come, no tire to dey do things wey go make your plan work. (2 Tim. 4:2) Katharina dey 17 years when e tell imself sey e go preach to everybody for where e dey work. One person curse am many times, but that one no make am tire. One of Katharina workmate come like the better character wey e get. E name na Hans. Because of this sister character, Hans come dey read our book. E study Bible with Jehovah Witness, and e baptize. But Katharina no know all this things because e no dey the same place with Hans again. Thirteen years later, one brother come give talk for Katharina congregation. For where Katharina and im family sitdown, dem come hear as dem call the brother wey want give the talk. Katharina really happy well well when e see sey the brother na Hans!

NO COMOT MIND FROM YOUR PLAN

14, 15. (a) If people want make you do wetin no good, wetin you suppose remember? (b) Wetin young people fit do make dem no follow their mate do bad thing?

¹⁴ Wetin you don dey learn for this topic? You don learn sey make you make up your mind to use your life serve Jehovah. This one mean sey, you go put mind for wetin you plan to use your life do for Jehovah. Many of your age-mate dey like to only enjoy theirself. And dem fit tell you make you join dem. The truth be sey, as time dey go, you go need to show dem sey you really serious for wetin you plan. No let anybody make you change your mind. After all, if you reach the motor park wey we talk about for the beginning of this topic, wetin you go do? You go just jump enter any bus wey you see just because, for your eye, the passengers dey enjoy theirself? You no go do like that.

¹⁵ E get many things wey you fit do if people want force you do wetin no good. For example, try run from anything wey fit make you do wetin God no like. (Prov. 22:3) And dey always think of wetin fit happen if you follow other people do bad thing. (Gal. 6:7) E still good make you gree sey you need person wey go advice you. If you dey carry body down, e go make you listen to wetin your papa and mama dey talk. And you go still take advice from other brothers and sisters wey get experience.—Read 1 Peter 5:5, 6.

16. How Christoph story take show sey e good to carry body down?

¹⁶ E get one young brother wey im name na Christoph. Because e no dey carry shoulder up, e follow the better advice wey dem give am. E no tey after e baptize, e come dey go do exercise for where dem dey do exercise. Other young people for the place come dey tell am to join their group dey do sport. Christoph tell one elder about the matter. The elder come tell am sey before e choose wetin e go do, make e think about wetin fit happen if e join. For example, the other young people fit dey like to show sey dem better pass other people. And Christoph fit come dey do like dem. But e still join the group. As time dey go, e come see sey fight fight dey the sport, and e fit even put person life for danger. E come go tell elders again, and dem use Bible take advice am. Christoph talk sey: “Jehovah send people to give me better advice. I listen to Jehovah, even though sey e tey small before I take the advice.” You dey really carry body down to follow better advice?

17, 18. (a) Wetin Jehovah want for young people? (b) Wetin dey pain some people wey don grow, and wetin you fit do make that kind thing no happen to you? Give example.

¹⁷ Bible talk sey: “Young man [or woman], dey happy as you still young, and make your mind dey sweet you as you young.” (Eccl. 11:9) True true, Jehovah want make you happy when you dey young. This topic don tell you sey make you no comot mind from wetin you plan to use your life do for Jehovah. And make you dey follow Jehovah advice for everything wey you plan to do. This one na one thing wey go really make you happy. Make you start to plan when you dey young. E no go tey, you go dey see how Jehovah go protect you, show you how to live better life, and bless you. Jehovah don give you plenty better advice for Bible. And make you follow the advice wey dey Ecclesiastes 12:1. E sey: “When you still young, remember your God, the Person wey high pass and wey make you.”

¹⁸ E no dey tey, before you know, young person don grow finish. Wetin dey pain many people wey don grow be sey, when dem dey young, dem no plan their life well. Some no even plan at all. But when you put mind for wetin you want use your life do for Jehovah, wetin you choose go really make you happy even when you don big. Na wetin happen to Mirjana be that. When this sister still dey young, e sabi sport no be small. Dem come tell am make e join people wey go do sport for Olympic. But e no go. Instead, e come start to dey pioneer. Thirty years don pass and the sister still dey full-time service with im husband. People for this world want make dem hear their name, make people dey praise dem, make dem fit dey control people, and dem want get plenty money. This sister talk sey this kind people no dey happy at all. E sey the best plan wey person fit get na to serve God and help other people to come serve am.

19. Why e good to put mind for wetin you want do for Jehovah, when you still dey young?

¹⁹ Young people wey dey Jehovah organization dey face problem today. But even with that one, dem still dey use their life serve Jehovah. We suppose dey praise dem. This young people dey try do wetin dem plan to use their life do for Jehovah. And the preaching work dey among the things wey dem value pass. Apart from that one, dem don tell theirself sey, nothing for this world go make dem comot mind from wetin dem don plan. Young people, make una know sey all this things wey una dey do no be waste. Your brothers and sisters for congregation love una and dem go support una. When una put everything wey una want do for Jehovah hand, una plan go get head.