Train Your Conscience With Laws and Wetin Fit Guide You for Bible
“I de think deep about the things wey you de tell me everytime.”—PS. 119:99.
1. Wetin be one thing wey e make human being better pass animal?
ONE thing make human being better pass animal. Wetin be that one? Na the conscience wey God give them. So Adam and Eve get conscience when God make them. We know this one because after they sin, they hide theirself make God no see them. This one show say their conscience worry them.
2. How our conscience fit be like steering? (Check the first picture.)
2 People wey they no train their conscience make e work well, be like ship wey e get bad steering. If person use this kind ship travel, e fit put the person for big trouble. When heavy breeze blow and the water begin move up and down, e go make the ship go another direction. But if the steering good, e fit help the captain of the ship direct the ship go the right way. Our conscience dey like that steering. E de direct us for the right way. This one go help us know the thing wey e good or bad as e dey for Bible. But for our conscience to direct us for the right way, we need to train-am.
3. Wetin fit happen if person no train e conscience for the right way?
3 When person no train e conscience well, the conscience no go warn the person make e no do bad thing. (1 Tim. 4:1, 2) E fit even make us believe say “bad thing good.” (Isa. 5:20) Jesus warn e disciples say: “Time de come when anybody wey e kill wuna go think say e don do God work.” (John 16:2) And for Bible, na so people wey they kill Stephen think. Other people don think like that too. (Acts 6:8, 12; 7:54-60) Some people wey they say them de serve God don do plenty bad things. They don kill people, and they believe say they do-am for God. But the truth be say, God hate the things wey they do! (Ex. 20:13) E clear say their conscience no direct them for the right way!
4. Wetin we fit do make our conscience de direct us for the right way?
4 Wetin we fit do make our conscience de direct us for the right way? The laws and things wey they fit guide us for Bible, fit help us. We “fit use-am teach, show mistake, correct, and show person how e go live the kind life wey God want.” (2 Tim. 3:16) Make we take time study Bible, think deep about wetin we de study, and do the things wey we learn. This one go make us de understand the things wey God want make we do. Then we fit dey sure say our conscience go direct us and we go de do the correct thing. Make we see how we fit use the laws and wetin fit guide us for Bible train our conscience.
TRAIN YOURSELF WITH LAW FOR BIBLE
5, 6. Wetin we go gain if we de follow law for Bible?
5 If we want make laws for Bible help us, we no go only read, or know them. But our love for the laws go de grow, and we go follow them. Bible talk say: “Hate bad thing and like good thing.” (Amos 5:15) But wetin go help us do that one? We go need to learn how to see things the way God de see them. For example, maybe you no de fit get better sleep. Then doctor tell you say make you de chop good food, de do exercise, and change some things for your life. When you follow the thing wey the doctor talk, you see say e work. You no go dey happy say the doctor help you?
6 Na so e still be with the laws wey God don give us. This laws de protect us so that sin no go put us for trouble. And e de help us live better life. For example, Bible talk say make we no de lie, de cheat, de thief, de put hand for sex matter wey God hate, de fight, and de put hand for things about demons. (Read Proverbs 6:16-19; Rev. 21:8) Na we de gain when we follow wetin Bible talk. And when we see the gain, our love for Jehovah and e law go strong pass as e dey before.
7. When we de read and think deep about the story for Bible, how e fit help us?
7 But our heart de sweet us say, we no need to first suffer before we know say e no good to do the thing wey Jehovah hate. We fit learn from the mistake wey people don do before. Bible get some examples. Proverbs 1:5 talk say: “Who get sense go listen and learn more.” True-true, the things wey God de teach us na the best. One way we fit learn this things na when we read and think deep about any story for Bible. For example, King David really suffer after e sin. E go sleep with Bath-sheba, the wife of another person. (2 Sam. 12:7-14) When we read this story and think deep about-am, we fit ask ourself say: ‘Wetin King David for do make e no suffer as e suffer because of wetin happen? If na me face that kind temptation, I for get the heart to run comot? I go run from the temptation like Joseph, or I go fall like David?’ (Gen. 39:11-15) When we take time think about the problem wey sin fit put us, we go fit get strong heart to “hate bad thing.”
8, 9. (a) Which work our conscience de do? (b) How things wey they fit guide us for Bible de direct our conscience?
8 Na true say we no de put hand for things wey Bible condemn. But, what if we face something for life and no law dey for Bible about-am? How we fit know wetin we go do wey e go make Jehovah happy? Na our conscience go help us, if we train-am the right way.
9 Because Jehovah love us, e don write things for Bible wey they go guide us. This things de direct our conscience so that e fit work well. God talk say: “Na me, Jehovah, be your God. Na me be the Person wey e de teach you for your own good. Na me be the Person wey e de show you the road wey you suppose to follow.” (Isa. 48:17, 18) E good make we take time think about the things wey they fit guide us for Bible. And make we allow them touch our heart and mind. When we do this one, we go fit correct and direct our conscience. And this one go help us choose the thing wey e go make God happy.
FOLLOW THINGS WEY THEY FIT GUIDE YOU FOR BIBLE
10. How the things wey they fit guide us for Bible fit help us? When Jesus de teach e disciples, how e use word wey e fit guide them?
10 When we understand the things wey they fit guide us for Bible, e go help us know the things wey God want make we do for any matter. E go still help us know the reason why God give us some kind laws. Na this one go help us choose good things so that Jehovah go happy with us. When Jesus de teach e disciples, e use word wey e fit guide them. E help them see wetin fit happen if person begin think or do some kind things. For example, e teach them say if them de think bad about person, e fit make them do the person bad. E still talk say if person de think about sex matter, e fit make the person go sleep with another person even if e don marry. (Matt. 5:21, 22, 27, 28) If we want make our conscience de work well, make we allow things wey they fit guide us for Bible de direct us. Then, we go fit do wetin go make Jehovah happy.—1 Cor. 10:31.
Mature Christian no go do wetin go worry the conscience of other people (Check paragraph 11, 12)
11. Which example show say people fit get different conscience?
11 For some kind matter, two Christians fit choose different things even if they use Bible train their conscience. E fit be about alcohol. Bible no talk say make we no drink. But e talk say make we no too drink, and make we no drink sotey we begin see things double-double. (Prov. 20:1; 1 Tim. 3:8) So if person no de drink too much, e mean say other things no dey wey the person suppose to put for mind? Other things dey. For example, e conscience fit allow make e drink. But e still need to think about other people their conscience.
12. How Romans 14:21 fit help us make we no do wetin go worry the conscience of another person?
12 Paul talk say make we no do wetin go worry the conscience of another person. E say: “E better make you no chop meat, or drink wine, or do anything wey e fit make your brother fall.” (Rom. 14:21) Somethings dey wey you get right to do, but e fit worry the conscience of your brother. You go dey ready to leave this things? Make we ready to leave them. Before some of our brothers begin serve Jehovah, them de drink anyhow. But now, they don tell theirself say they no want drink at all. You go like to do something wey e go make that your brother go back to the bad character wey e get before? (1 Cor. 6:9, 10) So if you invite any brother or sister come your house and e no want drink alcohol, abeg, make you no force the person.
13. If we want make people listen to the good news, which example we fit copy from Timothy?
13 E fit be say they circumcise Timothy when e dey around 20 years. Na e gree make they do-am, even though say e de pain. As e de go preach to Jew people, e no want make their conscience worry them say e never circumcise. Timothy behave like apostle Paul. (Acts 16:3; 1 Cor. 9:19-23) Like Timothy, you ready to leave some things so that you fit help other people?
‘DE WORK HARD TILL YOU MATURE’
14, 15. (a) Wetin person wey e want mature as Christian go do? (b) How mature Christian de treat people?
14 Every servant of Jehovah suppose to grow “pass the first things” wey they learn as Christian. They need to “work hard till [they] mature.” (Heb. 6:1) But this one no go fit just happen like that, even if we don dey the organization for many years. We need to “work hard.” So if we want be mature Christian, make we de work hard to learn more things and get deep sense. No wonder them de always encourage us make we read Bible everyday. (Ps. 1:1-3) Bible reading dey part of your plan? If you de read Bible everyday, you go understand the laws for Bible more. And you go grow for the way you de understand the things wey they fit guide us for inside Bible.
15 The law wey e dey important pass for Christians na law about love. Jesus tell e disciples say: “Na this one go make everybody know say wuna be my disciples, if wuna love wunaself.” (John 13:35) Bible call love “the law of king.” (Jas. 2:8) Paul talk say: “Person wey e get love don do everything wey the law talk.” (Rom. 13:10) We no surprise say love dey important because Bible tell us say “God na love.” (1 John 4:8) God de feel for people because e love them. But no be there the love end. God still de show love for the things wey e de do. John talk for Bible say: “Na this one make us know say God love us: E send e special Son come the world so that we fit get life through the Son.” (1 John 4:9) True-true, na because of the love wey God get for us, na e make God send Jesus come die for us. So make we de show say we love Jehovah, Jesus, brothers and sisters for congregation, and other people. And this one go really show say we be mature Christian.—Matt. 22:37-39.
The more we think how we fit use the things for Bible wey they fit guide us, the more our conscience go de direct us for the right way (Check paragraph 16)
16. As we de grow to be mature Christian, why our love for the things wey they fit guide us for Bible go de grow?
16 If you don de grow to be mature Christian, the more you go de value the things wey they fit guide us for Bible. Na so because we fit use law only when we face condition wey that law talk about. But we fit use word wey e fit guide us for Bible, when we face different-different condition. For example, small pikin no know the problem wey e dey if e follow bad friends. So e papa or mama go give law to protect the pikin. (1 Cor. 15:33) But as the pikin de grow, e go fit de think deep about the things wey they write for Bible to guide us. So even when law no dey, this things go help the pikin make correct decision more-more, when e de choose friends. (Read 1 Corinthians 13:11; 14:20.) The more we think how we fit use the things for Bible wey they fit guide us, the more our conscience go de direct us for the right way. And the more we go de understand wetin God want make we do for any condition.
17. Why we fit talk say we get the thing wey we need to choose wetin go make Jehovah happy?
17 We get everything wey e fit help us choose wetin go make Jehovah happy. If we de use laws and things wey they fit guide us for Bible, we go “ready and get everything wey [we] need for all kind of good work.” (2 Tim. 3:16, 17) So, make we de study Bible so that we go see things wey they fit guide us. This one go help us de understand ‘wetin God want make we do.’ (Eph. 5:17) Make we de use all the things wey the organization don give us. Things like, Watch Tower Publications Index, Research Guide for Jehovah’s Witnesses, Watchtower Library, Watchtower ONLINE LIBRARY, and JW Library app. This things go help us learn better things from our personal study and family worship.
WE GO GET GOOD THINGS WHEN WE USE BIBLE TRAIN OUR CONSCIENCE
18. Wetin we go gain when we follow the laws and wetin fit guide us for Bible?
18 Good thing dey for us when we follow laws and things wey they fit guide us for Bible. Psalm 119:97-100 talk say: “I really like your law! I de think deep about-am the whole day. The things wey you command de make me get sense pass my enemy. And na because them dey with me forever. I get deep sense pass all my teacher, because I de think deep about the things wey you de tell me everytime. I de do things with sense pass people wey they senior me. And na because I de follow wetin you tell me.” The more we de “think deep” about the laws and things for Bible wey they fit guide us, the more we go de do things with deep sense. And when we de train our conscience with the laws and wetin fit guide us for Bible, we “go grow to be like Christ.”—Eph. 4:13.