“Make Wuna Light Shine” Make People Praise Jehovah

1. Which special thing de make us dey happy?

WE DEY happy say plenty people de learn about Jehovah! For only last year, we conduct pass 10,000,000 Bible study. This one really show say we de make our light shine! Plenty people wey they want learn Bible still come our Memorial. And they learn about the kind love wey God show people when e send Jesus come die for us.​—1 John 4:9.

2, 3. (a) Which thing never fit make us stop to “shine like light”? (b) Because of wetin Jesus talk for Matthew 5:14-16, wetin we go talk about?

² For the whole world, servants of Jehovah de speak different-different language. Even with that one, we still de praise our Papa Jehovah as one family. (Rev. 7:9) No matter our language, or the place wey we de stay, all of us fit “shine like light for the world.”​—Phil. 2:15.

³ People de praise Jehovah because of our preaching work, because we dey as one, and because we always dey ready. For this topic, we go talk about how this three things fit make our light shine.​—Read Matthew 5:14-16.

HELP PEOPLE COME SERVE JEHOVAH

4, 5. (a) Apart from preaching, how we fit make our light shine? (b) Which good things fit come out when we behave well?

⁴ For Watch Tower of June 1, 1925, the topic “Light in the Darkness” talk say: “Nobody fit talk say e de do wetin the Lord talk for the remaining time . . . unless the person do e best make e light shine.” Then, the topic explain say: “The person go do this one when e de tell people the good news, and when e de do wetin God want.” E clear say, one way wey we de make our light shine na when we preach and teach people Bible. (Matt. 28:19, 20) Apart from that one, we fit use our fine character praise Jehovah. People de look us when we de preach. When we de smile and greet them well, e go help them know who we be and the kind God wey we de serve.

⁵ Jesus tell e disciples say: “When wuna enter any house, greet the people for the house.” (Matt. 10:12) For the area wey Jesus and the apostles preach, na normal thing for the people to allow strangers enter their house. But e no be like that for plenty place today. People fit fear or vex when they see person wey they no know for their door. But when you behave well, and you explain why you come, e fit make them relax. E good make we first smile. Brothers and sisters wey them de preach for public place with their book stand, don see say to smile good. When you de preach for this kind place, you fit see say people de want collect our book when you smile and greet them well. Your fine character fit still help you begin talk with them.

6. Wetin one old brother and sister do so that they fit continue to preach?

⁶ One husband and wife for England, wey they don old, no fit de preach from house to house like before because they no too strong again. So that their light go shine, they begin preach for outside their house. For one school wey e near their house, people de come carry their children when time reach. So this husband and wife arrange our books ontop table make this people fit see-am. Because many people want know more, they don collect the book Questions Young People Ask​—Answers That Work, Volume 1 and 2, and other brochures. One pioneer sister join this husband and wife de preach like this. The sister dey the same congregation with them. Because this sister de behave well, and the husband and wife really want help people, one man agree to study Bible.

7. How you fit help strangers for your area?

⁷ For our time, plenty people don run comot from their country go another country because of suffer. How you fit help this people learn about Jehovah and things wey e don promise? One thing wey you fit do first, na to learn one greeting for the language wey this people de speak. Our JW Language app fit help you do this one. You fit learn some things for the language wey you go talk so that they fit stop and listen to you. Then, you fit show them our jw.org website, and the different-different video and other books wey we get for their language.​—Deut. 10:19.

8, 9. (a) How our Life and Preaching meeting de help us? (b) How papa and mama fit help their children answer question for meeting?

⁸ Jehovah don give us the Life and Preaching Meeting so that our preaching go de better. The plenty things wey we de learn for this meeting de help us know how to make return visit and conduct Bible study pass before.

⁹ Plenty people wey they come our meeting, don see as our children de answer question for meeting. Papa and mama, make wuna teach wuna children make they try do pass just to read answer from book, or talk wetin person tell them. If you do this one, you de help them make their light shine. Because of the simple answer wey our children de give from their heart, some people don see say we get the truth.​—1 Cor. 14:25.

DE DO WETIN GO MAKE PEOPLE DEY AS ONE

10. How family worship fit help family dey as one?

¹⁰ Wetin be another thing wey you fit do make your light de shine? Make you de help your family and congregation dey as one. Make papa and mama de always do Family Worship. This one na one way wey they fit help their family dey as one. Plenty family de watch JW Broadcasting every month. After wuna watch-am finish, e good make wuna talk about wetin wuna learn. When wuna de do family worship, make you remember say one advice fit no work for all your children. Na so because some fit be small pikin and other ones fit dey around 13 to 19 years. Make sure say each person for your family see how they fit do the thing wey wuna learn.​—Ps. 148:12, 13.

11-13. How all of us fit help congregation dey as one, and help other people make they shine their light?

¹¹ Young people fit make congregation dey as one, and help the brothers and sisters make they shine their light. How they fit do this one? You fit make friend with old brothers and sisters. Ask them wetin don help them serve Jehovah for plenty years. You go learn better things from their story. And e go help you and them make wuna light de shine. All of us fit try de welcome visitors wey we see for our meeting. This one go help us dey as one, and e fit make visitors want join us make their light shine. One thing wey you fit do na to greet visitors with smile, and you fit even show them place to sit-down. Try make other people sabi them. Help them make they feel relax.

¹² If they tell you make you conduct meeting for field service, how you fit help old brothers and sisters? Give them better territory to preach. Sometimes, you fit pair them with young brothers or sisters so that they fit help them. Because they no too strong again, some of them no fit de preach like before. Show them say you care about them. True-true, whether person young or e don old, whether e don de serve Jehovah for many years or e just start, you fit help them make them preach with all their power.​—Lev. 19:32.

¹³ One person wey e write the book of Psalms, sing say: “E really good and e really sweet when brothers dey together as one!” (Read Psalm 133:1, 2.) Because Israel people dey together de serve Jehovah, they learn plenty good things from each other. E just be like anointing oil; e get fine smell and e good for skin. If you de do things with brothers and sisters, e go help us dey as one, and you go just be like that oil. If you don de do like this already, na good thing you de do. And make e no just be only for some brothers and sisters, or only for sometime.​—2 Cor. 6:11-13, ftn.

14. Wetin you fit do make your light shine for the place wey you de live?

¹⁴ How you fit do more make your light de shine so that your neighbor go fit learn truth for Bible? If you de talk and do good things, e fit draw them come learn the truth. So ask yourself say: ‘How my neighbors de see me? My house and compound dey clean? The way I arrange my things de make the area fine? I de help my neighbor?’ When you dey with brothers and sisters, try ask them how their good heart and better character don affect their family people, their neighbor, workmate, and schoolmate. E fit be say their story go help you.​—Eph. 5:9.

ALWAYS DEY READY

15. Why e dey important make we always dey ready?

¹⁵ If we want make our light de shine more-more, e good make we de remember the kind time wey we de live. Plenty times, Jesus tell e disciples say: “Make wuna always dey ready.” (Matt. 24:42; 25:13; 26:41) If we de think say “great tribulation” still far and e no go meet us, we no go use every chance wey we get preach the good news. (Matt. 24:21) Instead of our light to shine, e go de quench small-small sotey e fit even quench finish.

16, 17. Wetin you fit do so that you go always dey ready?

¹⁶ As the condition of this world de bad more-more, all of us need to always dey ready. We know say this world go end for the time wey Jehovah want-am. (Matt. 24:42-44) For now, e good make we dey patient, and always dey ready. Make you de read Bible everyday and de pray everytime. (1 Pet. 4:7) Some brothers and sisters don de serve Jehovah for years. Their light still de shine, and them still dey happy. Learn from their fine example. One of this fine example dey for Watchtower of April 15, 2012, page 18-21, under the topic “Seventy Years of Holding On to the Skirt of a Jew.”

¹⁷ Make you de do plenty work for Jehovah. Do good things for your brothers and sisters, and spend time with them. This one go make you get joy, and e go just be like say time de fly. (Eph. 5:16) For hundred years wey they don pass now, we don do plenty work for Jehovah. But today, we de even do work wey e pass that one. And na Jehovah de help us. We don make our light shine pass as we think say e fit even shine!

18, 19. How elders for congregation fit help us make we de serve Jehovah with all our power? Give example.

¹⁸ The sin wey we get for body no fit stop us make we no serve Jehovah the way e want. When we get this one for mind, e de make our faith strong. Jehovah don give us elders to help us. (Read Ephesians 4:8, 11, 12.) When elders come visit you again, use that time wey you go spend with them to learn from the fine things wey they go tell you.

¹⁹ One husband and wife for England get problem for their marriage. So, they call two elders make they come help them. The wife feel say the husband no de do e work to help the family serve Jehovah. The husband talk say e no really sabi teach, and e no de arrange for family worship everytime. The elders use the example of Jesus help this husband and wife. Jesus take care of the disciples and de always think about the things wey they need. The elders tell the husband make e do as Jesus do. They tell the wife make e dey patient. They still tell them how they fit work together so that they go fit do family worship with their two children. (Eph. 5:21-29) After, the elders praise the husband as e de try. They tell the husband make e no tire. And if e beg Jehovah for holy spirit, e go fit de do e work as head for family. The way this elders show this family love and support them, e help the family make they shine their light.

20. Which good thing go happen if you de make your light shine?

²⁰ Bible talk for Psalm 128:1 say: “Who de fear Jehovah and de do wetin God want, go dey happy.” Your light go shine if you de preach for people, de do everything to make people dey as one, and de always dey ready. This one go make you happy. Other people go see the good things wey you de do, and e go make many people praise Jehovah.​—Matt. 5:16.