If E Be Sey Na Small Pikin Open Door

If na small pikin come open door when we dey preach, make we tell am sey we want follow im papa or im mama talk. This one go show sey we respect dem. (Pr 6:20) If the small pikin tell us sey make we enter, no enter if im mama or im papa no dey house. E good make we go back another time.

If the pikin big small, maybe e dey around 15 to 19 years, e still good make we tell am sey we want see im mama or im papa. If dem no dey house, we fit ask am whether dem dey allow am choose the kind book wey e dey read. If e sey yes, we fit give am our book or tell am about our website wey be jw.org.

When we go back go visit the young person wey listen to us before, make we tell am sey we go like see im mama or im papa. This one go give us chance to tell dem wetin carry us come and show dem the better advice wey dey inside Bible wey dey make family happy if dem follow am. (Ps 119:86, 138) When we put their papa and mama for mind and show sey we respect dem, that one fit make dem want listen to us and e fit even give us chance to preach to everybody for the family.—1Pe 2:12.