LESSON 15
Why E Good Make You No Stop to Dey Learn About Jehovah?
1. Wetin you go gain if you no stop to dey learn Bible?
All the things wey you don learn for this book don make the love wey you get for Jehovah strong. If you want make this your love strong well well, make you still dey learn more about Jehovah. (1 Peter 2:2) Na only if you no stop to dey learn about Jehovah, you go get that life wey no go end.—Read John 17:3; Jude 21.
As you dey learn more about Jehovah, your faith go dey strong. This your faith go help you dey do wetin go make God happy. (Hebrews 11:1, 6) E go make you repent and your life go better.—Read Acts 3:19.
2. How other people fit gain from the things wey you don learn?
You and Jehovah fit be tight friend
When you hear better news, e dey sweet you for body to tell other people? As you dey learn Bible, you go come sabi how to dey use Bible tell other people about Jehovah.—Read Romans 10:13-15.
The way wey many people start to dey preach be sey, dem go first preach for their friend and family dem. But e good make you use your sense do am. Instead make you tell dem sey the way wey dem dey serve God no correct, tell dem about wetin God promise. No forget sey wetin people see you dey do na im dey touch dem pass the one wey you use your mouth talk.—Read 2 Timothy 2:24, 25.
3. If you and God na friend, wetin you go enjoy?
As you dey learn Bible, the love wey you get for God go dey strong. You go see as you go take near God well well. You go come be like one of im pikin.—Read 2 Corinthians 6:18.
4. How you go take continue to learn about Jehovah?
If you no stop to dey learn Bible, you go sabi how to do wetin God want. (Hebrews 5:13, 14) Tell any Jehovah Witness person make e come teach you Bible with one book wey dem dey call What Can the Bible Teach Us? You go see am sey as you dey learn from Bible, your life go dey better.—Read Psalm 1:1-3; 73:27, 28.
Jehovah na God wey dey happy, na im make this good news come from am. If you dey near people wey dey serve God, e go make you dey near God well well. (Hebrews 10:24, 25) As you dey try to do wetin God want, e mean sey you want that life wey no go end. The best thing wey you fit do for this life na to near God.—Read 1 Timothy 1:11; 6:19.