Wetin You Know About Your Enemy?

1. After Adam and Eve sin, wetin Jehovah tell us about our enemy?

ADAM really know say snake no de talk. So maybe Adam understand say na one angel use snake talk to Eve. (Gen. 3:1-6) Adam and Eve no know this angel well. But Adam decide to follow this stranger, and no obey the command from e Papa. (1 Tim. 2:14) But just after that one, Jehovah begin tell us things about this wicked enemy. E still promise us say small time, e go destroy this enemy. Jehovah talk again say, for some time, this wicked angel go bring trouble for people wey they love God.​—Gen. 3:15.

2, 3. Wetin fit be the reason why Jehovah no tell us plenty things about Satan before the Messiah come?

² Jehovah get sense, na e make e no tell us the real name of that wicked angel.a Na after 2,500 years don pass before Jehovah tell us something about that enemy. (Job 1:6) The title wey Bible call this enemy na “Satan,” and e mean “Resister” (person wey e no de gree). Na only three place this title dey for inside Hebrew Scriptures, for 1 Chronicles, Job, and Zechariah. Why Bible no too talk about this enemy before the Messiah come?

³ For Hebrew Scriptures, Jehovah no too talk about Satan and the things wey Satan de do. E fit be say na because Jehovah no want make people too take Satan as important. Wetin be the main reason why they write the Hebrew Scriptures? Na because Jehovah want make this part for Bible help people, so that they go fit sabi and follow the Messiah when e come. (Luke 24:44; Gal. 3:24) From the time wey the Messiah come, Jehovah don tell us plenty things about Satan and other wicked angels.b Jehovah use Jesus and e disciples to tell us. This one really good because Jehovah go use Jesus and the anointed Christian destroy Satan and everybody wey join Satan.​—Rom. 16:20; Rev. 17:14; 20:10.

4. Why we no need to fear Satan?

⁴ Apostle Peter write say Satan the Devil be like “lion wey e de shout.” Apostle John write say Satan na “snake” and “dragon.” (1 Pet. 5:8; Rev. 12:9) But make we no fear Satan. Some things dey wey e no fit do. (Read James 4:7.) Jehovah, Jesus, and the good angels dey with us. They go help us so that we go fight and win Satan. But we still need to know the answer for this three important question: (1) Which things Satan get power to do? (2) How e de try to use e power control people? (3) Which things e no get power to do? As we de answer this question, we go talk about lessons wey we fit learn.

WHICH THINGS SATAN GET POWER TO DO?

5, 6. Why the government for this world no fit remove the problem wey people de face?

⁵ Satan de control plenty bad angels. Before the heavy rain fall for time of Noah, Satan fool some of the angels make they sleep with women for this earth. Bible talk about this one when e talk say the dragon drag some stars from heaven. (Gen. 6:1-4; Jude 6; Rev. 12:3, 4) All that angels decide say they no go be part of the family of God. So na Satan begin control them. But this wicked angels or demons no just de do things anyhow, Satan organize them. Just like the Kingdom of God, Satan don make e own fake government and na e be the king of that government. E don arrange this demons, wey we no fit see, make they form different-different governments. And e give them power to rule the world.​—Eph. 6:12.

⁶ Satan de use this demons wey e don organize to control all government for this earth. We know this one because Bible talk say when Satan show Jesus “all the kingdom for this earth,” e tell Jesus say: “I go give you all this power and their glory, because they don give me, and I go give anybody wey I want.” (Luke 4:5, 6) But even as Satan de control the world, plenty government still de do some good things for their people. Even some rulers de try to help people. But no government for this world, or ruler, fit remove the problem wey people de face.​—Ps. 146:3, 4; Rev. 12:12.

7. Apart from government, how Satan de use fake religion and the business of this world? (Go check the first picture.)

⁷ No be only government Satan and demons de use. They still de use fake religion and the business of this world to fool the whole world. (Rev. 12:9) Satan de talk lie about Jehovah through fake religion. E no even want make people know say God get name. (Jer. 23:26, 27) Plenty people really like to worship God. But Satan don use lie fool them, and them de worship demons instead of God. (1 Cor. 10:20; 2 Cor. 11:13-15) Satan de use business fool people. For example, this world de make people believe say, if person get money and gather plenty property, e go dey happy. (Prov. 18:11) Because people believe this lie, they don put money as number one thing for their life instead of God. (Matt. 6:24) And if they love God before, small-small the love go die.​—Matt. 13:22; 1 John 2:15, 16.

8, 9. (a) The thing wey Adam, Eve, and the wicked angels do, teach us which two important lessons? (b) When we know the things wey Satan get power to do, how that one de help us?

⁸ The thing wey Adam, Eve, and the wicked angels do, teach us two important lessons. One, na only two side dey, and we must choose one. We go decide whether na God we go serve or na Satan we go follow. (Matt. 7:13) Two, the thing wey Satan de give no de last. For example, Adam and Eve get the chance to decide the thing wey e good or bad for themself. The demons too succeed to control the governments for this world. (Gen. 3:22) But the thing wey Satan de give de always bring trouble for the end, no matter the gain wey person think say e dey.​—Job 21:7-17; Gal. 6:7, 8.

⁹ When we know the things wey Satan get power to do, how that one go help us? We go respect the governments the way Jehovah want. E go still help us make we continue to preach the good news. (1 Pet. 2:17) Jehovah want make we respect the laws wey government give us, if the laws no dey against the laws for Bible. (Rom. 13:1-4) We know say e no good make we support any party for politics, or support any man as our leader. (John 17:15, 16; 18:36) Satan de talk plenty lie about our God, and e want make people believe say God no get name. Na e make we really want teach people the truth about our God. We de happy say we de use the name of our God and people de call us Jehovah Witness. When we love God, the blessing wey we de get, pass anything wey money or property fit give us.​—Isa. 43:10; 1 Tim. 6:6-10.

HOW SATAN DE USE E POWER CONTROL PEOPLE?

10-12. (a) How Satan catch some angels? (b) The thing wey the wicked angels do, de teach us which lesson?

¹⁰ Satan de use different-different style to make people do the things wey e want. For example, e de use the things wey people like to fool them. E still de try to make people fear so that they go do wetin e want.

¹¹ Make we talk about the trap wey Satan use catch some angels. E dey clear say Satan take time study this angels. E notice how e go take fool them so that they go do the thing wey e want. E use women set trap for the angels, and the trap catch them. They sleep with the women and they born children for them. This children be like giant, and them de treat people the way they like. (Gen. 6:1-4) E fit be say Satan promise them say, if this women born for them, they go fit control people for this earth. Maybe Satan try this one so that the thing wey Jehovah talk about ‘the pikin wey the woman go born’ no go happen. (Gen. 3:15) But we know say Jehovah destroy the plan wey Satan and the wicked angels get. Jehovah use heavy rain destroy all that wicked children wey the angels born.

¹² Which lesson we learn from this story? Make we no ever think say the trap wey Satan de use no fit catch us. For example, e de use sex wey God no like take catch people. And e de make people feel say they better pass other people. Satan catch some angels, even as they don live with Jehovah for heaven for many years. They allow bad thing grow inside their heart. We fit don de serve Jehovah for plenty years for e organization. But, even with that one, bad thing fit grow inside our heart. (1 Cor. 10:12) For this reason, e good make we de check our heart all the time. This one go help us remove anything about sex wey God no like, and we no go de think say we better pass other people.​—Gal. 5:26; read Colossians 3:5.

13. Which other trap Satan de use, and wetin go help us no fall for the trap?

¹³ Another trap wey Satan de use na things about demons. Today, no be only fake religion Satan de use make people put hand for things wey they concern demons. E still de use film, music, game, and picture to make people de like things like magic, witchcraft, and other things about demons. But wetin go help us so that e trap no go catch us? Each person must train e conscience so that e go de do wetin God want. (Heb. 5:14) We no go expect make the organization tell us the kind things wey we go watch, and the one wey we no go watch. But, we go make correct decision if we follow the advice wey apostle Paul give for Romans 12:9. E talk say make our love for God “no be for mouth.” Make we ask ourself this question: ‘The film, music, game, and picture wey I de look de show say I really love God? If my Bible students or return visits see the kind film or music wey I de watch, they go believe say I de do wetin I de teach?’ If the things wey we de talk and do match with the things wey God want, e go hard make Satan catch us with e trap.​—1 John 3:18.

14. Wetin Satan fit use attack us, and wetin go help us?

¹⁴ Another thing wey Satan de do so that we go leave Jehovah, na to attack us. For example, e fit use government to stop our preaching work. E fit use our friends for school, or people wey we de work with. They fit de laugh us because we de try to live our life the way Jehovah want. (1 Pet. 4:4) E fit still use our family member put fear for our heart. Because they love us, they fit talk say e no good make we de go our meeting. (Matt. 10:36) Wetin go help us? First, make we expect say Satan go bring us this kind direct attack. (Rev. 2:10; 12:17) And make we no forget the number one reason why Satan de give us problem. E talk say we de serve God only when things dey fine. E say if things hard, we no go serve God again. (Job 1:9-11; 2:4, 5) Which other thing go help us? Make we de beg make Jehovah give us power. Remember say Jehovah no go ever leave us.​—Heb. 13:5.

WHICH THINGS SATAN NO GET POWER TO DO?

15. If we no really want do something, Satan fit force us? Explain.

¹⁵ If people no really want do something, Satan no fit force them. (Jas. 1:14) Plenty people no even know say them de do wetin Satan want. But after they don learn the truth, they go choose who they go serve. (Acts 3:17; 17:30) If we don ready to do wetin God want, Satan no fit stop us.​—Job 2:3; 27:5.

16, 17. (a) Which other things dey wey Satan and the demons no fit do? (b) Why we no need to fear when we de pray loud?

¹⁶ Other things dey wey Satan and the demons no fit do. For example, if person get something for mind, Bible no tell us say Satan and the demons get power to know. Na only Jehovah and Jesus get that kind power. (1 Sam. 16:7; Mark 2:8) So, what if we de talk or pray, and other people fit hear? We go fear say Satan or the demons go hear wetin we talk and use-am bring us trouble? This one no fit happen. Why we talk so? We no de fear when we de do good things as we de serve Jehovah, just because Satan fit see us. So make we no fear to pray loud just because Satan fit hear. Bible even get plenty example about how servants of God pray loud. We no read for any place say they fear say Satan go hear wetin they talk. (1 Ki. 8:22, 23; John 11:41, 42; Acts 4:23, 24) Make we try live our life the way God want. If we do this one, we fit dey sure of one thing: Jehovah no go ever allow make Satan do us anything wey go make us no get everlasting life.​—Read Psalm 34:7.

¹⁷ E good make we know things about our enemy, but make we no fear the enemy. Even as we get sin for our body, we fit win Satan because Jehovah go help us. (1 John 2:14) If we no gree for Satan, e go run from us. (Jas. 4:7; 1 Pet. 5:9) But e be like say na young people Satan de like to catch pass other people. Wetin they fit do so that they go win Satan? The next topic go answer this question.