De Breef aun de Galata
6 Breeda, wan doa mol wäa eene orrajchte Rechtunk nemt, onen daut entowoaren, dan sell jie, waut vom Jeist jeleit woaren, dänjanjen met eene ruje Enstalunk trajchtstalen. Oba paust no junt selfst opp, daut jie nich uk aufjeprooft* woaren. 2 Halpt junt wieda unjarenaunda, june Lausten droagen, un opp dee Wajch woa jie Christus sien Jesaz nokomen. 3 Wiels wan doa irjentwäa denkjt, daut et met am waut es, un daut oba nuscht met am es, dan schmäat dee sikj selfst aun. 4 Oba jieda eena saul siene ieejne Woakjen unjasieekjen un dan woat dee Uasoak haben, sikj doaräwa to freien, waut hee selfst jedonen haft, onen sikj met eenen aundren to vejlikjen. 5 Wiels jieda eena woat siene ieejne Veauntwuatunk droagen.
6 Buta daut saul jieda eena, dän daut Wuat jelieet woat*, met dänjanjen aulahaunt Goodet deelen, dee am lieet*.
7 Schmäat junt nich selfst aun: Gott kaun eena nich teischen. Wiels daut, waut een Mensch seit, daut woat dee uk arnten. 8 Wiels wäa siene sintelje Natua* nojeit, wan dee seit, dee woat von siene sintelje Natua* Vedoawen arnten. Oba wäa doa dän Jeist nojeit, wan dee seit, dee woat von dän Jeist daut eewje Läwen arnten. 9 Doawäajen well wie nich opphieren, Goodet to doonen, wiels wan wie nich oppjäwen*, dan woa wie arnten, wan de Tiet ieescht doa es. 10 Soo dan, well wie aule Menschen Goodet doonen un besonda onse Gloowesbreeda, soo lang aus wie de Jeläajenheit* haben.
11 Kjikjt mol, met waut vonne groote Latren ekj junt met miene ieejne Haunt jeschräwen hab.
12 Aul dee, waut bloos de Menschen jefaulen wellen, wellen junt bat doa brinjen, junt beschnieden to loten. Dee doonen daut bloos, daut see wäajen Christus sienen Liedenspol* nich vefolcht woaren. 13 Wiels mau rajcht dee, waut sikj beschnieden loten, hoolen sikj nich aun daut Jesaz. Oba dee wellen, daut jie junt beschnieden loten, soo daut see doamet puchen kjennen, waut aun junen Kjarpa jedonen wort. 14 Oba ekj well mie kjeenmol met waut brow doonen, buta met onsen Harn Jesus Christus sienen Liedenspol*, wuaderch de Welt fa mie jestorwen es un ekj fa de Welt. 15 Wiels beschnäden sennen es nich wichtich un onbeschnäden sennen uk nich, oba een niea Mensch woaren es wichtich. 16 Muchten aul dee, waut ordentlich läwen un sikj no dise Räajel rechten, aulsoo Gott sien I̱srael, Fräd un Metleet haben.
17 Von nu aun saul mie kjeena mea trublen, wiels ekj droag aun mienen Kjarpa Brentieekjens, waut doa bewiest, daut ekj Jesus sien Sklow sie.
18 Mucht jie onsen Harn Jesus Christus sien grootet Metleet* haben, wiels jie wiesen, daut jie eene goode Enstalunk haben. Amen.