De ieeschta Breef aun de Korinta
8 Nu woa ekj junt äwa daut Äten schriewen, waut de Aufjetta jeopfat es: Wie aula weeten om dise Sach om. Oba bloos väl to weeten, moakt eenem stolt, oba Leew but aundre opp. 2 Wan doa wäa jleeft, daut hee fa aules de Auntwuat haft, kaun hee de Sach oba nich soo vestonen, aus hee dee wudd sellen vestonen. 3 Oba wan doa wäa Gott leeft, om dän weet Gott om.
4 Un wan daut om Äten jeit, waut de Aufjetta jeopfat es: Wie weeten, daut een Aufgott nich werkjlich een Gott es, un daut doa sestkjeen Gott es aus eena. 5 De Menschen sajen, daut et een deel Gotts* jeft; entwäda em Himmel ooda oppe Ieed. Doawäajen sent doa fa Menschen to beseenen een deel Gotts un Haren. 6 Oba fa ons es doa bloos een Gott, de Voda. Aules kjemt von am un wie läwen fa am. Un doa es bloos een Har, Jesus Christus. Aules es derch am un wie haben daut Läwen derch am.
7 Oba nich aule Menschen vestonen dit. Eenje haben verhäa Aufjetta aunjebät. Wan dee dan nu soont äten, waut eenen Aufgott jeopfat es, dan seenen dee daut soo, aus wan daut met dän Aufgott to doonen haft. Un dan baudat dee daut Jewessen, wäajen daut schwak es. 8 Oba daut Äten brinjt ons nich noda no Gott. Wie sent nich schlajchta auf, wan wie nich äten, uk nich bäta auf, wan wie äten. 9 Oba siet väasechtich, daut jun Rajcht to entscheiden nich irjentwoo dee tofaulbrinjt, waut doa schwak sent. 10 Wan du uk weetst, daut de Aufjetta nuscht daugen, kunn daut oba sennen, daut eena, dee een schwaket Jewessen haft, die sitt en eenen Tempel äten, waut fa eenen Aufgott es. Dan kunn dän daut bat doa brinjen, daut dee waut at, waut de Aufjetta jeopfat es. 11 Wan du uk weetst, daut doa nuscht met orrajcht es, dit Äten to äten, brinjst du oba doaderch dän schwakren Mensch sienen Gloowen togrunt. Denkj doaraun: Dauts dien Brooda, fa dän Christus jestorwen es. 12 Wan du opp dise Wajch jäajen dienen Brooda sindichst un dän sien schwaket Jewessen schotst, dan sindichst du jäajen Christus. 13 Doawäajen, wan Äten mienen Brooda tofaulbrinjt, dan woa ekj niemols mea Fleesch äten, soo daut ekj dän nich tofaulbrinj.