Ieeschte Petrus
4 Wäajen Christus aus Mensch* jeläden haft, sell jie uk doaropp schaufen*, deeselwje Enstalunk to kjrieen, waut hee haud. Wiels wäa aus Mensch* jeläden haft, dee haft de Sinden tochjeloten, 2 soo daut dee de äwaje Tiet, wua dee aus Mensch* läft, nich mea läft, om menschelje Wenschen notogonen, oba om Gott sienen Wellen to doonen. 3 Wiels de Tiet, waut vebie es, es jenuach, daut jie no de Velkja äaren Wellen jeläft haben, aus jie en eentwajch een sinteljet, schomplooset Benämen* hauden; jun onkontroldet Velangen nojinjen; too sea drunken; utjehoakte Fasten* hauden; toop wieren toom supen un jesazloose Aufjettarie dreewen. 4 De Velkja kjennen daut nich vestonen, daut jie nich lenja bie äa schlemmet, dwautschet Läwen metmoaken, un doawäajen räden dee schlajcht äwa junt. 5 Oba dee Menschen woaren sikj ver dänjanjen veauntwuaten motten, dee doa reed es, de Läwendje un de Doodje to rechten. 6 Dit es, wuarom de goode Norecht uk de Doodje bekauntjemoakt wort, soo daut dee fa Gott to beseenen em Jeisteljen kjennen läwendich sennen*, wan dee uk no daut Butaliche jerecht woaren*, soo aus Menschen daut auljemeen doonen.
7 Oba daut Enj von aules es dicht bie jekomen. Doawäajen doot kloa denkjen un siet junt doaräwa em Kloaren*, woo wichtich daut es to bäden. 8 Äwa aules habt groote Leew eena fa dän aundren, wiels Leew dakjt een deel Sinden too. 9 Siet unjarenaunda oppnäment onen to grunzen. 10 Doano waut vonne Fäichkjeit jieda eena jekjräajen haft, saul dee dee brucken toom aundre deenen, soo aus feine Aunjestalde* äwa Gott sien grootet Metleet*, waut opp veschiedne Wäaj jewäsen woat. 11 Wan doa wäa rät, dan saul dee soont räden, waut eene Norecht von Gott es. Wan doa wäa deent, dan saul dee daut soo doonen aus eena, waut von de Krauft aufhenjich es, waut Gott jeft, soo daut Gott en aule Stekjen derch Jesus Christus veharlicht woat. De Harlichkjeit un Macht sent siene fa emma un eewich. Amen.
12 Leewe Breeda, wundat junt nich äwa de Fia-Proowen, waut jie derchgonen, soo aus wan junt wudd waut Framdet passieren. 13 Enne Städ daut sell jie junt wieda freien, wäajen jie derch dautselwje Lieden gonen aus de Christus, soo daut jie junt kjennen freien un äwafroo sennen, äwadäm daut Christus siene Harlichkjeit openboa woat. 14 Wan junt dommjesajcht* woat wäajen Christus sienen Nomen, dan sent jie mootich, wäajen de Jeist von de Harlichkjeit, jo, Gott sien Jeist, opp junt es.
15 Oba kjeena von junt saul lieden, wäajen daut een Merda ooda een Stäla es ooda eena, waut Schlajchtet deit, ooda sikj mank aundre äare Sachen menjt. 16 Oba wan doa wäa aus een Christ lieden mott, dan doaf dee sikj nich schämen, oba dee saul wieda Gott veharlichen, doaderch daut hee aus een Christ läft. 17 Wiels nu es de bestemde Tiet, daut daut Jerecht bie Gott sien Hus aunfangt. Wan daut bie ons daut ieeschte aunfangt, woo woat daut dan met dee utkomen, waut Gott siene goode Norecht nich jehorchen? 18 “Un wan daut fa dän Jerajchten Mensch aul schwoa es, daut dee kaun jerat woaren, waut woat dan met dän Gottloosen un Sinda passieren?” 19 Soo, aul dee, waut lieden, wäajen dee Gott sienen Wellen doonen, sellen sikj* wieda onsen truen Schepfa äwajäwen, äwadäm daut see Goodet doonen.