De ieeschta Breef aun de Korinta

4 De Menschen sellen ons aus Christus siene Deena seenen, waut äwa Gott siene heilje Jeheemnisen* aunjestalt* sent. 2 Von soone aunjestalde Deena* woat velangt, daut dee tru sent. 3 Ekj jäw doa nich väl om rom, aus ekj von junt ooda von een menscheljet Jerecht unjasocht woa toom seenen, aus ekj waut veschulcht hab; wiels ekj unjasieekj je mie nich mol selfst. 4 Ekj weet von nuscht, met waut ekj mie veschulcht hab. Oba dauts nich een Bewies, daut ekj jerajcht sie, wiels Jehowa* es deejanja, waut mie unjasieekjt*. 5 Doawäajen doot kjeenem rechten bat de bestemde Tiet. Wan de Har kjemt, dan woat dee daut Vestoakne, waut em Diestren es, bedachen, un dee woat daut opdakjen, waut en jieda eenem sien Hoat es. Dan woat jieda eena von Gott jeloft woaren, doano aus dee vedeent haft.

6 Breeda, ekj hab junt dit von mie un von Apo̱llos jesajcht toom junt halpen vestonen, om waut daut jeit. Derch ons Väabilt sell jie dise Räajel lieren: “Got nich wieda aus daut, waut jeschräwen es.” Wan jie junt aun dise Räajel hoolen, dan woa jie nich stolt woaren un eenen Mensch fa bäta talen aus dän aundren. 7 Wiels waut moakt daut, daut jie aundasch sent aus aundre? Waut hab jie, waut jie nich jekjräajen haben? Wan Gott junt daut jejäft haft, wuarom puch jie dan, aus wudd jie daut derch june ieejne Krauft jekjräajen haben?

8 Hab jie aul aules, waut junt fält? Sent jie aul rikj? Hab jie aul aunjefongen, onen ons aus Kjennichs to rejieren? Ekj wensch mie opp iernst, daut jie aul hauden aunjefongen, aus Kjennichs to rejieren, soo daut wie uk wudden met junt toop kjennen aus Kjennichs rejieren. 9 Wiels mie lat daut soo, aus wan Gott ons aus Apostel haft utjestalt aus de latste Grupp, waut toom Doot veuadeelt es. Wiels aule beoobachten ons*: de Enjel uk de gaunze Welt. 10 Ons woat wäajen Christus fa onkluak jetalt, oba jie jleewen, daut jie wäajen Christus weis sent. Ons lat schwak, oba junt lat stoakj. Junt woat Iea jejäft, oba ons woat veacht. 11 Wie motten gaunz bat nu noch emma hungren, darschten un haben prost auntotrakjen. Ons woat vekjielt un wie haben kjeen Tus. 12 Un wie schaufen schwoa met onse ieejne Henj. Un wan se ons beleidjen, dan säajen wie dee. Wan se ons vefoljen, dan hool wie daut jeduldich ut. 13 Wan äwa ons utjeholt woat toom ons eenen schlajchten Nomen moaken, dan räd wie leeftolich trigj. Bat disen Dach sent wie de Welt äa Mell; daut Aufgank von aules.

14 Miene leewe Kjinja, ekj schriew junt aul dit nich, daut jie junt sellen schämen, oba toom junt waut oppe rajchte Wajch lieren. 15 Wan jie mank Christus siene Jinja veleicht uk 10,000 haben, waut fa junt oppkomen, hab jie oba secha nich een deel Vodasch. Soo aus een Voda hab ekj junt de goode Norecht jelieet un ekj hab junt jelieet Christus Jesus notofoljen. 16 Doawäajen fodda ekj junt opp: Nämt junt mie toom Väabilt. 17 Dauts, wuarom ekj junt Timotä̱us schekj, wiels hee es mien leewet un truet Kjint em Harn. Hee woat junt denkjen halpen, opp waut vonne Wajch ekj daut doo, waut Christus Jesus haben well; krakjt soo aus ekj aundre daut aulawäajen en jieda Vesaumlunk lia.

18 Eenje von junt sent voll Stolt, soo aus wudd ekj nich no junt komen. 19 Oba em Korten woa ekj komen, wan Jehowa* daut well. Dan woa ekj nich bloos enwoaren, waut dise stolte Pucha räden, oba uk von de Krauft, waut doa hinjastakjt. 20 Wiels Gott sien Kjennichrikj jeit nich om räden, oba om Krauft. 21 Waut well jie leewa? Saul ekj no junt komen met eenen Stock* ooda met Leew un met eene ruje Enstalunk?